ವೈದ್ಯೆರೆನ ದಿನತ್ತ ಆಚರಣೆ!ವೈದ್ಯರೆನ& ಸಮಾಜದ ಜವಾಬ್ದಾರಿ..

ಪೀಠಿಕೆ:
ಇಂಚಪ್ಪೊದ ದಿನಕ್ಲೆಡ್ ಭಾರತೊಡ್ ವೈದ್ಯೆರು ಮಸ್ತ್ ಸವಾಲುಲೆನ್ ಬೊಕ್ಕ ವಿವಾದೊಲೆನ ಕೇಂದ್ರೊಡ್ ಸಿಕ್ಕುದ್ ಬೂರೊಂದುಲ್ಲೆರ್. ವೈದ್ಯಕೀಯ ವೃತ್ತಿ ವಿಪರೀತ ಒತ್ತಡಡಾದ್ ಕರ್ತವ್ಯ ಮಲ್ಪೊಡಾಯಿನ ಅನಿವಾರ್ಯತೆಯಿಪ್ಪುನ ವೃತ್ತಿ. ಪ್ರಸ್ತುತ ಕಾಲದ ಪರಿಸ್ಥಿತಿ ಬಾರೀ ವಿಶೇಷವಾದ್ ಚಿಂತಾಜನಕವಾತುಂಡ್ . ವೈದ್ಯೆರು ಸಾಕುನ್ ತೆರಿಯಂದೆ ರೋಗದ ವಿರುದ್ಧ ಹೋರಾಟ ಮಲ್ಪುವೆರ್, ರೋಗಿಲೆನ ಶುಶ್ರೂಷೆಗಾದ್ ಶ್ರಮ ಬರ್ಪೆರ್. ಕಾನೂನುದ ನ್ಯಾಯ ತೀರ್ಮಾನಗುಲಾ ಸುರುಟೇ ಮಾಧ್ಯಮ ಪರಿಶೀಲನೆ ಪಂಡ ಸುದ್ಧಿ ಮಾಧ್ಯಮ, ಅಂತರ್ಜಾಲ ಮಾಧ್ಯಮ ಟಿವಿ ಮಾಧ್ಯಮ ಬೊಕ್ಕ ಸಾಮಾಜಿಕ ಜಾಲತಾಣಲೆನ ಹಸ್ತಕ್ಷೇಪದ ಕಾರಣ ವಿಷಯ ಸಂಕೀರ್ಣ ಆವೊಂದ್ ಪೋಪುಂಡ್. ದುರದೃಷ್ಟವಶಾತ್, ಆಸ್ಪತ್ರೆಡ್ ಆಯಿನ ಪ್ರತೀ ಸಾವುನುಲಾ ಇತ್ತೆ ವೈದ್ಯಕೀಯ ನಿರ್ಲಕ್ಷ್ಯದ ಮಸೂರದ ಮೂಲಕ ತೂಪೆರ್. ವಿನಾಕಾರಣ ವಿಚಾರಣೆಡ್ ದುಂಬೇ ವೈದ್ಯೆರು ದೂಷಿತರಾಪೆರ್. ವೈದ್ಯರೆನ್ ವಿಲನ್‌ ಲಕ್ಕ ಚಿತ್ರಣ ಕೊರ್ಪೆರ್. ಮುಕ್ತ ಸಂವಾದ, ಚರ್ಚೆಲು ಬೊಕ್ಕ ಅವ್ವೆನ್ ಎದುರಿಸಾವೊಂದುಪ್ಪುನ ಸವಾಲುಲೆನ ನ್ಯಾಯಯುತ ಮೌಲ್ಯಮಾಪನದ ಅಗತ್ಯನ್ ಯಾನು ಪುನರುಚ್ಛಾರ ಮಲ್ಪುವೆ. ವೈದ್ಯೆರೆನ ಮಿತ್ತ್ ಅರೋಪ ಮಲ್ಪುನವ್ವೆಡ್ ದುಂಬು ವೈದ್ಯೆರೆನ ಕೊಡುಗೆಲೆನ್ ಗಮನ ದೀಯೊಡಾಪಿನ ಬಾರೀ ಮುಖ್ಯವಾದುಂಡ್.

ವೈದ್ಯರ ಮಾನವೀಯ ಮೋನೆ:
ವೈದ್ಯೆರು, ಅಕ್ಲೆನ ಜ್ಞಾನ ಬೊಕ್ಕ ಕೌಶಲ್ಯನ್ ಬುಡ್ದ್ , ಕೇವಲ ಮನುಷ್ಯೆರು. ಅಕುಲು ಬಾಕಿದ ವ್ಯಕ್ತಿಲೆಕ್ಕ ಭಾವನೆಲು ಬೊಕ್ಕ ಮಿತಿ ಇತ್ತಿನಕುಲು . ಆಂಡಲಾ ಸಮಾಜ ಅಕ್ಲೆನ ಮಿತ್ತ್ ಇಪ್ಪಂದಿನ ನಿರೀಕ್ಷೆಲೆನ್ ದೀಯೊಂಬುಂಡ್. ವೈದ್ಯೆರುಲಾ ತಪ್ಪು ಮಲ್ದಿಪ್ಪೆರ್ ಪನ್ಪಿನವ್ವೆನ್ ಮದತ್ ಬುಡ್ಪೆರ್.. ವೈದ್ಯೆರು ದೇವರತ್ತ್, ಆಂಡ ತಮ್ಮ ರೋಗಿಲೆಗ್ ಸಾಧ್ಯವಾಯಿನಾತ್ ಉತ್ತಮವಾಯಿನ ಆರೈಕೆನ್ ಒದಗಿಸಾವರೆಗ್ ಮೀಸಲಾದುಪ್ಪುನ ಮಾನವೆರು ಪನ್ಪಿನವ್ಬೆನ್ ನೆನಪುಡ್ ದೀಯೊಂಬಿನ ಬಾರೀ ಮುಖ್ಯ.

ವೈದ್ಯೆರು ಎದುರಿಸಾವೊಂದುಪ್ಪುನ ಸವಾಲುಲು:
ಪ್ರಸ್ತುತ ಸಾಮಾಜಿಕ ಬೊಕ್ಕ ರಾಜಕೀಯ ವಾತಾವರಣಡ್ ವೈದ್ಯೆರು ಮಸ್ತ್ ಸವಾಲುಲೆನ್ ಎದುರಿಸಾವೊಂದುಲ್ಲೆರ್. ಸೀಮಿತ ಸಂಪನ್ಮೂಲ, ಹೆಚ್ಚ ರೋಗಿಲೆನ ದುನ್ನೊಲು ಬೊಕ್ಕ ತೀವ್ರವಾಯಿನ ಕೆಲಸದ ಒತ್ತಡ, ವಿಶ್ರಾಂತಿ ಉಪ್ಪಂದಿನ ದುಡಿಮೆದೊಟ್ಟುಗ್ ರೋಗಿಲೆನ ಶುಶ್ರೂಷೆ ಮಲ್ಪೊಡಾಯಿನ ಅನಿವಾರ್ಯತೆಡುಪ್ಪುವೆರ್.. ಅವ್ವೆನ್ ಸಾಮಾನ್ಯವಾದ್ ದೀರ್ಘ ಗಂಟೆ ಕಾಲ ಕೆಲಸ ಮಲ್ಪುವೆರ್, ಸಮಾಜಗ್ ಸೇವೆ ಸಲ್ಲಿಸಾವರೆಗ್ ವೈಯಕ್ತಿಕ ಬೊಕ್ಕ ಕುಟುಂಬದ ಹಿತಾಸಕ್ತಿನ್ ತ್ಯಾಗ ಮಲ್ತೊಂದ್ ಹೆಚ್ಚಿಗೆ ಪೊರ್ತುನ್ ರೋಗಿಲೆನ ಶುಶ್ರೂಷೆಗ್ ಮೀಸಲಾದ್ ದೀಪೆರ್.ನೆತ್ತ ಮಾತಾ ಒಟ್ಟುಗ್ , ವೈದ್ಯೆರೆನ ವಿರುದ್ಧ ಹೆಚ್ಚಾವೊಂದುಪ್ಪುನ ದೌರ್ಜನ್ಯ ಪ್ರಕರಣೊಲು ಪೋಡಿಗೆ ಬೊಕ್ಕ ಅಭದ್ರತೆದ ವಾತಾವರಣನ್ ವೈದ್ಯೆರೆನಕುಲೆಡ ಸೃಷ್ಟಿ ಆತುಂಡ್. ಪ್ರಭಾವಿ ವೋಟ್ ಬ್ಯಾಂಕ್ ಅತ್ತುಂಡ ನೋಟ್ ಬ್ಯಾಂಕ್ ಅತ್ತಾವಂದಿನ ಕಾರಣ ವೈದ್ಯೆರು ಸಾಫ್ಟ್ ಟಾರ್ಗೆಟ್ ಆತೆರ್.

ಮಾಧ್ಯಮ ಬೊಕ್ಕ ಸಾರ್ವಜನಿಕ ಗ್ರಹಿಕೆದ ಪಾತ್ರ:
ಸಾರ್ವಜನಿಕ ಅಭಿಪ್ರಾಯನ್ ರೂಪಿಸಾವರೆಗ್ ಮಾಧ್ಯಮ ಮಹತ್ವದ ಪಾತ್ರ ದೆತೊಂಬುಂಡ್. ವೈದ್ಯಕೀಯ ನಿರ್ಲಕ್ಷ್ಯ ಬೊಕ್ಕ ದುರ್ನಡತೆದ ಪ್ರಕರಣಲೆನ್ ಹೈಲೈಟ್ ಮಲ್ಪುನ ಮಾಧ್ಯಮಲೆಗ್ ಅತ್ಯಗತ್ಯವಾಂಡಲಾ , ಸಂಕುಚಿತ ಮನೋಭಾವನೆಡ್ದ್ ಇಡೀ ವೈದ್ಯಕೀಯ ಕ್ಷೇತ್ರೊನೇ ತಪ್ಪಿತಸ್ಥರಲೆಕ್ಕ ಚಿತ್ರಣ ಕೊರ್ಪಿನವ್ವೆನ್ ತಪ್ಪಾವುನಲಾ ಆತೇ ಮುಖ್ಯ. ವೈದ್ಯೆರೆನ್ ಖಳನಾಯಕೆರಾದ್ ಮಲ್ಪುನ ಚಿತ್ರಣ ವೈದ್ಯೆರು ಬೊಕ್ಕ ಸಮಾಜದ ನಡುತ್ತ ಅಂತರೊನ್ ನನಲಾತ್ ಜಾಸ್ತಿ ಮಲ್ಪುಂಡ್. ಜವಾಬ್ದಾರಿಯುತ ವರದಿಗಾರಿಕೆ ಬೊಕ್ಕ ನಿಷ್ಪಕ್ಷಪಾತವಾದ್ ವಿಷಯಲೆನ್ ಪ್ರೋತ್ಸಾಹ ಮಲ್ಪುನವ್ , ಈ ಅಂತರೊನ್ ಕಡಿಮೆ ಮಲ್ಪರೆಗ್ ಬೊಕ್ಕ ಹೆಚ್ಚು ರಚನಾತ್ಮಕ ಸಂವಾದೊನ್ ಉತ್ತೇಜಿಸಾವರೆಗ್ ಸಹಾಯ ಮಲ್ಪುಂಡ್.

ವೈದ್ಯಕೀಯ ನಿರ್ಲಕ್ಷ್ಯೊಗ್ ಪರಿಹಾರ:
ವೈದ್ಯಕೀಯ ನಿರ್ಲಕ್ಷ್ಯ ಮಾತಾ ಕ್ಷೇತ್ರೊಡ್ ಉಪ್ಪುಲೆಕ್ಕ ವೈದ್ಯಕೀಯ ವೃತ್ತಿದ ಉಲಾಯಿ ಅಸ್ತಿತ್ವಡ್ ಉಂಡು ಪನ್ಪಿನವ್ವೆನ್ ಒತ್ತೊಂಬಿನ ಅನಿವಾರ್ಯ ಆತುಂಡ್. ಆಂಚಾಂಡಲಾ ಕೆಲವು ವ್ಯಕ್ತಿಲೆನ ತಪ್ಪುನ್ ವೈದ್ಯೆರೆನ ಇಡೀ ಸಮುದಾಯಗ್ ಸಾಮಾನ್ಯೀಕರಿಸಾವುನ ಅನ್ಯಾಯ ಆಪುಂಡ್. ಅವ್ಯವಹಾರದ ನಿದರ್ಶನಲೆನ್ ಕೂಲಂಕಷವಾದ್ ತನಿಖೆ ಮಲ್ಪೊಡ್ ಬೊಕ್ಕ ಅಯಿತ್ತ ಹೊಣೆಗಾರಿಕೆನ್ ಖಚಿತಪಡಿಸಾವರೆಗ್ ಸೂಕ್ತ ಕ್ರಮಕುಲೆನ್ ದೆತೊನೊಡ್. ಈ ಸಮಸ್ಯೆಲೆನ್ ವಸ್ತುನಿಷ್ಠವಾದ್ ಪರಿಹರಿಸಾವುನ ಮೂಲಕ, ವೈದ್ಯಕೀಯ ಸಮುದಾಯ ಸ್ವಯಂ-ಸುಧಾರಣೆಗಾದ್ ಕೆಲಸ ಮಲ್ಪೊಲಿ ಬೊಕ್ಕ ಸಾರ್ವಜನಿಕ ನಂಬಿಕೆನ್ ಕಾತೊನೊಲಿ.

ಮುಕ್ತ ಸಂವಾದ ಬೊಕ್ಕ ತಿಳುವಳಿಕೆ:
ಆರೋಗ್ಯಕರ ವೈದ್ಯ-ರೋಗಿ ಸಂಬಂಧೊನ್ ಬುಲೆಪಾವರೆಗ್ ಬೊಕ್ಕ ವೈದ್ಯೆರು ಎದುರಿಸಾವೊಂದುಪ್ಪುನ ಸವಾಲುಲೆನ್ ಪರಿಹಾರ ಮಲ್ಪರೆಗ್ , ಮುಕ್ತ ಸಂಭಾಷಣೆ ಅತ್ಯಗತ್ಯ. ಪಾರದರ್ಶಕತೆನ್ ವೃದ್ಧಿಸಾವರೆಗ್ ಬೊಕ್ಕ ನಂಬಿಕೆನ್ ಬುಲೆಪಾವರೆಗ್ ವೈದ್ಯರು ರೋಗಿಲು, ಅಕ್ಲೆನ ಕುಟುಂಬಲು, ವಕೀಲೆರು ಬೊಕ್ಕ ಮಾಧ್ಯಮದೊಟ್ಟುಗ್ ಸಕ್ರಿಯವಾದ್ ತೊಡಗಿಸಾವೊನೊಡ್. ಅಂಚೆನೇ , ರೋಗಿಲು ಬೊಕ್ಕ ಒಟ್ಟಾರೆಯಾದ್ ಸಮಾಜ ವೈದ್ಯೆರು ಎದುರಿಸಾವೊಂದುಪ್ಪುನ ಒತ್ತಡೊಲು ಬೊಕ್ಕ ಅಕ್ಲೆನ ವೃತ್ತಿಡ್ ಅಂತರ್ಗತವಾದುಪ್ಪುನ ತೊಂದರೆಲೆನ್ ಗುರುತಿಸಾವೊಡ್. ರಚನಾತ್ಮಕ ಸಂಭಾಷಣೆಲು ಬೊಕ್ಕ ಪರಸ್ಪರ ತಿಳುವಳಿಕೆ ಎಡ್ಡೆ ಆರೋಗ್ಯದ ಫಲಿತಾಂಶೊಲು ಬೊಕ್ಕ ಹೆಚ್ಚು ಸಾಮರಸ್ಯದ ಸಮಾಜಗ್ ಕೊಡುಗೆ ಕೊರ್ಪುಂಡ್.

ಉಪಸಂಹಾರ:
ಭಾರತಡ್ ವೈದ್ಯೆರು ಎದುರಿಸಾವೊಂದುಪ್ಪುನ ಸವಾಲುಲೆನ್ ಬೊಕ್ಕ ವೈದ್ಯೆರು ಸಮಾಜಗಾದ್ ಮಲ್ಪುನ ಸ್ವಹಿತತ್ಯಾಗಲೆನ್ ಒತ್ತೊಂಬಿನ ಸಮಯ ಬೈದುಂಡ್. ವೈದ್ಯೆರು ವಿಶೇಷ ಸವಲತ್ತುಲೆನ್ ಸರಕಾರಡಾವಡ್ ,ಬೇತೆ ಮೂಲೊಡಾವಡ್ ದೆತೊನುಜೆರ್, ಕಾರ್ಪೋರೇಟ್ ಆಸ್ಪತ್ರೆಲೆಗ್ವ ಸರಕಾರ ಸವಲತ್ತುಲೆನ್ ಕೊರ್ದಿಪ್ಪು, ಆಂಡ ಸಾಮಾನ್ಯ‌ ವೈದ್ಯೆರೆಗ್ ಒವ್ವೇ ವಿಶೇಷ ಸವಲತ್ತುಲು ಇಜ್ಜಿ. ಅಕುಲು ಕೇವಲ ನ್ಯಾಯಯುತವಾಯಿನ ಬೊಕ್ಕ ಸರಳವಾಯಿನ ಮೂಲಭೂತವಾಯಿನ ಸವಲತ್ತುಲೆನ್ ಅಪೇಕ್ಷೆ ಮಲ್ಪುವೆರ್.. ಅನಗತ್ಯವಾಯಿನ ಆಪಾದನೆ ಬೊಕ್ಕ ನಿಂದನೆಡಾದ್ ಅಕಲೆನ್ ಮುಕ್ತ ಮಲ್ಪೊಡಾತುಂಡ್. ಕೆಲವು ಅಪವಾದೊಲುಪ್ಪು, ಅಂಚ ಪಂಡುದ್ ಇಡೀ ವೈದ್ಯಕೀಯ ವೃತ್ತಿನಗ ಒಂಜೇ ಪಂಡುದು ನಿರ್ಣಯ ಮಲ್ಪುನವ್ ತಪ್ಪು ಆಪುಂಡ್. ಯಾನು, ಸರಕಾರಿ ವೈದ್ಯಕೀಯ ಕಾಲೇಜಿಗ್ ಬೋಡಾದ್ ಕೆಲ ವರ್ಷೊಡಿಂಚಿ ಸರಕಾರದ ಗಮನ ಒಯ್ಪರೆಗ್ ಪ್ರಯತ್ನ ಮಲ್ತೊಂದುಲ್ಲೆ.. ವೈದ್ಯೆ ಯಾದ್ ಯಾನು ಸಮಾಜಹಿತಕ್ಕಾದ್ ಮಲ್ತಿನ ಆ ಕೆಲಸಗ್ ಸಾರ್ವಜನಿಕರೆಡ್ದ್ ಒವ್ವೇ ರೀತಿದ ಬೆಂಬಲ ತಿಕ್ಕುದಿಜಿ. ಅವ್ವೆನ್ ಯಾನು ಬಯಕುನಾಯೆಲಾ ಅತ್ತ್.. ಆಂಡ ಸರಕಾರಿ ಆಸ್ಪತ್ರೆ, ಸರಕಾರಿ ವೈದ್ಯಕೀಯ ಕಾಲೇಜು ಸಮಾಜಗ್ ಬಾರೀ ಉಪಯೋಗಿ ಪನ್ಪಿನವ್ವೆನ್ ಸಾರ್ವಜನಿಕೆರು ತೆರಿಯೊನೊಡು. ಅಯಿಕ್ಕಾದ್ ಒವ್ವೇ ಧ್ವನಿ ಲಕ್ಕಾವಂದೆ ಯೇಪೊಲಾ ಖಾಸಗಿ ಆಸ್ಪತ್ರೆಲೆನೇ ಅವಲಂಬಿಸಾವೊಂದ್ , ರೋಗದ ತೀವ್ರತೆದ ಕಾರಣ ರೋಗಿ ತೀರಿನಪಗ , ಅಯಿತ್ತ ಆಪಾದನೆನ್ ವೃಥಾ ವೈದ್ಯೆರೆನ ಮಿತ್ತ್ ಆರೋಪ ಮಲ್ಪುನವ್ ತಪ್ಪುಂಡ್.

ಈ ಹಿನ್ನೆಲೆಡ್ ಮುಕ್ತ ಸಂವಾದ, ಚರ್ಚೆಲು ಬೊಕ್ಕ ತಿಳುವಳಿಕೆಗ್ ಒತ್ತು ಕೊರ್ಪಿನೆಡ್ದಾವರ ವೈದ್ಯೆರು ಬೊಕ್ಕ ಸಮಾಜದ ನಡುಟ್ ಹೆಚ್ಚು ಸಹಾನುಭೂತಿ ಬೊಕ್ಕ ಸಹಯೋಗದ ಸಂಬಂಧಗ್ ಸಾದಿ ಮಲ್ತ್ ಕೊರ್ಪುಂಡ್. ವೈದ್ಯಕೀಯ ವಲಯಲಾ ಒರ ಆತ್ಮಾವಲೋಕನ ಮಲ್ತೊನೊಡ್. ಸಮಾಜಲಾ . ಒಟ್ಟಾದ್ ಕೆಲಸ ಮಲ್ಪುನ ಮೂಲಕ, ವೈದ್ಯಕೀಯ ವೃತ್ತಿದುಲಾಯಿದ ಮಾನವೀಯತೆನ್ ಶ್ಲಾಘಿಸಾವನಗ ಮಾತಾ ವ್ಯಕ್ತಿಲೆನ ಅಗತ್ಯತೆಲೆನ್ ನಿಜವಾದುಲಾ ಪೂರೈಸಾವುನ ಆರೋಗ್ಯ ವ್ಯವಸ್ಥೆನ್ ನಮ ಖಚಿತ ಮಲ್ತೊನೊಲಿ.

ಡಾ. ಪಿ. ವೆಂಕಟರಾಯ ಭಂಡಾರಿ
ಅಧ್ಯಕ್ಷರು
ಭಾರತೀಯ ವೈದ್ಯಕೀಯ‌ ಸಂಘ, ಉಡುಪಿ-ಕರಾವಳಿ

ವೈದ್ಯಕೀಯ‌ ನಿರ್ದೇಶಕರು
ಡಾ. ಎ. ವಿ. ಬಾಳಿಗಾ ಸ್ಮಾರಕ ಆಸ್ಪತ್ರೆ, ದೊಡ್ಡಣಗುಡ್ಡೆ, ಉಡುಪಿ