ಕೆಮ್ತೂರು ತುಳು ನಾಟಕ ಪರ್ಬೊ

ತುಳುಕೂಟ ಉಡುಪಿ (ರಿ) ವತಿರ್ದ್ , ಜನವರಿ 8 ನೇ ತಾರೀಕ್ ರ್ದ್ 14 ನೇ ತಾರೀಕ್ ಮುಟ ಒಂಜಿ ವಾರೊದ ಕಾಲ ಬುಡಂದೆ ನಡತಿನ ಪೆರ್ಮೆದ ಲೇಸ್, ದಿ. ಕೆಮ್ತೂರು ದೊಡ್ಡಣ್ಣ ಶೆಟ್ರೆನ ನೆಂಪುದ 21 ನೇ ವರ್ಸೊದ ತುಳು ನಾಟಕ ಪಂಥೊಡು ಪಾಲ್ ಪಡೆದ್ ಇನಾಮು ಗೆಂದಿನ ನಾಟಕ ತಂಡೊಲೆಗ್ , ಇನಾಮು ಪಟ್ಟುನ ಸಂಭ್ರಮೊದ ಲೇಸ್ “ ಕೆಮ್ತೂರು ತುಳು ನಾಟಕ- ಪ್ರಶಸ್ತಿ ಪ್ರದಾನ” ಸಮಾರಂಭ ಮೊರನಿ ಫೆಬ್ರವರಿ 5 ನೇ ತಾರೀಕ್ ದಾನಿ ಎಂ.ಜಿ.ಎಮ್ , ಕಾಲೇಜಿದ ಮುದ್ದಣ ಮಂಟಪೊಡು ಸೇರ್ದಿನ ಮಲ್ಲ ಬಿನ್ನೆರ್ , ಕೂಡ್ದಿನ ಕಲಾಭಿಮಾನಿಲೆನ ನಡುಟು ಭಾರೀ ಗೌಜಿಡ್ ಸಂಪನ್ನ ಆಂಡ್.ಸಭಾ ಕಾರ್ಯಕ್ರಮೊತ ಗುರ್ಕಾರ್ಮೆನ್, ತುಳುಕೂಟ ಉಡುಪಿ (ರಿ) ದ ಗುರ್ಕಾರೆರ್, ಶ್ರೀಯುತ ಜಯಕರ್ ಶೆಟ್ಟಿ ಇಂದ್ರಾಳಿ ಮೇರ್ ವಯಿಸೊಂಡೆರ್.ಕೆಮ್ತೂರು ತುಳು ನಾಟಕ ಪಂಥೊದ ಪ್ರಶಸ್ತಿ ಪ್ರದಾನ ಮಲ್ಪುನ ಮಲ್ಲ ಬಿನ್ನೆರಾದ್, ಕಸ್ತೂರ್ಬಾ ಮೆಡಿಕಲ್ ಕಾಲೇಜ್ ಮಣಿಪಾಲ ದ ಗೌರವಾನ್ವಿತ ಡೀನ್ , ಡಾ. ಪದ್ಮರಾಜ್ ಹೆಗ್ಡೆರ್ ಲೇಸ್ ದ ಮಿತ್ತರ್ಮೆಡಿತ್ತೆರ್. ಲೇಸ್ ದ ಮಲ್ಲ ಬಿನ್ನೆರಾದ್ ಒಡಿಪುದ ಉದ್ಯಮಿ, ಉಜ್ವಲ್ ಡೆವಲಪರ್ಸ್ ದ , ಶ್ರೀ ಪುರುಷೋತ್ತಮ ಪಿ.ಶೆಟ್ಟಿ, ಒಡಿಪುದ ಕೊಡುಗೈ ದಾನಿ, ಉದ್ಯಮಿ, ವಿಶ್ವ ಸಂಸ್ಕೃತಿ ಪ್ರತಿಷ್ಠಾನದ ಪ್ರವರ್ತಕೆರಾಯಿನ ಶ್ರೀ , ವಿಶ್ವನಾಥ್ ಶೆಣೈ, ಸಾಯಿರಾಧಾ ಡೆವಲಪರ್ಸ್ ದ ಮಾಲಕೆರಾಯಿನ ಶ್ರೀ, ಮನೋಹರ್ ಶೆಟ್ಟಿ,ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ, ಹಿರಿಯ ಜನಪದ ವಿದ್ವಾಂಸೆರಾಯಿನ , ಶ್ರೀ, ಬಾಬು ಆಮೀನ್ ಬನ್ನಂಜೆ, ಕೆಮ್ತೂರು ದೊಡ್ಡಣ್ಣ ಶೆಟ್ರೆನ ಕುಟುಮೊದ ಪರವಾದ್ , ಅರೆನ ಮಗೆ ವಿಜಯ್ ಕುಮಾರ್ ಶೆಟ್ಟಿ, ಅಂಚೆನೇ ತುಳುಕೂಟ ಉಡುಪಿ (ರಿ) ದ ಕಾರ್ಯಂತೆರಾಯಿನ ಶ್ರೀಯುತ ಗಂಗಾಧರ್ ಕಿದಿಯೂರ್, ಪಣವುದ ಗುರ್ಕಾರೆರ್ ಶ್ರೀಯುತ ಚೈತನ್ಯ ಎಂ. ಜಿ, ಕೆಮ್ತೂರು ತುಳು ನಾಟಕ ಪರ್ಬೊದ ಸಂಚಾಲಕೆರಾಯಿನ ಶ್ರೀಯುತ ಪ್ರಭಾಕರ್ ಭಂಡಾರಿ ಮೊಕುಲು ಮಿತ್ತಚಾವಡಿಡ್ ಒತ್ತುಪಾಲಿತ್ತೆರ್.
ಲೇಸ್ ಗ್ ಬತ್ತಿನ ಮಾತ ಮಲ್ಲ ಬಿನ್ನೆರೆನ್, ಕಲಾಭಿಮಾನಿ ಬಂಧುಲೆನ್, ತುಳುಕೂಟ ಉಡುಪಿ (ರಿ) ದ ಒತ್ತುಗುರ್ಕಾರೆ, ಶ್ರೀಯುತ ದಿವಾಕರ್ ಸನಿಲ್ ಮೇರ್ ಮೋಕೆಡ್ ಎದ್ಕೊಂಡೆರ್.
ಕೆಮ್ತೂರು ತುಳುನಾಟಕ ಪ್ರಶಸ್ತಿ- 2013 ನ್ ಗೆಂದಿನ ನಾಟಕ “ಸುಳಿ ಸುರುಳಿ” ನಾಟಕೊನು ಪ್ರದರ್ಶನ ಮಲ್ತಿನ ಸುಮನಸಾ ಕೊಡವೂರ್ ತಂಡದಕ್ಲೆಗ್
ಮಲ್ಲ ಬಿನ್ನೆರಾಯಿನ, ಡಾ. ಪದ್ಮರಾಜ್ ಹೆಗ್ಡೆ ಮೇರ್, ಪ್ರಶಸ್ತಿ, ನಗದು ಬಹುಮಾನ ಬೊಕ್ಕ ಶಾಶ್ವತ ಫಲಕೊನು ಕೊರ್ದು ಅಭಿನಂದನೆ ಮಲ್ತೆರ್. ನಾಟಕ ಪಂಥೊಡು ರಡ್ಡನೇ ಇನಾಮು ಪಡೆಯಿನ ಭೂಮಿಗೀತ ಸಾಂಸ್ಕೃತಿಕ ವೇದಿಕೆ ಪಟ್ಲ ತಂಡ, ಬೊಕ್ಕ ಮೂಜನೆ ಇನಾಮು ನ್ ಪಡೆಯಿನ ವಿಶ್ವ ಸಂಸ್ಕೃತಿ ಪ್ರತಿಷ್ಠಾನ ಉಡುಪಿ ತಂಡದಕ್ಲೆಗ್ ಲಾ ಕ್ರಮವಾದ್ ನಗದು ಬಹುಮಾನ ಬೊಕ್ಕ ಶಾಶ್ವತ ಫಲಕೊನು , ಮಿತ್ತ ಚಾವಡಿದ ಮಾತ ಮಲ್ಲ ಬಿನ್ನೆರ್ ನಕುಲು ಸೇರ್ದ್ ಕೊರಿಯೆರ್.
ಉಡುಪಿ ಜಿಲ್ಲೆಡ್, ಪ್ರೌಢಶಾಲೆಲೆಡ್ ತುಳು ಭಾಸೆ ನ್ ತೃತೀಯ ಐಚ್ಛಿಕ ಭಾಸೆಯಾದ್ ದೆತೊಂದು, ಈ ಸರ್ತಿದ ಎಸ್.ಎಸ್. ಎಲ್. ಸಿ ಪರೀಕ್ಷೆಡ್ ,ನೂದೆಟ್ ನೂದು ಅಂಕೊಲೆನ್ ಪಡೆಯಿನಂಚಿನ 3 ಶಾಲೆದ ಒಟ್ಟು 12 ಜನ ವಿದ್ಯಾರ್ಥಿಲೆಗ್, ಬೊಕ್ಕ ಶಿಕ್ಷಕಿ ಗ್ ಈ ಸಂದರ್ಭೊಡು ತುಳುಕೂಟ ಉಡುಪಿ (ರಿ) ದ ವತಿರ್ದ್, ನಗದು ರೂಪದ ಪಣವುದ ಬಹುಮಾನೊನು ಕೊರ್ದು ಅಭಿನಂದನೆ ಮಲ್ಪುನ ಕಾರ್ಯಕ್ರಮೊಲಾ ನಡತ್ಂಡ್.
ಉಂದುವೇ ಸಂದರ್ಭೊಡು, ಮಣಿಪಾಲ ಆಸ್ಪತ್ರೆ ದ ಪುಗರ್ತೆದ ವೈದ್ಯೆರಾದ್ ಸೇವೆ ಸಂದೈತ ಮಲ್ತೊಂದು, ಇಂಚಪ ಕಸ್ತೂರ್ಬಾ ಮೆಡಿಕಲ್ ಕಾಲೇಜ್ ಮಣಿಪಾಲ ದ ಪ್ರತಿಷ್ಟಿತ ಹುದ್ದೆ, “ಡೀನ್” ಆದ್ ಅಧಿಕಾರೊನು ವಯಿಸೊನಿನ ಡಾ. ಪದ್ಮರಾಜ್ ಹೆಗ್ಡೆ ಮೆರೆನ್ ತುಳುಕೂಟ ಉಡುಪಿ ದ ಪರವಾದ್ ಮಾನಾದಿಗೆ ಮಲ್ಪುನ ಕಜ್ಜೊಲಾ ವೇದಿಕೆ ಡ್ ನಡತ್ಂಡ್.
ಅಭಿನಂದನೆನ್ ಸ್ವೀಕಾರ ಮಲ್ತ್ ದ್, ಲೇಸ್ ದ ಮಲ್ಲ ಬಿನ್ನೆರೆನ ನಿಲೆಟ್ ಪಾತೆರಿನ ಡಾ. ಪದ್ಮರಾಜ್ ಹೆಗ್ಡೆರ್, ತುಳುಕೂಟ ಉಡುಪಿ ದ ಮಾತೆರೆನ ಮೋಕೆ ಅಭಿಮಾನೊದ ಈ ಮಾನಾದಿಗೆ ಎನ್ನ ಮನಸ್ ಗ್ ದಿಂಜ ಕುಷಿ ಕೊರುಂಡ್ , ನಿಕ್ಲೆನ ಮಾತೆರೆನ ಪ್ರೀತಿ, ವಿಶ್ವಾಸ, ಆಶೀರ್ವಾದ ಎಂಕ್ ಏಪೊಗ್ಲಾ ಇಂಚೆನೇ ಇಪ್ಪಡ್ ಪಂದ್ ಪಂಡೆರ್ .ನಾಟಕ ಪಂಥೊದ ಲೇಸ್ ದ ಬಗ್ಗೆ ಪಾತೆರಿನ ಆರ್ , ವಿಜ್ಞಾನ, ತಂತ್ರಜ್ಞಾನ ದುಂಬರಿಯಿಲೆಕ್ಕನೇ, ನರಮಾನಿಲೆಗ್ ಅನುಕೂಲತೆಲು ಲಾ ಜಾಸ್ತಿ ಆವೊಂದುಂಡು. ಅನುಕೂಲತೆಲು ಜಾಸ್ತಿಯಾಯಿನೆಕ್ ತಕ್ಕ ,ಜನಕುಲು ಲಾ ಭಾರೀ ಉದಾಸೀನದಕುಲು ಆವೊಂದುಲ್ಲೆರ್. ಪುರ್ಸೊತ್ತು ಇತ್ತುಂಡ ಖಾಲಿ ,ಟಿ.ವಿ ದ ಎದುರು ಕುಲ್ಲುವೆರ್, ನಾಟಕ, ಯಕ್ಷಗಾನೊನು ತೂಪಿನಂಚಿನಕುಲು ಕಡಿಮೆ ಆತೆರ್,ಇಂಚಿನ ಶ್ರೀಮಂತ ಕಲೆನ್ ತೂಪಿನ ಆಸಕ್ತಿ ಇತ್ತೆ ಎರೆಗ್ಲಾ ಇಜ್ಜಿ, ಈ ಮನಸ್ಥಿತಿ ಬದಲಾವೊಡು,ನಮ್ಮ ಸಂಸ್ಕೃತಿ, ಸಂಸ್ಕಾರೊಲೆನ್ ತೆರಿಪಾವುನಂಚಿನ , ಮನಸ್ಸ್ ಗ್ ಉಲ್ಲಾಸೊನು ಕೊರ್ಪಿನಂಚಿನ , ಇಂಚಿನ ನಾಟಕೊಲೆನ್ ಜನಕುಲು ಹೆಚ್ಚಿ ಹೆಚ್ಚಿ ತೂಪಿಲೆಕ್ಕ ಆವೊಡು ಪಂಡೆರ್. ಈ ಒಂಜಿ ಪರಿಸ್ಥಿತಿ ದ ನಡುಟುಲಾ ಈತೊಂಜಿ ಸಂಖ್ಯೆದ ಕಲಾಭಿಮಾನಿಲೆನ್ ಸೇರಾವೊಂದು ಕರಿನ ಇರುವ ವರ್ಸೊರ್ದಿಂಚಿ ತುಳುಕೂಟ ಉಡುಪಿ ಮುಲ್ಪ ನಾಟಕ ಪಂಥೊನು ಯಶಸ್ವಿಯಾದ್ ನಡಪಾವೊಂದು ಬರೊಂದುಂಡು ಪಂದಾಂಡ, ಉಡುಪಿ ಜನಕ್ಲೆನ ಕಲಾಭಿರುಚಿನ್ ನಮ ಮೆಚ್ಚೊಡಾಯಿನನೇ ಪಂದ್ ಲಾ ಆರ್ ಪಂಡೆರ್.
7 ದಿನೊ ನಡತಿನ ನಾಟಕ ಪಂಥೊಗು ತೀರ್ಪುಗಾರೆರಾದ್ ಬತ್ತಿನ ಖ್ಯಾತ ರಂಗಕರ್ಮಿಲು ಮುಂಬಯಿದ , ಶ್ರೀ ಭರತ್ ಕುಮಾರ್ ಪೊಲಿಪು,ಮಂಗಳೂರುದ ಜಗನ್ ಪವಾರ್, ಬೊಕ್ಕ ಉಡುಪಿದ ಪುಗರ್ತೆದ ಲೇಖಕಿ, ಜಾನಪದ ಸಂಶೋಧಕಿ, ಸಾಹಿತಿ, ಶ್ರೀಮತಿ, ನಿಕೇತನಾ ಜಿ ಎಕ್ಕಾರ್ ಮೊಕ್ಲೆನ ವಿಶೇಷ ಸಹಕಾರೊನು ಗುರುತಿಸಾದ್ ವೇದಿಕೆಡ್ ಗೌರವಿಸಾವುನ ಕಾರ್ಯಕ್ರಮಲಾ ನಡತ್ಂಡ್. ನಾಟಕ ಪಂಥೊಡು ತೀರ್ಪುಗಾರ್ತಿ ಯಾದ್ ತಾನ್ ಪಡೆಯಿನ ಅನುಭವೊಲೆನ್ , ಡಾ. ನಿಕೇತನಾ ಜಿ ಎಕ್ಕಾರ್ ಈ ಸಂದರ್ಭೊಡು ಪಟ್ಟೊಂಡೆರ್.ಲೇಸ್ ದ ಮಲ್ಲ ಬಿನ್ನೆರ್, ಹಿರಿಯೆರಾಯಿನ ಬನ್ನಂಜೆ ಬಾಬು ಆಮೀನೆರ್ ಪಾತೆರ್ದ್, ತುಳುಕೂಟ ಉಡುಪಿ ದ ಕಾರ್ಯಚಟುವಟಿಕೆಲು ನನಲಾತ್ ಹೆಚ್ಚಿ ಹೆಚ್ಚಿ ನಡಪುಲೆಕ್ಕ ಆವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್. ಗುರ್ಕಾರ್ಮೆದ ನಿಲೆಟ್ ಪಾತೆರಿನ ತುಳುಕೂಟ ಉಡುಪಿ (ರಿ) ದ ಗುರ್ಕಾರೆ, ಶ್ರೀಯುತ ಜಯಕರ್ ಶೆಟ್ಟಿ ಇಂದ್ರಾಳಿ ಮೇರ್, ತುಳು ಕೂಟ ಉಡುಪಿ ದ ವತಿರ್ದ್ ತುಳು ಭಾಸೆ, ಕಲೆ, ಸಂಸ್ಕೃತಿ, ಸಾಹಿತ್ಯ, ಶಿಕ್ಷಣ ಇಂಚ ವರ್ಸೊಗು ನಡಪುನಂಚಿನ ಪತ್ತ್ , ಪದ್ರಾಡ್ ಬೇತೆ ಬೇತೆ ಲೇಸ್ ಲೆನ ಬಗೆಟ್ ಸೇರ್ದಿನ ಬಂಧುಲೆಗ್ ಇಚಾರೊನ್ ತೆರಿಪಾಯೆರ್. ಮೂಜಿ ಗಂಟೆ, ಬತ್ತ್ ದ್ ಕುಲ್ಲುದು ಬಂಜಿ ಬೇನೆ ಆಪಿನಾತ್ ತೆಲ್ತ್ ತೆಲ್ತ್ ಸಾಕಾಪಿನಂಚಿನ ಏತೋ ನಾಟಕೊಲೆನ್ ನಮ ತೂಪ, ಆಂಡ ನಾಟಕ ತೂದು ಪಿದಾಯಿ ಬನ್ನಗ, ನಾಟಕದ ಕತೆ ಎಂಚಿನ? ಸಾರಾಂಶ ಎಂಚಿನ? ಸಂದೇಶ ಎಂಚಿನ? ಪಂಡ್ ದ್ ಏರಾಂಡಲಾ ಕೇಂಡೆರ್ಡ ,ಸರಿಯಾದ್ ಉತ್ತರ ಕೊರ್ರೆಗ್ ನಂಕ್ ಎರೆಗ್ಲಾ ಸಾಧ್ಯ ಆಪುಜಿ, ಅಂಚಿನ ನಾಟಕೊಲು ಲಾ ಮಸ್ತ್ ಉಲ್ಲ, ಆಂಡ 7 ದಿನ , ಬುಡಂದೆ ನಡತಿನ ದಿ. ಕೆಮ್ತೂರು ದೊಡ್ಡಣ್ಣಶೆಟ್ರೆನ ನೆಂಪುದ ತುಳು ನಾಟಕ ಪಂಥೊಡು ನಮ, ಸಮಾಜೊಗು ಎಡ್ಡೆ ಎಡ್ಡೆ ಸಂದೇಶೊಲೆನ್ ಕೊರ್ಪಿನಂಚಿನ, ನರಮಾನಿಲೆನ ಬದ್ ಕ್ ದ, ತಾದಿಗ್ ಬೊಲ್ಪಾಪಿನಂಚಿನ,ಜನಕ್ಲೆನ ಉಡಲ್ ಡ್ ಜಾಗೃತಿ ಪುಟ್ಟಾವುನಂಚಿನ, ಪೊಸ ಪೊಸ ದೇಖಿದ, ಪೊರ್ಲು ತಿರ್ಲ್ ದ ನಾಟಕೊಲೆನ್ ತೂಯ, ನಾಟಕ ಪಂಥೊದ ಲೇಸ್ ಗ್ ಉಮೇದ್ ಡ್ ಬತ್ತ್ ದ್ ಪಾಲ್ ಪಡೆಯಿನಂಚಿನ ಮಾತ ತಂಡೊಲೆಗ್ ತುಳುಕೂಟ ಉಡುಪಿ ದ ಪರವಾದ್ ಉಡಲ್ದಿಂಜಿ ಸೊಲ್ಮೆಲು ಬೊಕ್ಕ ಎಡ್ಡೆಪ್ಪುಲು. ಪ್ರಶಸ್ತಿ ಗೆಂದಿನ ಮಾತ ನಾಟಕ ತಂಡೊಲೆಗ್ ಬೊಕ್ಕ ಕಲಾವಿದೆರೆಗ್ ಹೃತ್ಪೂರ್ವಕ ಅಭಿನಂದನೆನ್ ಸಂದೈತ ಮಲ್ಪುವೆ ಪಂಡೆರ್.
ಕೆಮ್ತೂರು ತುಳು ನಾಟಕ ಪಂಥೊದ ಸಂಚಾಲಕೆರಾಯಿನ ಶ್ರೀಯುತ ಪ್ರಭಾಕರ ಭಂಡಾರಿ ಮೇರ್ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಪಣವುದ ಗುರ್ಕಾರೆರ್, ಚೈತನ್ಯ ಎಂ. ಜಿ, ಪ್ರಶಸ್ತಿ ಬೊಕ್ಕ ಇನಾಮು ಗೆಂದಿನಕ್ಲೆನ ಪುದರ್ ದ ಪಟ್ಟಿನ್ ಓದುದು ಪಂಡೆರ್. ಕೆಮ್ತೂರು ತುಳು ನಾಟಕ ಪ್ರಶಸ್ತಿ ಪ್ರಶಸ್ತಿ ಪ್ರದಾನ ಲೇಸ್ ದ ನೇರ ಪ್ರಸಾರೊನು ಮಲ್ಪುನ ಮುಖಾಂತರ ತುಳುಕೂಟ ಉಡುಪಿ (ರಿ) ದ ಯೂಟ್ಯೂಬ್ ಚಾನೆಲ್ ಗ್ಲಾ ಈ ಪೊರ್ತುಡು ಚಾಲನೆ ಕೊರ್ಪಿನ ಕೆಲಸ ನಡತ್ಂಡ್ .ತುಳುಕೂಟ ಉಡುಪಿ ದ ಪದುಕೆರ್, ಶ್ರೀಯುತ ಜಯರಾಂ ಮಣಿಪಾಲ್ ಮೇರ್ ಸುಗಿಪು ನಡಪುಡಾದ್ ಕೊರಿಯೆರ್. ಪದುಕೆರಾಯಿನ ಶ್ರೀಮತಿ ತಾರಾ ಉಮೇಶ್ ಆಚಾರ್ಯ ಲೇಸ್ ಸುಧಾರಿಕೆ ಮಲ್ತೆರ್. ಕಾರ್ಯಂತೆರ್ ಗಂಗಾಧರ್ ಕಿದಿಯೂರ್ ಮಾತೆರೆಗ್ಲಾ ಸೊಲ್ಮೆ ಸಂದೈತ ಮಲ್ತೆರ್.