ಅಭಯಹಸ್ತ ಟ್ರಸ್ಟ್ ಗ್ ರಾಜ್ಯೋತ್ಸವ ಗರಿ

ಉಡುಪಿ: 2020 ಮಾರ್ಚ್ ಕೊರೊನಾ ಮಹಾಮಾರಿ ಸಂದರ್ಭಡ್ ರಕ್ತದಾನ ಶಿಬಿರದ ಆಯೋಜನೆ ಬೊಕ್ಕ ತುರ್ತು ಪೂರೈಕೆಗ್ ಉಡುಪಿ ಜಿಲ್ಲೆಡ್ ಸ್ಥಾಪನೆ ಆಯಿನ ಸಂಸ್ಥೆ ಅಭಯಹಸ್ತ ಚಾರಿಟೇಬಲ್ ಟ್ರಸ್ಟ್ ರಿ. ಉಡುಪಿಗ್ 2023ತ್ತ ಉಡುಪಿ ಜಿಲ್ಲಾ ರಾಜ್ಯೋತ್ಸವದ ಗರಿ ತಿಕ್ಕುದುಂಡ್.

ಈ ಸಂಸ್ಥೆ ಇತ್ತೆ ಮೂಜನೇ ವರ್ಷೊಗ್ ಪಜ್ಜೆ ದೀದ್ ಉಡುಪಿ , ದ.ಕ, ಉ.ಕ, ಬೆಂಗಳೂರು ಬೊಕ್ಕ ವಿದೇಶೊಡ್ ( ಯು ಎ ಇ) ಸೇರ್ದ್ 170 ನೆತ್ತೆರ್ದಾನ ಶಿಬಿರೊನ್ ಬೇತೆ ಬೇತೆ ಸಂಘಟನೆದ ‌ಸಹಕಾರಡ್ ಆಯೋಜನೆ‌ ಮಲ್ದುಂಡ್. ರೋಗಿಲೆನ ನಿತ್ಯ ತುರ್ತು ಲೆಪ್ಪುಗ್ ಸ್ಪಂದಿಸಾದ್ ಬೇತೆ ಬೇತೆ ಗುಂಪುದ ರಕ್ತದಾನಿಲೆನ್ ಕರ್ನಾಟಕ‌ ರಾಜ್ಯದ ಬೇತೆ ಬೇತೆ ಆಸ್ಪತ್ರೆಲೆಗ್ (ವಿಶೇಷವಾದ್ ಉಡುಪಿ , ದ.ಕ , ಉ.ಕ ಬೊಕ್ಕ ಬೆಂಗಳೂರು) ಸಕಾಲೊಡ್ ಪೂರೈಸಾದ್ ಕೆಲವು ರೋಗಿಲೆಗ್ ಪುನರ್ಜನ್ಮ ಕೊರ್ದ್ ಅಕ್ಲೆನ ಕುಟುಂಬದಕ್ಲೆನ ಮೋನೆಡ್ ಮಂದಹಾಸ ಮೂಡಿಸಾಯಿನ ಪೆರ್ಮೆದ ಸಂಸ್ಥೆ. ಇದಮುಟ್ಟ ನೆತ್ತೆರ್ ದಾನ ಶಿಬಿರದ ಮೂಲಕ ಬೊಕ್ಕ ನಿತ್ಯ ತುರ್ತು ರಕ್ತದಾನಿಲೆನ ಪೂರೈಕೆದೊಟ್ಟುಗ್ ಸರಾಸರಿ 20000 ಯೂನಿಟ್ ನೆತ್ತೆರುನ್ ಕೇವಲ ಮೂಜರೆ ವರ್ಷಡ್ ಸಂಗ್ತಹಿಸಾಯಿನ ರಾಜ್ಯದ ಪ್ರತಿಷ್ಠಿತ ಸಂಸ್ಥೆ ಪನ್ಪಿನ ಪುಗಾರ್ತೆಗ್ ಪಾತ್ರ ಆತುಂಡ್. ‌ ಒವ್ವೇ ಫಲಾಪೇಕ್ಷೆ ಇಪ್ಪಂದೆ ಸಾರ ಸಾರ ಜನಕ್ಲೆನ ಬದುಕುಗ್ ಕಾರಣವಾಯಿನ ಈ ಸಂಸ್ಥೆನ್ ಕರ್ನಾಟಕ ರಾಜ್ಯ ‌ಆರೋಗ್ಯ ಇಲಾಖೆ 2021ಡ್ ಜಾಸ್ತಿ ನೆತ್ತೆರ್ ರಾಜ್ಯೊಡೇ ಸಂಗ್ರಹಿಸಾಯಿನ ಸಂಸ್ಥೆ ಪಂಡುದು ಬೆಂಗಳೂರುಡ್ ಗುರುತಿಸಾದ್ ಸಮ್ಮಾನ ಮಲ್ದುಂಡ್. ಸಂಸ್ಥೆ್ ಸ್ಥಾಪಕೆರು ಬೊಕ್ಕ ಅಧ್ಯಕ್ಷೆರು ಆಯಿನ ನೆತ್ತೆರುದ ಆಪತ್ಬಾಂದವೆ ಸತೀಶ್ ಸಾಲ್ಯಾನ್ ಮಣಿಪಾಲ್ ( ನೆತ್ತೆರ್ದಾನ ಕ್ಷೇತ್ರಡ್ ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪಡೆಯಿನ ಸಾಧಕೆರು) ಅರೆನ್ 30 ಗುಲಾ ಜಾಸ್ತಿ ಸಂಘ ಸಂಸ್ಥೆಲು ಗುರುತಿಸಾದ್ ಸಮ್ಮಾನ ಮಲ್ದುಂಡ್.. ಪ್ರಶಸ್ತಿ ಪ್ರದಾನ ಸಮಾರಂಭಡ್ ಉಪಾಧ್ಯಕ್ಷ ಶ್ರೀ ದಿನೇಶ್ ಹೆಗಡೆ ಅತ್ರಾಡಿ, ಖಜಾಂಚಿ ಡಾ.ಬಾಲಕೃಷ್ಣ ಮದ್ದೋಡಿ ಬೊಕ್ಕ ಅಭಯಹಸ್ತ ಚಾರಿಟೇಬಲ್ ಟ್ರಸ್ಟ್ ಸದಸ್ಯೆರು ಉಪಸ್ಥಿತರಿತ್ತೆರು.