ಪರ್ಯಾಯಕ್ಕೆ 10 ಕೋಟಿ ರೂ. ಬುಡುಗಡೆಗೆ ಕ್ರಮ -ಲಕ್ಷ್ಮೀ ಆರ್ ಹೆಬ್ಬಾಳ್ಕರ್
ಉಡುಪಿ: ಐತಿಹಾಸಿಕ ಶ್ರೀಕೃಷ್ಣ ಮಠದ ಪರ್ಯಾಯ ಮಹೋತ್ಸವಗ್ ಸರ್ಕಾರ ಪೂರ್ಣ ಸಹಕಾರ ಕೊರೊಂದಿತ್ತುದ್, ನಗರೋತ್ಥಾನ ಅಭಿವೃದ್ಧಿಗಾದ್ ಇತ್ತೆನೇ 30 ಕೋಟಿ ರೂಪಾಯಿ ಬುಡುಗಡೆ ಮಲ್ದುಂಡ್ ಪಂಡುದು ಮಹಿಳಾ ಬೊಕ್ಕ ಮಕ್ಕಳ ಕಲ್ಯಾಣ ಬೊಕ್ಕ ಜಿಲ್ಲಾ ಉಸ್ತುವಾರಿ ಸಚಿವೆ ಲಕ್ಷ್ಮೀ ಆರ್ ಹೆಬ್ಬಾಳ್ಕರ್ ತೆರಿಪಾದೆರ್.
ಉಡುಪಿಡ್ ಬುಧವಾರ ಮಾಧ್ಯಮದೊಟ್ಟುಗ್ ಆರು ಪಾತೆರಿಯೆರು.
ಶ್ರೀಮಠದ ಪರ್ಯಾಯಗ್ ಮುಖ್ಯಮಂತ್ರಿರ 10 ಕೋಟಿ ರೂಪಾಯಿ ಬುಡುಗಡೆ ಮಲ್ಪರೆಗ್ ಕ್ರಮ ದೆತೊಂದೆರ್. ಉಂದುವೇ ಸುರುಕ್ಕಾದ್ ಉಡುಪಿ ಪರ್ಯಾಯ ಮಹೋತ್ಸವಡ್ ಕುಟುಂಬ ಸಮೇತ ಪಾಲ್ ಪಡೆವೆ. ಪರ್ಯಾಯ ಮಹೋತ್ಸವಗ್ ಮಾತಾ ರೀತಿದ ಸಹಕಾರ ಕೊರ್ಪೆ ಪಂಡುದ್ ತೆರಿಪಾಯೆರು.
ಬೇತೆ ಕಾರಣೊಡಾದ್ ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿನಕುಲು ಪರ್ಯಾಯ ಮಹೋತ್ಸವಡ್ ಪಾಲ್ ಪಡೆವರೆಗ್ ಸಾಧ್ಯ ಆವೊಂದಿಜ್ಜಿ. ಆಂಡ, ಗೃಹ ಸಚಿವ ಡಾ.ಜಿ.ಪರಮೇಶ್ವರ್ ಕಾರ್ಯಕ್ರಮಡ್ ಪಾಲ್ ಪಡೆವೆರ್ ಪಂಡುದು ಪಂಡೆರು.
ಅನಂತಕುಮಾರ ಹೆಗಡೆಗ್ ತಿರುಗೇಟು
ಕರಿನ ನಾಲರೆ ವರ್ಷಡಿಂಚಿ ಸುದ್ದಿಡೇ ಉಪ್ಪಂದಿನ ಬಿಜೆಪಿ ಸಂಸದ ಅನಂತಕುಮಾರ ಹೆಗಡೆ ಚುನಾವಣೆ ಕೈತಲ್ ಬತ್ತಿನಪಗ ದಿಢೀರಾದ್ ದುಂಬು ಬೈದೆರ್. ಅರೆಗ್ ಕಾಂಗ್ರೆಸ್ ಬೊಕ್ಕ ಮುಖ್ಯಮಂತ್ರಿಲೆನ್ ಟೀಕೆ ಮಲ್ಪುನ ಒವ್ವೇ ನೈತಿಕತೆ ಇಜ್ಜಿ ಪಂಡೆರು.
ಜವಾಬ್ದಾರಿಡ್ ಉಪ್ಪಂದಿನ ಸಂಸದೆರು
ಬೆಳಗಾವಿದ ಖಾನಾಪುರಲಾ ಉತ್ತರ ಕನ್ನಡ ಲೋಕಸಭಾ ಕ್ಷೇತ್ರದ ವ್ಯಾಪ್ತಿಗ್ ಬರ್ಪುಂಡ್. ಆಂಡ ಇದಮುಟ್ಟ ಒರಲಾ ಸಂಸದೆರು ಭೇಟಿ ಕೊರ್ತುಜೆರ್. ಜನಕ್ಲೆನ ಸಮಸ್ಯೆಲೆನ್ ಕೇನುಜೆರ್.. ಆಂಡ ಇತ್ತೆ ಪ್ರಚೋದನಾತ್ಮಕ ಹೇಳಿಕೆಲೆನ್ ಕೊರೊಂದ್ ದುಂಬು ಬರೊಂದುಲ್ಲೆರ್. ಸಂಸದೆರಾದ್ ಜವಾಬ್ದಾರಿ ಸ್ಥಾನೊಡುಪ್ಪುನಾರ್ ಜವಾಬ್ದಾರಿಯುತವಾದ್ ಪಾತೆರುನಲಾ ಮುಖ್ಯ. ಸುರುಡಿಂಚಿಲಾ ಇಂಚಿನ ಹೇಳಿಕೆಲೆನ್ ಕೊರ್ಪಿನವ್ವೇ ಅರೆನ ಕೆಲಸ ಪಂಡೆರು.
ರಾಜ್ಯೊಡ್ ಕಾಂಗ್ರೆಸ್ ಗ್ ಹೆಚ್ಚು ಸ್ಥಾನ
ದುಂಬಗ್ ಬರ್ಪಿನ ಲೋಕಸಭಾ ಚುನಾವಣೆಡ್ ಕಾಂಗ್ರೆಸ್ ಪಕ್ಷ ರಾಜ್ಯಡ್ ಅತಿ ಹೆಚ್ಚು ಸ್ಥಾನೊನ್ ಪಡೆಯರೆಗುಂಡ್ ಪಂಡುದು ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ವಿಶ್ವಾಸ ವ್ಯಕ್ತಪಡಿಸಾಯೆರು.
ರಾಜ್ಯಡ್ ಇತ್ತೆ ಬಿಜೆಪಿದ 25 ಸಂಸದೆರ್ ಇತ್ತುಂಡಲಾ ಕರ್ನಾಟಕದ ಒವ್ವೇ ಸಮಸ್ಯೆಲೆಗ್ ಸೂಕ್ತವಾದ್ ಸ್ಪಂದನೆ ತಿಕ್ಕುಜಿ. ರಾಜ್ಯದ ಜನಕುಲು ಮಾತೆನ್ಲಾ ಸೂಕ್ಷ್ಮವಾದ್ಸ ಗಮನಡ್ ದೀಯೊಂದ್, ಈ ಬಾರಿ ಕಾಂಗ್ರೆಸ್ ಪಕ್ಷನ್ ಬೆಂಬಲಿಸಾವುನ ವಿಶ್ವಾಸ ಉಂಡು ಪಂಡುದು ಸಚಿವೆರು ಪಂಡೆರು.
by 