ಸಂತೆಕಟ್ಟೆ ಅಂಡರ್ ಪಾಸ್ ಗ್ ತೋಡುದಿನ ಹೊಂಡ ಮರಿಯಾಲಗ್ ಅಪಾಯ ಸಂಭವ : ರಮೇಶ್ ಕಾಂಚಾನ್..

ರಾಷ್ಟ್ರೀಯ ಹೆದ್ದಾರಿ 66ತ್ತ ಕಲ್ಯಾಣಪುರದ ಸಂತೆಕಟ್ಟೆಡ್ ಅಂಡರ್ ಪಾಸ್ ನಿರ್ಮಾಣಕ್ಕಾದ್ ತೋಡುದಿನ ಹೊಂಡಡಾದ್ ಮರಿಯಾಲಡ್ ಹೆದ್ದಾರಿ ಕುಸಿದು ದಾದಾಂಡಲಾ ಅಪಾಯ ಸಂಭವಿಸಾಂಡ ಅಯಿತ್ತ ನೈತಿಕ ಹೊಣೆನ್ ತುಂಬರೆಗ್ ಕೇಂದ್ರ ಸಚಿವೆ ಬೊಕ್ಕ ಉಡುಪಿ-ಚಿಕ್ಕಮಗಳೂರು ಸಂಸದರಾಯಿನ ಕುಮಾರಿ ಶೋಭಾ ಕರಂದ್ಲಾಜೆ ಮೇರ್ ಸಿದ್ದರುಲ್ಲೆರಾ ಪಂಡುದು ಉಡುಪಿ ಬ್ಲಾಕ್ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷರಾಯಿನ ರಮೇಶ್ ಕಾಂಚನ್ ಪ್ರಶ್ನೆ ಮಲ್ದೆರ್.

ಅವೈಜ್ಞಾನಿಕವಾದ್ ಒವ್ವೇ ರೀತಿದ ಮುಂಜಾಗ್ರತಾ ಕ್ರಮ ದೆತೊನಂದೆ ಆಳವಾಯಿನ ಗುಂಡಿನ್ ತೋಡುದ್ ಸೂಕ್ತವಾಯಿನ ಮುನ್ನೆಚ್ಚರಿಕಾ ಕ್ರಮೊನುಲಾ ದೆತೊನುಜಿ. ಒಂಜಿ ವೇಳೆ ಗುಂಡಿದ ಪಕ್ಕಡೇ ಪೋಪಿನ ರಾಷ್ಟ್ರೀಯ ಹೆದ್ದಾರಿ 66 ಬರ್ಸಗ್ ಕುಸಿದು ಪೋಂಡ ಜೀವ ಹಾನಿದೊಟ್ಡುಗ್ ಸಂಪರ್ಕಲಾ ಕಡ್ಡಿದ್ ಪೋಪಿನ ಭೀತಿ ಉಂಡು. ರಸ್ತೆ ನಿರ್ಮಾಣದ ಸಮಯಡೇ ಸೂಕ್ತ ಅಂಡರ್ ಪಾಸ್ ನಿರ್ಮಿಸಾವಂದೆ ಇತ್ತೆ ಉಂದೆನ್ ನಿರ್ಮಿಸಾವರೆಗಾದ್ ಆಳವಾಯಿನ ಗುಂಡಿ ಮಲ್ದಿನವ್ ಅಧಿಕಾರಿಲು ಬೊಕ್ಕ ಕೇಂದ್ರ ಸರ್ಕಾರದ ನಿರ್ಲಕ್ಷ್ಯತನಗ್ ತೋಜಾಯಿನ ಕೈಗನ್ನಡಿಯಾತುಂಡ್.
ಈ ನಡುಟ್ ಸಂಸದೆರು ಇಂಚಪ್ಪೊಗ್ ಸಭೆಟ್ ಗುಂಡಿನ್ ತಾತ್ಕಾಲಿಕವಾದ್ ಮಣ್ಣು ಪಡುದ್ ಮುಚ್ಚಾವರೆಗ್ ಸೂಚನೆ ಮಲ್ದಿನವ್ ಹಾಸ್ಯಾಸ್ಪದ ಸಂಗತಿಯಾತುಂಡ್. ಇತ್ತೆನೇ ಅಲ್ಪದ ಲೋಡುಗಟ್ಟಲೇ ಮಣ್ಣುನ್ ಲಕ್ಷಾಂತರ ರೂಪಾಯಿಲೆಗ್ ಮೊಕ್ಲೆನವ್ವೇ ಪಕ್ಷದ ನಾಯಕೆರು ಮಾರುದಿನವ್ ಸಾಮಾಜಿಕ ಜಾಲತಾಣಡ್ ವೈರಲ್ ಆತಿನವ್ ಜನಸಾಮಾನ್ಯೆರು ತೂತೆರ್.

ಅತ್ತಾವಂದೆ ಆತ್ ಆಳವಾದ್ ತೋಡುದಿನ ಗುಂಡಿನ್ ಮುಚ್ಚ್ಅವರೆಗ್ ಸಾಧ್ಯನಾ ಪನ್ಪಿನ ಕನಿಷ್ಠ ಜ್ಞಾನ ಸಂಸದರೆಗ್ ಇಜ್ಜಾ?

ಪರ್ಕಳದ ಜನಕುಲು ಕರಿನ 4 ವರ್ಷಡಿಂಚಿ ರಾಷ್ಟ್ರೀಯ ಹೆದ್ದಾರಿದ ಅವೈಜ್ಞಾನಿಕ ರೀತಿದ ಕಾಮಗಾರಿಡಾದ್ ಪರದಾಟ ಮಲ್ತೊಂದುಲ್ಲೆರ್. ಭೂಮಿ ಕಳೆಯೊಂದಿನ ಸ್ಥಳೀಯೆರೆಗ್ ಸರಿಯಾಯಿನ ಪರಿಹಾರಲಾ ತಿಕ್ಕುಜಿ. ಕಾಮಗಾರಿ ವಿಳಂಬವಾಯಿನ ಕಾರಣ ಬೋಡಾಯಿನಾತ್ ಕಷ್ಟ ಅನುಭವಿಸೊವುಂದುಲ್ಲೆರ್. ಅಪಘಾತೊಲು ಸಂಭವಿಸಾದ್ ಜೀವೊಗ್ ಹಾನಿಯಾತುಂಡ್. ಇಂಚೆನೇ ಇಂದ್ರಾಳಿದ ಬ್ರಿಡ್ಜ್‌ ದ ಕಾಮಗಾರಿ ಸಂಪೂರ್ಣ ಆವಂದೆ ಸಾರ್ವಜನಿಕೆರು ತುಂಬಾ ಕಷ್ಟ ಅನುಭವಿಸಾವೊಂದುಲ್ಲೆರ್. ಈತ್ ಮಾತಾ ಸಮಸ್ಯೆಲು ತನ್ನ ಕ್ಷೇತ್ರಡ್ ಇತ್ತುಂಡಲಾ ಮುಲ್ಪದ ಸಂಸದರಾಯಿನ ಶೋಭಾ ಕರಂದ್ಲಾಜೆ ಆರು ನಮ್ಮ ರಾಜ್ಯ ಸರ್ಕಾರದ ಬಗ್ಗೆ ಪಾತೆರುನವ್ ಹಾಸ್ಯಾಸ್ಪದ. ತಮ್ಮ ಕ್ಷೇತ್ರದ ಸಮಸ್ಯೆಲೆನ್ ಸುರುಕ್ ಸರಿಮಲ್ಪಡ್..

ಮೋದಿನ ಮೋನೆ ತೂದ್ ಶೋಭಾ ಕರಂದ್ಲಾಜೆರೆಗ್ ಓಟು ಪಾಡುದಿನ ಕ್ಷೇತ್ರದ ಜನಕುಲು ಇತ್ಯೆ ಪಶ್ಚಾತಾಪ ಮಲ್ತೊಂದುಲ್ಲೆರ್
ಮೂಜಿ ನಾಲ್ ತಿಂಗೊಲುಗೊರ ಅತಿಥಿ ಕಲಾವಿದರಾದ್ ಜಿಲ್ಲೆಗ್ ಬರ್ಪಿನ ಸಂಸದರಾಯಿನ ಶೋಭಾ ಕರಂದ್ಲಾಜೆ ಜಿಲ್ಲೆದ ಸಮಸ್ಯೆದ ಬಗ್ಗೆ ತೆರಿಯೊಂಬಿನ ಪ್ರಯತ್ನಲಾ ಮಲ್ಪಂದಿನವ್ ಜಿಲ್ಲೆದ ಜನಕುಲೆನ ದುರಂತ ಆತುಂಡ್.

ಸಮಯೊಗ್ ಸರಿಯಾದ್ ಕೆಲಸ ಮಲ್ಪರೆಗ್ ವಿಫಲವಾಯಿನ ಹೆದ್ದಾರಿ ಇಲಾಖೆ ತನ್ನನೇ ಕೇಂದ್ರ ಸರಕಾರದ ಅಧೀನಡಿತ್ತುದ್ ಕರ್ತವ್ಯಲೋಪ ಮಲ್ತಿನ‌ ಅಧಿಕಾರಿಲೆನ ವಿರುದ್ದ ಕ್ರಮ ದೆತೊನರೆಗ್ ಸಂಸದರೆಗ್ ಸಾಧ್ಯ ಆವಂದಿನ ಮೆರೆನ ದುರ್ಬಲತೆನ್ ತೋಜಾವುಂಡ್. ಈ ಬಾರಿದ ಮರಿಯಾಲಡ್ ಸಂತೆಕಟ್ಟೆ ಪರಿಸರದ ಜನಕುಲು ಸೇರಿನಂಚ ಜಿಲ್ಲೆದ ಜನಕುಲೆಗ್ ಅಂಡರ್ ಪಾಸ್ ಗುಂಡಿಡ್ದ್ ಸಮಸ್ಯೆ ಆಪಿನವ್ ಖಂಡಿತ. ಈ ಬಗ್ಗೆ ಸಂಸದೆ ಸೂಕ್ತ ಕ್ರಮ ದೆತೊನಿಜಿಡ ದುಂಬುದ ದಿನೊಕ್ಲೆಡ್ ಪಕ್ಷದ ವತಿಡ್ದ್ ಸಾರ್ವಜನಿಕೆರೆನೊಟ್ಟುಗ್ ಸೇರ್ದ್ ಹೋರಾಟ ಮಲ್ಪೊಡಾಪುಂಡ್. ಪಂಡುದ್ ಉಡುಪಿ ಬ್ಲಾಕ್ ಕಾಂಗ್ರೆಸ್ ಸಮಿತಿದ ಅಧ್ಯಕ್ಷರಾಯಿನ ರಮೇಶ್ ಕಾಂಚನ್ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.