ಇನಿ ಕೋಡೆಡ್ ತನ್ನ ಉದ್ಯಮನ್ ಆರ್ಥಿಕವಾದ್ ಬುಲೆಪಾವುನ ಆಲೋಚನೆನೇ ದೀಯೊಂಬಿನ ಕಾಲಘಟ್ಟೊಡ್ ಈ ರಡ್ಡ್ ಜವನೆರ್ ಉದ್ಯಮದೊಟ್ಟುಗ್ ಇಂಚಲಾ ತುಲುವಪ್ಪೆನ ಸೇವೆ ಮಲ್ಪೊಲಿ ಪಂಡುದ್ ಸಮಾಜಗ್ ತೋಜಾದ್ ಕೊರ್ತೆರ್..ಅಪಗಾಂಡ ಏರವ್ ರಡ್ಡ್ ಜವನೆರ್…ಅಕಲ್ನ ಸಂಗತಿ ದಾದ ತೆರಿಯರೆಗ್ ಈ ಲೇಖನ ಓದುಲೆ..
ಕರಿನ 10 ವರ್ಷೊಡಿಂಚಿ ಉತ್ತರ ಕರ್ನಾಟಕದ ಗುಲ್ಬರ್ಗಡ್ ಹೋಟೆಲ್ ಉದ್ಯಮ ನಡಪಾವೊಂದುಪ್ಪುನ ಹೆಬ್ರಿ ಕಳ್ತೂರುದ ಮೆಗ್ಗೆ- ಪರಯೆ ಸಂತೋಷ್ ಪೂಜಾರಿ ಬೊಕ್ಕ ಸತೀಶ್ ಪೂಜಾರಿ ಪಂಚಮಿ ಪುದರುಡ್ ಹೋಟೆಲ್ ಉದ್ಯಮ ಮಲ್ತೊಂದುಲ್ಲೆರ್.ಮೊಕ್ಲೆನ ಹೋಟೆಲ್ ಪಂಚಮಿಗ್ ನಿಕುಲು ಒರ ಭೇಟಿ ಕೊರುಂಡ ಏಪಲಾ ಅಂಚಿ ಪೋವನಗ ಮದಪಂದೆ ಪಂಚಮಿ ನ್ ಭೇಟಿಯಾವಂದೆ ಬರಯರ್..ದಾಯೆಗ್ ಪಂಡ ಪಂಚಮಿ ಹೋಟೆಲ್ ದ ತಿಂಡಿ ತೆನಸ್ ಏತ್ ರುಚಿಯಾದುಂಡ ಆತೇ ಪೊರ್ಲುಂಡ್ ಈ ಹೋಟೇಲ್ ದ ಮಾಲಕೆರೆನ ಮನಸ್ಸ್..
ತುಳುನಾಡ್,ತುಳುಬಾಸೆಗ್ ಮಾನಾದಿಗೆ ಕೊರ್ಪಿನ ಈ ರಡ್ಡ್ ಜನ ಮೆಗ್ಗೆ- ಪರಯನಕುಲು ತನ್ನ ಹೋಟೇಲ್ ದ ಪುದರುನ್ ತುಳು ಲಿಪಿಟ್ ಬರೆದ್ ತುಳುನಾಡ್ದ ಗೌರವನ್ ಪರವೂರುಡ್ ಮೆಚ್ಚಾದೆರ್ ..ಅತ್ತಾವಂದೆ ತನ್ನ ಹೋಟೆಲ್ ಗ್ ತುಳುನಾಡುಡ್ದ್ ಏರೇ ಭೇಟಿ ಕೊರಡ್ ಅಕಲೆಗ್ ಮಟ್ಟೆಲ್ ದಿಂಜಾದ್ ಮಾನಾದಿಗೆ ಮಲ್ಪುವೆರ್..ತುಳುವೆರೆಗ್ ಅಪಾರವಾಯಿನ ಗೌರವ ಕೊರ್ಪೆರ್..
ಆತೇ ಅತ್ತಾವಂದೆ ತುಳುನಾಡ್ದ ಸಂಸ್ಕೃತಿನ್ ಬಿಂಬಿಸಾವುನ ಕಂಬುಲ,ಆಟ,ಕೋಲದ ಚಿತ್ರೊಲು ಪಂಚಮಿ ಹೋಟೆಲ್ ದ ಗೋಡೆಡ್ ತೂವನಗ ತುಳುನಾಡುಡೇ ಉಲ್ಲನಾ ಪನ್ಪಿನ ಭಾವನೆ ಮನಸ್ಸುಗ್ ಮೂಡುಂಡ್.
ಮೊಕ್ಲೆನ ತುಳುಮೋಕೆನ್ ತೂದ್ ಉಡುಪಿದ ಇತ್ತೆದ ಶಾಸಕೆರಾಯಿನ ಯಶ್ಪಾಲ್ ಸುವರ್ಣ, ಮಾಜಿ ಸಚಿವೆರಾಯಿನ ಪ್ರಮೋದ್ ಮಧ್ವರಾಜ್ ಸೇರಿನಂಚ ಉಡುಪಿದ ಗಣ್ಯೆರ್ ಭೇಟಿ ಕೊರ್ದ್ ಶುಭಹಾರೈಸಾದೆರ್.
ತುಳುನಾಡುದ ತಿಂಡಿಲಾಯಿನ ನೀರುದೋಸೆ, ಗೋಳಿಬಜೆ, ಮೂಡೆ, ಬನ್ಸ್, ಪತ್ರೊಡೆ ಇಂಚ ಮುಲ್ಪ ಕರಾವಳಿದ ತಿಂಡಿಲೆನೇ ಉತ್ತರ ಕರ್ನಾಟಕದ ಗುಲ್ಬರ್ಗಡ್ ಪರಿಚಯ ಮಲ್ತೊಂದುಪ್ಪುನವ್ ನಿಜಕುಲಾ ತುಳುನಾಡುಗೇ ಪೆರ್ಮೆದ ವಿಷಯ.
ಅತ್ತಾವಂದೆ ತುಳುಟೇ ಹೋಟೆಲ್ ದ ಪುದರ್ ಪಲವೆನ್ ( ನಾಮಫಲಕ ) ನ್ ಪಾಡ್ದ್ ತುಳುನಾಡ್ದ ಗರಿಮೆನ್ ಕನ್ನಡನಾಡುಡ್ ಪರಪಾದೆರ್ ಈ ರಡ್ಡ್ ಜನ ತುಳುನಾಡ್ದ ಪೆರ್ಮೆದ ಜವನೆರ್..ಬಹುಶಃ ಊರುಡ್ದ್ ಪರವೂರುಗ್ ಪೋಂಡಲಾ ತನ್ನ ಪೆದ್ದಿ ಅಪ್ಪೆನ್ ಮದಪುನ ಈ ಕಾಲೊಡ್ ತುಳುವಪ್ಪೆಗ್ ಎತ್ತರದ ಜಾಗೆ ಕೊರ್ದ್ ಮಾನಾದಿಗೆ ಮಲ್ಪುನ ಮೊಕ್ಲೆಗ್ ತುಳುವೆರೆನ ಹಾರೈಕೆ ಏಪಲಾ ಉಪ್ಪಡ್..ಗುಲ್ಬರ್ಗ ಪೇಂಟೆದ ಗೋವಾ ಸರ್ಕಲ್ ಡುಪ್ಪುನ ಹೋಟೆಲ್ ಪಂಚಮಿಗ್ ಒರ ಭೇಟಿ ಕೊರ್ಲೆ..ಕನ್ನಡ ನಾಡುಡ್ ಮೆನ್ಕೊಂದುಪ್ಪುನ ತುಳುನಾಡ್ದ ಪೊರ್ಲುನ್ ತೂಲೆ..
by 