ಸಮಾಜದ ಜಬಾದಾರಿದೊಟ್ಟುಗ್ ಕುಟುಂಬದ ಜಬಾದಾರಿಲೆನ್ ಲಾ ತೂವೊನ್ಲೆ: ಹೆಬ್ಬಾಳ್ಕರ್

ಸಮಾಜದ ಜವಾಬ್ದಾರಿ ದೊಟ್ಟುಗ್ ನಿಕಲ್ನ ಕುಟುಂಬದ ಜವಾಬ್ದಾರಿ ಲೆನ್ ಲಾ ತೂವೊನ್ಲೆ..ಪಂಡುದ್ ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ತೆರಿಪಾಯೆರ್.

ಎನ್ನ ಪಾತೆರ ಕೇವಲ ಭಾಷಣೊಗ್ ಸೀಮಿತ ಆವಂದೆ ಎಡ್ಡೆ ಎಡ್ಡೆ ಬೇಲೆ ಮಲ್ಪರೆಗ್ ಪ್ರಯತ್ನ ಮಲ್ಪುವೆ ಪಂಡುದ್ ಈ ಪೊರ್ತುಡ್ ಪಂಡೆರ್.

ಸಮಾಜದ ಅಂಕು-ಡೊಂಕುಲೆನ್ ತಿದ್ದುದ್ ಸಾಮರಸ್ಯ,ಸತ್ಯದ ಮಿತ್ತ್ ಬೊಲ್ಪು ಚೆಲ್ಲುನ ಕೆಲಸ ಮಲ್ತೊಂದುಪ್ಪುನ ಪತ್ರಕರ್ತೆರು ಕುಟುಂಬನ್ ತ್ಯಜಿಸಾದ್ ರಾತ್ರೆ -ಪಗೆಲ್ ಬೆನೊಂದುಪ್ಪುವೆರ್.ಸಮಾಜದ ಎಡ್ಡೆಪ್ಪುಗಾದ್ ಸದಾ ಚಿಂತನೆ ಮಲ್ಪುನ ಪತ್ರಕರ್ತೆರು ಅಕ್ಲೆನ ಜೋಕ್ಲೆನ ಭವಿಷ್ಯದ ಬಗ್ಗೆಲಾ ಚಿಂತನೆ ಮಲ್ಪೊಡಾತುಂಡ್ ಪಂಡುದ್ ಈ ಪೊರ್ತುಡ್ ಆರ್ ಪಂಡೆರ್..

ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘ ಬೆಂಗಳೂರು, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ, ರಜತ ಮಹೋತ್ಸವ ಸಮಿತಿ ಬೊಕ್ಕ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲ ಮೊಕ್ಲೆನ ಸಹಯೋಗಡ್ ಮಣಿಪಾಲ ಕೆಎಂಸಿ ಆಸ್ಪತ್ರೆಯ ಡಾ.ಟಿಎಂಎ ಪೈ ಆಡಿಟೋರಿಯಂಡ್ ಆಯೋಜನೆ ಮಲ್ದಿನ ರಾಜ್ಯದ ಪತ್ರಕರ್ತೆರೆನ ಪ್ರತಿಭಾವಂತ ಜೋಕ್ಲೆಗ್ ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮನ್ ರಡ್ಡ್ ಕೈ ಟ್ ಸಂವಿಧಾನ ಪುಸ್ತಕೊಲೆನ್ ಅನಾವರಣ ಮಲ್ಪುನ ಮುಖೇನ ವಿಶಿಷ್ಟವಾದ್ ಉದಿಪನ ಮಲ್ತುದ್ ಆರು ಪಾತೆರಿಯೆರ್.

ಪತ್ರಕರ್ತರೆನ ಕುಟುಂಬನ್ ಪ್ರೋತ್ಸಾಹ ಮಲ್ಪುನ ನಿಟ್ಟುಡ್ ರಾಜ್ಯ ಕಾರ್ಯನಿರತ ಪತ್ರಕರ್ತರ ಸಂಘ ಪತ್ರಕರ್ತೆರೆನ ಜೋಕ್ಲೆಗ್ ಆಯೋಜನೆ ಮಲ್ದಿನ ಪ್ರತಿಭಾ ಪುರಸ್ಕಾರ ಕಾರ್ಯಕ್ರಮ ಮಾದರಿ ಕಾರ್ಯಕ್ರಮವಾದ್ ಆವಡ್ ಪಂಡುದು ಬಯಕಿಯೆರ್.

ಸಮಾಜದ ಬೇತೆ ಬೇತೆ ಸಮಸ್ಯೆಲೆನ್ ಸುದ್ದಿ ಮಲ್ಪುನ ಮುಖೇನ ಬೊಲ್ಪು ಚೆಲ್ಲುನ ಪತ್ರಕರ್ತೆರೆಗುಲಾ ಮಸ್ತ್ ಸಮಸ್ಯೆಲು ಉಪ್ಪುಂಡ್. ಇತ್ತೆಲಾ ಕೆಲವೆರ್ ಇಲ್ಲ್ ಉಪ್ಪಂದೆ ಪತ್ರಕರ್ತರು ಬಂಗೊಡುಲ್ಲೆರ್..ಪತ್ರಕರ್ತೆರೆನ ಏಳಿಗೆಗಾದ್ ಸರ್ಕಾರದ ಮಟ್ಟಡ್ ದುಂಬು ಉಂತುದ್ ಮಲ್ತ್ ಕೊರ್ಪೆ ಪಂಡೆರ್..ರಾತ್ರೆ -ಪಗೆಲ್ ,ಗಾಳಿ-ಬರ್ಸ ತೂವಂದೆ ಸುದ್ದಿ ಮಲ್ಪುನ ಪತ್ರಕರ್ತೆರೆನ ಶ್ರಮೊನ್ ಕಣ್ಣಾರೆ ತೂತೆ.ಖಂಡಿತವಾದುಲಾ ನಿಕಲ್ನ ಪರಿ ಶ್ರಮೊಗ್ ತಕ್ಕ ಫಲ ಸಿಕ್ಕುಂಡ್ ಪಂಡುದು ಆರು ವಿಶ್ವಾಸ ಕೊರಿಯೆರ್.

ಕಾರ್ಯಕರ್ತೆಯಾದ್ ಸುರುವಾಯಿನ ಎನ್ನ ರಾಜಕೀಯ ಜೀವನ ಇನಿ ಪ್ರತಿಭಾವಂತ ಜಿಲ್ಲೆದ ಉಸ್ತುವಾರಿ ಸಚಿವೆಯಾದ್ ನಿಕಲ್ನ ಮುಂದೆ ಎದುರುಡುಲ್ಲೆ. ಉಂದು ಎನ್ನ ಪರಿಶ್ರಮೊಗ್ ತಿಕ್ಕಿನ ಪ್ರತಿಫಲ.ನಿಕಲ್ನ ಪೊಪ್ಪ-ಅಮ್ಮ ಬಂಗೊಡ್ ಎನ ಭವಿಷ್ಯದ ಬಗ್ಗೆ ಕನ ಕಟ್ಟೊಂದೆರ್.ಅಕ್ಲೆನ ಕನ ನಿಜ ಮಲ್ಪುನ ಗುರುತರವಾಯಿನ ಜಬಾದಾರಿ ನಿಕಲ್ನ ಜಬಾದಾರಿ.ಅಕ್ಲೆನ ಕನಸುನ್ ನಿಜ ಮಲ್ಪರೆಗ್ ನಿಕುಲು ಸನ್ನದ್ದರಾವೊಡ್ ಪಂಡುದು ವಿದ್ಯಾರ್ಥಿಲೆಗ್ ಪಂಡೆರು.

ಕರ್ನಾಟಕ ವಿಧಾಸಭಾ ಸಭಾಪತಿ ಯು.ಟಿ ಖಾದರ್ ಪಾತೆರ್ದ್ , ನಮ್ಮ ಸಂಪ್ರದಾಯ,ಆಚಾರ-ವಿಚಾರೊಲು ಪಾರಂಪರಿಕವಾದ್ ಬುಳೆಯೊಡಾಂಡ ಅಯಿಕ್ ಪತ್ರಕರ್ತರೆನ ಕೊಡುಗೆ ಅಪಾರವಾಯಿನವ್ವ್.ಯುವ ಪೀಳಿಗೆಗ್ ನಮ್ಮ ಸಂಪ್ರದಾಯೊಲೆನ್ ವರ್ಗಾವಣೆ ಮಲ್ಪುನ ಮಲ್ಲ ಶಕ್ತಿಯಾದ್ ಮಾಧ್ಯಮದ ಪಾಲು ಉಂಡು ಪಂಡೆರ್.

ಪತ್ರಕರ್ತೆರು ಬೊಕ್ಕ ರಾಜಕಾರಣಿಲೆನ ನಡುಟ್ ಅವಿನಾಭಾವ ಸಂಬಂಧ ಉಂಡು. ಪತ್ರಕರ್ತೆರ್ ಉಪ್ಪಂದೆ ರಾಜಕಾರಣಿಲು ಇಜ್ಜೆರ್ .ಅಂಚೆನೇ ರಾಜಕಾರಣಿ ಉಪ್ಪಂದೆ ಪತ್ರಕರ್ತರಿಜ್ಜೆರ್. ರಾಜಕೀಯಡ್ ಗೊಂದಲ ಆಯಿನಪಗ ಪತ್ರಕರ್ತರೆನ ಸಲಹೆ,ಸೂಚನೆಡಾದ್ ಗೊಂದಲ ಪರಿಹಾರ ಆಯಿನ ಮಸ್ತ್ ಉದಾಹರಣೆಲು ಉಂಡು..ಪೊಸ ಶಾಸಕೆರೆಗ್ ತರಬೇತಿ ಕೊರಿಲೆಕ್ಕ ಪತ್ರಕರ್ತರೆಗುಲಾ ತರಬೇತಿ ಕೊರ್ಪಿನ ಅವಶ್ಯಕತೆ ಉಂಡು ಪಂಡೆರ್.

ಈ ಪೊರ್ತುಡ್ ಸಂಘದ ಸದಸ್ಯ ಪತ್ರಕರ್ತರ ಪ್ರತಿಭಾನ್ವಿತ ವಿದ್ಯಾರ್ಥಿ ಲೆಗ್ ಪ್ರತಿಭಾ ಪುರಸ್ಕಾರ ಪ್ರದಾನ ಮಲ್ತೆರ್. ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ರಾಜ್ಯಾಧ್ಯಕ್ಷ ಶಿವಾನಂದ ತಗಡೂರು ಅಧ್ಯಕ್ಷತೆಡಿತ್ತೆರ್. ಮಲ್ಲ ಬಿನ್ನೆರಾದ್ ಮಣಿಪಾಲ ಮಾಹೆ ಪ್ರೊ ಚಾನ್ಸಲರ್ ಡಾ.ಎಚ್.ಎಸ್. ಬಲ್ಲಾಳ್, ಉಡುಪಿ ಶಾಸಕೆರಯಿನ ಯಶ್‌ಪಾಲ್ ಸುವರ್ಣ, ಮಣಿಪಾಲ ಕಸ್ತೂರ್ಬಾ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕ ಡಾ.ಅವಿನಾಶ್ ಶೆಟ್ಟಿ, ಜಿಲ್ಲಾಧಿಕಾರಿ ಎಂ.ಕೂರ್ಮರಾವ್, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಕ್ಷಯ ಮಚ್ಚಿಂದ್ರ ಹಾಕೆ ಇತ್ತೆರ್.

ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ರಾಜ್ಯ ಉಪಾಧ್ಯಕ್ಷೆರಾಯಿನ ಪುಂಡಲೀಕ ಭೀ ಬಾಳೋಜಿ, ಅಜ್ಜಮಾಡ ರಮೇಶ್ ಕುಟ್ಟಪ್ಪ, ಭವಾನಿ ಸಿಂಗ್ ಠಾಕೂರು, ಕಾರ್ಯದರ್ಶಿ ಗಳಾದ ಮತ್ತಿಕೆರೆ ಜಯರಾಮ್, ಸೋಮಶೇಖರ್ ಕೆರಗೋಡು, ಕೋಶಾಧಿಕಾರಿ ವಾಸುದೇವ ಹೊಳ್ಳ, ರಾಜ್ಯ ಸಮಿತಿ ಸದಸ್ಯ ಕಿರಣ್ ಮಂಜನಬೈಲು, ರಾಷ್ಟ್ರೀಯ ಸಮಿತಿ ಸದಸ್ಯ ಅರುಣ್ ಕುಮಾರ್ ಶಿರೂರು, ರಜತ ಮಹೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಜಯಕರ ಸುವರ್ಣ ಉಪಸ್ಥಿತರಿತ್ತೆರು.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಸಂಘದ ರಜತ ಮಹೋತ್ಸವ ಸಮಿತಿದ ಸಂಚಾಲಕ ಮುಹಮ್ಮದ್ ಶರೀಫ್ ಕಾರ್ಕಳ ಸ್ವಾಗತ ಮಲ್ತೆರು. ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ರಾಜ್ಯ ಪ್ರಧಾನ ಕಾರ್ಯ ದರ್ಶಿ ಜೆ.ಸಿ.ಲೋಕೇಶ್ ಪುರಸ್ಕೃತೆರೆನ ಪಟ್ಟಿ ಓದಿಯೆರ್. ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ವಂದನಾರ್ಪಣೆ ಮಲ್ತೆರ್. ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ದಾನಿಲೆನ ಪಟ್ಟಿ ಓದಿಯೆರ್. ಪತ್ರಕರ್ತ ಕೆ.ಸಿ.ರಾಜೇಶ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್. ಸಭಾ ಕಾರ್ಯಕ್ರಮೊಡ್ ದುಂಬು ಕಲಾಮಯಂ ತಂಡೊಡ್ದ್ ಜಾನಪದ ಕಾರ್ಯಕ್ರಮ ನಡತುಂಡ್.