ಉಡುಪಿ ನಗರ ಮಹಿಳಾ ಹೈಟೆಕ್ ಮೀನು ಮಾರುಕಟ್ಟೆಗ್ ಶಾಸಕ ಯಶ್ಪಾಲ್ ಸುವರ್ಣ ಭೇಟಿ
ಮೀನುಗಾರ ಮಹಿಳೆಯೆರೆನ ಅಗತ್ಯ ಬೇಡಿಕೆಲೆನ್ ಈಡೇರಿಸಾವುನ ಭರವಸೆ.
ಉಡುಪಿ: ಉಡುಪಿ ನಗರ ಮಹಿಳಾ ಹೈಟೆಕ್ ಮೀನುಮಾರುಕಟ್ಟೆಗ್ ಉಡುಪಿ ವಿಧಾನಸಭಾ ಕ್ಷೇತ್ರದ ಶಾಸಕ ಯಶ್ಪಾಲ್ ಸುವರ್ಣ ಉಡುಪಿ ನಗರಸಭೆತ್ತ ಅಧಿಕಾರಿಲೆನೊಟ್ಟುಗ್ ಭೇಟಿ ಕೊರ್ದ್ , ಮೀನುಗಾರ ಮಹಿಳೆಯರೆಡ್ದ್ ಮನವಿನ್ ಸ್ವೀಕರಿಸಸದ್ ಮೀನುಗಾರ ಮಹಿಳೆಯೆರೆನ ಅಗತ್ಯ ಬೇಡಿಕೆಲೆನ್ ಈಡೇರಿಸಾವುನ ಭರವಸೆ ಕೊರಿಯೆರು.
ಮೀನು ಮಾರುಕಟ್ಟೆಡ್ ಹೋಲ್‍ಸೇಲ್ ಮೀನುವ್ಯಾಪಾರ ಮಲ್ಪುನ ಜಾಗೆಡ್ ಗೋಡೆ ಬಿರುಕುಬೂರ್ದಿತ್ತುದ್ ಮರಿಯಾಲಡ್ ನೀರು ಸೋರೊಂದುಂಡ್ ಬೊಕ್ಕ ಪ್ರಾಂಗಣಡ್ ನೀರು ಉಂತುನವ್ವೆನ್ ತಡೆ ಮಲ್ಪೊಡ್. ಶೌಚಾಲಯ ಬೊಕ್ಕ ಅಯಿತ್ತ ಪಿಟ್ ನ್ ವಿಸ್ತಾರ ಮಲ್ಪೊಡ್, ಮೀನುಕಟ್ಟಿಂಗ್ ಪ್ರಾಂಗಣನ್ ಮಹಿಳೆಯೆರೆಗ್ ಅನುಕೂಲ ಆಪಿಲೆಕ್ಕ ಸಮತಟ್ಟು , ನಗರ ಸಭೆಡ್ದ್ ನೀರ ಸಂಪರ್ಕ ಕಲ್ಪಿಸಾವೊಡ್, ಮಾರುಕಟ್ಟೆದ ಮುಂಭಾಗದ ಉಗ್ಗೆಲುಗ್ ಆವರಣ ಗೋಡೆ ನಿರ್ಮಾಣ ಮಲ್ಪೊಡ್. ಮಹಿಳೆಯೆರೆಗ್ ಡ್ರೆಸ್ಸಿಂಗ್ ಕೊಠಡಿ ನಿರ್ಮಾಣ ಮಲ್ಪೊಡ್, ಮಿತ್ತಮಹಡಿಡ್ ವಿಶ್ರಾಂತಿ ಕೊಠಡಿ, ಮಿತ್ತಮಹಡಿಡ್ ಶೌಚಾಲಯ ನಿರ್ಮಾಣ ಮಲ್ಪೊಡ್. ಜನರೇಟರ್ & ಸಿಸಿ ಟಿವಿ ಸೌಲಭ್ಯ, ಪಾರ್ಕಿಂಗ್ ವ್ಯವಸ್ಥೆ ಸೇರಿನಂಚ ಬೇತೆ ಬೇತೆ ಬೇಡಿಕೆಲೆದ ಮನವಿನ್ ಮೀನುಗಾರ ಮಹಿಳಾ ಮುಖಂಡೆರು ಶಾಸಕರೆಗ್ ಸಲ್ಲಿಸಾಯೆರು.
ಉಡುಪಿ ತಾಲೂಕು ಮಹಿಳಾ ಹಸಿಮೀನುಮಾರಾಟಗಾರರ ಸಂಘದ ಅಧ್ಯಕ್ಷೆ ಬೇಬಿ ಎಚ್.ಸಾಲ್ಯಾನ್ ಆರು ಶಾಸಕರಾದ್ ಉಡುಪಿ ಮೀನುಮಾರುಕಟ್ಟೆಗ್ ಪ್ರಪ್ರಥಮವಾದ್ ಆಗಮಿಸಾಯಿನ ಯಶ್ಪಾಲ್ ಸುವರ್ಣ ಅರೆನ್ ಮಹಿಳಾ ಮೀನುಗಾರರ ಪರವಾದ್ ಅಭಿನಂದನೆ ಮಲ್ತೆರ್. ಈ ಪೊರ್ತುಡ್ ಪಾತೆರಿನ ಆರು, ಶಾಸಕ ಯಶ್ಪಾಲ್ ಸುವರ್ಣ ಮೇರ್ ಮೀನುಗಾರ ಮಹಿಳೆಯರೆನ ಸಮಸ್ಯೆಲೆಗ್ ಸದಾ ಸ್ಪಂದನೆ ಕೊರೊಂದುಲ್ಲೆರ್. ಫೆಡರೇಶನ್, ಮಹಾಲಕ್ಷ್ಮೀ ಬ್ಯಾಂಕ್ ಅಭಿವೃದ್ಧಿದ ನೇತೃತ್ವವಹಿಸಾದಿನ ಯಶ್ಪಾಲ್ ಶಾಸಕರಾದ್ ಉಡುಪಿ ಕ್ಷೇತ್ರದ ಜನತೆದ ಸರ್ವಾಂಗೀಣ ಅಭಿವೃದ್ಧಿಗ್ ಶ್ರಮಿಸಾವೆರ್ ಪನ್ಪಿನ ದೃಡವಿಶ್ವಾಸ ಉಂಡು ಪಂಡೆರು.
ಶಾಸಕ ಯಶ್ಪಾಲ್ ಸುವರ್ಣ ಪಾತೆರ್ದ್ , ಉಡುಪಿ ನಗರ ಮಹಿಳಾ ಹೈಟೆಕ್ ಮೀನುಮಾರುಕಟ್ಟೆದ ಅಗತ್ಯ ಕಾಮಗಾರಿಲೆನ್ ಶೀಘ್ರವಾದ್ ಪೂರ್ಣ ಮಲ್ಪುಂಡ್. ಮಹಿಳೆಯೆರೆನ ಆರೋಗ್ಯದ ದೃಷ್ಠಿಡ್ ಶುದ್ಧ ಪರ್ಪಿನ ನೀರಿನ ಘಟಕ, ಪ್ರಥಮ ಚಿಕಿತ್ಸೆ ಘಟಕನ್ ಶೀಘ್ರವಾದ್ ಸ್ಥಾಪನೆ ಮಲ್ಪುಂಡ್ ಪಂಡೆರು.
ಈ ಸಂದರ್ಭಡ್ ನಗರಸಭಾ ಸದಸ್ಯರಾಯಿನ ಶ್ರೀಮತಿ ಮಾನಸ ಸಿ. ಪೈ, ನಗರಸಭೆ ಪೌರಾಯುಕ್ತರಾಯಿನ ಶ್ರೀ ರಮೇಶ್ ಪಿ. ನಾಯಕ್, ಎ ಇ ಇ ಯಶವಂತ ಪ್ರಭು, ಉಡುಪಿ ತಾಲೂಕು ಮಹಿಳಾ ಹಸಿಮೀನುಮಾರಾಟಗಾರರ ಸಂಘದ ಪ್ರಧಾನ ಕಾರ್ಯದರ್ಶಿ ಲಕ್ಷ್ಮೀ ಆನಂದ್, ಜಯಂತಿ ಗುರುದಾಸ್ ಬಂಗೇರ, ಲೀಲಾ ಕುಂದರ್, ಸುಂದರಿ ಸಾಲ್ಯಾನ್, ವನಜ ಸಾಲ್ಯಾನ್, ಮಾಲತಿ ಮೊಕುಲು ಮಾತಾ ಉಪಸ್ಥಿತರಿತ್ತೆರ್.
by 