ವಿಕ್ರಂ ಗೌಡ

ಉಡುಪಿ | ವಿಕ್ರಂ ಗೌಡ ಎನ್’ಕೌಂಟರ್ ಪ್ರಕರಣ; ಸೂಕ್ತ ತನಿಖೆ ಮಲ್ಪರೆಗ್  ದಲಿತ ಸಂಘರ್ಷ ಸಮಿತಿ ವತಿಡ್ದ್  ಜಿಲ್ಲಾಧಿಕಾರಿಗ್ ಮನವಿ

ಉಡುಪಿ: ವಿಕ್ರಂ ಗೌಡ ಎನ್’ಕೌಂಟರ್ ಪ್ರಕರಣದ ಬಗ್ಗೆ ಸೂಕ್ತ ತನಿಖೆ ಮಲ್ಪರೆಗ್  ಕರ್ನಾಟಕ ದಲಿತ ಸಂಘರ್ಷ ಸಮಿತಿ (ರಿ) ಅಂಬೇಡ್ಕರ್ ವಾದ ವತಿಡ್ದ್ ಉಡುಪಿ ಜಿಲ್ಲಾಧಿಕಾರಿ ವಿದ್ಯಾಕುಮಾರಿಗ್  ಮನವಿ ಕೊರಿಯೆರು.

ನವೆಂಬರ್ 18 ಗ್  ಉಡುಪಿ ಜಿಲ್ಲೆದ  ಹೆಬ್ರಿ ತಾಲೂಕುದ ಕಬ್ಬಿನಾಲೆ ಪೀತಂಬೈಲುಡ್  ನಕ್ಸಲ್ ಕಮಾಂಡರ್ ಪಂಡುದು ಗುರ್ತ ಆತಿನ
ವಿಕ್ರಂ ಗೌಡ ಅಲಿಯಾಸ್ ವಿಕ್ರಂ ಗೌಡ್ರು ಪನ್ಪಿನ ನಕ್ಸಲ್ ನಿಗ್ರಹದಳ ಎನ್‌ಕೌಂಟರ್‌ ಡ್  ತೀರಿಯೆ. ಆಯೆ ಪರಿಶಿಷ್ಟ ವರ್ಗಗ್ ಸೇರಿನ  ವ್ಯಕ್ತಿಯಾದಿತ್ತುದ್ದು, ಅತ್ಯಂತ ಬಡತನದ ಹಿನ್ನೆಲೆಡ್  ಸೇರಿನಾಯೆ. ಕರಿನ 20
ವರ್ಷಡಿಂಚಿ   ನಕ್ಸಲ್ ಚಳುವಳಿಡ್  ಗುರುತಿಸಾವೊಂದ್ ಕೆಲವ್  ಅಪರಾಧ ಕೃತ್ಯಲೆಡ್  ಭಾಗಿಯಾದುಲ್ಲೆ ಪಂಡುದು ನಮ ಮಾದ್ಯಮದ  ಮೂಲಕ ತೆರಿದ.

ಆಂಡ    ವಿಕ್ರಂ ಗೌಡ ಅಲಿಯಾಸ್ ವಿಕ್ರಂ ಗೌಡ್ಲು ಮೊರನಿ  ನಡತಿನ  ಪೊಲೀಸ್ ಕಾರ್ಯಾಚರಣೆಡ್  ಪೋಲೀಸೆರೆನ ಮಿತ್ತ್  ಗುಂಡು ರಾಪಾದ್ ಪೊಲೀಸೆರು ತಮ್ಮ ರಕ್ಷಣೆಗೋಸ್ಕರ ಆಯನ ಮಿತ್ತ್  ಗುಂಡು ರಾಪಾಯಿನ  ಘಟನೆಡ್  ಕರಿದ್ ಪೋಯಿನವ್  ನಮಕ್ ತೆರಿದುಂಡ್.
ಸಿ.ಪಿ.ಐ.ಎಮ್.ಎಲ್ ಮಾಸ್ ಲೈನ್ ರಾಜ್ಯ ಸಮಿತಿ ಕರ್ನಾಟಕ ಬೊಕ್ಕ  ಬರಹಗಾರ ನವೀನ್ ಸೂರಂಜೆ ಬೊಕ್ಕ ಕೆಲವ್ ಜನ  ಈ ಕಾರ್ಯಾಚರಣೆದ  ಬಗ್ಗೆ ಅನುಮಾನ ವ್ಯಕ್ತಪಡಿಸಾದ್  ಪತ್ರಿಕಾ ಹೇಳಿಕೆ ಕೊರ್ತೆರ್.

ಅಂಚಾದ್  ವಿಕ್ರಂ ಗೌಡ ಅಲಿಯಾಸ್ ವಿಕ್ರಂ ಗೌಡ್ಲು ಮೆರೆನ ಸಾವುದ  ಬಗ್ಗೆ ಸೂಕ್ತ ತನಿಖೆ ನಡಪಾದ್, ಸತ್ಯಾಸತ್ಯತೆನ್  ತೆರಿದ್  ಆಯನ ಕುಟುಂಬಗ್  ಸೂಕ್ತ ಪರಿಹಾರ ಬೊಕ್ಕ  ನ್ಯಾಯ ಒದಗಿಸಾವೊಡ್ ಪಂಡುದ್ ಆಗ್ರಹ ಮಲ್ದೆರ್.

ಈ ಸಂದರ್ಭಡ್ ದ.ಸಂ‌ಸ ರಾಜ್ಯ ಸಂಘಟನಾ ಸಂಚಾಲಕರಾಯಿನ ಸುಂದರ್ ಮಾಸ್ತರ್, ಜಿಲ್ಲಾ ಪ್ರಧಾನ ಸಂಚಾಲರಾಯಿನ ಮಂಜುನಾಥ್ ಗಿಳಿಯಾರು, ಜಿಲ್ಲಾ ಸಂಘಟನಾ ಸಂಚಾಲಕರಾಯಿನ  ಶ್ಯಾಮರಾಜ್ ಬಿರ್ತಿ, ಶ್ಯಾಮ್ ಸುಂದರ್ ತೆಕ್ಕಟ್ಟೆ, ಮಂಜುನಾಥ್ ನಾಗೂರು, ಸುರೇಶ್ ಹಕ್ಲಾಡಿ, ಸಲಾಹುದ್ದೀನ್ ಶೇಖ್, ಅಝೀಝ್ ಉದ್ಯಾವರ,ಇದ್ರೀಸ್ ಹೂಡೆ  ಉಪಸ್ಥಿತರಿತ್ತೆರು.