ಉಡುಪಿ: ಮಹಾಲಕ್ಷ್ಮೀ ಕೋ ಆಪರೇಟಿವ್ ಬ್ಯಾಂಕ್ ನಿ. ಉಡುಪಿದ 2022-23ನೇ ಸಾಲುದ ಸರ್ವತೋಮುಖ ಅಭಿವೃದ್ಧಿಗಾದ್ ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಡ್ದ್ ಕೊರ್ಪಿನ ಸಾಧನಾ ಪ್ರಶಸ್ತಿ ಸತತವಾದ್ 7 ನೇ ಸರ್ತಿಗ್ ತಿಕ್ಕುದುಂಡ್.
ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕುದ ವರ್ಷದ ಮಹಾಸಭೆಟ್ ಡಾ| ಎಂ . ಎನ್. ರಾಜೇಂದ್ರ ಕುಮಾರ್ ಮೇರ್ ಬ್ಯಾಂಕುದ ಅಧ್ಯಕ್ಷೆರಾಯಿನ ಶ್ರೀ ಯಶ್‍ಪಾಲ್ ಎ. ಸುವರ್ಣ ಬೊಕ್ಕ ಪ್ರಧಾನ ವ್ಯವಸ್ಥಾಪನಾ ನಿರ್ದೇಶಕೆರಾಯಿನ ಶ್ರೀ ಜಗದೀಶ್ ಮೊಗವೀರ್ ಮೊಕ್ಲೆಗ್ ಪ್ರಶಸ್ತಿ ಕೊರಿಯೆರ್. ಬ್ಯಾಂಕುದ ಸಹಾಯಕ ಪ್ರಧಾನ ವ್ಯವಸ್ಥಾಪಕೆರಾಯಿನ ಶ್ರೀಮತಿ ಶಾರಿಕಾ ಕಿರಣ್ ಉಪಸ್ಥಿತರಿತ್ತೆರು.
ಮಹಾಲಕ್ಷ್ಮೀ ಕೋ ಆಪರೇಟಿವ್ ಬ್ಯಾಂಕ್ ಶ್ರೀ ಯಶ್‍ಪಾಲ್ ಸುವರ್ಣ ಮೆರೆನ ಗುರ್ಕಾರ್ಮೆಡ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ 8 ಶಾಖೆಲೆನ ಮೂಲಕ ಗ್ರಾಹಕೆರೆಗ್ ಆಧುನಿಕ ಬ್ಯಾಂಕಿಂಗ್ ಸೌಲಭ್ಯಲೆನ ಸೇವೆದೊಟ್ಟುಗ್ ವ್ಯವಹಾರ ನಡಪಾವೊಂದಿತ್ತುದ್, ಕರಿನ 13 ವರ್ಷಡಿಂಚಿ ನಿರಂತರವಾದ್ ಸದಸ್ಯರೆಗ್ 18% ಡಿವಿಡೆಂಡ್ ಕೊರ್ಪಿನ ಮೂಲಕ ಕರಾವಳಿ ಭಾಗದ ಹೆಚ್ಚಿನ ಡಿವಿಡೆಂಡ್ ಕೊರ್ಪಿನ ಅಗ್ರಗಣ್ಯ ಪಟ್ಟಣ ಸಹಕಾರಿ ಬ್ಯಾಂಕ್ ಪನ್ಪಿನ ಪುಗಾರ್ತೆನ್ ಪಡೆದುಂಡ್.
ಆಧುನಿಕ ಬ್ಯಾಂಕಿಂಗ್ ವ್ಯವಸ್ಥೆದೊಟ್ಟುಗ್ ಸುಸಜ್ಜಿತ ಶಾಖೆಲೆನ ಮೂಲಕ ಗ್ರಾಹಕ ಸ್ನೇಹಿಯಾದ್ ವ್ಯವಹಾರ ನಡಪಾವೊಂದ್ ಸರ್ವಾಂಗೀಣ ಪ್ರಗತಿ ಸಾಧನೆ ಮಲ್ದಿತ್ತುದ್ ಬ್ಯಾಂಕುದ ಕಾರ್ಯವೈಖರಿಗ್ ಈ ಸರ್ತಿದ ಪ್ರತಿಷ್ಟಿತ ಸಾಧನಾ ಪ್ರಶಸ್ತಿದ ಮೂಲಕ ಮಾನಾದಿಗೆ ಮಲ್ದುಂಡ್..
by 