ಪೇತ್ರಿಡ್ ಅನ್ನಪೂರ್ಣ ನರ್ಸರಿ

ಕರಿನ  26 ವರ್ಷದ ಪಿರಾಕುಡ್  ಕಾಲಿ 5000 ಕಂಗುದ ದಯಿಲೆನ  ಮೂಲಕ ಪ್ರಾರಂಭ ಮಲ್ತಿನ ನರ್ಸರಿಯೊಂಜಿ ಇತ್ತೆ ಬುಳೆದು ಉಸುದ್  ದೇಶ ವಿದೇಶಡುಲಾ ಪುಗಾರ್ತೆನ್ ನರ್ಸರಿ  ಬ್ರಹ್ಮಾವರ ತಾಲೂಕು ಪೇತ್ರಿಡುಪ್ಪುನವ್ ತುಳುನಾಡುಗೇ  ಪೆರ್ಮೆದ  ಸಂಗತಿ.

ಮೂಲೊಡ್  ಪುತ್ತೂರು ಕಾವುದಕುಲಾಯಿನ  ಶ್ರೀ ಶ್ಯಾಮ್ ಪ್ರಸಾದ್ ಭಟ್ ಬೊಕ್ಕ  ಶ್ರೀಮತಿ ಪ್ರಸನ್ನ ಪ್ರಸಾದ್ ಭಟ್ ದಂಪತಿಲು ಕರಿನ  30 ವರ್ಷ ಪಿರಾವುಡ್ ಪೇತ್ರಿದ ಚೆರ್ಕಾಡಿಡ್  ಬತ್ತುದ್ ಅಲ್ಪನೇ ಇಲ್ಲ್ ಕಟ್ಟುದ್ ಕುಲ್ಲಿಯೆರ್ .
ಕೃಷಿ ಕುಟುಂಬಡ್ದ್  ಬತ್ತಿನ ಈ ಕುಟುಂಬ ಬೆನ್ನಿಡ್  ವಿಶೇಷ ಆಸಕ್ತಿ ಉಪ್ಪುನೆಡ್ದಾವರ  ಪೇತ್ರಿಡ್  ಖರೀದಿ ಮಲ್ತಿನ  10 ಎಕ್ರೆ ಜಾಗೆಡ್  ಕಂಗುದ  ತೋಟ ಮಲ್ತೆರು. ಬೊಕ್ಕ ಮೊಕ್ಲೆನ ಆಸಕ್ತಿ ನರ್ಸರಿದಂಚಿ  ಪೋದು,ಅನ್ನಪೂರ್ಣೇಶ್ವರಿ ನರ್ಸರಿ ನ್  ಸುರು ಮಲ್ತೆರು.

ಬೆನ್ನಿಡ್  ಆಸಕ್ತಿ  ಇತ್ತಿನ ಮೊಕ್ಲೆನ  2 ಆನ್ ಜೋಕ್ಲೆನ ಬೆಂಬಲದೊಟ್ಟುಗ್  ಕುಡೊರ  5 ಎಕ್ರೆ ಜಾಗ ಖರೀದಿ ಮಲ್ತುದ್  ಒಟ್ಟು 15 ಎಕ್ರೆ ಜಾಗೆಡ್  ಗುಣಮುಟ್ಟದ ಗಿಡ ದೀದ್  ನರ್ಸರಿ ಪ್ರಾರಂಭ ಮಲ್ತೆರು.
ಪ್ರಾರಂಭಡ್  ಮನೋಲಿದ  ಚಪ್ಪರದ ಅಡಿಟ್  ಗಿಡ ಬುಲೆಯರೆಗ್  ಪ್ರಾರಂಭ ಮಲ್ತಿನ ದಂಪತಿಲು ಬೊಕ್ಕ ಬೇತೆ ಬೇತೆ  ತಳಿತ್ತ  ಬಾರೆದ ಗಿಡ, ಅಡಿಕೆ ಗಿಡ, ಫಲ ಕೊರ್ಪಿನ   ಗಿಡ, ಪೂತ  ಗಿಡ ರಕ್ತಚಂದನ, ಬಿಲ್ವಪತ್ರೆ ಬೊಕ್ಕ  ಬಾಕಿದ ಕೆಲವು ಬಗೆತ್ತ  ಗಿಡಕ್ಲೆನ್ ಬುಲೆಪಾಯೆರು.

ಬಾರೆಗಿಡದ ಟ್ವಿಸ್ ಕಲ್ಚರ್ ಬಗ್ಗೆ ಬೆಂಗಳೂರುದ ಹುಳಿಮಾವುಡ್  1 ತಿಂಗೊಳು ತರಬೇತಿ ಪಡೆಯಿನ ದಂಪತಿಲು, ಅಕ್ಲೆನ  ಜಾಗೆಡೇ ಬಾರೆಗಿಡದ ಟ್ವಿಸ್ ಲ್ಯಾಬ್ ಪ್ರಾರಂಭ ಮಲ್ತೆರು. ಈ ಲ್ಯಾಬ್ ಬೆಂಗಳೂರುಡ್ ತತ್ತುಂಡ ಪೇತ್ರಿಡ್  ಇಪ್ಪುನವ್  ವಿಶೇಷವಾದುಂಡ್.

ಕರಿನ  ಸುಮಾರು 21 ವರ್ಷಡಿಂಚಿ ಮೊಕುಲು ಪ್ರತೀ ವರ್ಷ 1000 ಕ್ಕ್ ಲಾ ಜಾಸ್ತಿ  ಗಿಡಕ್ಲೆನ್  ಧರ್ಮಾರ್ಥವಾದ್  ಶಾಲೆಲೆಗ್, ಸಂಘ ಸಂಸ್ಥೆಲೆಗ್, ದೇವಸ್ಥಾನ, ಮಠ, ಚರ್ಚ್ ಲೆಗ್ ಕೊರ್ದ್  ಪರಿಸರ ಒರಿಪಾವುನ ಬೇಲೆ ಮಲ್ತೊಂದುಲ್ಲೆರ್.
ಹೊಸನಗರದ ರಾಮಚಂದ್ರಪುರ ಮಠಕ್ 2 ಲೋಡ್ ಪೂತ ಗಿಡಕ್ಲೆನ್  ಕೊರ್ದ್  ಇನಿಕುಲಾ ಮೊಕುಲು ಕೊರ್ತಿನ ಆ  ಗಿಡೊಟ್ ಆಪಿನ  ಪೂವೇ ದೇವೆರೆಗ್ ಸಮರ್ಪಣೆ ಆವೊಂದುಪ್ಪುನವ್  ಭಟ್ ಕುಟುಂಬಗ್  ಪೆರ್ಮೆದ ಬೊಕ್ಕ ಖುಷಿತ್ತ ಸಂಗತಿಯಾದುಂಡ್.

ಕೆಲಸದಕ್ಲೆನ್  ಇಲ್ಲದ ಕುಟುಂಬದಲೆಕ್ಕ  ತೂವೊಂದುಪ್ಪುನ ಮೊಕ್ಲೆನ ನರ್ಸರಿಡ್   ಇತ್ತೆಗುಲಾ  15 ಕುಟುಂಬ  50 ಜನ ದಿನಕೂಲಿ ಬೇಲೆದಕುಲು ಬೆನೊಂದುಲ್ಲೆರ್.

ಕರ್ನಾಟಕ ಬೊಕ್ಕ ದಕ್ಷಿಣ ರಾಜ್ಯಲೆಗ್  ಮಾರಾಟ ಆವೊಂದುಪ್ಪುನ   ಮೊಕ್ಲೆನ ಗಿಡಕುಲು  ಶ್ರೀಲಂಕಾ ಬೊಕ್ಕ ದುಬೈಗುಲಾ  ಮಾರಾಟ ಆವೊಂದುಂಡ್. ಅಯಿಟುಲಾ ಬಾರೆಗಿಡ ಶ್ರೀಲಂಕಾಗ್  ಜಾಸ್ತಿ   ರಫ್ತು ಆವೊಂದುಂಡ್.

ಒವ್ವೇ  ಗ್ರಾಹಕೆರುಗುಲಾ  ಮೊಕುಲು ಪ್ರದೇಶ /ಜಾಗ /ಮಣ್ಣು/ ಗಿಡ ಬುಲೆಪಾವುನ  ಮಾಹಿತಿ ಕೊರ್ದೇ ಗಿಡ ಕೊರೊಂದುಪ್ಪುನವ್  ಮೊಕ್ಲೆನ  ಗಿಡಕ್ಲೆನ ಕಾಳಜಿನ್  ದೆರ್ತ್ ತೋಜಾವುಂಡ್.