ಆದಿ ಅಪ್ಪೆನ ಸುಗಿಪುದ ವೇಲ್ಯೆ “ಮಾರ್ಣಮಿ”.

|| ಆದಿ ಅಪ್ಪೆನ ಸುಗಿಪುದ ವೇಲ್ಯೆ “ಮಾರ್ನೆಮಿ”||

ಊರೊರ್ಮೆಲಾ ಅಪ್ಪೆನ ಪೂಜೆದ “ಮಾರ್ನೆಮಿ‌” ಎಡ್ಡೆಮೆಲ್ಲಿ.ಉಂದುವೇ ಒಂರ್ಬದಿನತ್ತ ಗೌಜಿ.
ಎದುರ್ಪರೆ ಆವಂದಿನ ಆಪತ್ತುಲೆನ್ ಬರಿಕ್ ಒಂದಾದ್ ಲೋಕೊನು ರಚ್ಚಣೆ ಮಲ್ಪುನ ಆದಿ ಅಪ್ಪೆ ಅತ್ತಡ ಮೂಲದ ಅಪ್ಪೆನ್ ಮಹಾಕಾಳಿ,
ಮಹಾಲಕ್ಷ್ಮೀ,ಮಹಾ ಸರಸ್ವತೀಂದ್ ಮೂಜಿ ರೂಪೊಡು ಸುಗಿತೊಂದು,ಪೂಜಿಪುನ ಶರನ್ನವರಾತ್ರಿ ಒಂಜಿ ವಿಶೇಷ ಪರ್ವ.
ಜೀವೊದ ಮಿತ್ತ್ ಮೋಕೆ ನರಮಾನಿ ಬದ್ ಕ್ ದ ಮೂಲ ಗುಣ. ಈ ನರಮಾನಿ ಗುಣ ಇಜ್ಜಾಂದಿನಾಯೆ ನರಮಾನಿ ಆವರೆ ಬಲ್ಲಿ.ಇಂಚಿನ ಜೀವೊದ ಮಿತ್ತ್ ದ ಮೋಕೆದ ಗೇನೊನು ಮನಸ್ಸ್ ಡ್ ಪುಟ್ಟಾವುನಾಲ್ ಪೆತ್ತಿ ಅಪ್ಪೆ.ಪೆತ್ತಿ ಅಪ್ಪೆನ ಮೋಕೆಡ್ ಬಲತಿನ ಬಾಲೆ ಮಾತ್ರ ಲೋಕೊಡು ನರಮಾನಿಯಾದ್ ಜೀವೋ ಪ್ರೀತಿ ಇತ್ತಿನಾಯೆ ಆದ್ ಬದ್ ಕರೆ ಸಾಧ್ಯ.ಅಂಚಾದ್ ಅಪ್ಪೆನ್ ಮೋಕೆನೇ ಪೊಣ್ಣ ರೂಪೊಡು ಜನ್ಮಿತೆರ್ ಪಂಡೆರ್ .ಈ ಅಪ್ಪೆ ನಮ್ಮ ಅಪ್ಪೆ.ಮಾರ್ನೆಮಿಡ್ ಅರೆಗೇ ಪೂಜೆ,ಅರೆನನೆ ವ್ರತ.
ಲೋಕೊದ ಬೊಲ್ಪುನು ತೋಜಾವುನ,ಅಂಚೆನೆ ತಾಂಕುನ ಅಪ್ಪೆ ಒರ್ತಿ.ನಮ್ಮ ಸುತ್ತಲಾ ತೋಜುನ ಪಚ್ಚೆ ಮರಮಟ್ಟ್ ಡ್ ಉಪ್ಪುನ ಒರ್ತಿ ಅಪ್ಪೆನೇ ಆದಿಪ್ಪುನ ನೆಲತ ಅಪ್ಪೆ. ನನೊರ್ತಿ ಕಣ್ಣ ಗ್ ತೋಜಾಂದಿ ಅಪ್ಪೆ, ಆರ್ ಜಗತ್ತ್ ದ ಅಪ್ಪೆ ,ಆರ್ ಆದಿ ಅಪ್ಪೆ – ಮೂಲದ ಅಪ್ಪೆ. ಈ ಮೂಜಿ ಅಪ್ಪೆನಾಕುಲೇ ನರಮಾನಿ ಬದ್ ಕ್ ದ ಒಟ್ಟಿಗೆ ಸಾರ ಸಾರ ವರ್ಸೊಡ್ದು ಬತ್ತಿನ ಒಂಜಿ ವರ್ಣಿಪರೆ ಆವಂದಿನ ಸಂಬಂಧೊ; ಅವ್ವೆ “ಅಪ್ಪೆ”.ಈ ಗೇನನೆ ಸತ್ಯ.ನೆಡ್ದ್ ಮಿತ್ತ್ ಬೇತೆ ಸತ್ಯ ಇಜ್ಜಿ.
ಈ ಒಂಜೇ ಆಯಿನ ಸತ್ಯೊಗು ರೂಪು,ಗುಣ ಇಜ್ಜಾಂದೆ ಉಂಡು,ಆಂಡ ; ಪುಟ್ಟುನು,ಬದುಕುನು ,
ಸಯಿಪುನು ಇಂಚ ಮೂಜಿ ಸ್ಥಿತಿ ಇಪ್ಪುನ ಭೂಮಿಡ್ ಕುಲೊಂದು ಈ ಸತ್ಯೊದ ಗೇನೊನು ತೂನಗ ರೂಪು ,ಗುಣ ಇಜ್ಜಾಂದೆ ಇತ್ತಿನವೇ ಮೂಜಿ ಗುಣೊಕುಲೆನ್ ಪಡೆವೊಂದು ಒಂಜಿ ಮೂಜಾದ್ ಗಮನೊಗು ಬರ್ಪುಂಡು.ಈ ಅವಸ್ಥೆ ಎಂಚಿನ ಪಂಡ ಪುಟ್ಟುನವು,ಬದುಕುನವು, ಸಯಿಪುನವು.
ಈ ಮೂಜಿ ಅವಸ್ಥೆಗ್ ಮೂಜಿ ಗುಣ ಉಂಡು ಪನ್ಪಿನಲಾ ತೆರಿಯುನವು ಸಾಮಾನ್ಯ ಸಂಗತಿ.ಈ ಮೂಜಿ ಗುಣೊಕುಲೆ ಒಟ್ಟು ಅಭಿಪ್ರಾಯೊನೇ ಗೇನ ಇಜ್ಜಾಂದಿನ – ತಾಮಸ,ಯಾನೇ ಪನ್ಪಿನ ಅಹಂಕಾರ ರಾಜಸ,ಬೊಕ್ಕ ಒಲಿಯುನವೇ ಗೇನ ,ಅವ್ವೆ ವಿದ್ಯೆ .
ಈ ಮೂಜಿ ಗುಣಕುಲೆನ್ ಮಹಾಕಾಳಿ,ಮಹಾಲಕ್ಷ್ಮೀ,
ಮಹಾಸರಸ್ವತೀಂದ್ ವ್ಯಾಖ್ಯಾನಿತೆರ್ ವೈದಿಕ ವಿದ್ವಾಂಸೆರ್.
ಸಾತ್ವಿಕ ,ರಾಜಸ,ತಾಮಸ ಮೂಜಿ ಗುಣೊಕುಲು‌ ; ಅಯಿಕ್ ಬ್ರಹ್ಮೆ,ವಿಷ್ಣು,ಮಹೇಶ್ವರೆ ಪುದರ್ ದ ಮೂಜಿ ಮೂರ್ತಿಲು ಹಕ್ಕ್ ದಾರೆರ್.
ಮುಕಲೆಡ್ದ್ ಸೃಷ್ಟಿ,ಸ್ಥಿತಿ,ಲಯ ಪನ್ಪಿನ ಅನಾದಿದ ಅಂಚೆನೆ ದುಂಬುಗು ಏನಿಗ್ ಲಾ ಇಪ್ಪುನ‌ ಮೂಜಿ ಕೆಲಸೊಲು.ಉಂದು ಸೂರ್ಯೆ ಚಂದ್ರೆರ್ ಪುಟ್ಟೊಡ್ಡನೇ ಇತ್ತಿನವು ಅಂಚೆನೆ ಸೂರ್ಯೆ ಚಂದ್ರೆರ್ ಇಪ್ಪುನೆಟ್ಟ ಇಪ್ಪುನವು.
ಜಗತ್ತ್ ದ ಈತ್ ವ್ಯವಹಾರೊದ ಸುರುಟು ಒರ್ತಿ “ಅಪ್ಪೆ”.ಆರೇ “ಆದಿ ಅಪ್ಪೆ”.
ಪುಟ್ಟುನು ಅತ್ತಡ ಜನ್ಮೆವುನು ಪಂಡ ಎನ್ಪತ್ತನಾಲ್ ಲಕ್ಷ ಜೀವ ಕೋಟಿ ಪಂಡ್ ದ್ ಒಂಜಿ ಲೆಕ್ಕ. ಈತ್ ಲೆಕ್ಕೊಡು ಪೂರಲಾ ಎಡ್ಡೆಂದಿನವೇ ಆದಿಪ್ಪೊಡೂಂದು ದಾಲ ಇಜ್ಜಿ.ನೆಟ್ಟ್ ರಕ್ಕಸೆರ್ಲ ಉಪ್ಪುವೆರ್ಲಾ .ಸಜ್ಜನೆರ್ಲ ಉಪ್ಪುವೆರ್.ದುಷ್ಟೆರ್ ಅತ್ತಡ ರಕ್ಕಸೆರ್ ಸಜ್ಜನೆರೆಗ್ ಅನ್ಯಾಯ ಮಲ್ಪುನ ಮಾಮೂಲು.ಸಜ್ಜನಿಕೆಡ್ ದಿಂಜಕಾಲ ಸಾಧನೆ
ಮಲ್ತ್ ದ್ ಪಡೆಯಿನ ಸುಖೊನು ಬಲತ್ಕಾರೊಡು ಪಡೆಯೆರೆ ದುಷ್ಟೆರ್ ಪೊಂರ್ಬುವೆರ್ ಅದಗ ಸಜ್ಜನೆರ್ ಸೋತುದು ಈ ಆದಿ ಅಪ್ಪೆನ್ ಸುಗಿಪುವೆರ್ ಅದಗ ತನ್ನ ಸಜ್ನನೆರಾಯಿನ ಜೋಕುಲೆನ ಕಷ್ಟೊನು ನಿವಾರಿಪರೆ ಅಪ್ಪೆನೇ ಕೈಟ್ ಕೈದ್ ಪತೊಂದು ಪೆಟ್ಟ್ ಡ್ ದುಷ್ಟೆರೆನ್ ಕೆರ್ದ್ ಲೋಕೊಗು ಸುಕೊನು ಕೊರ್ಪೆರ್.
ಅಹಂಕಾರ,ಯಾನೇ ಪನ್ಪಿನ ಗುಣ ಮಿತಿ
ಮೀರ್ ದ್ ಲೋಕೊಡು ಅಶಾಂತಿ,ಅನ್ಯಾಯ,
ಅಧರ್ಮ ನೆಲೆ ಆವೊಂದು ಬನ್ನಗ ಧರ್ಮದ ಸ್ಥಾಪನೆಗ್ ಅಪ್ಪೆನೇ ಅವತರಿಪುವೆರ್ ಪನ್ಪಿನ ಒಂಜಿ‌ ಸಂದೇಶನ ಮಾರ್ನೆಮಿದ ಪೂಜೆಡ್,ಕೇನುನ ಕತೆಕುಲೆಡ್ ಉಂಡು.
ಮಾರ್ನೆಮಿ ಅಪ್ಪೆನ ಮೂಜಿ ರೂಪೊದ ಅಂಚೆನೆ ಮೂಜಿ ಗುಣೊಕುಲೆನ ,ಮಸ್ತ್ ಅವತಾರದ ಕತೆಲೆನ್ ಪಿಂದೊಣುನ ಪರ್ವಕಾಲಲ ಅಂದ್.
‌‌‌‌ ~~~~~~~~~~~~~~ಬರವು: ಕೆ.ಎಲ್.ಕುಂಡಂತಾಯ..