ಉಡುಪಿ, ಆ.19: ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಆಶ್ರಯೊಡ್ ರಜತ ಮಹೋತ್ಸವ ಸಮಿತಿ, ಪತ್ರಿಕಾ ಭವನ ಸಮಿತಿದ ಸಹಯೋಗದೊಟ್ಟುಗ್ ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಶನ್ ಉಡುಪಿ ವಲಯದ ಪ್ರಾಯೋಜಕತ್ವಡ್ ವಿಶ್ವ ಛಾಯಾಗ್ರಹಣ ದಿನಾಚರಣೆ ಪ್ರಯುಕ್ತ ಪ್ರತಿಕೋದ್ಯಮ ವಿದ್ಯಾರ್ಥಿಲೆಗ್ ಫೋಟೋಗ್ರಫಿ ಕಾರ್ಯಾಗಾರನ್ ಶನಿವಾರ ಉಡುಪಿ ಬ್ರಹ್ಮಗಿರಿತ್ತ ಐಎಂಎ ಭವನಡ್ ಆಯೋಜನೆ ಮಲ್ದಿತ್ತೆರ್.
ಕಾರ್ಯಾಗಾರನ್ ಉದಿಪನ ಮಲ್ತಿನ ಉಡುಪಿ ಜಿಲ್ಲಾ ಪೊಲೀಸ್ ಅಧೀಕ್ಷಕ ಅಕ್ಷಯ್ ಹಾಕೇ ಪಾತೆರ್ದ್ ಮಾಧ್ಯಮೊಲು ಕೆಲವೊಂಜಿ ಸೂಕ್ಷ್ಮ ವಿಚಾರ, ವಿವಾದಲೆನ್ ವೀಕ್ಷಕೆರೆನ ಬೊಕ್ಕ ಓದುಗೆರೆನ ಸಂಖ್ಯೆ ಜಾಸ್ತಿ ಮಲ್ಪುನ ಉದ್ದೇಶ ದೀಯೊಂದ್ ಸುದ್ದಿ ಮಲ್ಪಂದೆ, ಸೂಕ್ಷ್ಮತೆನ್ ಕಾತೊಂದ್ ಸತ್ಯಾಸತ್ಯತೆನ್ ತೆರಿಯೊಂದ್ ವರದಿ ಮಲ್ಪೊಡ್. ಸೂಕ್ಷ್ಮತೆಡಾದ್ ಇತ್ತಿನ ಸುದ್ದಿಲೆನ್ ಅಯಿತ್ತ ನೈಜ್ಯತೆ, ಗಂಭೀರತೆ, ಪ್ರಾಮುಖ್ಯತೆ ಬೊಕ್ಕ ಆಳೊನ್ ತೆರಿದ್ ಜನಕ್ಲೆನ ಎದುರು ದೀನಗ ಮಾತ್ರ ಅಯಿಕ್ ನ್ಯಾಯ ಒದಗಿಸಾವರೆಗ್ ಸಾಧ್ಯ ಪಂಡೆರು.
ಸಾಮಾಜಿಕ ಜಾಲತಾಣಲೆಗ್ ಗಡಿ ಪಂಡುದು ಇಜ್ಜಿ. ಅಲ್ಪ ಏರ್ಲಾ ದಾಲಾ ಬೋಡಾಂಡಲಾ ಬರೆಯೊಲಿ. ಅಯಿಟ್ ಸತ್ಯ, ಸುಳ್ಳು, ವದಂತಿ ಮಾತಲಾ ಇಪ್ಪುಂಡ್. ಕೆಲವು ಜನಕ್ಲೆಗ್ ಕೆಲವು ವಿಷಯೊಲೆನ ಬಗ್ಗೆ ದಾಲಾ ತೆರಿದಿತ್ತುಜಿಡಲಾ ಅಯಿತ್ತ ಬಗೆಟ್ ಪಾತೆರುವೆರ್. ನೆಟ್ಟಾದ್ ಸಮಾಜ ಬೊಕ್ಕ ಮಾನವೀ ಯತೆಗ್ ಮಸ್ತ್ ಹಾನಿಯಾಪುಂಡ್. ಉಂದು ಸಾಮಾಜಿಕ ಜಾಲತಾಣ ಬೊಕ್ಕ ಮಾಧ್ಯಮಲೆಗ್ ಇಪ್ಪುನ ವ್ಯತ್ಯಾಸ . ಅವ್ವೆನ್ ಒರಿಪಾವೊಡಾಂಡ ಸತ್ಯೊನ್ ತೆರಿಯೊಂದ್ ಸುದ್ದಿ ಮಲ್ಪೊಡ್ ಪಂಡುದು ಆರು ತೆರಿಪಾಯೆರು.
ಒಂಜಿ ಫೋಟೋ ಸಾವಿರ ಶಬ್ದೊಲೆಗ್ ಸಮ .ಎಡ್ಡೆ ಫೋಟೋ ಪಂಡ ಕಾಲಿ ತಂತ್ರಜ್ಞಾನ, ಕಲೆ ಮಾತ್ರ ಅತ್ತ್. ಅಯಿಟ್ ಛಾಯಾ ಚಿತ್ರಗ್ರಾಹಕನ ಫಿಲೋಸಫಿಲಾ ಮುಖ್ಯವಾದುಪ್ಪುಂಡ್ ಪಂಡುದ್ ಪಂಡಿನ ಆರು, ಮಾತಾ ವಿಚಾರೊಲೆನ್ ತೆರಿದುಪ್ಪುನ, ಮಾತಾ ದೃಷ್ಠಿಕೋನಡ್ ಆಲೋಚನೆ ಮಲ್ಪುನ , ಜನಪರ ಕಾಳಜಿ ಉಪ್ಪುನ ಬೊಕ್ಕ ಸಕಾರಾತ್ಮವಾದ್ ವಿಮರ್ಶೆ ಮಲ್ಪುನಂಚಿನ ಶಕ್ತಿ ಇಪ್ಪುನ ವೃತ್ತಿ ಪಂಡ ಅವ್ವ್ ಪತ್ರಿಕೋದ್ಯಮ ಪಂಡೆರು.
ಛಾಯಾಚಿತ್ರ ಬೊಕ್ಕ ಪರತ್ ಕ್ಯಾಮೆರಾದ ಪ್ರದರ್ಶನೊನ್ ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಶನ್ ಉಡುಪಿ ವಲಯ ಅಧ್ಯಕ್ಷೆರಾಯಿನ ಜನಾರ್ದನ ಕೊಡವೂರು ಉದಿಪನ ಮಲ್ತೆರು. ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಅಲೆವೂರು ಗುರ್ಕಾರ್ಮೆಡಿತ್ತೆರು
ಫೋಟೋಗ್ರಫಿ ಕಾರ್ಯಾಗಾರನ್ ಉದಯವಾಣಿದ ಛಾಯಾಚಿತ್ರ ಪತ್ರಕರ್ತ ಅಸ್ಟ್ರೋ ಮೋಹನ್, ನುಡಿಚಿತ್ರ ಕಾರ್ಯಾಗಾರನ್ ಮಂಗಳೂರು ವಿಜಯ ಕರ್ನಾಟಕ ಹಿರಿಯ ಉಪಸಂಪಾದಕ ಸುಶೀಲೇಂದ್ರ ಕುಡುಪಾಡಿ ನಡಪಾದ್ ಕೊರಿಯೆರ್. ಇಂಡಿಯನ್ ಫೆಡರೇಶನ್ ಆಫ್ ವರ್ಕಿಂಗ್ ಜರ್ನಲಿಸ್ಟ್ ದ ರಾಷ್ಟ್ರೀಯ ಸಮಿತಿ ಸದಸ್ಯ ಅರುಣ್ ಕುಮಾರ್ ಶಿರೂರು, ರಜತ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜಯಕರ ಸುವರ್ಣ, ಉಡುಪಿ ಪತ್ರಿಕಾ ಭವನ ಸಮಿತಿ ಸಂಚಾಲಕ ಅಜಿತ್ ಆರಾಡಿ ಉಪಸ್ಥಿತರಿತ್ತೆರು.
ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತೆರ್. ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಸೊಲ್ಮೆಸಂದಾಯ್ತ ಮಲ್ತೆರು. ಪತ್ರಕರ್ತ ಸುಭಾಷ್ ಚಂದ್ರ ವಾಗ್ಳೆ ಕಾರ್ಯಕ್ರಮ ನಿರೂಪಣೆ ಮಲ್ತೆರು. ಕಾರ್ಯಾಗಾರಡ್ ಉಡುಪಿ ಅಜ್ಜರಕಾಡು ಮಹಿಳಾ ಪ್ರಥಮ ದರ್ಜೆ ಕಾಲೇಜು, ಉಡುಪಿ ಎಂಜಿಎಂ ಕಾಲೇಜು, ಕಾರ್ಕಳ ಎಂಪಿಎಂ ಕಾಲೇಜು ಬೊಕ್ಲ ಕುಂದಾಪುರ ಭಂಡಾರ್ ಕಾರ್ಸ್ ಕಾಲೇಜಿದ ಪತ್ರಿಕೋದ್ಯಮ ವಿಭಾಗದ ವಿದ್ಯಾರ್ಥಿಲು ಪಾಲ್ ಪಡೆದಿತ್ತೆರು.
ಗಮನ ಒಯ್ತಿನ ಪರತ್ ಕ್ಯಾಮೆರಾ- ಛಾಯಾಚಿತ್ರ ಪ್ರದರ್ಶನ
ಕಾರ್ಯಾಗಾರಡ್ ಆಯೋಜನೆ ಮಲ್ದಿನ ಪರತ್ ಕ್ಯಾಮೆರಾಲು ಬೊಕ್ಕ ಛಾಯಾಚಿತ್ರ ಪ್ರದರ್ಶನ ಮಾತೆರೆನ ಗಮನ ಒಯ್ತುಂಡ್.
ಪತ್ರಕರ್ತ ಜಯಕರ ಸುವರ್ಣ ಬೊಕ್ಕ ಪ್ರಮೋದ್ ಸುವರ್ಣ ಅಕ್ಲೆಡ ಸಂಗ್ರಹಡಿತ್ತಿನ 40ವರ್ಷ ಪಿರಾಕುದ ಫೀಲ್ಡ್ ಕ್ಯಾಮೆರಾ, ಅಂಚೆನೇ ಪರತ್ ಟ್ವಿನ್ ಲೆನ್ಸ್ ರಿಫ್ಲೆಕ್ಸ್ ಕ್ಯಾಮೆರಾ, ಡಿಜಿಟಲ್ ಕ್ಯಾಮೆರಾ, ವಿಎಚ್‌ಎಸ್ ಬೊಕ್ಕ ಮಿನಿ ಡಿವಿ ವಿಡಿಯೋ ಕ್ಯಾಮೆರಾಲು, ಡಿಎಸ್‌ಎಲ್‌ಆರ್ ಕ್ಯಾಮೆರಾಲೆನ್ ಪ್ರದರ್ಶನ ಗ್ ದೀದಿತ್ತೆರ್.
ಸಂಘದ ಸದಸ್ಯೆರಾಯಿನ ಅಸ್ಟ್ರೋ ಮೋಹನ್, ಜನಾರ್ದನ ಕೊಡವೂರು, ಸುಭಾಷ್‌ಚಂದ್ರ ವಾಗ್ಳೆ, ಅರುಣಾಚಲ್ ಹೆಬ್ಬಾರ್, ನಝೀರ್ ಪೊಲ್ಯ, ಉಮೇಶ್ ಮಾರ್ಪಳ್ಳಿ, ರಾಮ ಅಜೆಕಾರು, ಹರೀಶ್ ಕಟಪಾಡಿ, ಅಶ್ವಥ್ ಆಚಾರ್ಯ ದೆತ್ತಿನ ಬೇತೆ ಬೇತೆ ರೀತಿದ ಛಾಯಾಚಿತ್ರೊಲೆನ್ ಪ್ರದರ್ಶನಗ್ ದೀದಿತ್ತೆರ್.
by 