ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಬೊಳ್ಳಿ ಪರ್ಬ..

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘಗ್ ರಜತ ಸಂಭ್ರಮ
ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘವು 25ನೇ ವರ್ಷೊಗ್ ಪಜ್ಜೆ ದೀದ್ , ಬೊಳ್ಳಿ ಪರ್ಬದ ಗೌಜಿಡ್ ಉಂಡು. ಈ ಪ್ರಯುಕ್ತ ಸಂಘ ವರ್ಷಪೂರ್ತಿ ಒಟ್ಟು 25 ಕಾರ್ಯಕ್ರಮೊಲೆನ್ ಆಯೋಜನೆ ಮಲ್ಪರೆಗ್ ಉದ್ದೇಶ ದೀತುಂಡ್ ಪಂಡುದ್ ರಜತ ಮಹೋತ್ಸವ ಸಮಿತಿದ ಅಧ್ಯಕ್ಷ ಮುಹಮ್ಮದ್ ಶರೀಫ್ ಕಾರ್ಕಳ ತೆರಿಪಾದೆರ್.

ಉಡುಪಿ ಪತ್ರಿಕಾ ಭವನಡ್ ಸುದ್ದಿಗೋಷ್ಠಿಡ್ ಪಾತೆರಿನ ಆರು, ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತ ಸಂಘದ ಆಶ್ರಯಡ್ ಉಡುಪಿ ಪತ್ರಿಕಾ ಭವನ ಸಮಿತಿ ಬೊಕ್ಕ ಕಾರ್ಕಳ, ಕಾಪು, ಕುಂದಾಪುರ, ಬೈಂದೂರು, ಬ್ರಹ್ಮಾವರ, ಹೆಬ್ರಿ ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘೊಲೆನ ಸಹಯೋಗದೊಟ್ಟಯಗ್ ಬೇತೆ ಬೇತೆ ಕಾರ್ಯಕ್ರಮೊಲೆನ್ ಆಯೋಜನೆ ಮಲ್ಪರೆಗ್ ತೀರ್ಮಾನ ಮಲ್ದುಂಡ್ ಪಂಡೆರು.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಅಲೆವೂರು ಪಾತೆರ್ದ್ , ರಜತ ಮಹೋತ್ಸವ ಸಂಭ್ರಮದ ಉದಿಪನ ಸಮಾರಂಭ ಮಾ.19ದಾನು ಮಧ್ಯಾಹ್ನ 2ಗಂಟೆಗ್ ಉಡುಪಿ ಎಂಜಿಎಂ ಕಾಲೇಜಿದ ಪೊಸ ರವೀಂದ್ರ ಮಂಟಪಡ್ ನಡಪರೆಗುಂಡ್.. ಈ ಸಂಭ್ರಮೊಡ್ ಸಂಘಟಿತೆರಾದ್ ಪತ್ರಕರ್ತರ ಕ್ಷೇಮಾ ಭಿವೃದ್ಧಿ ನಿಧಿನ್ ಸ್ಥಾಪನೆ ಮಲ್ಪುನ ಗುರಿನ್ ದೀಯೊಂದುಂಡ್. ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ ಉದಿಪನ ಆಯಿನ ಎ.18ತ್ತ ದಿನೊನ್ ಸ್ಥಾಪನಾ ದಿನ ಆದ್ ಆಚರಣೆ ಮಲ್ಪರೆಗ್ ತೀರ್ಮಾನ ಮಲ್ದುಂಡ್ ಪಂಡುದು ತೆರಿಪಾಯೆರು.

ರಜತ ಮಹೋತ್ಸವದ 25 ಕಾರ್ಯಕ್ರಮೊಲೆಡ್ ಸಂಘದ ಡೈರಿ ಬಿಡುಗಡೆ, ಆರೋಗ್ಯ ಶಿಬಿರ, ದತ್ತಿ ಉಪನ್ಯಾಸ, ಸಂಸ್ಮರಣೆ ಬೊಕ್ಕ ಪ್ರಶಸ್ತಿ ಪ್ರದಾನ, ಕಾರ್ಟೂನ್ ಮೇಳ, ರಾಜ್ಯಮಟ್ಟದ ಕ್ರಿಕೆಟ್ ಪಂದ್ಯಾಕೂಟ, ಪತ್ರಕರ್ತರೆಗ್ ಕಾರ್ಯಾಗಾರ, ಪತ್ರಕರ್ತರೆಡ್ದ್ ಗ್ರಾಮ ವಾಸ್ತವ್ಯ, ಫೋನ್ ಇನ್ ಕಾರ್ಯ ಕ್ರಮ, ಪತ್ರಿಕೋದ್ಯಮ ವಿದ್ಯಾರ್ಥಿಲಗಾದ್ ಕಾರ್ಯಾಗಾರ, ಫೋಟೋಗ್ರಫಿ ಸ್ಪರ್ಧೆ, ಸ್ಮರಣ ಸಂಚಿಕೆ ಬಿಡುಗಡೆ, ಹಿರಿಯ ಪತ್ರಕರ್ತರಿಗೆ ಸನ್ಮಾನ, ಪತ್ರಕರ್ತೆರೆನ ಸ್ನೇಹ ಕೂಟ, ಪತ್ರಕರ್ತೆರೆನ ಸಾಂಸ್ಕೃತಿಕ ಕಾರ್ಯಕ್ರಮ, ಅಗಲಿನ ಪತ್ರಕರ್ತರ ಬಗ್ಗೆ ಪುಸ್ತಕ ರಚನೆ, ಸೈಕಲ್ ಜಾಥ, ರಾಜ್ಯಾಧ್ಯಕ್ಷೆರೆನೊಟ್ಟುಗ್ ಸಂವಾದ ಮುಖ್ಯ ವಾಯಿನವ್ ಪಂಡೆರು.

ಡಿಸೆಂಬರ್ ತಿಂಗೊಲುಡ್ ರಜತ ಮಹೋತ್ಸವ ಸಮಾರೋಪ ಸಮಾರಂಭನ್ ಆಯೋಜನೆ ಮಲ್ಪುನ ಉದ್ದೇಶ ಉಂಡು. ಉಡುಪಿ ಬ್ರಹ್ಮಗಿರಿ ನಾಯರ್‌ಕೆರೆಟ್ ಕಾರ್ಯಾಚರಣೆ ಮಲ್ತೊಂದುಪ್ಪುನ ಸಂಘದ ಕೇಂದ್ರ ಕಚೇರಿಯಾದುಪ್ಪುನ ಪತ್ರಿಕಾ ಭವನ ಕಟ್ಟಡೊನ್ ವಿಸ್ತಾರ ಮಲ್ಪುನ ಯೋಜನೆನ್ ಪಾಡ್ದಿತ್ತುದ್, ಒಟ್ಟು ರಜತ ಮಹೋತ್ಸವ ಕಾರ್ಯಕ್ರಮೊನ್ 2-3ಕೋಟಿ ರೂ. ಖರ್ಚಿಡ್ ನಡಪಾವರೆಗ್ ತೀರ್ಮಾನ ಮಲ್ದುಂಡ್ ಪಂಡುದು ಆರು ಮಾಹಿತಿ ಕೊರಿಯೆರು.

ಸುದ್ದಿಗೋಷ್ಠಿಡ್ ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ, ಸಮಿತಿದ ಪ್ರಧಾನ ಕಾರ್ಯದರ್ಶಿ ಜಯಕರ ಸುವರ್ಣ, ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ, ಸಂಘದ ರಾಷ್ಟ್ರೀಯ ಸಮಿತಿ ಸದಸ್ಯ ಅರುಣ್ ಕುಮಾರ್ ಶಿರೂರು ಉಪಸ್ಥಿತರಿತ್ತೆರು.