ತುಳು ಸಾಹಿತಿ ಗಂಗಾಧರ ಕಿದಿಯೂರು ಮೆರೆಗ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ..

ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿದ ಗೌರವೊಗ್ ಉಡುಪಿ ತುಳುಕೂಟದ ಕಾರ್ಯಂತೆರ್, ತುಳು ಸಾಹಿತಿ,ನಾಟಕಕಾರೆ ಗಂಗಾಧರ್ ಕಿದಿಯೂರ್ ಮೇರ್ ಆಯ್ಕೆ ಆತೆರ್..ಎಲ್ಲೆ ನಡಪುನ ಉಡುಪಿ ಜಿಲ್ಲಾ ರಾಜ್ಯೋತ್ಸವದ ಕಾರ್ಯಕ್ರಮೊಡ್ ಪ್ರಶಸ್ತಿ ಮಾನಾದಿಗೆ ನಡಪರೆಗುಂಡ್.

ತುಳುನಾಡುದ ಬೆನ್ನಿದ ಕುಟುಂಬಡ್ದ್ ಬೈದಿನ ಗಂಗಾಧರ್ ಕಿದಿಯೂರ್ ಕರಿನ ನಲ್ಪ ವರ್ಷಡಿಂಚಿ ಸತತವಾದ್ ತುಳು, ಕನ್ನಡ ರಂಗಭೂಮಿಡ್ ಕಲಾಮಾತೆನ ಸೇವೆನ್ ಮಲ್ತೊಂದ್ ಬೈದೆರ್. ರಂಗಸಾಹಿತಿಯಾದ್ 26 ಕನ್ನಡ ಬೊಕ್ಲ ತುಳು ನಾಟಕೊಲೆನ್ ಬರೆದು ಮುದ್ರಣ ಮಲ್ತುದೆರ್. ರಂಗನಿರ್ದೇಶಕೆರಾದ್, ನೂದೆಕುಲಾ ಜಾಸ್ತಿ ಕನ್ನಡ, ತುಳು ನಾಟಕೊಲೆನ್ ನಿರ್ದೇಶನ ಮಲ್ತುದ್ ಗ್ರಾಮೀಣ ಪ್ರದೇಶದ ಕಲಾವಿದೆರೆನ್ ಬುಲೆಪಾವುನ ಪ್ರಯತ್ನ ಮಲ್ತುದೆರ್. ಕರಾವಳಿದ ಕೊಡಿಕಡೆ , ಮಾತ್ರ ಅತ್ತಾವಂದೆ ದೇಶವಿದೇಶಡುಲಾ ನಾಟಕ ಪ್ರದರ್ಶನ ನಡಪಾದೆರ್. ಗಂಗಾಧರ್ ಮೇರು ರಚನೆ ಮಲ್ದಿನ ಪಿಂಗಾರದ ಬಾಲೆ: ಸಿರಿ: ಜನಪದ ತುಳು ನಾಟಕೊಗ್ ಪ್ರತಿಷ್ಠಿತ ಧರ್ಮಸ್ಥಳ ರತ್ನವರ್ಮ ಹೆಗ್ಗಡೆ ಪ್ರಶಸ್ತಿ ತಿಕ್ಕುದುಂಡ್. ಮೂಲ ತುಳುಲಿಪಿಟ್ ಮುದ್ರಣ ಆತಿನ ಸುರುತ್ತ ನಾಟಕ ಕೃತಿ ಪನ್ಪಿನ ಪುಗಾರ್ತೆಗ್ ಪಾತ್ರ ಆತುಂಡ್. ಮೆನ್ಕುನ ಸಿರಿಸಿಂಗಾರ ಪನ್ಪಿನ ತುಳು ನಾಟಕ ಸಂಪುಟನ್ ಬರೆದು ಲೋಕಾರ್ಪಣೆ ಮಲ್ತುದೆರ್. ಸಾಮಾಜಿಕ ಹಿನ್ನಲೆದ ಬದುಕೊಂಜಿ ಸಂಗಮ ನಾಟಕೊಗ್ ಕಲ್ಪನಾ ಪ್ರಶಸ್ತಿ ತಿಕ್ಕುದುಂಡ್. ಪ್ರಸ್ತುತ ತುಳುನಾಡುದ ಪೆರ್ಮೆದ ಸಂಘಟನೆಯಾಯಿನ ತುಳುಕೂಟ ಉಡುಪಿ (ರಿ.) ಸಂಸ್ಥೆಡ್ ಸದಸ್ಯೆರಾದ್ 36 ವರ್ಷ, ಕಾರ್ಯದರ್ಶಿಯಾದ್ 10 ವರ್ಷ, ಪಣಿಯಾಡಿ ಕಾದಂಬರಿ ಪ್ರಶಸ್ತಿ ಸಂಚಾಲಕೆರಾದ್ 20 ವರ್ಷ ಬೊಕ್ಕ ಕರಿನ 10ವರ್ಷಡಿಂಚಿ ಪ್ರಧಾನ ಕಾರ್ಯದರ್ಶಿಯಾದ್ ಸೇವೆ ಸಲ್ಲಿಸಾವೊಂದುಲ್ಲೆರ್. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ವತಿಡ್ದ್ ತುಳುನಾಡ ಬರವುದ ಬಿರ್ಸೆರ್, ಪ್ರಶಸ್ತಿ ಗೌರವ ತಿಕ್ಕುದುಂಡ್. ಅಖಿಲಭಾರತ ತುಳು ಒಕ್ಕೂಟದ ಜತೆ ಕಾರ್ಯದರ್ಶಿಯಾದುಪ್ಪುನ ಮೆರೆಗ್ ಕರಿನ ಸಾಲುದ ಮಲಬಾರ್ ವಿಶ್ವರಂಗ ಪುರಸ್ಕಾರ, ಶ್ರಮಣಬೆಳಗೊಳಡ್ ನಡತಿನ ಅಖಿಲ ಕರ್ನಾಟಕ ಬೆಳದಿಂಗಳ ಸಾಹಿತ್ಯ ಸಮ್ಮೇಳನಡ್ ಕರ್ನಾಟಕ ತುಳುವರತ್ನ ರಾಷ್ಟ್ರಮಟ್ಟದ ಬಿರುದು ತಿಕ್ಕುದುಂಡ್. ಸೇರಿನಂಚ ಬೇತೆ ಬೇತೆ ಸಂಘ ಸಂಸ್ಥೆಲು ಗುರುತಿಸಾದ್ ಗೌರವ ಮಲ್ದುಂಡ್. ನಾಟಕ ಕಲಾವಿದೆರೆಗ್ ಅನುಕೂಲವಾಪಿನಂಚ ಮಧುಶ್ರೀ ಪ್ರಕಾಶನದ ಮೂಲಕ ಸಮಗ್ರ ನಾಟಕ ಸಂಪುಟನ್ ಪಿದಾಯಿ ಕನತುದ್, ಕರಾವಳಿ ಕರ್ನಾಟಕದ ವಿದ್ವಾಂಸೆರು, ಸಾಹಿತಿಲು ಬೊಕ್ಕ ಸಮಸ್ತ ಓದುಗೆರೆನ ಪ್ರಶಂಸೆಗ್ ಪಾತ್ರರಾತೆರ್. ನಿರಂತರವಾದ್ ರಂಗಭೂಮಿ ಕ್ಷೇತ್ರಡ್ ಸೇವೆ ಮಲ್ಪೊಡುಂದ್ ಇರಾದೆ ದೀಯೊಂದಿನ ಮೆರೆಗ್ ಈ ಸಾಲುದ ಉಡುಪಿ ಜಿಲ್ಲಾಡಳಿತದ ವತಿಡ್ದ್ ಕೊರ್ಪಿನ ಪ್ರತಿಷ್ಠಿತ ಉಡುಪಿ ಜಿಲ್ಲಾರಾಜ್ಯೋತ್ಸವ ಪ್ರಶಸ್ತಿಗ್ ಪರಿಗಣಿಸಿದೆ ಭವಿಷ್ಯಡ್ ಕುಡಲಾತ್ ಕಲಾಸೇವೆ ಮಲ್ಪುನ ಪ್ರೋತ್ಸಾಹ ತಿಕ್ಕಿಲೆಕ್ಕ ಆತುಂಡ್.