ಇಂಚಪ್ಪೊದ ದಿನಕ್ಲೆಡ್ ಆಧುನಿಕತೆ ಮಸ್ತ್ ದುಂಬರಿದಿತ್ತುದ್ ಅಯಿಕ್ ಸರಿಯಾದ್ ಆಹಾರ ಪದ್ದತಿಲಾ ಬದಲಾತುಂಡ್.ಮುಖ್ಯವಾದ್ ಎಲ್ಯ ಜೋಕುಲು & ಪ್ರಾಯಗ್ ಬತ್ತಿನ ಜೋಕ್ಲೆನ ಆಹಾರ ಕ್ರಮ ಹಿರಿಯೆರೆಡ್ದ್ ಸಂಪೂರ್ಣ ಬದಲಾದುಂಡ್.ಶೋಕಿದ ಪುದರುಡ್ ರಂಗ್ ರಂಗ್ ದ ತಂಪು ಪಾನೀಯೊಲು, ಪಿಜ್ಜಾ ಬರ್ಗರ್ ಫಾಸ್ಟ್ ಫುಡ್ ದ ಪುದರುಡ್ ಬಜೀ ರಾಸಾಯನಿಕ ತೆನಸುಲೆನೇ ತಿನೊಂದುಲ್ಲ.ಉಂದು ಮಾತಾ ನಮ್ಮ ಜೀವಗ್ ಒವ್ವೇ ರೀತಿದ ಎಡ್ಡೆ ಪೋಚಕಾಂಶನ್ ಕೊರ್ಪುಜಿ.ಬದಲಾದ್ ನಮ್ಮ ಜೀವಡ್ ಕೊಲೆಸ್ಟ್ರಾಲ್ ಶೇಖರಣೆ ಆವರೆಗ್ ಸಹಕಾರ ಮಲ್ತುದ್ ಸ್ಥೂಲಕಾಯೆರಾದ್ ಮಲ್ಪುಂಡ್.ಉಂದುವೇ ದುಂಬಗ್ ಒಂಜಿ ದಿನ ಕ್ಯಾನ್ಸರ್ ದಂಚಿನ ಮಾರಕ ರೋಗಗ್ ಕಾರಣ ಆಪುಂಡ್.ಎನರ್ಜಿ ಡ್ರಿಂಕ್ಸ್ ಲೆನ ಪುದರುಡ್ ಬರ್ಪಿನ ಪೇಯೊಲು ಅತಿಯಾಯಿನ ಕ್ರತಕ ಬಣ್ಣ, ಸಕ್ಕರೆ ಬೊಕ್ಕ ಕಮ್ಮನೆ ,ಲೆಕ್ಕೊಡ್ ಜಾಸ್ತಿ ಕೆಫಿನ್ ನ್ ಅಯಿಟ್ ಗಲಸುವೆರ್.ಅವ್ವೆನ್ ಪರ್ದ್ ಒಂತೆ ಉಲ್ಲಾಸ ತೋಜಿಂಡ ಅವ್ವೆಡ್ದ್ 10 ಪಟ್ಟು ಅಯಿಟ್ ಅಡ್ಡ ಪರಿಣಾಮ ಆಪುಂಡ್.ಅವ್ವೆಡ್ದ್ ಇಲ್ಲಡೇ ಮಲ್ದಿನ ಲಿಂಬು ಶರ್ಬತ್, ಮುಸಂಬಿ,ಕಿತ್ತಳೆದ ಜ್ಯೂಸ್ ಲು ಎಡ್ಡೆ ಬೊಕ್ಕ ಶಕ್ತಿವರ್ಧಕ.
ಮಾತಾ ತೆನಸುಲೆಡ್ ಪಿಜ್ಜಾ ಬರ್ಗರ್ ಲೆಡ್ ಗಲಸುನ ಮೈದಾ ಹಿಟ್ಟು ನಮ್ಮ ಜೀವಗ್ ಹಾನಿಕಾರಕ.. ಗೋಧಿನ್ ಪೊಡಿ ಮಲ್ತುದ್ ಅಯಿಟುಪ್ಪುನ ಮಾತಾ ಎಡ್ಡೆ ಅಂಶೊಲೆನ್ ದೆತ್ತುದ್ ಬಜೀ ಸ್ಟಾರ್ಚ್ ನ್ ಬೇರ್ಪಾಡಿಸಾದ್ ಆ ಸ್ಟಾರ್ಚ್ ಗ್ ಬೇತೆ ಬೇತೆ ರಾಸಾಯನಿಕಲೆನ್ ಪಾಡ್ದ್ ಮಸ್ತ್ ಸಣ್ಣ ಮಲ್ಪುನವ್ವೇ ಮೈದಾ.ಈ ಮೈದಾ ಬೊಜ್ಜು ತಯಾರ್ ಮಲ್ಪುನೇಕ್ ಸಹಕಾರಿ.ಅಯಿಕ್ ಬದಲಾದ್ ಇಲ್ಲಡೇ ಮಲ್ದಿನ ಇಡ್ಲಿ, ದೋಸೆ,ಅಡ್ಡೆ,ಚಪಾತಿ ಉಂದು ಆರೋಗ್ಯದಾಯಕ.
ಅಂಚೆನೇ ಮಾಂಸಾಹಾರಿಲೆಡ್ ಕ್ರತಕವಾದ್ ಬುಲೆಪಾಯಿನ ಫಾರಂ ಕೋರಿದ ಮಾಸಲಾ ಬೊಜ್ಜು ತಯಾರ್ ಮಲ್ಪುಂಡ್.48 ಡ್ದ್ 50 ದಿನೊಟ್ ಕೋರಿದ ಕಿನ್ನಿ ಮಲ್ಲ ಕೋರಿಯಾವರೆಗ್ ,ಅಲ್ಪಲಾ ರಾಸಾಯನಿಕೊಲು,ಹಾರ್ಮೋನುಲೆನ್ ಗಲಸುವೆರ್.ಅಯಿತ್ತ ಮಾಸ ಆಂಟಿಬಯೋಟಿಕ್ ಬೊಕ್ಕ ಬುಲೆವರೆಗ್ ಸಹಕಾರಿಯಾಪಿನ ಹಾರ್ಮೋನುಲೆನ್ ಯಥೇಚ್ಛವಾದ್ ಗಲಸುವೆರ್.ಅಂಚಾದ್ ಇತ್ತೆದ ಪೊಣ್ಣು ಜೋಕುಲು 5-6 ಕ್ಲಾಸ್ ಡೇ (ಋತುಮತಿ) ಪ್ರಾಯೊಗ್ ಬರ್ಪೆರ್.ಅಕಲೆಗ್ ಈ ಬಗ್ಗೆ ಒವ್ವೇ ತಿಳುವಳಿಕೆ ಉಪ್ಪಂದಿನ ಪ್ರಾಯ ಅವ್ವಾದಿಪ್ಪುಂಡ್.ಅಂಚಾದ್ ಸಾಧ್ಯವಾಯಿನಾತ್ ಬಾಯ್ಲರ್ ಫಾರಂ ಕೋರಿದ ಬಳಕೆ ಕಮ್ಮಿ ಮಲ್ಪೊಡ್.ಊರುಡ್ ಇಲ್ಲಡೇ ಸಾಂಕಿನ ಕೋರಿಲು ಆರೋಗ್ಯಗ್ ಎಡ್ಡೆ. ಕೋರಿಡ್ದುಲಾ ತಾಜಾ ಮೀನು ಜೀವಗ್ ಆರೋಗ್ಯಗ್ ಬಾರೀ ಎಡ್ಡೆ..
ನಮ ಉಪಯೋಗ ಮಲ್ಪುನ ಮಾರುಕಟ್ಟೆಡ್ ಬರ್ಪಿನ (ತರಕಾರಿ) ಕಾಯಿ-ಕಜಿಪು ದ ಬಗ್ಗೆಲಾ ಜಾಗ್ರತೆ ಮಲ್ಪೊಡ್.ತರಕಾರಿದ ಬಿತ್ತು ಪಾಡುನಗನೇ ಅಯಿಕ್ ಕ್ರಿಮಿನಾಶಕ ಪಾಡ್ದ್ ಬೊಕ್ಕ ಬಿತ್ತುವೆರ್.ಅಂಚೆನೇ ರಾಸಾಯನಿಕ ಗೊಬ್ಬರ & ಕ್ರಿಮಿನಾಶಕಲೆನ್ ಪಾಡ್ದೆ ಬುಲೆಪಾದ್ ಕನಪೆರ್.ಅವ್ ತೂವರೆಗ್ ಪಜ್ಜಿ-ಪಜ್ಜಿಯಾದುಪ್ಪುಂಡ್.ಆಂಡ ಅಯಿಕ್ ಕ್ರಿಮಿನಾಶಕ ಸರಿಯಾದ್ ಉಪಯೋಗ ಮಲ್ಪುವೆರ್.ಕೆಲವೆರ್ ಉಂದೆನೇ ಸಾವಯವ ತರಕಾರಿ ಪಂಡುದ್ ಜನಕ್ಲೆಗ್ ಯಾಮಾರಿಸಾದ್ ಮಾರುವೆರ್.ನಿಜವಾದುಲಾ ಸಾವಯವ ತರಕಾರಿಲು ಮಸ್ತ್ ದುಬಾರಿಯಾದುಪ್ಪುಂಡ್.ಅಂಚಾದ್ ಇಲ್ಲದ ಜಾಲುಡ್ ಅತ್ತುಂಡ ಟೆರೇಸ್ ಡ್ ನಮಕ್ ಬೋಡಾಯಿನಾತ್ ಹೆಚ್ಚಾದ್ ಪತ್ಪೆ,ಬಸಳೆ,ಗುಳ್ಳ, ಬೆಂಡೆ ಇಂಚಿನ ತರಕಾರಿಲೆನ್ ಬುಲೆಪಾವೊಲಿ.ಉಂದು ಆರೋಗ್ಯಗ್ ಲಾ ಎಡ್ಡೆ.ಸಮಾಜಗುಲಾ ಎಡ್ಡೆ.
ಡಾ| ದೇವದಾಸ್ ಶೆಟ್ಟಿ, ಮಲ್ಪೆ..
by 