ಉಡುಪಿ : ಜಾದೂಗಾರ ಕುದ್ರೋಳಿ ಗಣೇಶ್ ಮೆರೆನ ಪೊಸ ಪ್ರಯೋಗ ” ಮೈಂಡ್ ಮಿಸ್ಟರಿ ” ಪ್ರದರ್ಶನದ ಪೋಸ್ಟರ್ ನ್ ಪ್ರಸಿದ್ದ ಉದ್ಯಮಿ ನಾಡೋಜ ಡಾ.ಜಿ.ಶಂಕರ್ ಮೇರು ಉಡುಪಿಡ್ ಮಲ್ತೆರ್. ಶ್ಯಾಮಿಲಿ ಸಭಾಂಗಣಡ್ ನಡತಿನ ಪತ್ರಿಕಾ ಗೋಷ್ಠಿಡ್ ಜಾದೂ ತಂತ್ರಗಾರಿಕೆಡ್ದ್ ಪೋಸ್ಟರ್ ಬುಡುಗಡೆ ಮಲ್ತೆರ್. ಡಾ.ಜಿ.ಶಂಕರ್ ಮೇರು ಮಂತ್ರದಂಡನ್ ತಟ್ಟಿನಪಗ ಕಾಲಿ ಪೆಟ್ಟಿಗೆಡ್ ಚಿಮ್ಮಿನ ರಿಬ್ಬನ್ ರಾಶಿಡ್ ಪೋಸ್ಟರ್ ಮೂಡ್ದ್ ಬತ್ತುಂಡ್..
ಈ ಸಂದರ್ಭಡ್ ಪಾತೆರಿನ ಡಾ.ಜಿ.ಶಂಕರ್ ಸದಾ ಪೊಸತನದ ಮೂಲಕ ಜನಪ್ರಿಯರಾದುಪ್ಪುನ ಕುದ್ರೋಳಿ ಗಣೇಶ್ ಅಂತರರಾಷ್ಟ್ರೀಯವಾದ್ ಚರ್ಚೆಡುಪ್ಪುನ ಮೆಂಟಲಿಸಮ್ ಕಲೆಟ್ ನಿಪುಣೆರಾದ್ ಈ ಕಲೆಟ್ ಪಳಗಿದಿನವ್ ಮೆಚ್ಚುನ ವಿಚಾರ.ಈ ಕಲಾ ಪ್ರದರ್ಶನದ ಸುರುತ ಸಾರ್ವಜನಿಕ ಪ್ರದರ್ಶನನ್ ಉಡುಪಿಡ್ ಆಯೋಜನೆ ಮಲ್ದಿತ್ತುದ್ ಪ್ರೇಕ್ಷಕೆರೆಗ್ ಪೊಸ ಅನುಭವ ಸಿಕ್ಕಡ್ ಪಂಡುದು ಶುಭ ಹಾರೈಸಿಯೆರು.
ಜಾದೂಗಾರ ಕುದ್ರೋಳಿ ಗಣೇಶ್ ಕಾರ್ಯಕ್ರಮದ ವಿಶೇಷತೆಯದ ಬಗ್ಗೆ ವಿವರಣೆ ಕೊರಿಯೆರು. ಮೈಂಡ್ ರೀಡಿಂಗ್, ಟೆಲಿಪತಿ , ನ್ಯೂರೋ ಲಿಂಗ್ವಿಸ್ಟಿಕ್ ಪ್ರೋಗ್ರಾಮಿಂಗ್, ಸಮ್ಮೊಹಿನಿ ಇಂಚ ಸುಪ್ತ ಮನಸ್ಸುದ ಶಕ್ತಿದ ರಂಗ ರೂಪಾತ್ಮಕ ಪ್ರಯೋಗನೇ ಮೈಂಡ್ ಮಿಸ್ಟರಿ. ಆಷ್ಟ್ರೇಲಿಯಾ,ಕಿನ್ಯಾ,ದುಬಾಯಿ,ಕತಾರ್ ದೇಶಲೆಡ್ ಈ ಪ್ರಯೋಗ ಕೊರ್ದಿತ್ತುದ್ ಸುರುತ ಸರ್ತಿ ಉಡುಪಿಡ್ ಸಾರ್ವಜನಿಕ ಪ್ರದರ್ಶನ ಕೊರೊಂದುಲ್ಲೆ ಪಂಡುದು ತೆರಿಪಾಯೆರ್.
ಈ ಸಂದರ್ಭಡ್ ಕುದ್ರೋಳಿ ಗಣೇಶ್ ಮೇರು ಪ್ರದರ್ಶನ ಮಲ್ತಿನ ಮೆಂಟಲಿಸಮ್ ಕಲೆತ್ತ ಕೆಲವು ಪ್ರಾತ್ಯಕ್ಷಿತೆ ವೀಕ್ಷಣೆ ಮಲ್ತುದ್ ಪರ್ತಕರ್ತೆರು ಅಚ್ಚರಿಯಾತೆರು.
ಕಾರ್ಯಕ್ರಮದ ಸಂಯೋಜಕೆರಾಯಿನ ವಿಕ್ರಂ ಶೆಟ್ಟಿ ಸ್ವಾಗತ ಮಲ್ತೆರು. ಮೈಂಡ್ ಮಿಸ್ಟರಿ ಪ್ರದರ್ಶನ ಡಿಸೆಂಬರ್ 21 ಬೊಕ್ಕ 22 ಗ್ ಉಡುಪಿದ ಯಕ್ಷಗಾನ ಕಲಾರಂಗದ ಐವೈಸಿ ಸಭಾಂಗಣಡ್ ನಡಪರೆಗಿತ್ತುದ್ ಸುರುತ ದಿನ ಬಯ್ಯಗ್ 6.30 ಕ್ಕ್ ಬೊಕ್ಕ ರಡ್ಡನೇ ದಿನ ಮಧ್ಯಾಹ್ನ 3.30 ಕ್ಕ್ ಬೊಕ್ಕ ಬಯ್ಯಗ್ 6.30 ಕ್ ಇಂಚ ರಡ್ಡ್ ದಿನಟ್ ಮೂಜಿ ಪ್ರದರ್ಶನ ನಡಪರೆಗುಂಡ್ ಪಂಡೆರು. ಮೆಂಟಲಿಸಮ್ ಕಲೆತ್ತ ವೀಕ್ಷಣೆಗ್ ಬೋಡಾಪಿನ ಏಕಾಗ್ರತೆ ಬೊಕ್ಕ ಗಂಬೀರತೆನ್ ಪರಿಗಣಿಸಾದ್ ಕಾರ್ಯಕ್ರಮದ ಪ್ರವೇಶ 16 ವರ್ಷ ಮಿತ್ತುದ ಪ್ರೇಕ್ಷಕೆರೆಗ್ ಮಾತ್ರ ಇಪ್ಪುಂಡ್ ಪಂಡುದು ಸೂಚನೆ ಕೊರಿಯೆರು.
by 