ವಸುಂಧರಾ ಅದ್ಭುತ ಅಭಿನಯ

ಕುಮಾರಿ ವಸುಂಧರಾ ಮೆರೆನ ಅದ್ಭುತ ನೃತ್ಯಾಭಿನಯ

ಮಹತೋಬಾರ ಶ್ರೀ ಶಂಕರನಾರಾಯಣ ದೇವಸ್ಥಾನ ಬೊಕ್ಕ  ನೃತ್ಯನಿಕೇತನ ಕೊಡವೂರು ಸಂಯೋಜನೆದ ಸಾಪ್ತಾಹಿಕ ನೃತ್ಯಸರಣಿ “ನೃತ್ಯಶಂಕರ” ಸರಣಿ 55ಡ್ ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನದ ವಸಂತಮಂಟಪಡ್  ವಿದುಷಿ ಕು| ವಸುಂಧರಾ ಮೇರು ತನ್ನ ನೃತ್ಯಾಭಿನಯನದ ಮುಖೇನ ಪೇಕ್ಷಕೆರೆನ್ ಕುಲ್ಲುದಿನಲ್ಪಡ್ದ್ ಒಡೇಗುಲಾ ಪೋವಂದಿಲೆಕ್ಕ ಮಲ್ಪರೆಗ್  ಯಶಸ್ವಿಯಾತೆರು.

ನಾಟ್ಯಾಧಿ ದೇವತೆಯಾಯಿನ  ಶಿವಗ್ ಪೂ, ತನು ಮನ ಅರ್ಪಣೆ ಮಲ್ತುದ್ ದೇವತೆಲೆಗ್  ಗುರುಕುಲೆಗ್ ಅಪ್ಪೆ ಅಮ್ಮಗ್  ನಮಸ್ಕಾರ ಮಲ್ತುದ್  ಬರ್ಪಿನ  ಮಾತಾ ಕಲಾಭಿಮಾನಿಲೆನ್  ಸ್ವಾಗತ ಮಲ್ಪುನ ಪುಷ್ಪಾಂಜಲಿ ಮೂಲಕ ನೃತ್ಯ ಪ್ರಾರಂಭ ಮಲ್ತೆರು.

ಪದವರ್ಣ ಪ್ರಸ್ತುತಿಡ್  ವರ್ಣನ್  ವಿಭಿನ್ನವಾದ್ ಚಿತ್ರಣ ಮಲ್ದೆರ್. ಮುಲ್ಪ ರುಕ್ಮಿಣಿ ತನ್ನ ಬಾಲ್ಯಡೇ  ಕೃಷ್ಣನ ಕಥೆ, ಮಹಿಮೆಲೆನ್  ಕೇನೊಈದ್  ಅಪಾರವಾದ್ ಮೋಕೆ ಮಲ್ಪರೆಗ್  ಸುರು ಮಲ್ದೊಲು. ಆಯನೇ ತನ್ನ ಕಲ್ಪನೆ ಚಿತ್ರಣ ಮಲ್ತಿಲೆಕ್ಕ ಪಟಟ್ ಚಿತ್ರಣ ಮಲ್ತುದ್ ಅಯಿತೊಟ್ಟುಗ್  ಪಾತೆರೊಂದುಪ್ಪನಗ  ಅಲೆನ ಸಖಿ ಸತಾಯಿಸಾನಗ, ಅಣ್ಣೆ ರುಕ್ಮ  ಬತ್ತುದು ಆ ಚಿತ್ರಪಟನ್ ಪರ್ತುದ್  ಅಲೆನ್  ಕೋಣೆಡ್ ಕುಲ್ಲಾವೆ.
ಆ ಪೊರ್ತುಡ್  ಅಲ್ಪನೇ  ಪೋವೊಂದಿತ್ತಿನ  ದೇವಾಲಯದ ಅರ್ಚಕೆರೆಡ ಬಾಕಿಲ್ ದೆಪ್ಪರೆಗ್ ಪಂಡುದ್, ಅರೆಡ  ತನ್ನ ಸ್ವಯಂವರಡ್ ದುಂಬೇ ದೇವಿನ ದೇವಸ್ಥಾನಗ್ ಬತ್ತುದ್  ದೇವಸ್ಥಾನಗ್ ಲೆಸೊಂದ್ ಪೋರೆಗ್   ಓಲೆ ಬರೆದು ಅವ್ವೆನ್  ಕೃಷ್ಣಗ್  ಮುಟ್ಟಾವರೆಗ್ ಪನ್ಪೊಲು.

ಮಾತೆರೆನ  ಮನವ ಅರ್ಥ ಮಲ್ತೊಂಬಿನಾಯೆ  ಎನ್ನ ಮನಸ್ ನ್  ದಾಯೆಗ್ ಅರ್ಥ ಮಲ್ತೊಂದುಜೆ ಉಂದು ನ್ಯಾಯನಾ ಕೃಷ್ಣ.. ಪಂಡುದು ಅಪಾರ ಪ್ರೇಮ ಕುತೂಹಲಡ್ , ಇಂಚಿಡ್  ರುಕ್ಮಿಣಿ ತನ್ನ ಮನದೊಡೆಯನ ನೆನೆತೊಂದುಪ್ಪನಗ  ಅಂಚಿಡ್ ಮನದರಸಿನ  ಲೆಸೊಂದ್ ಪೋರೆಗ್  ಕೃಷ್ಣ ಬರ್ಪೆನಾ  ಪನ್ಪಿನವ್ವೆನ್  ನೃತ್ಯಾಭಿನಯಡ್  ಬಾರೀ ಮನೋಜ್ಞವಾದ್ ಅಭಿನಯ ಮಲ್ತೆರು.

ಪುರಂದರ ದಾಸೆರು ರಚನೆ ಮಲ್ದಿನ  ನಿಂದಾ ಸ್ತುತಿ “ಎಂಥ ಚೆಲುವೆಗೆ” ಈ ನೃತ್ಯಡ್  ಶಿವ ಪಾರ್ವತಿಯೆರ ವಿವಾಹ ಮಹೋತ್ಸವಗ್  ಬತ್ತಿನ  ದೋಸ್ತಿನಕ್ಲೆನ ಸಂಭಾಷಣೆ ಇತ್ತುಂಡ್. ಮೇರು ಕಲ್ಯಾಣ ಮಹೋತ್ಸವದ ಸಂಭ್ರಮದ ಬಗ್ಗೆ  ಪಾತೆರುನ  ಪೊರ್ತು ಎಂಚಿನ ಚೆಲುವೆ ಪಾರ್ವತಿ, ಆಂಡ  ಅಲೆಗ್  ಇಂಚಿನ ಆನಾ ಪಂಡುದು ಪನ್ಪಿನಾಲ್  ಒರ್ತಿ, ಕಾಲಿ ಪಣವು ಆಸ್ತಿ ಮುಖ್ಯ ಅತ್ತ್ , ಗುಣ ವ್ಯಕ್ತಿತ್ವ ಮುಖ್ಯ ಪಂಡುದು ತೆರಿಪಾವುನಾಲ್  ಕುಡೊರ್ತಿ. ಇಂಚ ಇರುವೆರ್ಲಾ ಮದಿಮೆದ ಗೌಜಿನ್   ಸಂಭ್ರಮಿಸಾವುನ ಒಂಜಿ ತಮಾಷೆದ  ಕಥೆನ್  ಅಭಿನಯದ ಮೂಲಕ ಪ್ರಸ್ತುತ ಮಲ್ದೆರು.

ಮದಿಮೆದ  ಪೊಸತುಡ್ ಕಂಡನೆ  ತನ್ನ ಬುಡೆದಿಗ್  ಕೊರ್ಪಿನ ಕಾಳಜಿ, ಸಮಯ ಬೊಕ್ಕ ದಾಯೆಗ್ ಕೊರ್ಪುಜೆ. ತನ್ನದೇ ವ್ಯವಹಾರ ಲೋಕಡ್ ಉಪ್ಪುನ  ಪಾತೆರುನ  ಆಸೆ ಬುಡೆದಿಗ್. ಇಂಚ ಉಪ್ಪನಗ ವಿಧವಿಧವಾದ್ ಪಾತೆರೆಗ್  ಪ್ರಯತ್ನ ಮಲ್ತುಂಡಲಾ  ಕಂಡನೆ ಪಾತೆರೆಜೆಡಲಾ ಬುಡೆದಿ  ಬೇಜಾರ್ ಮಲ್ಪಂದೆ, ಉಪಾಯ ಮಲ್ತುದ್ ಎಂಚ  ಪಾತೆರುಲೆಕ್ಕ ಮಲ್ಪೊಲಿ ಪನ್ಪಿನ  ಪ್ರಸ್ತುತಿ ಜಾವಳಿ ನೃತ್ಯ ಅಭಿನಯ ಅಮೋಘವಾದಿತ್ತುಂಡ್.

ವಿದುಷಿ ವಸುಂಧರಾ: ಮೇರ್ ಗುರು ವಿದ್ವಾನ್ ಕೊಡವೂರು ಸುಧೀರ್ ರಾವ್ ಬೊಕ್ಕ  ವಿದುಷಿ ಮಾನಸಿ ಸುಧೀರ್ ಮೊಕ್ಲೆನ  ಶಿಷ್ಯೆಯಾದಿತ್ತುದ್ ಕೆ.ಗುರುರಾಜ್ ಭಟ್ ಬೊಕ್ಕ  ಶ್ರೀಲತಾ ಭಟ್ ದಮಪತಿಲೆನ  ಮಗಲ್. ಬಿ.ಟೆಕ್, ಎಂ.ಟೆಕ್, ವ್ಯಾಸಂಗನ್  ಎಸ್ ಎಮ್ ವಿ.ಐ.ಟಿ.ಎಮ್,ಎಂ.ಐ.ಟಿ. ಯಲ್ಲಿ ಮುಗಿತುದ್  ಪ್ರಸ್ತುತ ತನ್ನ ವಿದ್ಯಾಭ್ಯಾಸನ್   ಬಿ.ಎಡ್ ಕಲ್ತೋಂದ್  ಶಿಕ್ಷಕಿಯಾದ್ ಬೇಲೆ ಮಲ್ತೊಂದುಲ್ಲೆರ್.

ಮೇರ್ ಕರಿನ  18 ವರ್ಷಡಿಂಚಿ  ನೃತ್ಯಭ್ಯಾಸನ್ ಮಲ್ತೊಂದಿತ್ತುದ್  ,  ಜೂನಿಯರ್, ಸೀನಿಯರ್ ಬೊಕ್ಕ ವಿದ್ವತ್ ಪರೀಕ್ಷೆಡ್  ಎಡ್ಡೆ  ಅಂಕ ಪಡೆದ್ ಪಾಸಾತೆರ್.  ತನ್ನ ಶಾಲಾ  ಕಾಲೇಜಿದ  ದಿನೊಟ್  ನೃತ್ಯ ಸ್ಪರ್ಧೆಲೆಡ್ ಕೆಲವು ಇನಾಮುಲೆನ್  ಪಡೆದೆರ್.

ಭರತನಾಟ್ಯ ಮಾತ್ರ ಅತ್ತಾವಂದೆ ಯಕ್ಷಗಾನ , ಸಂಗೀತ ಹರಿಕಥೆಡುಲಾ  ಅಭಿರುಚಿನ್  ಪಡೆತುದೆರ್. ಈತ್  ಮಾತ್ರ ಅತ್ತಾವಂದೆ ಕೇಶಾಲಂಕಾರ ವರ್ಣಾಲಂಕಾರಡುಲಾ  ಆಸಕ್ತಿ ಬುಲೆಪಾವೊಂದೆರ್.