ಪಕ್ಕಿಲು ಪಾರೊಂದುಲ್ಲ ತೂಯರಾ ?

ಒಂಜಿ ವೈಜ್ಞಾನಿಕ ಲೇಖನ..

🕊️ಪಕ್ಕಿಲು ಪಾರೊಂದುಲ್ಲ ತೂಯರಾ? 🕊️ ಉಂದು ದಾದ ಕೇನೊಂದುಲ್ಲೆ ಪಂಡ್ದ್ ಎನ್ನೊಂದುಲ್ಲರಾ? ಬಾಯಿ ಬರಂದಿನ ಎಲ್ಯ ಬಾಲೆ ಇಪ್ಪುನಗೊಡ್ದಿಂಚಲಾ ಅಕ್ಕಸೊಡು ಪಾರುನ ಪಕ್ಕಿಲೆನ್ ತೋಜಾದ್ ಬಾಯಿಗ್ ನುಪ್ಪು ಕೊರೊಂದಿತ್ತಿನ ಪೊರ್ತುಡ್ದಿಂಚಲಾ ಪಕ್ಕಿಲೆನ ಚಿಲಿಪಿಲಿ,ಪುರ್ರ ಪಂಡ್ದ್ ಬಲಿಪುನವು ಗೊತ್ತಿತ್ತನನೇ ಇಸಯ. ಪುಲ್ಯ ಬೊಲ್ಪುಗು, ಅಂಚೆನೆ ಪೊರ್ತು ಕಂತುನ ಸಮಯೊಡು ಪತ್ತ್ ಪದಿನಾಲ್ ಪಕ್ಕಿಲು ಒಟ್ಟುಗೆ ಒಡೆಗಾ ದಾದನಾ ತುರ್ತು ಕೆಲಸೊಗು ಪೋಪಿಲೆಕ್ಕ ಅಮಸರೊಡು ಪಾರುನ ತೂವಂದಿನಕುಲು ಎರ್ಲಾ ಇಪ್ಪಯರ್. ಆಂಡಾ, ಈ ಪಕ್ಕಿಲು ಪಾರ್ನಗ " V" ಆಕಾರೊಡೇ ಪಕ್ಕಿಲೆನ ಸಾಲ್ ದಾಯೆಗಿಪ್ಪುಂಡು ? ಪನ್ಪಿನವು ಒಂಜಿ ಸೋಜಿಗದ ಪ್ರಶ್ನೆ. ಈ ಪ್ರಶ್ನೆ ಪೊಸತಾದಿಪ್ಪುವೇ ಪನ್ಪಿನ ಸಂಕಲಪ್ಪು. ಈ ಪ್ರಶ್ನೆಗ್ ಉತ್ತರ ಪಂಡ ಇಂಚಿತ್ತಿನ ಕಾರ್ಲೆದ (car) ಮುಸುಂಟು "V" ಇಪ್ಪುಂಡು. ಅಂಚಾದ್ "ಎರೋ ಡೈನಮಿಕ್"ಗಾದ್ ಪನ್ಪಿನ ಬಾರಿ ಪರಾಕ್ದ ಪಾತೆರ ಪಕ್ಕಿ ಪ್ರಿಯೆರ್ನ ಅಂಚೆನೆ ವಿಜ್ಞಾನಿಲೆನ ವಿಚಾರ ಆದಿತ್ತಂಡ್. ಆತೇ ಅತ್ತ್, ಉಂದೆಡ್ದ್ಲಾ ಬೇತೆ ದಾದಾಂಡಲಾ ಕಾರಣ ಉಂಡಾ ಈ ಪಕ್ಕಿಲು ಈ ರೀತಿ " V " ಆಕಾರೊಡು ರಾಯೆರೆ ? ಪನ್ಪಿನ ಸಂಕಲಪ್ಪುದ ಒಟ್ಟುಗು ಈ ವಿಚಾರೊಡು ಸಂಶೋಧನೆ ನಡತೊಂದೇ ಇತ್ತ್ಂಡ್. ಅಂಚೆನೆ ಒಂತೆ ಸಮಾಧಾನೊದ ಉತ್ತರಲಾ ತಿಕ್ಕಂಡ್ ಏತೊಂಜಿ ಎಡ್ಡೆ ನಮ್ಮ ಪಿರವುಡ್ದು ಎರಾಂಡಲಾ ಇತ್ತ್ಂಡ. ಎಪ್ಪೊಲ ಬೆರಿಟ್ಟಿತ್ತಿನಕ್ಲನ ಬೆರಿ ಸಹಾಯ ತಿಕ್ಕ್ದ್ ಬದ್ಕ್ ಸುಖೊಟ್ಟು ದಿಂಜುದು ಪನ್ಪಿನವು ಸತ್ಯೊದ ಪಾತೆರ. ಈ ಇಸಯೊಲೆನ್ ನಮ ನರಮಾನಿ ಪಕ್ಕಿಲೆಡ ಕಲ್ಪೊಡು. ಪಕ್ಕಿಲು ಒಂಜಿ ಕೋಡಿಡ್ದ್ ನನೊಂಜಿಕೋಡಿಗ್ ಪೋನಗ "V " ಆಕಾರೊಡೇ ಪಾರುವ. ದಾಯೆ ಪಂಡ ಇಂಚ ಪಾರುನೆಟ್ಟಾದ್ ಒಂಜಿ ಪಕ್ಕಿ ನೂದು (100%) ಶಕ್ತಿ ಉಪಯೋಗ ಮಲ್ತಂಡ ಮುಟ್ಟುನ ಜಾಗೊಗು ಮುಟ್ಟುನೆಡ್ದ್ಲಾ ಒಟ್ಟಾದ್

“V ” ಆಕಾರೊಡು ದಿಂಜ ಪಕ್ಕಿಲು ಪಾರ್ದ್ ಮುಟ್ಟೆರೆಗ್ ಬಾರಿ ಕಡಿಮೆ ಪಂಡ (70%) ಶಕ್ತಿದ ಉಪಯೋಗ ಅಂಚೆನೆ ಕಡಿಮೆ ಸಮಯ ತಾಗುಂಡು. ಮಾತೆರೆಡ್ದ್ ದುಂಬು ಇಪ್ಪುನ ಪಕ್ಕಿ ಬೇಗ ಬಚ್ಚಿದ್ ಪೋಪುಂಡು. ಅಪಗ ಪಿರವುದ ಸಾಲ್ದ ಒಂಜಿ ಪಕ್ಕಿ ಎದುರು ಬರ್ಪುಂಡು. ಎದುರಿತ್ತಿ ಪಕ್ಕಿ ಬಚ್ಚಿದ್ ಪಿರಿ ಪೋಪುಂಡು. ಅಂಚೆನೆ ಎದುರುದ ಪಕ್ಕಿನ್ ಉಲ್ಲಾಸೊಡು ದೀವೆರೆಗಾದ್ ಬಾಕಿದ ಪಿರವುದ ಪಕ್ಕಿಲು ಜೋರು ಜೋರುಡು ಬೊಬ್ಬೆ ಪಾಡ್ದ್ ಆಸಕ್ತಿ ಪುಟ್ಟಾವ. ಎಂಚ ನಮ ಬಲಿಪುನಾಯನ್ ಅಂಚೆನೆ ಗೊಬ್ಬುದ ಮೈದಾನೊಡು “ಹೋ..ಹೋ..” ಪಂಡ್ದ್ ಮೈಮರ್ಲುನ ಲೆಕ್ಕ ಮಲ್ತ್ ಬಲಿಪೆರೆ ಶಕ್ತಿ ದಿಂಜಾವ ಅಂಚೆನೆ. ಪಾರುನ ಪಕ್ಕಿಲೆನ್ ತೂಪಿನ ಒಟ್ಟುಗು ನಮಕ್ಕ್ ಲಾ ಒಂಜಿ ಕಲ್ಪೆರೆಗ್ ಬಾರಿ ಪೊರ್ಲುದ ನೀತಿ ಉಂಡು ಈ ಪಕ್ಕಿಲೆನ “V” ಆಕಾರೊಡು ಪಾರುನೆತ್ತ ಪಿರವು.
ಒಂಜಿ ಪಕ್ಕಿ ನೂದು (100) ಕಿಲೋಮೀಟರ್ ಬಲಿಪುಂಡ , ಅವ್ವೇ ಪಕ್ಕಿ ಗುಂಪುಡು ನೂತ್ತ ಎಳ್ಪತ್ತೊಂಜಿ (171) ಕಿಲೋಮೀಟರ್ ಪಾರುಂಡು. ಆಕಸ್ಮಾತ್ ಒಂಜಿ ಪಕ್ಕಿ ತನ್ನ ಗುಂಪು ತತ್ತ್ತಂಡ ಆ ಪಕ್ಕಿಗ್ ಆಯನೇ ತತ್ತಿಲೆಕ್ಕ ಆಪುಂಡು. ಆಂಡ ತನ್ನ ಗುಂಪು ಸೇರ್ದ್ ದುಂಬು ಪಾರುಂಡು ಹೆಚ್ಚಾದ್. ಒಂಜೊಂಜಿ ಸಮಯ ಒಂಜಿ ಪಕ್ಕಿ ಸಾಕಾದ್ ಶಕ್ತಿ ದಾಂತೆ ಪಿರ ಒರಿದ್ ಪೋಂಡ ಅತ್ತ್ತಡಾ ಗುಂಪುಡ್ದು ತತ್ತಂಡ, ಬೇತೆ ರಡ್ಡ್ ಪಕ್ಕಿಲು ಐತೋಟ್ಟುಗು ಬತ್ತ್ತದ್ ಪಾರುವ. ನನ ಪಾರುನ ಸಾಧ್ಯನೇ ಇಜ್ಜಿ, ಪನ್ಪಿನ ಪೊರ್ತುಗು ಒಟ್ಟು ಬೈದಿನ ರಡ್ಡ್ ಪಕ್ಕಿಲು ಬಚ್ಚಿದಿನ ಪಕ್ಕಿಗ್ ನೆಲಕ್ಕ್ ಜಪ್ಪೆರೆಗ್ ಸಹಾಯ ಮಲ್ಪುವ. ಅತ್ತಾಂದೆ ಆ ಪಕ್ಕಿ ಉಸಾರಾನೇಟ ಮುಟ್ಟ ಒಟ್ಟುಗಿಪ್ಪುನತ್ತಾಂದೆ, ಆ ಪಕ್ಕಿದ ಪ್ರಾಣ ಪೋನೇಟ ಮುಟ್ಟ ಐತೊಟ್ಟುಗಿತ್ತ್ದ್ ಸಹಾಯ ಮಲ್ಪುವ. ನರಮಾನಿ ಪಕ್ಕಿಲೆಡ ಈ ಇಸಯೊನು ಕಲ್ಪೊಡು ಬದ್ಕ್ ಸುಖೊಟ್ಟು ದಿಂಜೊಡಾಂಡ. ಅಂಚೆನೆ ನಮ್ಮ ಫೈಟರ್ ಜೆಟ್ಲಗ್ “V ” ಆಕಾರೊಡು ಪಾರುನ ಕಲ್ಪಾದಿನೇ ಈ ಪಕ್ಕಿಲು. ಒಟ್ಟುಗು “V” ಆಕಾರೊಡು ದಿಂಜ ವಿಮಾನೊಲು ಒಟ್ಟಾದ್ ಪಾರುನ ತಂತ್ರಜ್ಞಾನೊದ ಉಲಯದ ಗುಟ್ಟು ಇಪ್ಪುನು ಈ ಎಲ್ಯ ಪಕ್ಕಿಲೆಡ. ಈ “V” ಆಕಾರೊಡು ಪಕ್ಕಿಲು ಪಾರುನ ಪೊರ್ಲು ತೂದು ನಮ್ಮ ರಾಷ್ಟ್ರ ಕವಿ ಕುವೆಂಪು ಪನ್ಪೆರ್, ಕನ್ನಡೊಡು ..” ದೇವರು ರುಜು ಮಾಡಿದನು, ರಸವಶನಾಗುತ ಕವಿ ಅದ ನೋಡಿದನು”… ಪಂಡ್ದ್ ಪಂತೆರ್. ( ದೇವೆರ್ಲಾ ಒಪ್ಪಿಗೆ ಕೊರಿಯೆರ್, ರಸೊಕ್ಕುಲೆನ ವಸೊಟ್ಟು ಕವಿ ಅವೆನ್ ತೂಯೆ..) ಪನ್ಪಿನ ಪೊರ್ಲುದ ಪಾತೆರ ಪಂತೆರ್ ರಾಷ್ಟ್ರ ಕವಿ ಕುವೆಂಪು.
(ರಸವಸೊಟ್ಟು, ಪಂಡ ನವರಸೊಕ್ಕುಲೆನ ವಸ ದಿಂಜಿದ್ ಕವಿ ತೂಯೆ ಪನ್ಪಿನ ಒಂಜಿ ಉಡಲ್ದ ಪಾತೆರ)

(ವೈಜ್ಞಾನಿಕ ಲೇಖನೊದ ಮೂಲ ಬರಹಗಾರೆರ್ ಮಣ್ಣ್ ವಿಜ್ಞಾನಿ..
ಡಾಕ್ಟರ್ ಟಿ. ಯಸ್ ಚನ್ನೇಶ್.
ಮೆರೆನ ಅನುಮತಿ ಪಡೆದ್ ಅರೆಗ್ ಸೊಲ್ಮೆ ಸಂದಾವೊಂದು ಕನ್ನಡೊಡ್ದು ತುಳು ಭಾಷೆಗ್ ಭಾಷಾಂತರ ಮಲ್ದೆ, ಮೆರೆನ ಪುಸ್ತಕಯಾನ ಪನ್ಪಿನ ಪುಸ್ತಕೊಡ್ದು)

ಕುಸುಮ್ ಸಾಲಿಯಾನ್
ಪುಣೆ- ಮಹಾರಾಷ್ಟ್ರ