ಶ್ರೀ ಕೃಷ್ಣಾಪುರ ಮಠಾಧೀಶೆರಾಯಿನ ಶ್ರೀ ವಿದ್ಯಾಸಾಗರ ತೀರ್ಥ ಶ್ರೀಪಾದೆರೆನ ಚತುರ್ಥ ಪರ್ಯಾಯ ಮಹೋತ್ಸವ ಸಮಿತಿದ ಬೊಕ್ಕ ಪರ್ಯಾಯ ಕಛೇರಿದ ಉದೀಪನ ಕಜ್ಜೊ ಕೃಷ್ಣಾಪುರ ಮಠತ್ತ ಶ್ರೀಕೃಷ್ಣ ಸಭಾಮಂದಿರೊಡ್ ನಡತುಂಡ್.
ಶ್ರೀ ಕೃಷ್ಣಾಪುರ ಮಠಾಧೀಶೆರಾಯಿನ ಶ್ರೀ ವಿದ್ಯಾಸಾಗರ ತೀರ್ಥ ಶ್ರೀಪಾದೆರ್ ಉದೀಪನ ಮಲ್ತುದ್ ಪ್ರತೀವರ್ಸ ನಡಪುಲೆಕ್ಕನೇ ತಯಾರಿ ಮಲ್ತುಆ ಪೊರ್ತುಡ್ ಕೋವಿಡ್ ನಿಯಮಾನುಸಾರ ಪರ್ಯಾಯೋತ್ಸವನ್ ಮಲ್ಪುಂಡ್ ಪಂಡುದ್ ಪಂಡೆರ್.ಮಠತ್ತ ಅಭಿಮಾನದ ಮಿತ್ತ್ ಬತ್ತುದ್ ಜವಾಬ್ದಾರಿ ದೆತೊಂದ್ ಪರ್ಯಾಯೋತ್ಸವ ಯಶಸ್ವಿ ಮಲ್ತಕೊರ್ರೆಗ್ ಸಹಕಾರ ಮಲ್ಪುನ ಮಾತೆರೆಗ್ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವೆರ್ ಎಡ್ಡೆ ಮಲ್ಪಡ್ ಪಂಡೆರ್.
ಸಮಿತಿದ ಕಾರ್ಯಾಧ್ಯಕ್ಷೆರಾಯಿನ ಉಡುಪಿ ಶಾಸಕೆ ಪಾತೆರ್ದ್ ಶ್ರೀಪಾದೆರೆನ ಆಶೀರ್ವಾದ ಮೇರೆಗ್ ಕೋವಿಡ್ ನಿಯಮಾನುಸಾರ ಪರ್ಯಾಯೋತ್ಸವದ ರೂಪುರೇಷೆನ್ ತಯಾರ್ ಮಲ್ತುದ್ ಉಡುಪಿ ನಗರ ಅಭಿವೃದ್ಧಿಗ್ ಸರಕಾರೊಡ್ದ್ ಗರಿಷ್ಠ ಅನುದಾನ ಕನತುದ್,ಕನ್ನಡ ಬೊಕ್ಕ ಸಂಸ್ಮೃತಿ ಇಲಾಖೆದ ವತಿಡ್ದ್ ಮೆರವಣಿಗೆಗ್ ಬೋಡಾಯಿನ ವಿಶೇಷ ಜಾನಪದ ತಂಡೊಲೆನ್ ಪಾಲ್ ಪಡೆವರೆಗ್ ಲೆಪ್ಪಾವುಂಡ್ ಬೊಕ್ಕ ಸರಕಾರದ ವತಿಡ್ದ್ ಸರ್ವ ಸಹಕಾರ ಕೊರ್ಪುಂಡ್ ಪಂಡೆರ್.
ಕಜ್ಜೊಡ್ ಕಟೀಲುದ ಅರ್ಚಕೆರಾಯಿನ ವಾಸುದೇವ ಅಸ್ರಣ್ಣ,ಲಕ್ಷ್ಮೀನಾರಾಯಣ ಅಸ್ರಣ್ಣ,ಅನಂತ ಅಸ್ರಣ್ಣ,ಮಾಜಿ ಸಚಿವೆರಾಯಿನ ವಿನಯ್ ಕುಮಾರ್ ಸೊರಕೆ,ಪ್ರಮೋದ್ ಮಧ್ವರಾಜ್,ಕ.ಸಾ.ಪ.ದ ಮಾಜಿ ಅಧ್ಯಕ್ಷೆರಾಯಿನ ಹರಿಕೃಷ್ಣ ಪುನರೂರು,ಪ್ರದೀಪ್ ಕಲ್ಕೂರ,ಉಡುಪಿ ತಾಲೂಕು ಬ್ರಾಹಣ ಮಹಾಸಭಾದ ಅಧ್ಯಕ್ಷೆರಾಯಿನ ಮಂಜುನಾಥ ಉಪಾಧ್ಯಾಯ,ಅಷ್ಟಮಠತ್ತ ದಿವಾನೆರ್,ಬೊಕ್ಕ ಭಕ್ತಾದಿಲು ಉಪಸ್ಥಿತರಿತ್ತೆರ್.
ಪರ್ಯಾಯ ಸಮಿತಿದ ಅಧ್ಯಕ್ಷೆರಾಯಿನ ಸೂರ್ಯನಾರಾಯಣ ಉಪಾಧ್ಯಾಯೆರ್ ಸ್ವಾಗತ ಮಲ್ತುದ್ ವಿಷ್ಣುಪ್ರಸಾದ್ ಪಾಡಿಗಾರ್ ಕಾರ್ಯಕಾರಿ ಸದಸ್ಯೆರೆನ ವಿವರ ಕೊರಿಯೆರ್.ಸಾರ್ವಜನಿಕ ಸಂಪಕರ್ಾಧಿಕಾರಿ ಬಿ.ವಿ.ಲಕ್ಷ್ಮೀನಾರಾಯಣ ಮೇರ್ ಕಾರ್ಯಕ್ರಮ ನಿರೂಪಣೆ ಮಲ್ತುದ್ ಸಮಿತಿದ ಸಂಯೋಜಕೆರಾಯಿನ ಯು.ಕೆ.ರಾಘವೇಂದ್ರ ರಾವ್ ಸೊಲ್ಮೆ ಸಂದಾಯ್ತ ಮಲ್ತೆರ್
by 