ಕ್ರಿಸ್ಮಸ್ ಸ್ನೇಹ ಕೂಟ..

ಉಡುಪಿ: ಹಿಂಸೆಗ್ ಉತ್ತರವಾದ್ ಪ್ರೀತಿನ್ ತೆರಿಪಾವರೆಗ್ ಯೇಸು ಕ್ರಿಸ್ತೆರು ಭೂಮಿಡ್ ಪುಟ್ಟುಧ್ ಬತ್ತೆರು ಪಂಡುದು ಉಡುಪಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷರಾಯಿನ ಅತಿ ವಂ|ಡಾ|ಜೆರಾಲ್ಡ್ ಐಸಾಕ್ ಲೋಬೊ ಪಂಡೆರು.
ಆರು ಮಂಗಳವಾರ ಉಡುಪಿ ಧರ್ಮಪ್ರಾಂತ್ಯದ ವತಿಡ್ದ್ ಕಕ್ಕುಂಜೆ ಅನುಗ್ರಹ ಪಾಲನಾ ಕೇಂದ್ರಡ್ ಆಯೋಜನೆ‌ಮಲ್ದಿನ ಮಾಧ್ಯಮ ಮಿತ್ರೆರ್ನೊಟ್ಟುಗ್ ಕ್ರಿಸ್ಮಸ್ ಸ್ನೇಹ ಕೂಟದ ಅಧ್ಯಕ್ಷತೆಡಿತ್ತುದ್ ಪಾತೆರಿಯೆರು .
ಇಡೀ ಮನುಕುಲ ಜಾತಿ ಮತ ಬೇಧ ಇಪ್ಪಂದೆ ಆಚರಣೆ ಮಲ್ಪುನ ಪರ್ಬ ಕ್ರಿಸ್ತ ಜಯಂತಿಯಾದಿತ್ತುದ್ ನೆತ್ತ ಕೇಂದ್ರ ವ್ಯಕ್ತಿ ಯೇಸು ಆದುಲ್ಲೆರ್. ಯೇಸು ಸ್ವಾಮಿ ಈ ಜಗತ್ತುಗ್ ಕೊರಿನ ಕಾಣಿಕೆ ಶಾಂತಿ ಸಮಾಧಾನ ಆಂಡ ಇನಿ ಸಮಾಜಡ್ ಅಶಾಂತಿ, ಅಸಮಾನತೆ, ಅನ್ಯಾಯ, ಬಡತನ, ನಿರುದ್ಯೋಗ, ಹಿಂಸೆ ಶೋಷಣೆ, ರೋಗರುಜಿ, ದ್ವೇಷ ಯುದ್ದ, ಅತ್ಯಾಚಾರ, ಮತಾಂದತೆ, ಪರಮತ ಅಸಹಿಷ್ಣುತೆ ಇತ್ಯಾದಿಲೆನ್ ತೂವೊಂದಿತ್ತುದ್ ಉಂದೆನ್ ಗೆಂದಾರೆಗ್ ಪ್ರೀತಿಡ್ ಮಾತ್ರ ಸಾಧ್ಯ. ಶಾಂತಿ ಇತ್ತಿನಲ್ಪ ಮಾತ್ರ ಭಾವೈಕ್ಯತೆ ಸಾಮರಸ್ಯ, ಸಹಬಾಳ್ವೆ, ಸಮಾಧಾನ ಸಾಧ್ಯ ಪ್ರತಿಯೊರಿಲಾ ಶಾಂತಿದ ದೂತೆರಾಯೆರೆಡ ಶಾಂತಿ ಪ್ರೀತಿದ ಭಾರತನ್ ಕಟ್ಟರೆಗ್ ಸಾಧ್ಯ ಪಂಡೆರು.
ಮುಖ್ಯ ಅತಿಥಿಲಾದ್ ಮಲಬಾರ್ ಗೋಲ್ಡ್ & ಡೈಮಂಡ್ಸ್ ದ ಗೆಸ್ಟ್ ರಿಲೇಶನ್ ಮ್ಯಾನೇಜರ್ ರಾಘವೇಂದ್ರ ನಾಯಕ್, ಉಡುಪಿ ಜಿಲ್ಲಾ ವಾರ್ತಾಧಿಕಾರಿ ಮಂಜುನಾಥ ಹೆಚ್, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಅಲೆವೂರು ಶುಭ ಹಾರೈಸಿಯೆರು.
2023ನೇ ಸಾಲುದ ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಪತ್ರಕರ್ತ ಹರೀಶ್ ಸುವರ್ಣ ಬಲಾಯಿಪಾದೆ ಅರೆಗ್ ಮಾನಾದಿಗೆ ಮಲ್ತೆರು.
ಉಡುಪಿ ಧರ್ಮಪ್ರಾಂತ್ಯದ ವಿಕಾರ್ ಜನರಲ್ ಮೊನ್ಸಿಂಜ್ಞೊರ್ ಫರ್ಡಿನಾಂಡ್ ಗೊನ್ಸಾಲ್ವಿಸ್, ಕುಲಪತಿ ಡಾ|ರೋಶನ್ ಡಿಸೋಜಾ, ಸಾರ್ವಜನಿಕ ಸಂಪರ್ಕಾಧಿಕಾರಿ ವಂ|ಡೆನಿಸ್ ಡೆಸಾ, ಧರ್ಮಗುರುಕುಲಾಯಿನ ವಂ|ವಲೇರಿಯನ್ ಮೆಂಡೊನ್ಸಾ, ವಂ|ಚಾರ್ಲ್ಸ್ ಮಿನೇಜಸ್, ಅನುಗ್ರಹ ಪಾಲನಾ ಕೇಂದ್ರದ ನಿರ್ದೇಶಕ ವಂ|ವಿನ್ಸೆಂಟ್ ಕ್ರಾಸ್ತಾ ಉಪಸ್ಥಿತರಿತ್ತೆರು.
ಉಜ್ವಾಡ್ ಪತ್ರಿಕೆದ ಸಂಪಾದಕರಾಯಿನ ವಂ|ಆಲ್ವಿನ್ ಸಿಕ್ವೇರಾ ಸ್ವಾಗತಿಸಾದ್, ಮಾಧ್ಯಮ ಸಂಯೋಜಕರಾಯಿನ ಮೈಕಲ್ ರೊಡ್ರಿಗಸ್ ವಂದಿಸಾಯೆರು. ವಂ|ಸಿರಿಲ್ ಲೋಬೊ ಕಾರ್ಯಕ್ರಮ ನಿರೂಪಣೆ ಮಲ್ತೆರು.