ಉಡುಪಿ ಜಿಲ್ಲೆಡ್ ಕ್ರಿಸ್ಮಸ್ ಪರ್ಬದ ಗೌಜಿ..

ಉಡುಪಿ: ಏಸುಕ್ರಿಸ್ತರ ಜನ್ಮದಿನ ಕ್ರಿಸ್ಮಸ್ ಪರ್ಬೋನ್ ಕ್ರೈಸ್ತ ಬಾಂಧವೆರು ಉಡುಪಿ ಜಿಲ್ಲೆಯಾದ್ಯಂತ ಐತಾರ ದಾನಿ ಭಕ್ತಿ, ಶೃದ್ಧೆ, ಸಂಭ್ರಮ ಸಡಗರಡ್ ಆಚರಣೆ ಮಲ್ತೆರು.
ಐತಾರ ರಾತ್ರೆಗ್ ಜಿಲ್ಲೆದ ಮಾತಾ ಚರ್ಚ್ ಲೆಡ್ ವಿಶೇಷ ಪ್ರಾರ್ಥನೆ, ಕ್ರಿಸ್ಮಸ್ ಗೀತೆಲೆನ ಗಾಯನ, ಸಾಂಸ್ಕೃತಿಕ ಕಾರ್ಯಕ್ರಮೊಲು ನಡತುಂಡ್. ಪರ್ಬದ ವಿಶೇಷ ಬಲಿಪೂಜೆನ್ ಉಡುಪಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷರಾಯಿನ ಅತೀ ವಂದನೀಯ ಡಾ| ಜೆರಾಲ್ಡ್ ಐಸಾಕ್ ಲೋಬೊ ಮೇರು ಅಧಿಕೃತ ಚರ್ಚು ಮಿಲಾಗ್ರಿಸ್ ಕೆಥೆಡ್ರಲ್ ಕಲ್ಯಾಣಪುರಡ್ ಬಲಿಪೂಜೆನ್ ಅರ್ಪಿಸಾದ್ ಪರ್ಬದ ಸಂದೇಶನ್ ಕೊರಿಯೆರು.
ನಮನ್ ಮಾತೆರೆನ್ ಪ್ರೀತಿ ಮಲ್ಪರೆಗ್ ಭೂಮಿಗ್ ಬತ್ತಿನ ಯೇಸು ಸ್ವಾಮಿ ಪೆತ್ತದ ಕಿದೆಟ್ ಗೋದಲಿಡ್ ಪುಟ್ಟುದ್ ತನ್ನ ಸರಳತೆ ಮೆರೆಯೆರು. ಪ್ರೀತಿ ಪಡೆಯುನೇಟ್ ಇಪ್ಪುನ ಸಂತೋಷಡ್ದ್ ಬಾಕಿದಕ್ಲೆಗ್ ಸೇವೆದ ಮೂಲಕ ಕೊರ್ಪಿನೇಟ್ ಹೆಚ್ಚಿ ಗೆ ಸಮಾಧಾನ ಕೊರ್ಪುಂಡ್. ಪರಸ್ಪರ ದ್ವೇಷ ಮಲ್ಪುನೇಡ್ದ್ ಯೇಸುಲೆಕ್ಕ ಬಾಕಿದಕ್ಲೆನ್ ಪ್ರೀತಿಸಾವುನ ಕೆಲಸ ಮಲ್ಪೊಡ್. ಕ್ರಿಸ್ತ ಜಯಂತಿ ಶಾಂತಿನ್ ಪಟ್ಟುನ ಪರ್ಬ. ಜಗತ್ತ್ ಡೊರ್ಮೆ ಸದಾ ಶಾಂತಿ ನೆಲೆಸುಲೆಕ್ಕ ಪ್ರಾರ್ಥನೆ ಮಲ್ಪೊಡ್ ಪಂಡುದ್ ಧರ್ಮಾಧ್ಯಕ್ಷೆರು ತಮ್ಮ ಸಂದೇಶಡ್ ತೆರಿಪಾಯೆರು.
ಮಿಲಾಗ್ರಿಸ್ ಕ್ಯಾಥೆಡ್ರಲ್ ನ ರೆಕ್ಟರ್ ವಂ|ವಲೇರಿಯನ್ ಮೆಂಡೊನ್ಸಾ, ಸಹಾಯಕ ಧರ್ಮಗುರು ವಂ|ಜೋಯ್ ಅಂದ್ರಾದೆ, ಕಟಪಾಡಿ ಹೋಲಿ ಕ್ರಾಸ್ ಸಭೆಯ ವಂ|ರೊನ್ಸನ್ ಡಿಸೋಜಾ ಉಪಸ್ಥಿತರಿತ್ತೆರು.
ಬಲಿಪೂಜೆಗ್ ದುಂಬು ಯೇಸು ಸ್ವಾಮಿನ ಜನನದ ವೃತ್ತಾಂತನ್ ನಟನೆ ಬೊಕ್ಕ ನೃತ್ಯರೂಪಕದ ಮೂಲಕ ಚರ್ಚ್ ದ ಜೋಕುಲು ಪ್ರದರ್ಶನ ಮಲ್ತೆರು.
ಕ್ರಿಸ್ಮಸ್ ಪರ್ಬದ ಪ್ರಯುಕ್ತ ಇಡೀ ಜಿಲ್ಲೆದ ಚರ್ಚ್ ಲು ವರ್ಣಮಯ ವಿದ್ಯುತ್ ದೀಪಾಲಂಕಾರ ಬೊಕ್ಕ ಬಗೆ ಬಗೆತ್ತ ಚಿತ್ತಾಕರ್ಷಕ ನಕ್ಷತ್ರಲೆಡ್ ಮೆನ್ಕೊಂದಿತ್ತುಂಡ್. ಉಡುಪಿ ಜಿಲ್ಲೆದ ಪ್ರಮುಖ ದೇವಾಲಯಲು ಭಕ್ತಾದಿಲೆಡ್ದ್ ದಿಂಜಿದಿತ್ತುಂಡ್ ..
ಐತಾರ ರಾತ್ರೆಗ್ ಪೂಜೆದ ಪೊರ್ತುಗ್ ಸಿಂಗರಿಸಾಯಿನ ಗೋದಲಿಡ್ ಬಾಲಯೇಸು ಮೂರ್ತಿನ್ ದೀದ್ ದೇವರೆನ ಸ್ತುತಿ, ಜೋಗುಳದ ಮೂಲಕ ಭಕ್ತಾದಿಲು ಆರಾಧನೆ ಮಲ್ತೆರು. ಮೇಣದ ಬತ್ತಿಲೆನ್ ಬೆಳಗಾದ್ ಪೂ ಸುಗಂಧಲೆನ್ ಅರ್ಪಿಸಾವುನ ಮೂಲಕ ಯೇಸು ಸ್ವಾಮಿನ ಜನನನ್ ಕ್ರೈಸ್ತ ಭಾಂಧವೆರು ಸ್ವಾಗತ ಮಲ್ತೆರು.
ಜಿಲ್ಲೆದ ಪ್ರಮುಖ ಚರ್ಚ್ ಲಾಯಿನ ಶಿರ್ವ ಆರೋಗ್ಯ ಮಾತೆನ ದೇವಾಲಯಡ್ ಧರ್ಮಗುರು ವಂ|ಡಾ| ಲೆಸ್ಲಿ ಡಿ’ಸೋಜಾ, ಉಡುಪಿ ಶೋಕಮಾತಾ ಇಗರ್ಜಿಡ್ ಧರ್ಮಗುರು ವಂ|ಚಾರ್ಲ್ಸ್ ಮಿನೇಜಸ್, ಕುಂದಾಪುರ ಹೋಲಿ ರೋಸರಿ ಚರ್ಚಿನಲ್ಲಿ ವಂ|ಸ್ಟ್ಯಾನಿ ತಾವ್ರೊ, ಕಾರ್ಕಳ ಅತ್ತೂರು ಸಂತ ಲಾರೆನ್ಸ್ ಬಾಸಿಲಿಕಾದಲ್ಲಿ ವಂ | ಆಲ್ಬನ್ ಡಿಸೋಜಾ, ತೊಟ್ಟಂ ಸಂತ ಅನ್ನಮ್ಮ ಚರ್ಚ್ ಡ್ ವಂ |ಡೆನಿಸ್ ಡೆಸಾ ಇವರುಗಳ ನೇತೃತ್ವಡ್ ಕ್ರಿಸ್ಮಸ್ ಆಚರಣೆ ಬಲಿಪೂಜೆಲು ನಡತುಂಡ್.
ಪರ್ಬದ ಅಂಗವಾದ್ ಚರ್ಚ್ ಲೆಡ್ ಯುವ ಸಂಘಟನೆದ ಸದಸ್ಯರೆಡ್ದ್ ವಿಶೇಷ ಸಾಂಸ್ಕೃತಿಕ ಕಾರ್ಯಕ್ರಮ, ಜೋಕ್ಲೆನ ಪ್ರೀತಿಗ್ ಪಾತ್ರವಾಯಿನ ಸಾಂತಾಕ್ಲಾಸ್ ವೇಷ, ಭಕ್ತಾದಿಲೆಗ್ ಕ್ರಿಸ್ಮಸ್ ಕೇಕ್ ವಿತರಣೆ ನಡತುಂಡ್. ಬಲಿಪೂಜೆಡ್ ಬೊಕ್ಕ ಕ್ರೈಸ್ತ ಭಾಂಧವೆರು ಪರಸ್ಪರ ಕ್ರಿಸ್ಮಸ್ ಪರ್ಬದ ಶುಭಾಶಯಲೆನ್ ವಿನಿಮಯ ಮಲ್ತೊಂಡೆರು.