ಮೇ.10, ವಿಧಾನಸಭಾ ಕ್ಷೇತ್ರದ ಚುನಾವಣಾ ಪ್ರಚಾರ ರಾಷ್ಟ್ರೀಯ ಪಕ್ಷೊಲಾಯಿನ ಕಾಂಗ್ರೆಸ್, ಬಿಜೆಪಿ ಪಕ್ಷದಕುಲು ಬಾರೀ ಜೋರುಡ್ ನಡತೊಂದುಂಡ್.ಈ ಸರ್ತಿದ ಕಲೊಟ್ ಏರ್ ಗೆಂದುವೆರ್,ಏರ್ ಸೋಪುವರ್ ಪನ್ಪಿನವ್ ಒಂತೆ ಗೊಂದಲ ಆತುಂಡ್.ದಾಯೆಗ್ ಪಂಡ ಬಿಜೆಪಿ ಪಕ್ಷ ಆಡಳಿತ ಮಲ್ತೊಂದಿತ್ತುಂಡಲಾ ವಿಪರೀತ ಬೆಲೆಏರಿಕೆಡಾದ್ ಜನಕುಲು ಸೋತುದ್ ಪೋತೆರ್..ಆಂಡ ಕುಡೊಂಜಿ ಕಡೆಟ್ ಕಾಂಗ್ರೆಸ್ ಪಕ್ಷ ಆಡಳಿತ ಬತ್ತುಂಡ ಕುಡೊರ ದೇಶದ ಪರಿಸ್ಥಿತಿ ದಿಕ್ಕು ಬದಲಾಪುಂಡಾ ಪನ್ಪಿನ ಗೊಂದಲೊಡ್ ಜನಕುಲು ಈ ಸರ್ತಿ ಒವ್ ಪಕ್ಷೊನ್ ಆಯ್ಕೆ ಮಲ್ಪುವೆರ್ ಪಂಡುದ್ ಪನರೆಗಾವಂದ್.
ಈ ನಡುಟ್ ಕುಡೊಂಜಿ ಪಕ್ಷ ಆಮ್ ಆದ್ಮಿ ಇಂಚಪ್ಪೊಗ್ ಒಂತೆ ಜೋರುಡೇ ಸುದ್ದಿ ಮಲ್ದಿತ್ತುಂಡ್..ವಿಶೇಷವಾದ್ ಉಡುಪಿಡ್ ಆಮ್ ಆದ್ಮಿ ಪಾರ್ಟಿದ ಜಿಲ್ಲಾಧ್ಯಕ್ಷೆರಾದ್ ಆಯ್ಕೆ ಆತಿನ ಉಡುಪಿದ ಉದ್ಯಮಿ ದಿವಾಕರ್ ಸನಿಲ್ ಮೇರ್ ಉಡುಪಿ ವಿಧಾನಸಭಾ ಕ್ಷೇತ್ರದ ಆಮ್ ಆದ್ಮಿ ಪಾರ್ಟಿದ ಅಭ್ಯರ್ಥಿಯಾದ್ ಆಯ್ಕೆ ಪಂಡುದ್ ಸುದ್ದಿಯಾದಿತ್ತುದ್,ಬೊಕ್ಕ ಅವ್ ಸುದ್ದಿಲಾ ಚಪ್ಪೆಯಾದಿತ್ತುಂಡ್..ಆಂಡ ಇನಿ ತೆರಿನ ಸುದ್ದಿದ ಪ್ರಕಾರ ಅಮ್ ಆದ್ಮಿ ಪಾರ್ಟಿದ ಜಿಲ್ಲಾಧ್ಯಕ್ಷೆರಾಯಿನ ದಿವಾಕರ್ ಸನಿಲ್ ಮೇರ್ ಪಾರ್ಟಿಗ್ ವಿದಾಯ ಕೊರಿಯೆರ್ ಪನ್ಪಿನ ಸುದ್ದಿ ತೆರಿದ್ ಬೈದುಂಡ್.
ಉಡುಪಿಡ್ ಕರಿನ 30 ವರ್ಷೊಡಿಂಚಿ ಪ್ರಸಿದ್ಧ ಉದ್ಯಮಿಯಾದಿತ್ತಿನ ದಿವಕರ್ ಸನಿಲ್ ಮೇರ್ ಒವ್ವೇ ಪಕ್ಷೊಗ್ ಸೇರಂದೆ,ಮಾತಾ ಪಕ್ಷದಕ್ಲೆನೊಟ್ಟುಗ್ ಒಡನಾಟೊಡ್ ಇತ್ತಿನಾರ್.ಕರಿನ ವರ್ಷ ಆಮ್ ಆದ್ಮಿ ಪಕ್ಷೊಗ್ ಸೇರಿನ ಸನಿಲೆರ್ ಪಕ್ಷೊಗ್ ವಿದಾಯ ಕೊರಿಯೆರ್. ಇತ್ತೆ ಕುಡೊರ ಸನಿಲ್ ಬಿಜೆಪಿ ಪಕ್ಷೊಗ್ ಸೇರುವೆರಾ ಅತ್ತ್ ಕಾಂಗ್ರೆಸ್ ಪಕ್ಷೊಗ್ ಸೇರುವೆರಾ ಪನ್ಪಿನ ಕುತೂಹಲ ಜನಕ್ಲೆಗ್ ಉಂಡು….
ಉಡುಪಿ ಪ್ರೆಸ್ ಕ್ಲಬ್ ಡ್ ಪತ್ರಿಕಾಗೋಷ್ಠಿಡ್ ಪಾತೆರಿನ ಸನಿಲ್ ಮೇರ್ ಆಮ್ ಆದ್ಮಿ ಪಕ್ಷೊಡ್ ಎಂಕ್ ಒವ್ವೇ ಸರಿಯಾಯಿನ ನಿಲುವು ತಿಕ್ಕುದಿಜಿ..ಎಮ್ ಎಲ್ ಎ ಅಭ್ಯರ್ಥಿ ಆವೊಡಾಂಡ ಜಿಲ್ಲಾಧ್ಯಕ್ಷ ಪೋಸ್ಟ್ ಗ್ ರಿಸೈನ್ ಕೊರ್ದ್ ಉಡುಪಿ ಅಭ್ಯರ್ಥಿ ಯಾವರೆಗ್ ಅವಕಾಶ ಕೊರ್ತುಜೆರ್.ಅಭ್ಯರ್ಥಿ ಆಯ್ಕೆ ಮಲ್ತುಜೆರಡಲಾ ಬೇಜರಿಜ್ಜಿ ಆಂಡ ಆಯ್ಕೆ ಮಲ್ದಿನ ಪ್ರಕ್ರಿಯೆ ಸರಿ ಇಜ್ಜಿ.ಅಂಚಾದ್ ಇನಿ ವ್ಯಯಕ್ತಿಕವಾದ್ ಪಕ್ಷೊಗ್ ವಿದಾಯ ಪನೊಂದುಲ್ಲೆ..ಎನ್ನ ಬದಲುಗ್ ಬೈದಿನ ಜಿಲ್ಲಾಧ್ಯಕ್ಷೆರಾಯಿನ ಡಾಲ್ಫಿ ವಿಕ್ಟರ್ ಲೂಯಿಸ್ ಅಂಚೆನೇ ಸಂಘಟನಾ ಕಾರ್ಯದರ್ಶಿ ಕೀರ್ತಿರಾಜ್ ಲಾ ಇನಿ ಪಕ್ಷೊಗ್ ರಿಸೈನ್ ಕೊರೊಂದುಲ್ಲೆರ್.
by 