ಮತಾಂತರ ನಿಷೇಧ ಕಾಯ್ದೆ ತಿದ್ದುಪಡಿ ವಾಪಸ್ ಪಡೆಯಿನ ರಾಜ್ಯ ಕಾಂಗ್ರೆಸ್ ಸರಕಾರದ ಹಿಂದೂ ವಿರೋಧಿ ನೀತಿ ಖಂಡನೀಯ: ವೀಣಾ ಎಸ್. ಶೆಟ್ಟಿ
ಸದಾ ಹಿಂದೂ ವಿರೋಧಿ ನೀತಿ ಅನುಸರಿಸಾವೊಂದುಪ್ಪುನ ಮುಖ್ಯಮಂತ್ರಿ ಸಿದ್ದರಾಮಯ್ಯ ನೇತೃತ್ವದ ರಾಜ್ಯ ಕಾಂಗ್ರೆಸ್ ಸರಕಾರ ಮತಾಂತರ ನಿಷೇಧ ಕಾಯ್ದೆಗ್
ಬಿಜೆಪಿ ಸರಕಾರ ಕನದಿನ ತಿದ್ದುಪಡಿನ್ ವಾಪಾಸು ಪಡೆಯೆರೆಗ್ ಸಚಿವ ಸಂಪುಟ ಸಭೆಟ್ ನಿರ್ಣಯ ಮಲ್ದಿನವ್ ಖಂಡನೀಯ ಪಂಡುದು ಬಿಜೆಪಿ ಉಡುಪಿ ಜಿಲ್ಲಾ ಮಹಿಳಾ ಮೋರ್ಚಾ ಅಧ್ಯಕ್ಷೆ ವೀಣಾ ಎಸ್. ಶೆಟ್ಟಿ ತೆರಿಪಾದೆರ್.
ಸಮಾಜಡ್ ಲವ್ ಜಿಹಾದ್ ಬೊಕ್ಕ ಆಮಿಷದ ಮುಖಾಂತರ ಮೋಸದ ಮತಾಂತರ ಅವ್ಯಾಹತವಾದ್ ನಡತೊಂದಿತ್ತುದ್ ರಾಜ್ಯ ಕಾಂಗ್ರೆಸ್ ಸರಕಾರ ಮತಾಂತರ ನಿಷೇಧ ಕಾಯ್ದೆ ತಿದ್ದುಪಡಿನ್ ವಾಪಾಸು ಪಡೆಯುನ ಮೂಲಕ ಮತಾಂತರನೇ ಕಾಯಕ ಮಲ್ತೊಂದಿನ ಮತಾಂಧ ಶಕ್ತಿಲೆಗ್ ಪ್ರೋತ್ಸಾಹ ಕೊರಿಲೆಕ್ಕಾತುಂಡ್.
ಪಠ್ಯ ಪುಸ್ತಕ ಪರಿಷ್ಕರಣೆ ವಿಚಾರೊಡುಲಾ ಕಾಂಗ್ರೆಸ್ ಸರಕಾರ ಹಿಂದೂ ವಿರೋಧಿ ನೀತಿನ್ ಅನುಸರಿಸಾದ್ ಸ್ವಾತಂತ್ರ್ಯ ಹೋರಾಟಗಾರೆ ಮಹಾನ್ ಪುರುಷೆರಾಯಿನ ವೀರ ಸಾವರ್ಕರ್, ಹೆಡಗೇವಾರ್ ಮೊಕ್ಲೆನ ಜೀವನಾದರ್ಶೊನ್ ಸಾರುನ ಪಾಠೊನ್ ಕೈಬುಡ್ತಿ ನವ್ ಒಂಜೇ ವರ್ಗದ ಓಲೈಕೆದ ರಾಜಕಾರಣ ಆತುಂಡ್. ಆಂಡಲಾ ಈ ಪ್ರಕ್ರಿಯೆಡಾದ್ ಇಂಚಿನ ಮಹಾನ್ ಪುರುಷರೆನ ಜೀವನ ಮೌಲ್ಯಲೆನ್ ವಿದ್ಯಾರ್ಥಿಲು ಆಸಕ್ತಿಡ್ ಅರಿತೊನರೆಗ್ ದುಂಬು ಬೈದಿನ ಖಂಡಿತ ಪಂಡುದ್ ಆರು ತೆರಿಪಾದೆರ್.
ನಕಲಿ ಗ್ಯಾರಂಟಿ ಕಾರ್ಡುಲೆನ್ ವಿತರಣೆ ಮಲ್ಪುನ ಮುಖೇನ ರಾಜ್ಯದ ಜನತೆನ್ ಯಾಮಾರಿಸಾದ್ ಅಧಿಕಾರಗ್ ಬೈದಿನ ಜನ ವಿರೋಧಿ ಕಾಂಗ್ರೆಸ್ ಜನತೆಗ್ ಕೊರ್ತಿನ ಉಚಿತದ ವಾಗ್ದಾನೊನ್ ಪೂರೈಸಾವಂದೆ ಪಂಗನಾಮ ಪಾಡುದುಂಡ್. 200 ಯುನಿಟ್ ಉಚಿತ ವಿದ್ಯುತ್ ಪಂಡುದು ಡಂಗುರ ಸಾರುದಿನ ಕಾಂಗ್ರೆಸ್ ಇತ್ತೆ ದಿಡೀರಾದ್ ವಿದ್ಯುತ್ ದರೊನ್ ಏರಿಸಾವುನ ಮುಖೇನ ರಾಜ್ಯದ ಜನತೆಗ್ ಶಾಕ್ ಕೊರ್ತುಂಡ್. ಕೇಂದ್ರ ಸರಕಾರ ಕೊರ್ಪಿನ 5 ಕೆ.ಜಿ. ಉಚಿತ ಅರಿ ಸಹಿತ ಹೆಚ್ಚುವರಿ 10 ಕೆ.ಜಿ. ಉಚಿತ ಅರಿ ಕೊರ್ಪೆ ಪಂತಿನ ಮುಖ್ಯಮಂತ್ರಿ ಸಿದ್ದರಾಮಯ್ಯ ಸಬೂಬು ಪನೊಂದ್ ಅಸಹಾಯಕತೆ ಪ್ರದರ್ಶನ ಮಲ್ತೊಂದುಲ್ಲೆರ್.. ಮಹಿಳೆಯೆರೆಗ್ ಉಚಿತ ಸರಕಾರಿ ಬಸ್ ಪ್ರಯಾಣಡ್ದ್ ಆಟೋ, ಟ್ಯಾಕ್ಸಿ ಚಾಲಕರ ಸಹಿತ ಖಾಸಗಿ ಬಸ್ ಮಾಲಕೆರು ಸಂಕಷ್ಟಕ್ಕೀಡಾವೊಂದುಲ್ಲೆರ್. ಇಲ್ಲದ ಒಡತಿಗ್ 2,000 ಫ್ರೀ ಪಂತಿನ ಕಾಂಗ್ರೆಸ್ ಮಾಮಿ- ಮರ್ಮಾಲೆನ ನಡುಟ್ ಜಗಳ ಕನತುದ್ ದಾಲಾ ಮಲ್ಪರೆಗಾವಂದೆ ಮನೀಪಂದೆ ಕುಲ್ಲುದುಂಡ್. ನಿರುದ್ಯೋಗಿ ಪದವೀಧರರರೆಗ್ ಯುವಕರೆಗ್ 3,000 ಮಾಸಾಶನ ಉಚಿತ ಪಂತಿನ ಕಾಂಗ್ರೆಸ್ ಇತ್ತೆ ಪ್ರಸಕ್ತ ಸಾಲುಡ್ ತೇರ್ಗಡೆಯಾಯಿನ ಪದವೀದರೆರು ಮಾತ್ರ ಅರ್ಹೆರು ಪಂಡುದು ರಾಗ ಬದಲಿಸಾದುಂಡ್
ಈ ಮಾತಾ ವೈಫಲ್ಯದ ಹಿನ್ನೆಲೆಡ್ ಪಾತೆರ ತಪ್ಪಾಯಿನ ಕಾಂಗ್ರೆಸ್ ಸರಕಾರ ಉಚಿತದ ಗ್ಯಾರಂಟಿಲೆನ್ ಪೂರೈಸಾವಂದೆ , ಅಭಿವೃದ್ಧಿದ ಗೊಡವೆಗುಲಾ ಪೋವಂದೆ, ರಾಜ್ಯೊನ್ ದಿವಾಳಿದ ಅಂಚಿಡ್ ಕೊನೊತಿನವ್ ನಿಶ್ಚಿತ ಪಂಡುದ್ ವೀಣಾ ಎಸ್. ಶೆಟ್ಟಿ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್
by 