ಸುದೀರ್ಘ ಅವಧಿಗ್ ದೇಶೊನ್ ಆಳ್ದಿನ ಕಾಂಗ್ರೆಸ್ ಕೇವಲ ಓಟು ಬ್ಯಾಂಕಿಗಾದ್ ಹಿಂದುಳಿದ ವರ್ಗ ಬೊಕ್ಕ ದಲಿತ ಸಮುದಾಯನ್ ಬಳಕೆ ಮಲ್ತೊಂದುಂಡ್. ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರಕಾರ ‘ಸಬ್ಕೇ ಸಾಥ್ ಸಬ್ಕಾ ವಿಕಾಸ್’ ಮೂಲ ಮಂತ್ರದೊಟ್ಟುಗ್ ಮಾತಾ ವರ್ಗದ ಜನತೆದ ಕಲ್ಯಾಣೊಗ್ ನಾಂದಿ ಪಾಡುದ್ ಜನಕ್ಲೆನ ಮನಸ್ಸುನ್ ಗೆಂದುದುಂಡ್. ಮಾತಾ ವರ್ಗಲೆನ ಏಳಿಗೆ ಬಿಜೆಪಿಡ್ದ್ ಮಾತ್ರ ಸಾಧ್ಯ ಪಂಡುದು ಉಡುಪಿ ವಿಧಾನಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಯಶ್ಪಾಲ್ ಎ. ಸುವರ್ಣ ಪಂಡೆರು.
ಅರು ಕುತ್ಪಾಡಿದ ನವಚೇತನ ಯುವಕ ಮಂಡಲದ ಸಭಾಭವನಡ್ ನಡತಿನ ಕಡೆಕಾರ್ ಗ್ರಾಮ ಪಂಚಾಯತ್ ವ್ಯಾಪ್ತಿದ ಬಿಜೆಪಿ ಕಾರ್ಯಕರ್ತೆರೆನ ಚುನಾವಣಾ ಪೂರ್ವಭಾವಿ ಸಭೆಟ್ ಭಾಗವಹಿಸಾದ್ ಪಾತೆರಿಯೆರು.
ಬಿಜೆಪಿ ನೇತೃತ್ವದ ಕೇಂದ್ರ ಬೊಕ್ಕ ರಾಜ್ಯ ಸರಕಾರ ದಾಖಲೆದ ಅಭಿವೃದ್ಧಿ ಬೊಕ್ಕ ವಿನೂತನ ಯೋಜನೆಲೆನ ಮುಖೇನ ಜನಮಾನಸಡ್ ಪೊಸ ಭರವಸೆ ಮೂಡಿಸಾದುಂಡ್. ಆಂಡ ತಮ್ಮ ಆಡಳಿತಾವಧಿಡ್ ಜನಹಿತೊನ್ ಮದರಿನ ಕಾಂಗ್ರೆಸ್ ಬೇರೆ ರಾಜ್ಯೊಲೆಡ್ ಕೊರ್ತಿನ ಭರವಸೆನ್ ಪೂರೈಸಾವರೆಗ್ ವಿಫಲವಾದ್ ಇತ್ತೆ ಕರ್ನಾಟಕಡುಲಾ ನಕಲಿ ಗ್ಯಾರಂಟಿ ಕಾರ್ಡ್ ವಿತರಣೆ ಮಲ್ಪುನ ಮುಖೇನ ಜನಕ್ಲೆನ ತಾದಿತಪ್ಪಾವುನ ದಿಕ್ಕುಡ್ ಸಾಗೊಂದುಂಡ್ ಪಂಡೆರು.
ಅಭಿವೃದ್ಧಿಗ್ ಕುಡೊಂಜಿ ಪುದರು ಬಿಜೆಪಿ ಪನ್ಪಿಲೆಕ್ಕ ಕೆಲವು ಜನಪರ ಯೋಜನೆಲೆನ ಮುಖೇನ ಇಲ್ಲ್ ಇಲ್ಲ್ ಮುಟ್ಟುದಿನ ಬಿಜೆಪಿದ ಗೇಲು ಶತಸಿದ್ಧ ಪಂಡುದು ಯಶ್ಪಾಲ್ ಸುವರ್ಣ ಪಂಡೆರು.
ಉಡುಪಿ ಶಾಸಕ ಕೆ.ರಘುಪತಿ ಭಟ್ ಪಾತೆರ್ದ್ ರಾಜ್ಯದ ಡಬಲ್ ಎಂಜಿನ್ ಸರಕಾರದ ಸಾಧನೆಲು ಬೊಕ್ಕ ಉಡುಪಿ ವಿಧಾನಸಭಾ ಕ್ಷೇತ್ರದಾದ್ಯಂತ ಆತಿನ ಅಭಿವೃದ್ಧಿ ಕೆಲಸ ಕಾರ್ಯೊಲು ಯಶ್ಪಾಲ್ ಸುವರ್ಣರೆನ ಗೇಲುಗ್ ಶ್ರೀರಕ್ಷೆಯಾವರೆಗುಂಡ್ . ನವ ಉಡುಪಿ ನಿರ್ಮಾಣದ ಕೈಂಕರ್ಯನ್ ನನಲಾತ್ ಮಿತ್ತ್ ಕನವರೆಗ್ ಜನತೆ ಯಶ್ಪಾಲ್ ಸುವರ್ಣರೆನ್ ಮಲ್ಲ ಅಂತರದ ಓಟುಡ್ ಗೆಂದಾವೊಡ್ ಪಂಡೆರು.
ಈ ಸಂದರ್ಭಡ್ ಬಿಜೆಪಿ ರಾಜ್ಯ ಎಸ್.ಸಿ. ಮೋರ್ಚಾ ಪ್ರಧಾನ ಕಾರ್ಯದರ್ಶಿ ದಿನಕರ ಬಾಬು, ಬಿಜೆಪಿ ಜಿಲ್ಲಾ ಕೋಶಾಧಿಕಾರಿ ಪ್ರವೀಣ್ ಕುಮಾರ್ ಶೆಟ್ಟಿ ಕಪ್ಪೆಟು, ಉಡುಪಿ ನಗರ ಪ್ರಧಾನ ಕಾರ್ಯದರ್ಶಿ ದಿನೇಶ್ ಅಮೀನ್, ಅಂಬಲಪಾಡಿ-ಕಡೆಕಾರು ಮಹಾಶಕ್ತಿ ಕೇಂದ್ರದ ಸಂಚಾಲಕ ರಾಜೇಂದ್ರ ಪಂದುಬೆಟ್ಟು, ಮಾಜಿ ತಾ.ಪಂ. ಸದಸ್ಯೆ ಶಿಲ್ಪಾ ರವೀಂದ್ರ ಕೋಟ್ಯಾನ್, ಶಕ್ತಿ ಕೇಂದ್ರ ಅಧ್ಯಕ್ಷ ಅಶೋಕ್ ಬಂಡಾರಿ, ಬೂತ್ ಅಧ್ಯಕ್ಷರು, ಕಡೆಕಾರು ಗ್ರಾಮ ಪಂಚಾಯತ್ ಸದಸ್ಯರು ಬೊಕ್ಕ ಕಾರ್ಯಕರ್ತೆರು ಉಪಸ್ಥಿತರಿತ್ತೆರ್.
by 