ಉಡುಪಿ: ಕೀರ್ತಿಶೇಷರಾಯಿನ ಪೇಜಾವರ ಮಠದ ಹಿರಿಯ ಯತಿ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರೆಗ್ ಕೇಂದ್ರ ಸರ್ಕಾರ ಕೊರ್ತಿನ ಪದ್ಮವಿಭೂಷಣ(ಮರಣೋತ್ತರ) ಪ್ರಶಸ್ತಿನ್ ಅರೆನ ಪರವಾದ್ ದೆಹಲಿಡ್ ಪಡೆಯಿನ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್ ಬೊಕ್ಕ ಪ್ರಶಸ್ತಿನ್ ಗುರುವಾರ ಬೈಯಗ್ ನಗರದ ಸಂಸ್ಕೃತ ಕಾಲೇಜಿಡ್ ಮಾನಾದಿಗೆಡ್ ಎದ್ಕೊಂಡೆರ್.
ಸಂಸ್ಕೃತ ಕಾಲೇಜಿಡ್ದ್ ಅಲಂಕೃತ ಜೀಪುಡ್ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರೆನ ಭಾವಚಿತ್ರ ಬೊಕ್ಕ ಪದ್ಮವಿಭೂಷಣ ಪ್ರಶಸ್ತಿನ್ ದೀದ್ ಚಂಡೆ ವಾದ್ಯಮೇಳದೊಟ್ಟುಗ್ ಗಣ್ಯೆರೆನ ಉಪಸ್ಥಿತಿಡ್ ಶ್ರೀ ಕೃಷ್ಣ ಮಠೊಕ್ ಕನತೆರ್.
ಶ್ರೀ ಕೃಷ್ಣ ಮಠತ್ತ ಚಂದ್ರಶಾಲೆಡ್ ಕೃಷ್ಣ ದೇವರೆಗ್ ಅರ್ಪಣೆ ಮಲ್ತುದ್ , ಅಷ್ಟ ಮಠಾಧೀಶೆರೆಗ್ ಅವೆನ್ ತೋಜಾದ್ ಬೊಕ್ಕ ಅವ್ವೇ ವಾಹನೊಡ್ ಶ್ರೀ ಪೇಜಾವರ ಮಠೊಕ್ ಕನತೆರ್.
ಪೇಜಾವರ ಮಠದ ಹಿರಿಯ ಯತಿ ಶ್ರೀ ವಿಶ್ವಪ್ರಿಯತೀರ್ಥೆರೆನ ಪೀಠೊಡ್ ದೀದ್ ಅರ್ಪಿಸಾಯಿನೆಡ್ ಬೊಕ್ಕ ರಥಬೀದಿಡ್ ಸಭಾ ಕಾರ್ಯಕ್ರಮ ನಡತುಂಡ್.
ಈ ಸಂದರ್ಭೊಡ್ ಉಡುಪಿ ಶಾಸಕೆರಾಯಿನ ರಘುಪತಿ ಭಟ್, ಭಾಜಪ ಹಿ. ವರ್ಗಗಳ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಯಶ್ಪಾಲ್ ಸುವರ್ಣ, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಮಟ್ಟಾರ್ ರತ್ನಾಕರ ಹೆಗ್ಡೆ, ಬಿಜೆಪಿ ಜಿಲ್ಲಾಧ್ಯಕ್ಷ ಕುಯಿಲಾಡಿ ಸುರೇಶ್ ನಾಯಕ್, ಮಾಜಿ ಸಚಿವೆರಾಯಿನ ಪ್ರಮೋದ್ ಮಧ್ವರಾಜ್, ನಗರಸಭೆ ಅಧ್ಯಕ್ಷೆ ಸುಮಿತ್ರಾ ನಾಯಕ್, ಜಿಲ್ಲಾಧಿಕಾರಿ ಕೂರ್ಮಾ ರಾವ್, ಜಿ.ಪಂ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ನವೀನ್ ಭಟ್, ಜಿಲ್ಲಾ ಪೋಲಿಸ್ ವರಿಷ್ಠಾಧಿಕಾರಿ ವಿಷ್ಣುವರ್ಧನ್ ಉಪಸ್ಥಿತರಿತ್ತೆರ್.
by 