ಮಡಾಮಕ್ಕಿ: ಜಾತ್ರಾ ಮಹೋತ್ಸವ, ಗೆಂಡಸೇವೆ

ಮಡಾಮಕ್ಕಿ: ಜಾತ್ರಾ ಮಹೋತ್ಸವ, ಗೆಂಡಸೇವೆ

ಮಡಾಮಕ್ಕಿ :
ಮಾಡು ಒಲ್ಲದ ಖ್ಯಾತಿದ ಮಡಾಮಕ್ಕಿ ಮಹತೋಭಾರ ವೀರಭದ್ರ ದೇವಸ್ಥಾನಡ್ ಫೆ. 8 ತಾರೀಕುದಾನಿ ಧಾರ್ಮಿಕ ವಿಧಿ ವಿಧಾನದೊಟ್ಟುಗ್ ಜಾತ್ರಾ ಮಹೋತ್ಸವ, ಗೆಂಡಸೇವೆ, ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮೊಲು ನಡಪರೆಗುಂಡ್.

ದೇವಳ 1 ಸಾವಿರ ವರ್ಷಗುಲಾ ಜಾಸ್ತಿ ಇತಿಹಾಸದೊಟ್ಟುಗ್ ಪುಗಾರ್ತೆದ ಬಾರ್ಕೂರು ಅರಸೆರೆನ ಆಳ್ವಿಕೆಡಿತ್ತುಂಡ್ ಪಂಡುದು ಶಿಲಾಶಾಸನವಿತ್ತುದ್ ದೇವಳ ನೇಪಾಳಿ ಶೈಲಿಡ್ ಉಂಡು.
ವೀರಭದ್ರ ದೇವರೆಗ್ ಗರ್ಭಗುಡಿಯೇ ಇಜ್ಜಿ. ಅಂಚಾದ್ ಈ ದೇವಳಗ್ ಮಾಡು ಒಲ್ಲದ ವೀರಭದ್ರ ಕ್ಷೇತ್ರ ಪಂಡುದಗ ಪ್ರಸಿದ್ದಿ.ತೆನ್ಕಾಯಿಡ್ದ್ ಬಡಕಾಯಿಮುಟ್ಟ ಪರಪುನ ಮಡಾಮಕ್ಕಿ ತುದೆತ್ತ ತಡಿಟ್ ನಡಪುನ ಜಾತ್ರೆಡ್ ಬೇತೆ ಬೇತೆ ಕಡೆಟ್ ಬರ್ಪಿನ ಸಾರಸಾರ ಭಕ್ತೆರು ಕ್ಷೇತ್ರದ ಮಹಿಮೆಗ್ ಸಾಕ್ಷಿಯಾತೆರ್.

ಹಿನ್ನೆಲೆ :
ಪಿರಾಕುದ ಕಾಲೊಡ್ ರಕ್ಕಸೆರೆನ ಅಟ್ಟಹಾಸ ಜಾಸ್ತಿ ಆಯಿನಪಗ ವೃಷಭಯೋಗೇಶ್ವರ ಮುನಿಯು ಶಿವನು ಸುದೀರ್ಘ ತಪಸ್ಸು ಮಲ್ತಿನಪಗ ಶಿವಪುತ್ರ ವೀರಭದ್ರ ಪ್ರತ್ಯಕ್ಷೆ ಆದ್ ರಕ್ಕಸೆರೆನ್ ತೂದ್ ಕೋಪೋದ್ರಿಕ್ತೆನಾದ್ ತನ್ನ ತರೆನ್ ಕೈತಲುದ ಮಲ್ಲ ಕಲ್ಲುಗ್ ದರ್ತೆಗೆ. ಅದಗ ಕಲ್ಲು ಚೂರು ಚೂರಾದ್ ಪುಡಾದುಂಡ್. ಅರ್ಧ ಚಂದ್ರಾಕ್ರತಿದ ಒಂಜಿ ಕಲ್ಲುನ್ ವೃಷಭಯೋಗೇಶ್ವರ ಮುನಿ ಕನತುದ್ ಮಡಾಮಕ್ಕಿ ಕೈತಲುದ ಮಲ್ಲ ಉಗ್ಗೆಲುಡ್ ಮಡಾಮಕ್ಕಿ, ಬೇಳಂಜೆ ಸಂಸ್ಥಾನಲೆನ ರಾಜೆರೆನ ರತ್ನ ವೈಡೂರ್ಯಾಧಿಲೆನ್ ಕನತುದ್
ಉಗ್ಗೆಲುಡ್ ಪಾಡ್ದ್ ಭದ್ರಗಾದ್ ಅಯಿಕ್ ಮಣ್ಣುದಕಟ್ಟೆನ್ ಕಟ್ಟುದ್ ಅಯಿತ್ತ ಮಿತ್ತ್ ಕನತುದಗ ಕಲ್ಲುನ್ ಪ್ರತಿಷ್ಠೆ ಮಲ್ದೆ ಪಂಟುದ್ ಪುರಾಣಡ್ ಉಲ್ಲೇಖ ಉಂಡು.

ವೀರಭದ್ರನ ಮುರಂಪು ಊರ್ದ್ ನಿಲೆಆಯಿನ ಜಾಗಗ್ ಊರುಗ್ ಮಡಾಮಕ್ಕಿ ಪನ್ಪಿನ ಪುದರು ಬತ್ತುಂಡ್ ಪಂಡುದು, ಕ್ಷೇತ್ರಗ್ ಕೋಟೆರಾಯ ಪರಿವಾರೊಲು ದೇವಗಣಕುಲು ರಕ್ಷಣೆಡ್ ಉಂಡು ಪಂಡುದು ಪ್ರತೀತಿ. ಮುಲ್ಪ ಅರ್ಧಚಂದ್ರಾಕೃತಿದ ಶಿಲೆನೇ ವೀರಭದ್ರನ ಸಾನ್ನಿಧ್ಯ. ವೀರಭದ್ರ ನೆಲೆ ಆಯಿನ‌ ಮಣ್ಣುದ ಕಟ್ಟೆದ ಮಣ್ಣು(ಮೃತ್ತಿಕೆ) ಪ್ರಸಾದ ರೂಪವಾದ್ ಭಕ್ತೆರೆಗ್ ಪಟ್ಟುನ‌ ವಿಶೇಷ.
———–
ಜಾತ್ರಾ ಮಹೋತ್ಸವ, ಕೆಂಡ ಸೇವೆ ದಿನತ್ತಾನಿ ತುಲಾಭಾರ ಸೇವೆ ಬೊಕ್ಕ ಬಾಕಿದ ಸೇವೆಲು,, ಮಹಾ ಅನ್ನಸಂತರ್ಪಣೆ, ರಾತ್ರಿ ಕ್ಷೇತ್ರದ ಮೇಳಡ್ದ್ ಯಕ್ಷಗಾನ ನೃತ್ಯಸೇವೆ, ವೀರಭದ್ರ ಸ್ವಾಮಿ, ಬನಶಂಕರಿ ದೇವಿನ ದರ್ಶನ, ಕೆಂಡಸೇವೆ, ರಂಗಪೂಜೆ, ಢಮರುಸೇವೆ, ಪರಿವಾರ ದೇವತೆಲೆನ ಕೋಲ ಸೇವೆ. ವೀರಭದ್ರ ಸ್ವಾಮಿ ದರ್ಶನಡ್ ಪಾತ್ರಿ ಚೂಪಾಯಿನ ಮುಳ್ಳು್ ಪಾದುಕೆನ್ ಪಾಡೊಂದ್ ವೀರಭದ್ರನ ಮಣ್ಣುದ ಕಟ್ಟೆದ(ಸನ್ನಿಧಾನ)ನ್ ಪ್ರದಕ್ಷಿಣೆ ಬರ್ಪುನವ್ ಕ್ಷೇತ್ರೊಡ್ ವಿಶೇಷವಾದುಂಡ್.

ಕ್ಷೇತ್ರದ ಯಕ್ಷಗಾನ ಮೇಳ ಯಶಸ್ವಿ ತಿರುಗಾಟದೊಟ್ಟುಗ್ ಕ್ಷೇತ್ರದ ಕೀರ್ತಿನ್ ಜಾಸ್ತಿ ಮಲ್ಪುನೇಟ್ ತನ್ನವೇ ಆಯಿನ ಪಾತ್ರ ವಹಿಸಾವೊಂದುಪ್ಪುನವ್ ಪ್ರಶಂಸನೀಯ.

ಕಾರ್ಯಕ್ರಮೊಲು:
ಫೆ. 7 ನೇ ಮಂಗಳವಾರ ಮಧ್ಯಾಹ್ನ ಗಂ. 2.30 ಡ್ದ್ ಶ್ರೀಕ್ಷೇತ್ರಗ್ ಭಕ್ತಾದಿಲು ಸಮರ್ಪಿಸಾವುನ‌ ಬೊಳ್ಳಿ ಕೊಡುಗೆಲೆನ್ ಮಡಾಮಕ್ಕಿ ಪೇಟೆಡ್ದ್
ಸೋಮೇಶ್ವರ,ಸೀತಾನದಿ,ಹೆಬ್ರಿ,ಬೇಳಂಜೆ,ಅಲ್ಬಾಡಿ,ಬೆಳ್ವೆ,
ಗೋಳಿಯಂಗಡಿ,ಕೊಂಜಾಡಿ,
ಶೇಡಿಮನೆ,ಅರಸಮ್ಮಕಾನು,ಮಾಂಡಿಮೂರುಕೈ ಮುಖೇನ ತೆರೆದ ವಾಹನದಲ್ಲಿ ಮೆರವಣಿಗೆ, ನಾಲನೇ ಮೈಲುಕಲ್ಲುಡ್ದ್ ಕಾರ್ನಡಿಗೆಡ್ ಪೂರ್ಣಕುಂಭ ಸ್ವಾಗತದೊಟ್ಟುಗ್ ದೇವಸ್ಥಾನಗ್ ತಲುಪುಂಡ್.

ಫೆ. 8 ನೇ ಬುಧವಾರ ಗಣೇಶ ಪ್ರಾರ್ಥನೆ, ಪುಣ್ಯಾಹ, ನವಕ ಪ್ರಧಾನ ಹೋಮ ಕಲಶ,ಶತ ರುದ್ರಭೀಷೇಕ, ಮಧ್ಯಾಹ್ನ ಗಂ. 12 ಗ್ ಮಹಾಪೂಜೆ, ಗಂ. 12.30 ತುಲಾಭಾರ ಸೇವೆ, ಗಂ. 12.45 ಡ್ದ್ ಗಂ. 3 ಮುಟ್ಟ ಅನ್ನಸಂತರ್ಪಣೆ, ರಾತ್ರಿ ಗಂ. 8 ಕೆಂಡ ಸೇವೆಗ್ ಅಗ್ನಿ ಸ್ಪರ್ಶ, ಗಂ. 8.30 ಡ್ದ್ ಯಕ್ಷಗಾನ ನೃತ್ಯಸೇವೆ, ಗಂ. 9 ಡ್ದ್ ದಾನಿಲೆಗ್ ಸನ್ಮಾನ, ಗಂ. 9.30 ಶ್ರೀ ಸ್ವಾಮಿ ಬೊಕ್ಕ ಅಮ್ಮನವರ ದರ್ಶನ, ಕೆಂಡ ಸೇವೆ, ಗಂ. 10.30 ಡ್ದ್ ಪರಿವಾರ ದೈವೊಲೆನ ಕೋಲ ಬೊಕ್ಕ ದರ್ಶನ, ಗಂ. 1.30 ಡ್ದ್ ರಂಗ ಪೂಜೆ, ಢಮರು ಸೇವೆ, ವ್ಯಾಘ್ರ ಚಾಮುಂಡಿ ದರ್ಶನ,ಸುತ್ತು ಬಲಿ, ಸ್ವಾಮಿ ದರ್ಶನ,ಪ್ರಸಾದ ವಿತರಣೆ ನಡಪರೆಗುಂಡ್.