ತುಳುಲಿಪಿ, ತುಳುನಾಡ್, ತುಳುಬಾಸೆ, ತುಳುಕಟ್ಟ್, ತುಳುರಾಜ್ಯಲೆಗ್ ಬೋಡಾದ್ ತುಳುನಾಡೊರ್ಮೆ ಪ್ರಚಾರ ಬುಕ್ಕ ಚಲವಲಿ ಮಲ್ತೊಂದಿಪ್ಪುನ ಸಂಘಟನೆಯಾಯಿನ ಜೈತುಳುನಾಡ್(ರಿ) ಕಾಸ್ರೋಡ್ ಎಗ್ಗೆ ಇಂದೆತ್ತ ವತಿಡ್ತ್ ವಿಶ್ವತುಳುಲಿಪಿ ದಿನಾಚರಣೆಲ ಕೂಡುಪಟ್ಟಾಂಗ ಸಭೆಲಾ 2021 ಅಕ್ಟೋಬರ್ ತಿಂಗೊಲುದ 10-10-2021(ಯುಗಾಬ್ದ 5123 ನಿರ್ನಾಲ 24), ಆದಿತ್ಯವಾರ ಕಾಂಡೆ 10.30 ಗಂಟೆಗ್ ಕುಂಬಳೆ ಗಿಟ್ಟದ ಸಿರಿಯ/ಸೀರೆ ದೇವಲದ ಸಭಾಮಂಟಪಡ್ ನಡತುಂಡ್.
ಜೈತುಳುನಾಡ್(ರಿ) ಕಾಸ್ರೋಡ್ ಸಂಘಟನೆದ ಕಾಸ್ರೋಡು ಎಗ್ಗೆದ ಮಾನಾದಿಗೆದ ಗುರ್ಕಾರೆ ಆಯಿನ ಶ್ರೀ ಸೀರೆ ಉಮೇಶ್ ಸಾಲ್ಯಾನ್ ವಿಶ್ವತುಳುಲಿಪಿದಿನ ಕಾರ್ಯಕ್ರಮನ್ ದೀಪಬೆಳಗಾದ್ ಉದಿಪನ ಮಲ್ತೆರ್. ಮದೆಕ್ಕ್ ಪೋದಿತ್ತುನ ತುಳುಲಿಪಿನ್ ಪಾಕೊ ಸಂಶೋಧನೆಲೆನ ಮೂಲಕ ಪಿರಪ್ರಚಾರಗ್ ಕನತ್ತುದ್ ತುಳುಲಿಪಿಕ್ಕ್ ಪಿರಜೂವ ಕೊರಿನ ದಿ| ಪುಂಡೂರ್ ವೆಂಕಟರಾಜ ಪುಣಿಚಿತ್ತಾಯ(ಪುವೆಂಪು) ಅರೆನ ಪುಟ್ಟಿನದಿನತ ಅಂಗವಾದ್ ಅರೆನ ಭಾವಚಿತ್ರಗ್ ವಂದನೆ ಮಲ್ತುದ್ ಪುಡ್ಡೆಪಾಡುದ್ ಪುರ್ಪಾರ್ಚನೆಲಾ ನಡತುಂಡ್.
ಪು.ವೆಂ.ಪು ಸಂಸ್ಮರಣಾ ಭಾಷಣ ಮಲ್ತುದ್ ಅರೆನ ತುಳುಸಂಶೋಧನಾ ಕೆಲಸ, ಬದುಕುದ ಬಗ್ಗೆ ತುಳುಸಂಶೋಧಕಿ ಶ್ರೀಮತಿ ಕಾರಿಂಜ ವಿನೋದಾಪ್ರಸಾದ್ ರೈ ಪಾತೆರ್ಯೆರ್. ತುಳು ಕವಯತ್ರಿಯಾಯಿನ ಶ್ರೀಮತಿ ಕುಶಾಲಾಕ್ಷಿ ಕಣ್ವತೀರ್ಥ ತುಳುವೆರೆಗ್ ಸಾರ್ವತ್ರಿಕವಾದ್ ತುಲುಲಿಪಿ ಕಲ್ಪಾವೊಡಾಯಿನ ಪ್ರಾಮುಖ್ಯತೆ ಬಗ್ಗೆ ಪಾತೆರ್ಯೆರ್.
ಇಂದೆತೊಟ್ಟುಗು ಸ್ವರಚಿತ ತುಳುಕವಿತಾ ವಾಚನ ಕಾರ್ಯಕ್ರಮಲಾ,
ತುಳುಲಿಪಿ ಕಲ್ತುನಕುಲೆಗ್ ಪ್ರಮಾಣಪತ್ರ ಪಟ್ಟುನ ಕಜ್ಜಲಾ ನಡತುಂಡು. ಉಮೇಶ್ ಶಿರಿಯ, ಕುಶಾಲಾಕ್ಷಿ ಕಣ್ವತೀರ್ಥ ಬುಕ್ಕ ಶ್ವೇತಾಕಜೆ ಇಂಬೆರ್ನಕುಲು ಸ್ವರಚಿತ ತುಳುಕಬಿತೆಲೆನ್ ಪಂಡೆರ್.
ಬುಕ್ಕ ನಡತಿನ ಕೂಡುಪಟ್ಟಾಂಗದ ಸೇರಿಗೆಡ್ ಸಂಘಟನೆದ ನನ ದುಂಬುದ ಚಟುವಟಿಕೆದ ಯೋಜನೆಲೆನ ಬಗ್ಗೆ ಪಾತೆರಕತೆಲಾ ನಡತುಂಡ್.
ಜೈತುಳುನಾಡ್(ರಿ) ಕಾಸ್ರೋಡ್ ಸಂಘಟನೆದ ಕಾಸ್ರೋಡು ಎಗ್ಗೆದ ಗುರ್ಕಾರೆಯಾಯಿನ ಶ್ರೀ ಹರಿಕಾಂತ್ ಕಾಸ್ರೋಡ್ ಇಂಬೆರ್ ಈ ಕಾರ್ಯಕ್ರಮದ ಗುರ್ಕಾರ್ಮೆ ವಹಿಸಿದ್ ಕಜ್ಜಸುದಾರಿಕೆ ಮಲ್ತೆರ್. ಕಾರ್ಯಂತೆರಾಯಿನ ಶ್ರೀ ಕಾರ್ತಿಕ್ ಪೆರ್ಲ ಇಂಬೆರ್ ಮಾತರೆನ್ಲಾ ಎದ್ಕೊನಿನ ಈ ಕಜ್ಜಡ್ ಪದುಕೆರಾಯಿನ ಶ್ರೀ ರಮೇಶ್ ಅಟ್ಟೆಗೋಳಿ ಸೊಲ್ಮೆ ಸಂದಾವೆಲ್ ಮಲ್ತೆರ್.
by 