ಮೋದಿಗಾದ್ ಕರಿನ ರಡ್ಡ್ ವರ್ಸೊಡಿಂಚಿ ಯಾಗ ಮಲ್ತೊಂದುಪ್ಪುನ ಲಕ್ಷ್ಮೀಶ್ ಆಚಾರ್ಯ…

ನರೇಂದ್ರ ಮೋದಿನ ಪುದರುಡ್ ಸಂಕಲ್ಪ ;

ಕರಿನ ರಡ್ಡ್ ವರ್ಷೊಡಿಂಚಿ ನಿತ್ಯ ಯಾಗ

ಮೋದಿ ಬೊಕ್ಕ ದೇಶದ ಒಳಿತಿಗಾದ್ ಋಕ್ ಸಂಹಿತಾ ಯಾಗ ಪೂರ್ಣಾಹುತಿ .

ಸ್ವಚ್ಛ -ಶುದ್ಧ- ಗವ್ಯ ಬೊಕ್ಕ ಸಾವಯವ ದ್ರವ್ಯ ಬಳಕೆ

ಅಪೂರ್ವ ವೈದಿಕ ವಿದ್ವಾಂಸೆರೆನ ಮೌನ ಕರ್ತವ್ಯ

ಉಡುಪಿ ಜಿಲ್ಲೆದ ಕಾಪು ಹೋಬಳಿ ವ್ಯಾಪ್ತಿದ ಅಡ್ವೆ ಪನ್ಪಿನ ಕಿನ್ನ ಗ್ರಾಮೊಡ್ ವೇದ ವಿದ್ವಾಂಸೆ ಒರಿ ತನ್ನ ಇಲ್ಲಡೇ ಕರಿನ ರಡ್ಡ್ ವರ್ಷೊಡಿಂಚಿ ಒವ್ವೇ ಪ್ರಚಾರ ಉಪ್ಪಂದೆ ದೇಶದ ಪ್ರಧಾನ ಮಂತ್ರಿ ನರೇಂದ್ರ ಮೋದಿಗ್ ಬೊಕ್ಕ ದೇಶದ ಕ್ಷೇಮ‌ ಸುಭಿಕ್ಷೆ ಸಮೃದ್ಧಿ ಶಾಂತಿಗಾದ್ ಪ್ರಾರ್ಥನೆ ಮಲ್ತುದ್ ಪ್ರತಿನಿತ್ಯ ಬಾರೀ ಶ್ರದ್ಧೆಡ್ ಋಗ್ವೇದ ಸಂಹಿತಾ ಯಾಗ ಶುಕ್ರವಾರ ಸಂಪನ್ನ ಆತುಂಡ್.

ವಿದ್ವಾನ್ ಅಡ್ವೆ ಲಕ್ಷ್ಮೀಶಾಚಾರ್ಯೆರು ಈ ಯಾಗದ ಕರ್ತೃವಾದಿತ್ತುದ್ ಸುಮಾರ್ ಸರ್ತಿ ಲೋಕದ ಒಳಿತಿಗಾದ್ ಒರುಂಭ ಸರ್ತಿ ಋಕ್ ಸಂಹಿತಾಯಾಗನ್ ಮಲ್ತುದ್ ಈ ಸರ್ತಿ ಪತ್ತನೇ ಸರ್ತಿದ ಯಾಗನ್ ಪೂರ್ಣ ಮಲ್ದಿನವ್ ಅಪೂರ್ವ ಸಂಗತಿ .

ಉಡುಪಿ ಜಿಲ್ಲೆದ ಕಾಪು ವಿಧಾನಸಭಾ ಕ್ಷೇತ್ರ ವ್ಯಾಪ್ತಿದ ಅಡ್ವೆ ಗ್ರಾಮದ ನಿವಾಸಿಯಾದುಪ್ಪುನ ವಿದ್ವಾನ್ ಶ್ರೀ ಲಕ್ಷ್ಮೀಶ ಆಚಾರ್ಯೆರು ಈ ಭಾಗದ ಶ್ರೇಷ್ಠ ವೈದಿಕ ವಿದ್ವಾಂಸರಾದುಲ್ಲೆರ್. ಶ್ರೀಯುತೆರು ಪ್ರಸ್ತುತ ದೇಶೊಡುಪ್ಪುನ ತೀರಾ ಬಿರೆಳೆಣಿಕೆದಾತ್ ಅಗ್ನಿಹೋತ್ರಿಲಡ್ ಒರಿ ಆದಿತ್ತುದ್ ಕರಿನ ಮಸ್ತ್ ವರ್ಷೊಡಿಂಚಿ ತನ್ನ ಇಲ್ಲಡೇ ಅಗ್ನಿಕುಂಡ ಪ್ರತಿಷ್ಠಾಪನೆ ಮಲ್ತುದ್ ಒಂಜಿ ದಿನಲಾ ಬುಡಂದೇ ಪ್ರತೀನಿತ್ಯ ಮೂಜಿ ಪೊರ್ತುಲಾ ಅಗ್ನಿದ ಉಪಾಸನೆನ್ ಮಲ್ತೊಂದುಪ್ಪುನವ್ ಈ ಕಾಲಘಟ್ಟೊಡ್ ನಿಜವಾದುಲಾ ಮೆಚ್ಚುನ ಅಚ್ಚರಿದ ಸಂಗತಿಯಾತುಂಡ್.

ಈ ಆಚರಣೆ ಮಸ್ತ್ ಕಷ್ಟಕರವಾದಿತ್ತುಂಡಲಾ ಶ್ರೀ ಆಚಾರ್ಯೆರು ಬಾರೀ ಶ್ರದ್ಧೆಡ್ ಉಂದೆನ್ ನಿರ್ವಹಣೆ ಮಲ್ತೊಂದುಲ್ಲೆರ್ .

ಸ್ಥಳೀಯ ಶ್ರೀ ಯೋಗದೀಪಿಕಾ ಗುರುಕುಲಡ್ ಪ್ರಾಚಾರ್ಯೆರಾದ್ ಕರ್ತವ್ಯ ನಿರ್ವಹಣೆ ಮಲ್ತೊಂದ್ ಐತ ಒಟ್ಟುಗ್ ಕೈತಲುಡೇ ( ಅಗ್ನಿದ ಉಪಾಸನೆದ ಕಾರಣೊಗಾದ್ ದೂರ ಪೋಷಕ ಕ್ಕ ಇಜ್ಜಿ) ಕೆಲವು ಕಡೆಟ್ ಪ್ರವಚನೊಗ್ ಪೋದ್ ಸೀಮಿತ ಆದಾಯೊನ್ ದೆತೊನೊಂದಿತ್ತೆರ್ ..ಆಂಡ ಈ ಆದಾಯದ ಮಸ್ತ್ ಪಾಲುನ್ ಲೋಕವಿಹಿತವಾದ ವೈದಿಕ ಕರ್ತವ್ಯಗಾದ್ ವಿನಿಯೋಗ ಮಲ್ತೊಂದುಪ್ಪುನವಗ ಅರೆನ ನಿಸ್ವಾರ್ಥ ರಾಷ್ಟ್ರಭಕ್ತಿಗ್ ಸಾಕ್ಷಿಯಾತುಂಡ್ .

ಇತ್ತೆ ಕರಿನ ಕೊರೊನ ವಿಪತ್ತುದ ಸಂದರ್ಭಡ್ದ್ ಸುರು ಮಲ್ತುದ್ ರಡ್ಡ್ ವರ್ಷೊಡಿಂಚಿ ( ಒಂಜಿ ದಿನಲಾ ಬುಡಂದೆ ) ನಿತ್ಯಲಾ ಪತ್ತನೇ ಸರ್ತಿದ ಸಂಪೂರ್ಣ ಋಗ್ವೇದ ಸಂಹಿತಾ ಯಾಗೊನ್ ಇಡೀ ದೇಶ ಸುಭಿಕ್ಷೆ -ಸಮೃದ್ಧಿ -ನೆಮ್ಮದಿ -ಶಾಂತಿಗಾದ್ ಪ್ರಾರ್ಥನೆ ಮಲ್ತುದ್ ಮೋದಿಜಿನ ಪುದರು ಬೊಕ್ಕ ನಕ್ಷತ್ರೊಡ್ ಸಂಕಲ್ಪ ಮಲ್ತೊಂದಿತ್ತೆರ್..

ಶುಕ್ರವಾರ
ಪರಮಪೂಜ್ಯ ಶ್ರೀ ಪೇಜಾವರ ಶ್ರೀ ವಿಶ್ವಪ್ರಸನ್ನತೀರ್ಥ ಸ್ವಾಮೀಜಿ ಮತ್ತು ಶ್ರೀ ಪಲಿಮಾರು ಮಠಾಧೀಶ ಶ್ರೀ ವಿದ್ಯಾಧೀಶ ತೀರ್ಥ ಸ್ವಾಮೀಜಿ ಬೊಕ್ಕ ಮಾನ್ಯ ಶಾಸಕೆರಾಯಿನ ಶ್ರೀ ಲಾಲಾಜಿ ಆರ್ ಮೆಂಡನ್ , ಜಿಲ್ಲಾ ಬಿಜೆಪಿ ಅಧ್ಯಕ್ಷ ಕೆ ಸುರೇಶ್ ನಾಯಕ್ ಮೊಕ್ಲೆನ ಉಪಸ್ಥಿತಿಡ್ ಈ ಬೃಹತ್ ಯಾಗದ ಪೂರ್ಣಾಹುತಿ ನೆರವೇರುಂಡ್ . ವೈದಿಕ ವಿದ್ವಾಂಸೆರು , ಜಿಲ್ಲಾ ಬಿಜೆಪಿ ಅಧ್ಯಕ್ಷ ಕೆ ಸುರೇಶ್ ನಾಯಕ್ ಉಪಸ್ಥಿತರಿತ್ತೆರ್ .