ಪುಗರ್ತೆಡ್ ಮೆರೆವೊಂದುಪ್ಪುನ ಬಿಲೆಕಟ್ಟರಾವಂದಿ ಮುತ್ತು – ಚೇರ್ಕಾಡಿ ದೊಡ್ಡಮನೆ ಸುಲೋಚನಾ ಶೆಟ್ಟಿ ಕೊಡವೂರು

1947 ಭಾರತೊದ ಪರತಿರಿಟ್ ಮದಪರಾವಂದಿ ಒರ್ಸೊ. ಪರೆಂಗಿಲೆ ಕೈತ ಅಮ್ಕೆಡ್ ಇತ್ತಿ ಭಾರತ ಬುಡುಗಡೆ ಪಡೆದ್ ತನ್ನತನೊನು ಒರಿತೊನ್ನ ದಿನೊ. ಸ್ವಾತಂತ್ರ್ಯ ಪಡೆಯಿ ಈ ಒರ್ಸೊ ಸೊರ್ಣೊದ ಅಚ್ಚರೊಡು ಬರೆದ್ ದೀದ್ ನಡತ್ ಬತ್ತಿ ಪಜ್ಜೆಗ್ ಅಮೃತ ಮಹೋತ್ಸವದ ಸಂಬುರ್ಮೊ. ಅಂಚನೆ ಕುಂದಾಪುರದ ಪುಗರ್ತೆದ ಕೊಡವೂರು ಜನ್ನಿಬೆಟ್ಟು ಬೊಕ್ಕ ಚೇರ್ಕಾಡಿ ದೊಡ್ಡಮನೆಕ್ಲಾ ಆ ಒರ್ಸೊ ಒಂಜಿ ಪೊಸ ಕೊಸಿ ಕನತಿ ಒರ್ಸೊ. ಆನಿ ಉದಿತಿ ಒಂಜಿ ಮುತ್ತು ಸಮಾಜಗ್ ಬಗೆಬಗೆಟ್ ಅರ್ಪಿತ ಆದ್ ಇನಿ ಪುಟ್ಟುದ ಅಮೃತ ಮಹೋತ್ಸವದ ಮೊಟ್ಟಿಲ್‌ಡ್ ಉಂತ್‌ದುಂಡು. ಆ ಬಿಲೆಕಟ್ಟರಾವಂದಿನ ಮುತ್ತು ಚೇರ್ಕಾಡಿ ದೊಡ್ಡಮನೆ ಸುಲೋಚನಾ ಶೆಟ್ಟಿ ಕೊಡವೂರು.

ಸ್ವಾತಂತ್ರ್ಯ ತಿಕ್‌ದ್ ಸರಿಯಾದ್ ಒಂಜಿ ತಿಂಗೊಲುಡು ಕೊಡವೂರುದ ಚೇರ್ಕಾಡಿ ದೊಡ್ಡಮನೆ ಪದ್ಮಾವತಿ ಶೆಡ್ತಿ ಯಾನೆ ಹೆಗ್ಗಡ್ತಿ ಬೊಕ್ಕ ಒಡಿಪುದ ಕ್ರಿಶ್ಚಿಯನ್ ಹೈಸ್ಕೂಲ್‌ದ ಪುಗರ್ತೆದ ದೈಹಿಕ ಶಿಕ್ಷಕೆರ್ ಆಯಿನ ಕೊಡವೂರು ಜನ್ನಿಬೆಟ್ಟು ಗೋಪಾಲ ಶೆಟ್ರೆನ ಕಡೀರ ಮಗಲಾದ್ 1947 ಸೆಪ್ಟೆಂಬರ್ 15ಗ್ ಉದಿತಿನಾರ್ ಸುಲೋಚನಾ ಶೆಟ್ಟಿ.

ಬಿ.ಎ ಪದವಿ ಪಡೆದ್ ಟಿ.ಸಿ.ಎಚ್ ಮಲ್ತಿ ಸುಲೋಚನಾ ಶೆಟ್ರ್ 1972ಡ್ದ್ 2005 ಮುಟ್ಟ ಕಟಪಾಡಿದ ಎಸ್.ವಿ.ಎಸ್ ವಿದ್ಯಾವರ್ಧಕ ಸಂಘದ ಪ್ರಾಥಮಿಕ ಶಾಲೆಡ್ ಕಲ್ಪಾದಿಯಾದಿತ್ತ್‌ದ್ ಕನ್ನಡ, ವಿಜ್ಞಾನದ ಒಟ್ಟುಗು ಮಾತಾ ವಿಷಯಲಾ ಪಾಠ ಮಲ್ತೊಂದಿತ್ತ್‌ನಾರ್ 27 ಒರ್ಸೊ ಮುಖ್ಯೋಪಾಧ್ಯಾಯಿನಿ ಆದ್ ಸೇವೆ ಮಲ್ತೆರ್. 2004ಡ್ ಕಲ್ಪಾದಿಲೆ ದಿನಾಚರಣೆದ ಪೊರ್ತುಡು ಉಡುಪಿ ಜಿಲ್ಲಾ ಉತ್ತಮ ಶಿಕ್ಷಕಿ ಪ್ರಶಸ್ತಿದ ಮಾನಾದಿಗೆ ಪಡೆವೊಂದೆರ್.

ಶಾಲಾ ಕಲ್ಪಾದಿಯಾದ್ ಮಾತ್ರ ಅತ್ತಂದೆ ಮಂಗಳೂರು ವಿಶ್ವವಿದ್ಯಾನಿಲಯದದ ಮಾನ್ಯತೆ ಪಡೆಯಿ ಸಂಪನ್ಮೂಲ ಅಭಿವೃದ್ಧಿ ಕಾಲೇಜ್‌ದ AIM INSIGHTSದ ಮಾನವ ಸಂಪನ್ಮೂಲ ವ್ಯಕ್ತಿಯಾದ್, ಬೀದಿ ವಾಚನಾಲಯ ರಚನೆ, ಜನೊಕ್ಲೆಡ ಓದುನ ಅಬ್ಬೆಸ ಪುಟ್ಟವುನ ತರಬೇತಿಲೆನ್ ಬೊಕ್ಕ ರಾಷ್ಟ್ರ ಮಟ್ಟಡ್ ಜೋಕ್ಲೆನ ಬೇಸಿಗೆ ಶಿಬಿರ ನಡಪಾಯೆರೆ ಬೋಡಾಯಿನ ತರಬೇತಿದ ದೃಢಪತ್ರಲಾ ಪಡೆತೆರ್. ಕರ್ನಾಟಕ ಸರಕಾರದ ಪ್ರವಾಸೋದ್ಯಮ ಇಲಾಖೆದ ಪ್ರವಾಸೋದ್ಯಮ ಬುಲೆಚ್ಚಿಲ್ ಸಲಹೆ ಕೊರ್ಪಿ ರಾಜ್ಯಮಟ್ಟದ 12 ಜನ ತಜ್ಞೆರೆ ಕೂಟೊಡು ಇಂಬೆರ್ಲಾ ಒರ್ತಿ.

ಗುಣಮಟ್ಟದ ಶಿಕ್ಷಣಗಾದ್ ಕೆಲಸ ಮಲ್ಪಿ ಕುಡ್ಲದ ಪಡಿ ವೆಲೋರೆಡ್ ಸಂಸ್ಥೆದ ಒಡಿಪು ಜಿಲ್ಲೆದ ಸುರುತ ಗುರ್ಕಾರ್ದಿಯಾದ್, ಜಿಲ್ಲಾ ಶಿಕ್ಷಣ ಸಂಪನ್ಮೂಲ ಕೇಂದ್ರದ ಕಾರ್ಯಂತೆರಾದ್, ತಾಲೂಕು ಶಿಕ್ಷಣ ಸಂಪನ್ಮೂಲ ಕೇಂದ್ರದ ಒತ್ತು ಗುರ್ಕಾರ್ದಿಲಾ ಬೆನ್ಕೆ ಬೆನ್ತಿನಾರ್. ಕರ್ನಾಟಕ ಸರ್ಕಾರದ ಯುವಜನ ಮತ್ತು ಕ್ರೀಡಾ ಇಲಾಖೆದ ‘ಜೀವನ ಕೌಶಲ್ಯಗಳು ಮತ್ತು ಯುವ ಜನಾಂಗ’ ತರಬೇತಿ ಪಡೆಯಿನ ರಾಜ್ಯದ ಏಕೈಕ ಹಿರಿಯ ನಾಗರಿಕೆರಾಯಿ ಸುಲೋಚನಾ ಶೆಟ್ರ್ ಭಾರತೀಯ ಜ್ಞಾನ ವಿಜ್ಞಾನ ಸಮಿತಿ ಉಡುಪಿ ಜಿಲ್ಲೆದ ಸಂಚಾಲಕಿ ಆದ್ ಆಯ್ಕೆ ಆತೆರ್.

ಕರ್ನಾಟಕ ಸರಕಾರದ ರಾಜ್ಯ ಚಲನಚಿತ್ರ ಅಕಾಡೆಮಿದ ರಾಜ್ಯ ಮಟ್ಟದ ಕಾರ್ಯಾಗಾರದ ಒಡಿಪು ಜಿಲ್ಲಾ ಒತ್ತು ಸಂಚಾಲಕಿಯಾದ್ ಇತ್ತಿ ಪೊರ್ತು ಶಿಕ್ಷಣದಲ್ಲಿ ಚಲನಚಿತ್ರ ಮಾಧ್ಯಮ ಪನ್ಪಿ ತುಲಿಪು ಮಲ್ತ್ ಜೋಕ್ಲೆನ ಇಲ್ಲದಕ್ಲೆಗ್ ಬೊಕ್ಕ ಕಲ್ಪಾದಿಲೆಗ್ ಮಾಯಿತಿ ಕೊರ್ತೆರ್. ರಾಷ್ಟ್ರೀಯ ಮಟ್ಟಡ್ ಶೈಕ್ಷಣಿಕ ಮೌಲ್ಯ ಮಾಪನ ಯೋಜನೆ ASAR ಶೈಕ್ಷಣಿಕ ಸರ್ವೆಡ್ ಜಿಲ್ಲಾ ಮಟ್ಟಡ್ ಪಾಲ್ ಪಡೆತೆರ್. ಗ್ರಾಮೀಣ ಬಾಗೊಡು ಮಂಡಲ ಪಂಚಾಯತ್ ಓಟುದ ಪೊರ್ತು ಅಲ್ಪದ ಗೆಂದಿನ ಜನಪ್ರತಿನಿಧಿಲೆಗ್ 5 ಸುತ್ತುದ ವಾರ್ಷಿಕ ತರಬೇತಿ ಬೊಕ್ಕ ಪೊಂಜೊವು ಪ್ರತಿನಿಧಿನಕ್ಲೆಗ್ ಸಶಕ್ತೀಕರಣದ ತರಬೇತಿಲಾ ಕೊರ್ತೆರ್.

ಋಷಿ ಸಂಸ್ಕೃತಿ ಕೇಂದ್ರ ಕನಕಪುರ ಬೆಂಗಳೂರುಡ್ದು ಸಿದ್ಧಿ ಸಮಾಧಿ ಯೋಗ ಕಲ್ತ್ ಯೋಗ ಕಲ್ಪಾದಿಯಾದ್ 5000ಡ್ದ್ ಜಾಸ್ತಿ ಜನಕ್ ಯೋಗ ಕಲ್ಪಯಿನ ಪೆರ್ಮೆ ಸುಲೋಚನಾ ಶೆಟ್ರೆನವು. ಋಷಿ ಸಂಸ್ಕೃತಿ ಕೇಂದ್ರ ನಡಪಾವುನ 5 ವಿಶ್ವ ಸಮ್ಮೇಳನಲೆಡ್ ಗುರು ಸಮ್ಮಿಲನಡ್ಲಾ ಪಾಲ್ ಪಡೆತೆರ್. ಈಶ್ವರೀಯ ವಿಶ್ವವಿದ್ಯಾಲಯದ ಯೋಗ, ಧ್ಯಾನಲೆನ್ ಅಬ್ಬೆಸ ಮಲ್ತ್ ಮೌಂಟ್ ಅಬುಡು ನಡತಿ ಸಮ್ಮೇಳನಡ್ಲಾ ಪಾಲ್ ಪಡೆತೆರ್. ಒಡಿಪುದ ಟೀಚರ್ಸ್ ಕೋಪರೇಟಿವ್ ಬ್ಯಾಂಕ್‌ಡ್ 8 ಒರ್ಸೊ ನಿರ್ದೇಶಕಿ ಆದ್ ಕಲ್ಪಾದಿಲೆನ ಪರವಾದ್ ಸೇವೆ ಸಂದಾಯಿ ಸುಲೋಚನಾ ಶೆಟ್ರ್ ಒಡಿಪು ಶ್ರೀ ಗುರು ನಿತ್ಯಾನಂದ ಕೋಪರೇಟಿವ್ ಸಹಕಾರಿ ಸಂಸ್ಥೆಡ್ ರಡ್ಡ್‌ನೇ ಅವಧಿದ ನಿರ್ದೇಶಕೆರ್ ಆದುಲ್ಲೆರ್.

1986ಡ್ದ್ 2004 ಮುಟ್ಟ ಸಾಕ್ಷಾರತಾ ಆಂದೋಲನಡ್ ಸಲಹಾಗಾರ್ತಿಯಾದ್, ಮುಖ್ಯ ತರಬೇತಿದಾರಾದ್, ಸಮಿತಿದ ಗುರ್ಕಾರ್ದಿಯಾದ್, ಜಿಲ್ಲಾ ಸಂಘಟನಾ ಕಾರ್ಯಂತೆರಾದ್, ಬೆಳಗಾವಿಡ್ ನಡತಿ ರಾಜ್ಯಮಟ್ಟದ ನವಸಾಕ್ಷರೆರೆ ಸಮಾವೇಶದ ಜಿಲ್ಲಾ ಸಂಚಾಲಕಿಯಾದ್ ಜಬದಾರಿ ತುಂಬಿನ ಸುಲೋಚನಾ ಶೆಟ್ಟಿ ಪ್ರೊ.ರೋಹಿಡೇಕರ್ ವರದಿದ “ಹೊಸ ಪಠ್ಯ ವಸ್ತು ತಯಾರಿ” ಬೊಕ್ಕ “ಕನಿಷ್ಠ ಕಲಿಕಾ ಸರಣಿ” ಯೋಜನೆಡ್ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಏಕೈಕ ಶಿಕ್ಷಕೆರೆ ಪ್ರತಿನಿಧಿಯಾದ್ ಬೆಂದಿ ಅನುಭವ ಪತೊಂದೆರ್. ಸಾಮಾಜಿಕ ಹೋರಾಟಗಾರ್ತಿಯಾದ್ ಗುರ್ತ ಮಲ್ತೊಂಡಿ ಸುಲೋಚನಾ ಶೆಟ್ಟಿ ಮಕ್ಕಳ ಹಕ್ಕುಗಳು, ಮಕ್ಕಳ ಮೇಲಿನ ದೌರ್ಜನ್ಯ ತಡೆ ಕಾಯ್ದೆ, ಮಕ್ಕಳ ಶಿಕ್ಷಣ ಹಕ್ಕು ಕಾಯ್ದೆ, ಲಿಂಗ- ಲಿಂಗತ್ವ, ಬಾಲ ನ್ಯಾಯ ಕಾಯ್ದೆ, ಬಾಲ ನ್ಯಾಯ ಮಂಡಳಿ, ಮಕ್ಕಳ ಕಲ್ಯಾಣ ಸಮಿತಿ ಇಂಚ ಪತ್ತ್ ಪದಿನೈನ್ ವಿಷಯಲೆ ಹೋರಾಟದ ಒಟ್ಟುಗು ರಾಜ್ಯ ಮಟ್ಟದ ಮಹಿಳಾ ತರಬೇತುದಾರರ ಸಂಸ್ಥೆ ಸಂಚಲನ (ರಿ)ದ ಪದಾಧಿಕಾರಿಯಾದ್ ಕರ್ನಾಟಕದ ಬೇತೆ ಬೇತೆ ಕೋಡಿಡ್ ಮಸ್ತ್ ಕುಟುಮೊಲೆ ಕೌಟುಂಬಿಕ ಬಿಕ್ಕಟ್ಟು ನಿರ್ವಹಣಾ ತರಬೇತಿ ಕೊರ್ನ ಅನುಭವೊಲಾ ಉಂಡು.

ಬರವುದ ಕಲೊಟುಲಾ ಬೆನ್ನಿ ಬೆಂದಿ ಸುಲೋಚನಾ ಶೆಟ್ಟಿ 1964ಡ್ದ್ 2014 ಮುಟ್ಟದ ತನ್ನ ಅನುಭವೊದ ಬೊಕ್ಕ ಕಲ್ಪೊದ ಒರುಟು ಸಾಹಿತ್ಯಿಕ ಬೊಕ್ಕ ವೈದ್ಯಕೀಯ ವಿಚಾರೊದ ಕನ್ನಡಡ್ “ಸ್ವಮೂತ್ರವೆಂಬ ಅಮೃತದ ಮಹಿಮೆ” ತುಳುಟ್ಟು “ಮೈನೀರ್ ಪನ್ಪಿ ಅಮುರ್ತದ ಮೈಮೆ” ಇಂಗ್ಲಿಷ್‌ಡ್ “Auto Urine Therapy- Nature’s Miracle Care” ಪನ್ಪಿ ಬೂಕು ಬರೆತೆರ್. ಈ ಬೂಕುಗು ಡಾ. ಬಿ.ಎಂ ಹೆಗ್ಡೆ ಸುರುತ ಮದಿಪು ಬರೆತೆರ್. ಇಂಬೆರ್ ಬರೆತಿ “ಅರಿವು” ಕವನ ಸಂಕಲನ ಬೆದ್ರಡ್ ನಡತಿ ಅಖಿಲ ಭಾರತ ಸಾಹಿತವ ಸಮ್ಮೇಳನಡ್ ಬುಡುಗಡೆ ಆತ್ಂಡ್. ಇಂಬೆರ್ ಬರೆತಿ ಕೃತಿ ಮಸ್ತ್ ಕೋಡಿಡ್ ಬೀದಿ ನಾಟಕ ಆದ್ ಪ್ರದರ್ಶನ ಆತ್ಂಡ್. ಹವ್ಯಾಸಿ ಲೇಖಕಿ ಆಯಿನ ಇಂಬೆರ್ ಕರ್ಮವೀರ, ಬಂಟರವಾಣಿ, ಸಂಪರ್ಕ, ತುಳು ಅಕಾಡೆಮಿದ ಮದಿಪು ಪತ್ರಿಕೆಲೆಗ್ ಅಂಚನೆ ಕಜ್ಜಕೊಟ್ಯಲೆಗ್ ಲೇಖನ, ಕಬಿತೆಲೆನ್ ಬರೆತೆರ್. ಕರಾವಳಿ ಲೇಖಕಿಯರ ಸಂಘ ಬೊಕ್ಕ ಕರ್ನಾಟಕ ಸಾಹಿತ್ಯ ಪರಿಷತ್ತ್‌ದ ಸದಸ್ಯೆರಾದುಲ್ಲೆರ್.

ಶಿಕ್ಷಣ ಇಲಾಖೆದ ಪ್ರತಿಭಾ ಕಾರಂಜಿ, ಅಂತರ್ ಶಾಲಾ ಕ್ರೀಡಾಕೂಟದ ನಿರ್ಣಾಯಕಿಯಾದ್, ತುಳುಕೂಟೊದ ಪದುಕೆರ್ ಆದ್, ಆಟಿ ಕೂಟೊಲೆಡ್ ಬಿನ್ನೆದಿಯಾದ್, ಜಾತಿ ಮತ ಭೇದದಾಂತೆ ಮದಿಮಲೆ ಐತ ಮಲ್ಪುನು, ಶೋಭಾನೆ ಪದ, ಭಕ್ತಿಗೀತೆ ಪನ್ಪುನು, ಜನಪದ ಪದ ಪನ್ಪುನ ಸಕಲಕಲಾ ವಲ್ಲಭೆ ಆಯಿನ ಸುಲೋಚನಾ ಶೆಟ್ಟಿ ಕುಡ್ಲ ಆಕಾಶವಾಣಿ, ನಮ್ಮ ಟಿವಿ, ಸ್ಪಂದನ ಟಿವಿ, ದೂರದರ್ಶನಲೆಡ್ ಮಸ್ತ್ ಕಾರ್ಯಕ್ರಮಲೆಡ್ ಪಾಲ್ ಪಡೆತಿನಾರ್, ಯಕ್ಷಗಾನ, ಜಾನಪದ, ನಾಟಕ, ತುಳುನಾಡ ಸಂಸ್ಕೃತಿ ಬೊಕ್ಕ ಪ್ರಕೃತಿಲೆನ ಬಗೆಟ್ ಆಸಕ್ತಿ ಇಪ್ಪುನ ಇಂಬೆರ್ ಗೆಳೆಯರ ಬಳಗ ಮೂಡಬೆಟ್ಟು, ಬಂಟರ ಸಂಘ, ಕಂಬಳಕಟ್ಟ ಕೊಡವೂರು, ಪೊಲೀಸ್ ಇಲಾಖೆದ ಮಲ್ಪೆ ಬೀಟ್ ಟೀಮ್ ಸದಸ್ಯೆರಾದ್ಲಾ ಗುರ್ತ ಮಲ್ತೊಂದಿನಾರ್.

ಬದ್ಕ್‌ದ ಅಮೃತ ಮಹೋತ್ಸವದ ಮರ್ಗಿಲ್ ಉಂತ್‌ದಿ ಸುಲೋಚನಾ ಶೆಟ್ಟಿ ವೃತ್ತಿ ಜೀವನಡ್ ನಿವೃತ್ತಿ ಪಡೆಂಡಲಾ ಪ್ರವೃತ್ತಿಡ್ ಪರಿಪು ನೀರ್‌ದ ಲೆಕ ಬಿರ್ಸ್‌ಡ್ ಸಾಗುನಾರ್. ಕೊರಂಗ್ರಪಾಡಿ ದೊಡ್ಡಮನೆ ಜಯರಾಮ ಶೆಟ್ರೆನ ಕೈ ಪತ್ತಿ ಸುಲೋಚನಾ ಶೆಟ್ರ್ ದಾಂಪತ್ಯ ಬದ್ಕ ಪಜ್ಜೆಡ್ ಪಡೆಯಿ ಇರ್ವೆರ್ ಜೋಕ್ಲೆನ್ ಸಮಾಜಗೆ ಅರ್ಪಣೆ ಮಲ್ತಿನಾರ್.

ಪ್ರಸ್ತುತ ಉದ್ಯಮಿ ಓಂ ಪ್ರಸಾದ್ ಬೊಕ್ಕ ಸಾಮಾಜಿಕ ಕಾರ್ಯಕರ್ತೆ, ಶಿಕ್ಷಣ ಸಂಸ್ಥೆದ ತಾಪಕೆ ಪ್ರೇಮ್ ಪ್ರಸಾದ್ ಪನ್ಪಿ ರಡ್ಡ್ ಆನ್ ಜೋಕ್ಲು ಅಂಚನೆ ಪ್ರಜ್ಞಾ ಬೊಕ್ಕ ಪೌರ್ಣಮಿ ಪನ್ಪಿ ಮರ್ಮಲಲ್ಲ್ ಅಂಚನೆ ನೈತಿಕ್ ಪನ್ಪಿ ಪುಲ್ಲಿನ ಒಟ್ಟುಗು ಸಂತೃಪ್ತ ಬದ್ಕ್ ನಡಪಾವೊಂದುಲ್ಲೆರ್. ನನಲಾ ಒಂಜಿ ಬೊಲ್ಲಿ ಪರ್ಬದ ಕೊಸಿ ತೂಪಿ ಭಾಗ್ಯ ಸುಲೋಚನಾ ಶೆಟ್ರೆಗ್ ಒದಗಡ್ ಪನ್ಪಿ ಹಾರೈಕೆ ಎಂಕ್ಲೆನವು.

✍????ಶ್ರೀಶಾವಾಸವಿ ತುಳುನಾಡ್