ಸದಸ್ಯೆರ್ ನಿರಂತರವಾದ್ ಸಂಘಟನೆಡ್ ತೊಡಗಿಸಾವೊಂಡ ಮಾತ್ರ ಸಂಘಟನೆ ಗಟ್ಟಿ ಆಪುಂಡ್.. ಅಂಚಟದ್ ಸರಕಾರ ಮಟ್ಟೊಡ್ ಅತ್ತುಂಡ ಸ್ಥಳೀಯ ಮಟ್ಟೊಡ್ ಸಂಘಟನೆಗ್ ಬೋಡಾಯಿನ ಸವಲತ್ತುಲೆನ್ ಪಡೆತೊನರೆಗ್ ಅನುಕೂಲ ಆಪುಂಡ್ ಪಂಡುದು ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ದ.ಕ ಬೊಕ್ಕ ಉಡುಪಿ ಜಿಲ್ಲೆ , ಉಡುಪಿ ವಲಯದ ವರ್ಷದ ಸಭೆನ್ ಜಿಲ್ಲಾಧ್ಯಕ್ಷೆರಾಯಿನ ಆನಂದ ಎನ್ ಕುಂಪಲ ತುಡರ್ ಅರ್ಲಾದ್ ಉದಿಪನ ಮಲ್ತುದ್ ಪಾತೆರಿಯೆರು.
ತುಳು ಭಾಷೆಗ್ ಮಾನ್ಯತೆ ತಿಕ್ಕುನ ಪೊರಂಬಾಟದ ಈ ಪೊರ್ತುಡ್ ಉಡುಪಿ ವಲಯ ಸಭೆತ್ತ ಇಡೀ ನಡಕೆನ್ ತುಳುಟೇ ಮಲ್ತುದ್ ತುಲುಬಾಸೆಗ್ ಮಾನಾದಿಗೆ ಕೊರಿನವ್ ಶ್ಲಾಘನೀಯ ಪಂಡೆರು.
ಈ ಪೊರ್ತುಡ್ ಸದಸ್ಯೆರೆನ ಜೋಕ್ಲೆಗ್ ಕಲಿಕಾ ಪ್ರೋತ್ಸಾಹ ಕೊರಿಯೆರ್.. ಪೊಸ ಪದುಕೆರೆನ್ ಸಂಘಟನೆಗ್ ಸೇರಾವೊಂಡೆರ್.. ಜಿಲ್ಲಾ ಕೆಸರು ಗದ್ದೆ ಕ್ರೀಡಾಕೂಟದ ಪೋಸ್ಟರ್ ನ್ ಬುಡುಗಡೆ ಕಜ್ಜೊ ನಡತುಂಡ್. ಸುರಭಿ ಸುಧೀರ್ ಶೆಟ್ಟಿ ನೇತೃತ್ವದ 2023-25ನೇ ಪೊಸ ಸಾಲು್ ತಂಡೊನ್ ಆಯ್ಕೆ ಮಲ್ತುಂಡ್.
ಈ ಪೊರ್ತುಡ್ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ನಿತಿನ್ ಬೆಳುವಾಯಿ, ಜಿಲ್ಲಾ ಪಣವುದ ಪಾಲವೆರ್ ನವೀನ್ ರೈ ಪಂಜಳ, ಜಿಲ್ಲಾ ಒತ್ತು ಗುರಿಕಾರೆ ಪದ್ಮಪ್ರಸಾದ್ ಜೈನ್ , ಎಸ್ಕೆಪಿಎ ವಿವಿದೋದ್ದೇಶ ಸಹಕಾರಿ ಸಂಘದ ಗುರಿಕಾರೆ ವಾಸುದೇವ ರಾವ್, ಜಿಲ್ಲಾ ಒತ್ತು ಕಾರ್ಯಂತೆರಾಯಿನ ವಾಮನ ಪಡುಕೆರೆ, ಜಿಲ್ಲಾ ಕಟ್ಟಡ ಸಮಿತಿ ಪದುಕ ರ್ ಸುಂದರ ಪೂಜಾರಿ ಕೊಳಲಗಿರಿ,ಅಶೋಕ್ ಪುತ್ರನ್ ,ಪ್ರವೀಣ್ ಹರಿಖಂಡಿಗೆ, ಮಂಜು ಪರ್ಕಳ,ದಾಮೋದರ ಸುವರ್ಣ, ಸತೀಶ್ ಸೇರಿಗಾರ್, ಹರೀಶ್ ಅಲೆವೂರು, ಸಂದೀಪ್ ಕಾಮತ್, ಉಪಸ್ಥಿತರಿತ್ತೆರು.
ವಲಯದ ಗುರಿಕಾರೆ ಜನಾರ್ದನ್ ಕೊಡವೂರು ಎದ್ಕೊನೊಂದ್, ಪ್ರಸ್ತಾವನೆ ಮಲ್ತೆರ್. ಕಾರ್ಯಂತೆರಾಯಿನ ಪ್ರವೀಣ್ ಕೊರೆಯ ವರದಿ ವಾಚನ ಮಲ್ತೆರ್. ಪಣವುದ ಪಾಲವೆರಾಯಿನ ದಿವಾಕರ್ ಹಿರಿಯಡ್ಕ ಲೆಕ್ಕ ಪತ್ರ ಮಂಡಿಸಾದ್, ಸೊಲ್ಮೆ ಸಂದಾಯೆರ್. ರಾಘವೇಂದ್ರ ಸೇರಿಗಾರ್ ಮದಿಪು ಕೊರಿಯೆರು. ಸುಂದರ್ ನಿಟ್ಟೂರು ಸುಗಿತೆರ್.
by 