ಉಡುಪಿದ ಸಿಟಿ ಬಸ್ಟ್ಯಾಂಡ್ ಗ್ ಕ್ರಾಂತಿವೀರೆ ಸಂಗೊಳ್ಳಿ ರಾಯಣ್ಣನ ಪುದರ್ ದೀಯೊಡ್ ಪಂಡುದ್ ಸಂಗೊಳ್ಳಿ ರಾಯಣ್ಣ ಅಭಿಮಾನಿ ಬಳಗದಕುಲು ಉಡುಪಿ ನಗರಸಭಾಧ್ಯಕ್ಷೆರೆಗ್ ಮನವಿ ಕೊರ್ತೆರ್.ಆಂಡ ಮನವಿ ಕೊರಿನ ಬೆರಿಕೇ ಪುದರ್ ದೀಯರೆಗ್ ಆಪುಜಿ.ನಿಯಮದ ಪ್ರಕಾರ ಅವ್ವ್ ಪುದರ್ ದೀಯರೆಗ್ ಬೇತೆ ಎರೆನಲಾ ಆಕ್ಷೇಪ ಉಂಡಾ ಕೇಂಡುದ್ ಪತ್ರಿಕೆಡ್ ಪ್ರಕಟನೆ ಕೊರ್ಪೆರ್.ಈ ನಿಟ್ಟುಡ್ ಪತ್ರಿಕೆದ ಪ್ರಕಟಣೆ ತೂದ್ ಉಡುಪಿದ ತುಳುಸಂಘಟನೆಲು ಮಾತಾ ಸೇರ್ದ್ ನಗರ ಸಭಾಧ್ಯಕ್ಷೆರೆಗ್ ಆಕ್ಷೇಪಣೆ ಕೊರ್ತೆರ್.
ಸಂಗೊಳ್ಳಿ ರಾಯಣ್ಣ ಕ್ರಾಂತಿ ವೀರೆ ಆಂಡಲಾ ಉಡುಪಿಡ್ ಸ್ವಾತಂತ್ರ್ಯ ಹೋರಾಟಗಾರೆರ್ ತುಳುಚಳುವಳಿಗಾರೆರ್ ಮಸ್ತ್ ಜನ ಉಲ್ಲೆರ್.ಅಕ್ಲೆನ ಪುದರ್ ದೀಯೊಡ್ ಪಂಡುದ್ ತುಳುವೆರ್ ಮನವಿ ಕೊರಿಯೆರ್.
ಈ ಪೊರ್ತುಡ್ ಜೈ ತುಳುನಾಡ್ ಸಂಘಟನೆ ಒಡಿಪು ಎಗ್ಗೆ,ಸಿರಿತುಳುವಚಾವಡಿ ಒಡಿಪು,ತುಳುನಾಡಧ್ವನಿ ಪತ್ರಿಕೆ,ಟೈಮ್ಸ್ ಆಫ್ ಕುಡ್ಲ ಪತ್ರಿಕೆ, ದ ಪದುಕೆರ್ ಇತ್ತೆರ್.
ಮನವಿಗ್ ಸ್ಪಂದಿಸಾಯಿನ ಉಡುಪಿ ನಗರಸಭಾಧ್ಯಕ್ಷೆರಾಯಿನ ಸುಮಿತ್ರಾ ನಾಯಕ್ ಪಾತೆರ್ದ್ ಸಂಗೊಳ್ಳಿ ರಾಯಣ್ಣ ಅಭಿಮಾನಿ ಬಳಗದಕುಲು ಮನವಿ ಕೊರಿನ ಬೆರಿಕೇ ಪತ್ರಿಕೆಡ್ ಬೇತೆಕ್ಲೆನ ಆಕ್ಷೇಪ ಉಂಡ ಕೇನರೆಗ್ ಪ್ರಕಟಣೆ ಕೊರ್ತಾ..ನಿಕುಲು ಕೊರಿನ ಆಕ್ಷೇಪಣೆನ್ ಸರಕಾರೊಗ್ ಮುಟ್ಟಾವುನ ಬೇಲೆ ಮಲ್ಪುವೆ..ಸರಕಾರ ಸರಿಯಾಯಿನ ಕ್ರಮ ದೆತೊಂದ್ ಒಂಜಿ ನಿರ್ಧಾರೊಗ್ ಬರ್ಪುಂಡ್.ಸರಕಾರದ ಉತ್ತರ ದಾದ ಬರ್ಪುಂಡ್ ಪಂಡುದ್ ಕಾತುದ್ ತೂವೊಡ್..ತುಳುನಾಡುದ ಬಗ್ಗೆ ಎಂಕುಲಾ ಅಭಿಮಾನ,ಗೌರವ ಉಂಡು ಪಂಡೆರ್.
ಸಿರಿ ತುಳುವ ಚಾವಡಿದ ಗೈಮೆದ ಗುರ್ಕಾರೆ ಈಶ್ವರ್ ಶೆಟ್ಟಿ ಚಿಟ್ಪಾಡಿ,ಜೈ ತುಳುನಾಡ್ ಸಂಘಟನೆದ ರಾಜೇಶ್ ತುಳುವೆ,ಸಂತೋಷ್,ಸದಾಶಿವ ಮುದ್ರಾಡಿ, ರವೀಂದ್ರ , ಇತ್ತೆರ್.
by 