ಅಪ್ಪೆ ಭೂಮಿ ಅಪ್ಪೆ ಜಗತ್ತುದ ಅಪ್ಪೆ.

ಅಪ್ಪೆ – ಭೂಮಿಅಪ್ಪೆ – ಜಗತ್ತ್ ದ ಅಪ್ಪೆ
“ಮಾರ್ನೆಮಿ‌” ಪೂಜೆದ ಗದ್ದಲ,ಗೌಜಿ

“ನಮ‌ ಮಾತೆರ್ಲ ಒರ್ತಿ ಅಪ್ಪೆಡ್ದ್ ಜನ್ಮೆಯಿನಾಕ್ಲು.
ಈ ಜಗತ್ತ್ ಒರ್ತಿ ಅಪ್ಪೆಡ್ದ್ ಉಂಡಾಂಡ್” ಈ ಸಂಗತಿ ಇಸ್ಮಯದ ಇಸಯ ಅತ್ತ್ , ಅಸಂಬದ್ಧ ವಿವರ ಅತ್ತ್.ನರಮಾನಿ ತನ್ನ ಬದ್ ಕ್ ತನ್ನ ಸುತ್ತಲ ಇಪ್ಪುನ ಮರಮಟ್ಟ್, ಭೂಮಿ,ಆಕಾಸ,ಬೀಜುನ ಗಾಲಿ,
ಬರ್ಪುನ ಬರ್ಸ ,ದೊಂಬು,ಸಲಿ ಇಂಚ ಪ್ರಕೃತಿ ದೊಟ್ಟಿಗೆ ಜೋಡಿತೊಂದು ಕಟ್ ಯೆ.ಈ ಪ್ರಕೃತಿನ್ ತಾನ್ ತಾಂಗ್ ಆದ್ ಅಯಿತ ನದ್ ರ್ ಗ್ ಸರಿಯಾದ್ ಬದ್ ಕರೆ ಕಲ್ತೆ.ಪ್ರಕೃತಿದ ಎಡ್ಡೆ ಅಂಚೆನೆ ಹಾಳ್ ಪರಿಣಾಮೊಲೆನ್ ಅವು ಸಹಜ ಪಂಡ್ ದೇ ಒಪ್ಪಿತೊಂದು ಬದ್ ಕ್ ರೂಪಿತೊಂಡೆ ಪಣ್ಪಿನ ಗ್ರಹಿಕೆಡ್ ಸತ್ಯ ಇಜ್ಜಾ ?
ಒಂರ್ಬ ತಿಂಗೊಲು ತುಂಬೊಂದು ಬೇನೆ ತಡೆತೊಂದು ನಂಕ್ ಜನ್ಮಕೊರಿನ ಅಪ್ಪೆ ಬದ್ ಕ್ ಗ್ ತಾರ್ಕನೆ ಮಲ್ತ್ ಕೊರಿನ ಪ್ರಕೃತಿನ್ ತರೆತಗ್ಗಾದ್ ಮನ್ನಿತೊಂದು ,ಅಪ್ಪೆ ಬೊಕ್ಕ ಪ್ರಕೃತಿನ್ ಒಂಜೇ ಪನ್ಪಿನ ಗೇನೊಡು ಒಪ್ಪಿತೊಂದು ಬತ್ತ್ ದ್ ಒಂಜಿ ಕಾಲೊಡು ಅಪ್ಪೆ – ಪ್ರಕೃತಿನ್ ತಾಂಕುನ ಅಂಚೆನೆ ಕಣ್ಣ್ ಗ್ ತೋಜುನವು‌ ಪಂಡ್ ದ್ ಮನ್ನಿತೊಂದು ಬತ್ತಿನವು ಉಂದೇ ಅಪ್ಪೆ – ಪ್ರಕೃತಿ – ಕಣ್ಣ್ ಗ್ ತೋಜಂದಿನ ಸಕ್ತಿಗ್ ತರೆ ತಗ್ಗಾದ್ ನಂಬೊಂದು ಬತ್ತಿನ ಸತ್ಯದ ಮೂಲ ಇಪ್ಪೊಡು.
ಗರ್ಭಧರಿತೊಂದು ಪೆದ್ದುನ‌ ಸಕ್ತಿ ಇಪ್ಪುನ ಪೊಣ್ಣು – ಅಪ್ಪೆ ಮೂಲ (ಮಾತೃಮೂಲ) ಆತೊಲ್ಡ ಇಸ್ಮಯ ಇಜ್ಜಿ .ಆಣಗ್ ಈ ರಡ್ಡ್ ಸಕ್ತಿಲಾ ಇಜ್ಜಾಂದಿನೆಡ್ದ್ ತನಡ್ದ್ ಹೆಚ್ಚಿನ ಸಕ್ತಿ ಇಪ್ಪುನ ಪೊಣ್ಣು ಪಂಡ ಅಪ್ಪೆ ನರಮಾನಿ ಕೂಟೊಡು ಮುಖಿ ಆಯೊಲು.
ಕೃಷಿ ಅತ್ತಡ ಉಣ್ಯರೆ ,ತಿನ್ಯರೆ,ಬಂಜಿದ ಬಡವುಗು ಬೋಡಾಪಿನೆನ್ ಬುಲೆವುನ ಅಗತ್ಯ ಪೆದ್ದಿನ ಅಪ್ಪೆನ ಜವಾಬ್ದಾರಿ ಆಂಡ್.ಅಡ್ಂಜೊವು ಕಾಂಡೆ ಲಕ್ ದ್ ಬೋಂಟೆಗ್ ಪೋಯೆಡ ದಾಲ ತಿಕ್ಂಡ ಬಯ್ಯಗ್ ತಿನ್ಯರೆ ಉಂಡು ಇಜ್ಜಡ ಬಂಜಿಕಟ್ ದ್ ಜೆಪ್ಪೊಡಾವು, ಆಂಡ ಎಲ್ಯ ಬಾಲೆಲು ಬಡವು ಕಟೊಂದು ಕುಲ್ಲೂಜ,ಬುಲಿಪರೆ ಸುರುಪತ್ತುವ.ಈ ಜೋಕುಲೆನ ಬಡವು ತೆಕ್ಕಾವುನ ಕೆಲಸ ಅಪ್ಪೆನವು ಆಂಡ.ಬೋಂಟೆ ಇಜ್ಜಾಂದಿನ ದಿನತಾನಿಗ್,ಮರಿಯಲದ ದಿನೊಕುಲೆಗ್ ಜೋಕೆಡ್ ದೀವರೆ ಬೋಡಾದ್,ಬುಲಿಪುನ ಜೋಕುಲೆನ ಬಡವು ತೆಕ್ಕಾವರೆ ಬುಲೆ ಬುಲೆವುನ ಅಗತ್ಯ ಅಪ್ಪೆಗ್ ಆಂಡ್. ಅಂಚಾದ್ ಅಪ್ಪೆನೇ ಬೆನ್ನಿ – ಕೃಷಿ ಸುರುಮಲ್ತಿನಾಲ್ ಆದಿಪ್ಪೊಡು ಪನ್ಪುನವು ಶೋಧಕೆರ್ನ ಅಭಿಪ್ರಾಯ – ಈ ಸಂಗತಿ ಬೋಂಟೆ ಸಂಸ್ಕೃತಿಡ್ದ್ ಕೃಷಿ ಸಂಸ್ಕೃತಿಗ್ ನರಮಾನಿ ಬದಲಾಯಿನ ಕಾಲದವು.
ಅಪ್ಪೆನ ಗರ್ಭಧರಿಪುನ ಸಕ್ತಿ ಅಂಚೆನೆ ಭೂಮಿದ ಬುಲೆ ಬುಲೆವುನ (ಸಸ್ಯಧಾರಣೆ)ಸಕ್ತಿ ; ಇಂದೆನ್ ತೂನಗ ಭೂಮಿಗ್ ಪಾಡಿನ ಬಿತ್ತ್ ಕೊಡ್ಯುನ
ನದ್ ರ್ ,ಅಪ್ಪೆ ಪೆದ್ದುನ ರೀತಿ ಈ ರಡ್ಡೆನ್ಲಾ ಸಮೀಕರಿತ್ ದ್ ಅಪ್ಪೆಲೆಕ್ಕನೆ ಭೂಮಿಲಾ ಒರ್ತಿ ಅಪ್ಪೆ ಪಂಡ್ ದೇ ಒಪ್ಪಿತೊಂಡೆ.
ಪೆತ್ತಿ ಅಪ್ಪೆನ ಮಟ್ಟೆಲ್ಡ್ ಗೊಬ್ಬೊಂದು,
ಬುಲಿತೊಂದು,ತೆಲಿತೊಂದು ಒಂಜಿದಿನ ಪಿರೆಲ್ದ್ ಭೂಮಿಗ್ ಬೂರ್ನಗ ,ಅಲ್ಪಲ ಕಣ್ಣ್ ಬುಡ್ದ್ ಒರ್ಮೆಲಾ ತೂವೊಂದಿತ್ತಿಲೆಕ್ಕನೇ ಅಪ್ಪೆ ,ಭೂಮಿ ಅಪ್ಪೆ ಅತ್ತಾಂದೆ ಮಾತೆರೆನ್ಲಾ ಕಾಪುನ,
ಬೋಡಾಯಿನೆನ್ ಕಾಲವೇಲ್ಯೊಡು ಕೊರ್ಪಿನ ನನೊಂಜಿ ಅಪ್ಪೆ ಉಲ್ಲೊಲು,ಆಲ್ ಜಗತ್ತ್ ದ ಮಾತೆರೆನ್ಲಾ ಕಾಪುನ ಅಪ್ಪೆ ಆಲ್ “ಜಗತ್ತ್ ದ ಅಪ್ಪೆ” ಪಂಡ್ ದ್ ನರಮಾನಿ ತೆರಿಯೊನುವೆ.
ಈ ಜಗತ್ತ್ ದ ಅಪ್ಪೆನ್ ಬುಲೆ ಬಾಗ್ಯ ಕಂಡೊಡು ದಿಂಜಿದಿಪ್ಪುನ ಪೊರ್ತುಡು, ಮರಿಯೊಲ ಕರಿಯೊಂದು ಬರ್ಪಿನ ,ಅಂಚೆನೆ ಉಲ್ಲಾಸ್ ದ ಪೊರ್ತುಡು,ನನದಾನೆ ಬುಲೆಬಾಗ್ಯ ಇಲ್ಲ ಜಾಲ್ ಗ್ ಬರ್ಪಿ ಪೊರ್ತುಡು ಕೊಂಡಾಟೊಡು,ತರೆತಗ್ಗಾದ್ ಸುದ್ಧ ಮನಸ್ಸ್ ಡ್ ಪೂಜಿಪುನ ವೇಲ್ಯೆನೆ ಮಾರ್ನೆಮಿ.
ಕಣ್ಣ್ ಗ್ ತೋಜಾಂದಿನ , ಆಂಡ ಅಪ್ಪೆಲೆಕ್ಕನೇ ಮೋಕೆಡ್ ತರ್ಕ್ ದ್ ಕಾಪುನ ಜಗತ್ತ್ ದ ಅಪ್ಪೆನ್ ಕಾಲ ಬದಲಾವೊಂದು ಬತ್ತಿಲೆಕ್ಕನೆ ಬೇತೆ ಬೇತೆ ಆಲೋಚನೆಲು ಪುಟೊಂದು ಬೇತೆ ಬೇತೆ ಗ್ರಹಿಕೆಡ್ ತೆರಿಯೊಂದು ದಿಂಜ ಕಾಲ ಕರಿನಗ ಶ್ರದ್ಧೆ – ನಂಬಿಕೆಗ್ ವೈದಿಕದ ರೂಪು ಉಂಡಾಂಡ್.ಈ ವೈದಿಕ ಅತ್ತಡ ಇನಿ ಊರೊರ್ಮೆ ನಡಪುನ ಮಾರ್ನೆಮಿದ ಪೂಜೆದ ಕ್ರಮಲಾ ನರಮಾನಿ ತನನ್ ತಾನ್ ತೆರಿಯೊಂದು ಸುರು ಮಲ್ತಿನ ಕಾಲದ ನಂಬೊಲಿಗೆಲ ಒಂಜೆ ಆದುಂಡು.
ವೈದಿಕ , ಪರಬ್ರಹ್ಮೆನೇ ,(ಪರಬೊಮ್ಮ) ಮಾತೆರ್ದ್ ಮಿತ್ತ್ ಅಯಿಡ್ದ್ ಮೂಜಿ ಸಕ್ತಿಲು ಪನ್ಪಿನ ವಿವರೊನು ಪಂಡೊಂದು ತನ್ನ ಆದಿದ “ಅಪ್ಪೆ – ಭೂಮಿ ಅಪ್ಪೆ – ಜಗತ್ತ್ ದ ಅಪ್ಪೆ” ಪನ್ಪಿನ ತಿಳಿವಳಿಕೆಗ್ ಸರಿಯಾಯಿನ ವಿವರಣೆ ಕೊರ್ಪುಂಡು.ಪರಬ್ರಹ್ಮನ ಚೈತನ್ಯ ರೂಪುದ ಜಗತ್ತ್ ದ “ಪುಟ್ಟು – ಬುಲೆಪು- ನಾಶ” ನೆಕ್ಕ್ ಕಾರಣವಾಯಿನ ಸಕ್ತಿನ್ ಈಸ್ವರ ದೇವೆರ್ನ ಬುಡೆದಿ ಶಿವಶಕ್ತಿ ಪಂಡ್ ದ್ ಶಿವ ಭಕ್ತೆರ್,ಲಕ್ಷ್ಮೀ ಪನ್ಪಿ ರೂಪುಡು ವೈಷ್ಣವೆರ್ ಗ್ರಹಿತೆರ್ ,ಮಾಹಾಮಾತೆ ಶಾಕ್ತೆರ್ನ ಗ್ರಹಿಕೆ. ಮಹಾಕಾಳಿ,ಮಹಾಲಕ್ಷ್ಮೀ,
ಮಹಾಸರಸ್ವತಿ ಪನ್ಪಿನ ಮೂಜಿ ರೂಪೊಡು ಪೂಜೆ.
ಉಂದು ಮಾರ್ನೆಮಿದ ಕಾಲೊಡು ಪಂಡ ಒಂರ್ಬ ದಿನೊಟು ನಡಪುನ ಗೌಜಿದ ಎಡ್ಡೆಮೆಲ್ಲಿ. • ಕೆ.ಎಲ್.ಕುಂಡಂತಾಯ ~~~~~~~~~~~~~~