ವಿಡಿಯೋ ಪ್ರಕರಣ ಮುಚ್ಚಿದ್ ಪಾಡುನ ಪ್ರಯತ್ನ: ಯಶ್ಪಾಲ್

ಉಡುಪಿ ವಿಡಿಯೋ ಪ್ರಕರಣ ಸಿಐಡಿ ತನಿಖೆಗ್ ಒಪ್ಪಿಸಾದ್ ರಾಜ್ಯ ಸರಕಾರ ಪ್ರಕರಣ ಮುಚ್ಚಿದ್ ಪಾಡುನ ಹುನ್ನಾರ : ಯಶ್ ಪಾಲ್ ಸುವರ್ಣ

ಉಡುಪಿ ಜಿಲ್ಲಾ ಪೊಲೀಸ್ ಇಲಾಖೆ ಖಾಸಗಿ ಪ್ಯಾರಾ ಮೆಡಿಕಲ್ ಕಾಲೇಜಿದ ವಿಡಿಯೋ ಪ್ರಕರಣದ ತನಿಖೆನ್ ಮಲ್ತೊಂದುಪ್ಪುನ ಸಂದರ್ಭಡೇ ತರಾತುರಿಟ್
ಸಿಐಡಿಗ್ ವರ್ಗಾವಣೆ ಮಲ್ತುದ್ ಪ್ರಕರಣೊನ್ ಮುಚ್ಚಿದ್ ಪಾಡುನ ಹುನ್ನಾರ ರಾಜ್ಯ ಸರಕಾರ ಮಲ್ತೊಂದುಂಡ್ ಪಂಡುದು ಉಡುಪಿ ಶಾಸಕ ಯಶ್ ಪಾಲ್ ಸುವರ್ಣ ದೂರುದೆರ್.

ರಾಜ್ಯದಾದ್ಯಂತ ಈ ಪ್ರಕರಣದ ಬಗ್ಗೆ ತೀವ್ರ ಜನಾಕ್ರೋಶ, ಪ್ರತಿಭಟನೆಗ್ ಮಣಿದ ಸರಕಾರ ತನಿಖಾಧಿಕಾರಿನ್ ಬದಲಾವಣೆ ಮಲ್ತಿನೆಡ್ ಬೊಕ್ಕ ಉಡುಪಿ ಜಿಲ್ಲಾ ಪೊಲೀಸ್ ಇಲಾಖೆ ತನಿಖೆ ತೀವ್ರ ಮಲ್ತುದ್ ಪ್ರಕರಣದ ಸಂತ್ರಸ್ಥ ಬೊಕ್ಕ ಆರೋಪಿ ವಿದ್ಯಾರ್ಥಿನಿಲೆನ್ ನ್ಯಾಯಾಧೀಶೆರೆನ ಎದುರು ಹಾಜರು ಮಲ್ತುದ್ ಹೇಳಿಕೆ ದೆತೊಂದ್ ಕೆಲಬ್ ಪೂರಕ ಸಾಕ್ಷಿಲೆನ್ ಸಂಗ್ರಹ ಮಲ್ದಿತ್ತುಂಡ್.

ಅತ್ತಾವಂದೆ ಆರೋಪಿ ವಿದ್ಯಾರ್ಥಿನಿನ ಅಮ್ಮೆರ್ ನಿಷೇಧಿತ ಪಿಎಫ್ ಐ ಸಂಘಟನೆದ ಸಕ್ರಿಯ ಸದಸ್ಯ ಪನ್ಪಿನ ಮಾಹಿತಿಲು ತನಿಖೆಡ್ ತೋಜಿದ್ ಬೈದುಂಡ್. ಇತ್ತೆ ಜಿಲ್ಲಾ ಪೊಲೀಸೆರೆನ ತನಿಖೆ ಪೂರ್ಣ ಆಪಿನ ಸುರುಟೇ ತರಾತುರಿಡ್ ಸಿಐಡಿಗ್ ವರ್ಗಾವಣೆ ಮಲ್ಪುನ ಮೂಲಕ ರಾಜ್ಯ ಸರಕಾರದ ನಡಕೆ ಕುಡೊರ ಗೊಂದಲ ಸೃಷ್ಟಿ ಮಲ್ದುಂಡ್.

ಪ್ರಕರಣದ ಸುರುಡಿಂಚಿಲಾ ಪೊಲೀಸ್ ಇಲಾಖೆಗ್ ಪ್ರತಿ ಹಂತೊಡ್ ಪ್ರಭಾವ ಬೀರುನ ಯತ್ನ ಮಲ್ದಿನ ಸರಕಾರ ಇತ್ತೆ ಆರೋಪಿಲೆನ್ ರಕ್ಷಣೆ ಮಲ್ಪರೆಗ್ ಸಿಐಡಿಗ್ ವರ್ಗಾವಣೆ ಮಲ್ದುಂಡ್ ಪಂಡುದು ನೇರ ಆರೋಪ ಮಲ್ದೆರ್.