ಸಾಹಿತಿ,ಶಿಕ್ಷಕಿ ಜ್ಯೋತಿ ಗುರುಪ್ರಸಾದ್ ಮೆರೆಗ್ ಜಿಲ್ಲಾ ರಾಜ್ಯೋತ್ಸವ ಗರಿ..

ಜ್ಯೋತಿ ಗುರುಪ್ರಸಾದ್ ಮೇರ್ ಮೈಸೂರು ಜಿಲ್ಲೆದ ತಿರುಮಕೂಡಲು ನರಸೀಪುರಡ್ ಪುಟ್ಟಿನಾರ್. 1988 ನೇ ಇಸವಿಡ್ದ್ ಕಾರ್ಕಳಡ್ ವಾಸವಾದಿತ್ತುದ್ ಕಾರ್ಕಳದ ಸುತ್ತಮುತ್ತಲುಡ್ ಕೆಲವು ಶಿಕ್ಷಣ ಸಂಸ್ಥೆಲೆಡ್ ಕನ್ನಡ ಬೊಕ್ಕ ಇಂಗ್ಲಿಷ್ ಉಪನ್ಯಾಸಕಿಯಾದ್ ಸೇವೆ ಸಲ್ಲಿಸಾದ್ ಪ್ರಸ್ತುತ ಕಾರ್ಕಳದ ಶಿರ್ಡಿ ಸಾಯಿ ಪ್ರಥಮ ದರ್ಜೆ ಕಾಲೇಜಿಡ್ ಕನ್ನಡ ಉಪನ್ಯಾಸಕಿಯಾದ್ ಸೇವೆ ಮಲ್ತೊಂದುಲ್ಲೆರ್. 2003 ಡ್ ‘ ಚುಕ್ಕಿ’ ಕವನ ಸಂಕಲನದ ಹಸ್ತ ಪ್ರತಿಗ್ ಕಡೆಂಗೋಡ್ಲು ಕಾವ್ಯ ಪ್ರಶಸ್ತಿ ಬತ್ತಿತ್ತುದ್, ಡಾ.ಯು. ಆರ್.ಅನಂತಮೂರ್ತಿ ಅರೆನ ಋಜುವಾತು ಪ್ರಕಾಶನಡ್ ಪ್ರಕಟ ಆತುಂಡ್. ಈ ಸುರುತ್ತ ಕೃತಿಟೇ ಜ್ಯೋತಿ ಆಧುನಿಕ ಕನ್ನಡ ಕಾವ್ಯ ಲೋಕೊಡ್ ಗಟ್ಟಿಯಾಯಿನ ಪಜ್ಜೆ ಊರುದ್ ವಿಶಿಷ್ಟ ಸಂವೇದನೆದ ಕವಿ ಪನ್ಪಿನ ಪುಗಾರ್ತೆಗ್ ಪಾತ್ರರಾತೆರ್. ಪ್ರಸ್ತುತ ಪದ್ಯ_ ಗದ್ಯ ಸೇರಿನಂಚ ಸುಮಾರು 12 ಸ್ವತಂತ್ರ ಕೃತಿಕುಲೆನ್ ರಚನೆ ಮಲ್ದಿತ್ತುದ್ ಪದ್ಯ_ ಗದ್ಯ ರಡ್ಡೇಟುಲಾ ತಮ್ಮ ಹೃದ್ಯ ಬರವಣಿಗೆದ ಛಾಪು ಮೂಡಿಸಾದೆರ್. ‘ ಚುಕ್ಕಿ’ ಕವನ ಸಂಕಲನಗ್ ‘ ಅಮ್ಮ ಪ್ರಶಸ್ತಿ’, ಲೇಖಕಿ ಪ್ರಶಸ್ತಿ, ಅತ್ತಿಮಬ್ಬೆ ಸಾಹಿತ್ಯ ಪ್ರಶಸ್ತಿ, ಸಾಹಿತ್ಯ ಸೇತು ಇಂಚ ರಾಜ್ಯ ಪ್ರಶಸ್ತಿಲು ತಿಕ್ಕುದುಂಡ್. ರಡ್ಡನೇದ ಕವನ ಸಂಕಲನ ‘ ಮಾಯಾಪೆಟ್ಟಿಗೆ’ ಕಿ ರಂ ನಾಗರಾಜರ ‘ ಅಧ್ಯಯನ ಮಂಡಲ’ ಡ್ದ್ 2009 ಡ್ ಪ್ರಕಟವಾತುಂಡ್.ಅತ್ತಾವಂದೆ ಕನ್ನಡ ಸಾಹಿತ್ಯ ಪರಿಷತ್ತುದ ನೀಲ ಗಂಗಾ ಪ್ರಶಸ್ತಿ, ಕರ್ನಾಟಕ ಲೇಖಕಿಯರ ಸಂಘದ ಗೀತಾ ದೇಸಾಯಿ ದತ್ತಿ ಪ್ರಶಸ್ತಿ, ನಿರತ ಸಾಹಿತ್ಯ ಪ್ರಶಸ್ತಿ ಇಂಚಿನ ಪ್ರಶಸ್ತಿಲೆಗ್ ಭಾಜನವಾತುಂಡ್. ಮೂಜನೇತ್ತ ಕವನ ಸಂಕಲನ ‘ ವರನಂದಿ ಪ್ರತಿಮೆ’ ಮುಂಬೈ ದ’ ಸುಶೀಲಾ ರಾವ್’ ಕಾವ್ಯ ಪ್ರಶಸ್ತಿಗ್ ಭಾಜನವಾದಿತ್ತುದ್ ಲೋಹಿಯಾ ಪ್ರಕಾಶನಡ್ದ್ 2011 ಟ್ ಪ್ರಕಟವಾದಿತ್ತುಂಡ್.ಅತ್ತಾವಂದೆ ಮಂಗಳೂರುದ ಸಾಂಸ್ಕೃತಿಕ ಪ್ರತಿಷ್ಠಾನದ 2019 ತ್ತ ‘ ಹಂಸಕಾವ್ಯ’ ರಾಷ್ಟ್ರೀಯ ಪುರಸ್ಕಾರನ್ ಪಡೆದುಂಡ್. ನಾಲನೇತ್ತ ಕವನ ಸಂಕಲನ ‘ ಜಟಾಯು ಪಕ್ಷಿಗೆ ಶ್ರದ್ಧಾಂಜಲಿ’ ದ ಹಸ್ತಪ್ತಿ ಕಾಂತಾವರ ಕನ್ನಡ ಸಂಘದ ‘ ಮುದ್ದಣ ಕಾವ್ಯ ಪ್ರಶಸ್ತಿ’ಗ್ ಭಾಜನ ಆತುಂಡ್. ‘ ಈ ಕ್ಷಣ’ ಅಗ್ನಿ ವಾರ ಪತ್ರಿಕೆಗ್ ಬರರತಿನ ಅಂಕಣ ಮಾಲೆ. ಸುರುತ ಗದ್ಯ ಕೃತಿ. ಬೆಂಗಳೂರುದ ಸೃಷ್ಟಿ ಪ್ರಕಾಶನಡ್ದ್ ಪ್ರಕಟವಾದ್ 2009 ತ್ತ ಕರ್ನಾಟಕ ಸಂಘದ ಹಾ ಮಾ ನಾಯಕ ಪ್ರಶಸ್ತಿ ಪಡೆದುಂಡ್ ‘ ಜೋಲಿ ಲಾಲಿ ಭಾಗ ೧ ಬೊಕ್ಕ ೨’ ವಾರ್ತಾಭಾರತಿಡ್ ನಾಲ್ ವರ್ಷ ಕಾಲ ಪ್ರಕಟವಾಯಿನ ಅಂಕಣಮಾಲೆ. 2013 ತ್ತ ಕನ್ನಡ ಸಾಹಿತ್ಯ ಪರಿಷತ್ತುದ ‘ ಅಂತರ್ರಾಷ್ಟ್ರೀಯ ಮಹಿಳಾ ದತ್ತಿನಿಧಿ ಪ್ರಶಸ್ತಿಗ್ ಭಾಜನವಾತುಂಡ್. ‘ ಪ್ರೀತಿ ಬೊಕ್ಕ ಪ್ರೀತಿ ಮಾತ್ರ’ ಬಗೆ ಬಗೆತ್ತ ಚಿಂತನಶೀಲ ಲೇಖನೊಲೆನ ಸಂಗ್ರಹ ಮೈಸೂರುದ ವಿಸ್ಮಯ ಪ್ರಕಾಶನಡ್ದ್ 2009 ಟ್ ಪ್ರಕಟವಾದಿತ್ತುದ್ ಪುತ್ತೂರುದ ಉಗ್ರಾಣ ಪ್ರಶಸ್ತಿ’ ಗ್ ಭಾಜನವಾತುಂಡ್. ‘ ಹೊಸ ಪಕ್ಷಿ ರಾಗ’ ‘ ಸಂವಾದ’ ಮಾಸಪತ್ರಿಕೆಗ್ ಬರೆತಿನ ಅಂಕಣಮಾಲೆ ಸೃಷ್ಟಿ ಪ್ರಕಾಶನಡ್ದ್ ಪ್ರಕಟವಾದ್ 2014 ತ್ತ ಕನ್ನಡ ಸಾಹಿತ್ಯ ಪರಿಷತ್ತುದ ಶ್ರೇಷ್ಠ ಪುಸ್ತಕ ಬಹುಮಾನ ತಿಕ್ಕುದುಂಡ್. ‘ ತಂತಿಪಕ್ಷಿ’ ಬೇತೆ ಬೇತೆ ಪತ್ರಿಕೆಲೆಡ್ ಪ್ರಕಟವಾದುಪ್ಪುನ ಕಥಾಸಂಕಲನ( ಸೃಷ್ಟಿ ಪ್ರಕಾಶನ_ 2010), ‘ ಕಣ್ಣಭಾಷೆ’ ಶೈನಾ ಗ್ ಬರಹದ ಪತ್ರಿಕೆಗ್ ಐನ್ ವರ್ಷ ಕಾಲ ಬರೆತಿನ ಕನ್ನಡ ಪ್ರೀತಿದ ಅಕ್ಷರ ಮಾಲೆದ ಅಂಕಣ. ‘ ಮನಸು ಮಾಗಿದ ಸುಸ್ವರ’ ಜನಬಿಂಬ ವಾರಪತ್ರಿಕೆಗ್ ಬರೆತಿನ ಮೌಲಿಕ ಕನ್ನಡ ಚಿತ್ರಗೀತೆಲೆನ ಅವಲೋಕನದ ಅಂಕಣ ಕೃತಿ. ನಾದ ಬ್ರಹ್ಮ ಹಂಸಲೇಖ ಅರೆನ ಮೆಚ್ಚುಗೆಗ್ ಪಾತ್ರವಾದ್ ಮುನ್ನುಡಿ ಬರೆಪಾವೊಂದುಂಡ್. ‘ ದೇಸೀ’ ಪ್ರಕಾಶನ ಬೆಂಗಳೂರುಡ್ದ್ 2021 ಟ್ ಪ್ರಕಟವಾತಿನ ಇಂಚಪ್ಪೊದ ಕೃತಿ. ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದ ಪ್ರಧಾನ ಕವಿಗೋಷ್ಠಿಲೆಡ್ , ಮೈಸೂರು ದಸರಾ ಪ್ರಧಾನ ಕವಿಗೋಷ್ಠಿ, ಬಾದಾಮಿ ಉತ್ಸವ, ಹಂಪಿ ಉತ್ಸವ, ಕೇಂದ್ರ ಸಾಹಿತ್ಯ ಅಕಾಡೆಮಿ ಕವಿಗೋಷ್ಠಿ, ತರಳಬಾಳು ಬೆಳದಿಂಗಳ ಕವಿಗೋಷ್ಠಿ, ಧಾರವಾಡ ಸಾಹಿತ್ಯ ಸಂಭ್ರಮ ಇಂಚ ಕವಿಗೋಷ್ಠಿಲೆಡ್ ಕವಿಯಾದ್ ಪಾಲ್ ಪಡೆದಿನಿ ಅತ್ತಾವಂದೆ 2022 ತ್ತ ವಿಶ್ವ ವಿಖ್ಯಾತ ಮೈಸೂರು ದಸರಾ ಕವಿಗೋಷ್ಠಿದ ಭಾಗವಾಯಿನ ‘ ಚಿಗುರು ಕವಿಗೋಷ್ಠಿ’ ದ ಅಧ್ಯಕ್ಷತೆ ವಹಿಸಾದಿತ್ತೆರ್. 2014 ಡ್ ಕಾರ್ಕಳ ತಾಲ್ಲೂಕು ಕನ್ನಡ ಸಾಹಿತ್ಯ ಸಮ್ಮೇಳನ ದ ಸುರುತ್ತ ಮಹಿಳಾ ಅಧ್ಯಕ್ಷೆ ಗೌರವಗ್ ಪಾತ್ರರಾತೆರ್. ಮಂಗಳೂರು ವಿ ವಿ ಕನ್ನಡ ಪಠ್ಯ ಪುಸ್ತಕಡ್ ಮೆರೆನ ಕವಿತೆ ಸೇರ್ಪಡೆಯಾತುಂಡ್ . 2020 ಡ್ದ್ 2023 ಮುಟ್ಟದ ಮಂಗಳೂರು ವಿ ವಿ ಕನ್ನಡ ಪಠ್ಯಪುಸ್ತಕ ರಚನಾ ಸಮಿತಿಡ್ ಮುಖ್ಯ ಸಂಪಾದಕರಾದಿತ್ತೆರ್. ಕರ್ನಾಟಕ ಸಾಹಿತ್ಯ ಅಕಾಡೆಮಿ ವಾರ್ಷಿಕ ಸಂಕಲನೊಲು, ಕೇಂದ್ರ ಸಾಹಿತ್ಯ ಅಕಾಡೆಮಿ ಕವನ ಸಂಕಲನಲೆಡ್ ಮೆರೆನ ಕವನೊಲು ಸೇರ್ಪಡೆಯಾತುಂಡ್. ಅಕ್ಕಮಹಾದೇವಿ ಮಹಿಳಾ ವಿ ವಿ ಆಧುನಿಕ ಕಾವ್ಯ ಸಂಪುಟಡ್ ಹಂಪಿ ವಿ ವಿ ಕಾವ್ಯ ಸಂಪುಟಡ್ ಮೆರೆನ ಕವಿತೆಲೆನ ವಿಮರ್ಶೆದ ಅಧ್ಯಾಯ ಸೇರ್ದುಂಡ್. ಬೆಂಗಳೂರು ವಿ ವಿ ಪ್ರಸಾರಾಂಗದ ಪ್ರಕಟನೆಡ್ ಮೆರೆನ ಕವಿತೆಲು ಸೇರ್ದುಂಡ್. ರಾಜ್ಯದ ಪ್ರಮುಖ ಪತ್ರಿಕೆಲು, ವಿಶೇಷಾಂಕೊಲೆಡ್ , ಕಾಲ ನಿರ್ಣಯ ವಾರ್ಷಿಕ ಕ್ಯಾಲೆಂಡರ್ ಲೆಡ್ ಮೆರೆನ ಕವಿತೆಲು ಪ್ರಕಟವಾದುಂಡ್. ಮಂಗಳೂರು ಆಕಾಶವಾಣಿಡ್ ‘ ಕಾವ್ಧಧಾರೆ’ ದ ಒರ್ತಿ ಮುಖ್ಯ ಕವಿಯಾತೆರ್. ಮಂಗಳೂರು ಆಕಾಶವಾಣಿದ ಎ ಶ್ರೇಣಿ ನಾಟಕ ಕಲಾವಿದೆಯಾದುಲ್ಲೆರ್. ಸ್ರ್ರೀಪರ ಚಿಂತನೆ, ಮಾನವತೆದ ನಿಲುವು,ಪ್ರೇಮ ಉಂದು ಮೆರೆನ ಸಾಹಿತ್ಯದ ಬೊಲ್ಪುಲು.

ಈ ಸರ್ತಿದ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಗ್ ಭಾಜನರಾಯಿನ ಜ್ಯೋತಿ ಗುರುಪ್ರಸಾದ್ ಮೆರೆಗ್ ಕುಡಲಾತ್ ಪ್ರಶಸ್ತಿ ಗೌರವೊಲು ಒಲಿದ್ ಬರಡ್..