ಬೊಂಬಾಯಿದ ಪುಗಾರ್ತೆದ ತುಳು ಸಾಹಿತಿ ಶಿಮುಂಜೆ ಪೆರಾರಿ ಮೆರೆಗ್ ಈ ವರ್ಷದ ಐಲೇಸಾ ವಯೋ ಸಮ್ಮಾನ.
ಐಲೇಸಾ ತನ್ನ ಪುಟುದಿನತ ನೆನಪುಗು ವರ್ಷಲಾ ಕೊರ್ಪಿನ ”ವಯೋ ಸಮ್ಮಾನ” ಈ ಸರ್ತಿ ಬೊಂಬಾಯಿದ ತುಳುವೆ ”ಶಿಮುಂಜೆ ಪರಾರಿ” ಪಂಡುದೆ ಪುದರಾಯಿನ ಮುಲ್ಕಿದ ಕಕ್ವಗ್ರಾಮದ ಅತಿಕಾರಿ ಬೆಟ್ಟು ಮುಲ್ಪದ ಸೀತಾರಾಮ ಮುದ್ದಣ್ಣ ಶೆಟ್ಟಿ ಮೆರೆಗ್ ಸಂದಾಯ್ತ ಆವೊಂದುಂಡು .
ಮುಂಬೈದ ಅಂಧೇರಿ ಪಡ್ಡಾಯಿ ಕಂಟ್ರಿ ಕ್ಲಬ್ ಮುಲ್ಪ ಜೂಲೈ ತಿಂಗೊಲು ಅಕೇರಿದ ೨೯ ತಾರೀಖ್ ದಾನಿ ನಡಪುನ ಈ ವಯೋಸಮ್ಮಾನ ಮಾನಾದಿಗೆ ಕೊರ್ಯೆರೆಗಾದ್ ಅರೆನ ಅಪಗದ ಸಾಹಿತ್ಯದ ದೋಸ್ತಿ ಸುಬ್ರಾಯ ಚೊಕ್ಕಾಡಿ ಊರುಡ್ಡು ಬೊಂಬಾಯಿಗ್ ಬರೊಂದುಲ್ಲೆರ್ . ಮುಖ್ಯ ಬಿನ್ನೆರಾದ್ ಅಬುಧಾಭಿ ಸರ್ವೋತ್ತಮ ಶೆಟ್ರು , ಮೂಡಂಬೈಲ್ ರವಿ ಶೆಟ್ಟಿ ಕತಾರ್ , ಅಕ್ಷತರಾಜ್ ಪೆರ್ಲ ಪಾಲ್ ಪಡೆವೆರ್
ಮಾನಾದಿಗೆದ ಬಿನ್ನೆರಾದ್ ಮುಂಬೈ ಬಂಟ್ ಸಂಘದ ಮಾಜಿ ಅಧ್ಯಕ್ಷೆ ಶ್ಯಾಮ್ ಎನ್ ಶೆಟ್ಟಿ ,ದಿವಾಕರ್ ಎನ್ ಶೆಟ್ಟಿ ಮುದ್ರಾಡಿ ,ಡಿ ಕೆ ಶೆಟ್ಟಿ ಪೊವೈ ಪುಗರ್ತೆದ ವಕೀಲೆರಾಯಿನ ಪ್ರಕಾಶ್ ಎಲ್ ಶೆಟ್ಟಿ ಬೊಕ್ಕ ಗುಣಕರ ಶೆಟ್ಟಿ , ಕರ್ನಾಟಕ ಮಲ್ಲ ದಿನ ಪತ್ರಿಕೆದ ಸಂಪಾದಕೆರಾಯಿನ ಚಂದ್ರಶೇಖರ ಪಾಲೆತ್ತಾಡಿ , ಮುಂಬೈ ವಿಶ್ವ ವಿದ್ಯಾಲಯದ ಕನ್ನಡ ವಿಭಾಗ ದ ಡಾ, ಜಿ ಎನ್ ಉಪಾಧ್ಯ , ಮಾತೃಭೂಮಿ ಕೋ ಆಪರೇಟಿವ್ ಸೊಸೈಟಿ ಕಾರ್ಯಂತೆರ್ ಶ್ರೀ. ಪ್ರವೀಣ್ ಶೆಟ್ಟಿ,, ಶ್ರೀನಿವಾಸ ಸಾಫಲ್ಯ ,ಬೊಕ್ಕ ಶಿಮುಂಜೆ ಪರಾರಿ ಮೆರೆನ ಅಭಿಮಾನಿಲು ಪಾಲ್ ಪಡೆದ್ ಅರೆನೊಟ್ಟುಗು ಖುಷಿ ಪಟ್ಟೊನೆರೆ ಒಟ್ಟಾವೊಂದುಲ್ಲೆರ್ .
ಶಿಮುಂಜೆ ಪರಾರಿ ಮರಾಠಿ ಹಿಂದಿ ಮೂಲದ ನಾಟಕೊಲೆನ್ , ಪದೊಕುಲೆನ್ ತುಳು ಭಾಷೆಗ್ ಅನುವಾದ ಮಲ್ತುದು ಪುದರಾಯಿನಾರ್ . ಯಾನ್ ಪಿನಯೆ , ಔಲೊರ್ತಿ ಮೂಲೊರ್ತಿ , ಜೋಕುಲು ಬಾಲೆಲು ಪನ್ಪಿನ ನಾಟಕೊಲೆನ್ ಮರಾಠಿ ಭಾಷೆಡ್ಡು ತುಳುಕು ಕನತ್ ಅಭಿನಯ ಮಲ್ತು ಪುಗಾರ್ತೆ ಪಡೆಯಿನಾರ್ . ಜೋಕುಲು ಬಾಲೆಲು ನಾಟಕೊಗು ತುಳು ಅಕಾಡಮಿದ ಪುಸ್ತಕ ಮಾನಾದಿಗೆ ದೆತೊಂದಿನ ಶಿಮುಂಜೆ ಯಾನ್ ಪನ್ಪಿನಿ ಇಂಚ ಪನ್ಪಿನ ತುಳು ಚುಟುಕು ಬರೆದ್ ಮುಪ್ಪಸಾವಿರ ಪ್ರತಿ ಪ್ರತಿ ತುಳುವನ ಇಲ್ಲ ಬಾಕಿಲ್ಗ್ ಮುಟ್ಟಾಯಿನಾರ್ . ನಿತ್ಯಾನಂದ ಸ್ವಾಮಿಲೆನ ಪುದರ್ಡ್ ನಿತ್ಯ ಅನಂದ ವಚನ ಮುಕ್ತಕ ಬರೆದ್ ಅವೆನ್ ಗುರುಕುಲೆಗ್ ಸಂದಾಯ್ತ ಮಲ್ತಿನಾರ್ . ಮೆರೆನ ಸಾಹಿತ್ಯ ಬೇಲೆನ್ ಗುರ್ತ ಮಲ್ತಿನ ಮುಂಬೈ ವಿಶ್ವ ವಿದ್ಯಾಲಯದ ಡಾ. ಪೂರ್ಣಿಮಾ ಶೆಟ್ಟಿ ಶಿಮುಂಜೆ ಬದುಕು ಬರಹದ ಅಧ್ಯಯನ ಬೊಕ್ಕ ಡಾ. ಜಿ ಎನ್ ಉಪಾಧ್ಯ ಮೇರ್ ಪ್ರಧಾನ ಸಂಪಾದಕೆರಾದ್ ಸಂಪೊಲಿಗೆ ಮಲ್ದಿನ ಸಂಪ್ರೀತಿ ಪನ್ಪಿನ ಗ್ರಂಥ ಗೌರವ ಅರೆಗ್ ಅರ್ಪಣೆ ಮಲ್ದೆರ್
ಊರುಡ್ಡು ಬೊಂಬಾಯಿಗ್ ಬತ್ತಿನ ಜೋಕುಲೆಗ್ ಫ್ರೀ ನೈಟ್ ಸ್ಕೂಲ್ ಮುಲ್ಪ ಪದಿಮೂಜಿ ವರ್ಷ ದಮಾರ್ಥ ಪಾಠ ಕಲ್ಪಾಯಿನ ಮಾಸ್ಟ್ರು ಶಿಮುಂಜೆ ಪರಾರಿ ಮೆರೆಗ್ ಇತ್ತೆ ೮೪ ವರ್ಷ ಪ್ರಾಯ . ಬುಡೆದಿ ಚಂದ್ರಿಕಾ ಬೊಕ್ಕ ಅರ್ಚನಾ ಅಪರ್ಣ ಪನ್ಪಿನ ರಡ್ಡ್ ಪೊಣ್ಣು ಜೋಕುಲೆನೊಟ್ಟುಗು ಬೊಂಬಾಯಿದ ಅಂಧೇರಿಡ್ ಉಪ್ಪುನ ಪರಾರಿ ಮೆರೆನ ಇಲ್ಲ ಬಾಕಿಲ್ಗ್ ಪೋದು ಅರೇನಾ ಪ್ರಾಯದಾತ್ ೮೪೦೦೦ ಗುರುದಕ್ಷಿಣೆ ಕೊರ್ದು , ಅರೆನ ಸಾಹಿತ್ಯ ಕತೆ ಕವನ , ನಾಟಕ ವಾಚನ ಮಲ್ತ್ ಅರೇನಾ ಇಷ್ಟದ ಪದ ಪಂಡುದ್ , ಇಷ್ಟದ ತೆನಸ್ ಅರೆಗ್ ತಿನ್ಪಾದ್ ಅರೆನೊಟ್ಟುಗು ಒಂತೆ ಪೊರ್ತು ನಲಿತ್ ತೆಲಿತ್ ಈ ವಯೋಸಮ್ಮಾನ ಕೊರ್ದು ಬರ್ರೆಗ್ ಐಲೇಸಾದ ಕೂಟದಕುಲು ಅಟ್ಟನೆ ಮಲ್ತುದು ಈ ಶನಿವಾರ ಬೊಂಬಾಯಿಗ್ ಬರೊಂದುಪ್ಪುನ ಪೊರ್ತುಗು ಅರೆನ ಅಭಿಮಾನಿ ಬಂದುಲು ಒಟ್ಟುಗು ಸೇರೊನೊಡು ಪಂಡುದ್ ಐಲೇಸಾದ ಸಾರಥಿ ರಮೇಶ್ಚಂದ್ರ ಬಿನ್ನಾಪು ಮಲ್ದೆರ್
by 