ಶ್ರೀ ವೆಂಕಟರಮಣ ಕ್ರೆಡಿಟ್ ಕೋ-ಆಪರೇಟಿವ್ ಸೊಸೈಟಿದ ವರ್ಷದ ಮಹಾಸಭೆ.

ಶ್ರೀ ವೆಂಕಟರಮಣ ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿ ನಿ ಸುಳ್ಯ 1.51 ಕೋಟಿ ರೂಪಾಯಿರ್ತ್ ಜಾಸ್ತಿ ಲಾಭ, ಪದುಕೆರೆಗ್ 20% ಡಿವಿಡೆಂಟ್

ಶ್ರೀ ವೆಂಕಟರಮಣ ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿ ನಿ ಸುಳ್ಯ ಉಂದೆತ 2022-23 ನೇ ಸಾಲ್‌ತ ವರ್ಸೊದ ಮಹಾಸಭೆ ಇನಿ ತಾರೀಕ್ 16-09-2023 ಸನಿಯಾರ ಸುಳ್ಯತ ಕೊಡಿಯಾಲ್ ಬೈಲ್‌ಟ್ ಇಪ್ಪುನ ಗೌಡ ಸಮುದಾಯ ಭವನ ಟ್ ನಡತ್ಂಡ್. ಸಭೆತ ಗುರ್ಕಾರ್ಮೆನ್ ಸೊಸೈಟಿತ ಗುರ್ಕಾರೆರಾಯಿನ ಶ್ರೀ ಪಿ ಸಿ ಜಯರಾಮ ವೈಸೊಂದಿತ್ತೆರ್. ಸುಳ್ಯತ ಗೌಡರ ಯುವ ಸೇವಾ ಸಂಘರ್ದ್ ಪ್ರವರ್ತಿಸತ್ ಉಂಡಾಯಿನ ಶ್ರೀ ವೆಂಕಟರಮಣ ಸೊಸೈಟಿಗ್ ಉಂದು 25 ನೇ ವರ್ಸ. ಈ ವರ್ಸತ ಮಾರ್ಚ್ 31 ತ ಅಕೇರಿಗ್ ಒಟ್ಟು 16,960 ಪದುಕೆರ್ ಇತ್ತ್‌ತ್ ಒಟ್ಟು 4.26 ಕೋಟಿ ಪಾಲ್ ಬಂಡವಾಳ ಬತ್ತ್‌ದ್, ಈ ವರ್ಸ 156.53 ಕೋಟಿ ರೂಪಾಯಿ ಡಿಪಾಸಿಟ್ ಒಟ್ಟಾತ್ಂ‌ಡ್. ಅಂಚೆನೇ 145.43 ಕೋಟಿ ರೂಪಾಯಿ ಸಾಲ ಕೊರ್ತ್ಂ‌ಡ್. ಅಂಚಾದ್ ಈ ವರ್ಸಡ್ 1.51 ಕೋಟಿ ರೂಪಾಯಿರ್ತ್ ಜಾಸ್ತಿ ಲಾಭ ಬತ್ತ್ಂಡ್ ಪಂದ್ ಗುರ್ಕಾರೆರ್ ತೆರಿಪಾಯೆರ್. ಸೊಸೈಟಿತ ಲೆಕ್ಕ ಪರಿಶೋಧನೆ ‘ಎ’ ತರಗತಿ ಆತ್ಂಡ್, ಅಂಚೆನೇ ಸೊಸೈಟಿ ಪ್ರತಿ ವರ್ಸಲ ಲಾಭಟೇ ನಡತೊಂದುಂಡು. ಈ ವರ್ಸ ಪದುಕೆರೆಗ್ 20% ಡಿವಿಡೆಂಟ್ ಕೊರ್ಪಂದ್ ತೆರಿಪಾಯೆರ್. ಸೊಸೈಟಿಗ್ ಇತ್ತೆ ಒಟ್ಟು 22 ಶಾಖೆ ಉಂಡು, ಈ ವರ್ಸ ಪೊಸ 3 ಶಾಖೆ ಮಲ್ತ್‌ತ್ ಒಟ್ಟು 25 ಶಾಖೆಲೆನ್ ಮಲ್ಪುವಂದ್ ಪಂಡೆರ್.

ಲೇಸ್‌ಟ್ 2022-23 ನೇ ಸಾಲ್ ತ ಎಸ್.ಎಸ್.ಎಲ್.ಸಿ ಬುಕ ಪಿಯುಸಿ ಪರೀಕ್ಷೆಟ್ 90% ರ್ತ್ ಜಾಸ್ತಿ ಅಂಕೊ ಪಡೆಯಿನ ಪದುಕೆರೆನ 65 ಜೋಕುಲೆಗ್ ಇನಾಮು ಕೊರ್ತ್ ಮಾನಾದಿಗೆ ಮಲ್ತೆರ್. ಅಂಚೆನೇ ಸಹಕಾರ ರತ್ನ ಪ್ರಶಸ್ತಿ ಪಡೆಯಿನ ಸೊಸೈಟಿತ ದುಂಬುತ ಗುರ್ಕಾರೆರಾಯಿನ ಶ್ರೀ ನಿತ್ಯಾನಂದ ಮುಂಡೋಡಿ ಮೆರೆಗ್ ಮಾನಾದಿಗೆ ಮಲ್ತೆರ್. ಅಕೇರಿಗ್ ಸೊಸೈಟಿತ ಒತ್ತು ಗುರ್ಕಾರೆರ್ ಶ್ರೀ ಮೋಹನ್‌ರಾಂ ಸುಳ್ಳಿ ಬತ್ತಿಂಚಿನ ಬಿನ್ನೆರೆಗ್, ಪದುಕೆರೆಗ್, ಸಿಬ್ಬಂದಿಲೆಗ್ ಅಂಚೆನೇ ಸೊಸೈಟಿತ ಬುಲೆಚ್ಚಿಲ್‍ಗ್ ಕಾರಣ ಆಯಿನ ಮಾತೆರೆಗ್ಲ ಸೊಲ್ಮೆ ಸಂದಾಯೆರ್. ಮಿತ್ತರ್ಮೆಟ್ ಸೊಸೈಟಿತ ಮಾತ ನಿರ್ದೇಶಕೆರ್, ಸಿ.ಇ.ಓ ಕೆ.ಟಿ ವಿಶ್ವನಾಥ, ಜಿ.ಎಂ ಚಂದ್ರಶೇಖರ ಎಂ ಇತ್ತೆರ್. ಲೇಸ್‌ಡ್ ಸೊಸೈಟಿತ ಮಾಂತ ಸಿಬ್ಬಂದಿಲ್ ಬುಕ ಪದುಕೆರ್ ಪಾಲ್ ಪಡೆದಿತ್ತೆರ್. ಸಭೆರ್ತ್ ಬುಕ್ಕ ಬತ್ತ್‌ನ ಮಾತೆರೆಗ್ಲ ವನಸ್‌ತ ಅಟ್ಟನೆ ಇತ್ಂಡ್.

ವರದಿ : ಜಗದೀಶ ಗೌಡ ಕಲ್ಕಳ