ವಿಧಾನಸಭೆ ಅಧಿವೇಶನೊಡ್ ತುಲು ಅಧಿಕ್ರತ ಮಲ್ಪುಲೆ: ತುಲುವೆರೆ ದುನಿಪು “ಟ್ವೀಟ್ ತುಳುನಾಡ್” ಟ್ವಿಟ್ಟರ್ ಅಭಿಯಾನ

ಸೆಪ್ಟೆಂಬರ್ 13 ಡ್ದ್ 24 ತಾರೀಕುಮುಟ್ಟ ನಡಪುನ ವಿಧಾನಸಭೆತ್ತ ಅಧಿವೇಶನೊಡ್ ತುಲುಬಾಸೆನ್ ಅಧಿಕ್ರತ ಮಲ್ಪೊಡ್ ಪಂಡುದ್ ಟ್ವೀಟ್ ತುಲುನಾಡ್ ಟ್ವಿಟ್ಟರ್ ಅಭಿಯಾನ ನಡಪರೆಗುಂಡ್.ಉಂದುವೇ ಸನಿಯಾರ ಸೆಪ್ಟೆಂಬರ್ 4 ತಾರೀಕುದಾನಿ ನಡುರಾತ್ರೆಗ್ 12 ಗಂಟೆಡ್ದ್ ಸೆಪ್ಟೆಂಬರ್ 5 ತಾರೀಕ್ 11.59 ಮುಟ್ಟ ಈ ಟ್ವೀಟ್ ಅಭಿಯಾನ ನಡಪರೆಗುಂಡ್.
ಜೈ ತುಳುನಾಡ್ ಬೊಕ್ಕ ತುಲುನಾಡುದ ಬೇತೆ ಬೇತೆ ತುಳುಸಂಘಟನೆಲೆನ ಒತ್ತುಸೇರಿಗೆಡ್ ನಡಪರೆಗುಪ್ಪುನ ಈ ಅಭಿಯಾನ #TuluOfficialinKA_KL ಬೊಕ್ಕ  #SpeakUpForTulu  ಪನ್ಪಿನ ಹ್ಯಾಶ್ ಟ್ಯಾಗ್ ಮುಖೇನ ನಡಪರೆಗುಂಡ್.ಕರಿನ ಸರ್ತಿ   ನಡತಿನ ಟ್ವಿಟ್ಟರ್ ಅಭಿಯಾನೊಡ್ 4.5 ಲಕ್ಷ ಟ್ವಿಟ್ ಆತುಂಡ್. ಈ ಸರ್ತಿ ಅವ್ವೆಡ್ದ್ ಜಾಸ್ತಿ ಟ್ವಿಟ್ ಆಪಿನ ಸಾಧ್ಯತೆಲು ಉಂಡು.

ಈ ಸರ್ತಿ ಕನ್ನಡ ಬೊಕ್ಕ ಸಂಸ್ಕ್ರತಿ ಇಲಾಖೆದ ಸಚಿವೆರ್ ನಮ್ಮ ತುಳುನಾಡುದಾರೇ ಆಯಿನೆಡ್ದಾವರ, ಅತ್ತಾವಂದೆ ಅರೆಗ್ ತುಲುಬಾಸೆದ ಬಗ್ಗೆ ಮೋಕೆ ಗೌರವ ಇತ್ತಿನೆಡ್ದಾವರ ಖಂಡಿತವದುಲಾ ಈ ಸರ್ತಿ   ತುಲು ಬಾಸೆ ರಾಜ್ಯೊಡ್ ಅಧಿಕ್ರತ ಬಾಸೆ ಆವ್ ಪಂಡುದ್ ತುಲುವೆರ್ ಬಾರೀ ನಿರೀಕ್ಷೆಡುಲ್ಲೆರ್.ಸಚಿವೆರಾಯಿನ ಸುನೀಲ್ ಕುಮಾರ್ಲಾ ತುಲುವೆರೆಗ್ ಬೆಇರಿಬಲ ಆದ್ ಉಂತುವೆ ಪನ್ಪಿನ ಭರವಸೆಲಾ ಈ ನಿಲೆಟ್ ಕೊರ್ತೆರ್.

ಅಂಚೆನೇ ಕರ್ನಾಟಕ ತುಳುಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರಾಯಿನ ದಯಾನಂದ ಕತ್ತಲ್ಸಾರ್ ಮೆರೆನ ಮುತಾಲಿಕೆಡ್ ತುಳುಸಾಹಿತ್ಯ ಅಕಾಡೆಮಿದ ಮಾತಾ ಪದುಕೆರೆನ ಸಹಕಾರೊಡ್ ತುಳುಬಾಸೆನ್ 8ನೇ ಪರಿಚ್ಚೇದೊಗ್ ಸೇರ್ಸಾವರೆಗ್ ಆಫೀಶಿಯಲ್ ತಯಾರಿಲು, ಐತನೇ ಆಯಿನ ಚಿಂತನೆಲು ಬಾರೀ ಬಿರುಸುಡ್ ಆವೊಂದುಂಡ್.
ಅಂಚಾದ್ ಈ ಸರ್ತಿ ಆಂಡಲಾ ತುಳುವಪ್ಪೆನ ಮೋನೆಡ್ ತೆಲಿಕೆನ್ ತೂಪಿನ ಯೋಗ ತುಳುವಪ್ಪೆ ಜೋಕುಲೆಗ್ ತಿಕ್ಕುವಾ ಪಂಡುದ್ ಕಾತುದ್ ತೂವೊಡ್.