ಕಲಾಸಾಧಕಿ ಅಕ್ಷತಾ ‌ಅನೂಪ್‌‌ ದೇವಾಡಿಗಗ್ ರಾಜ್ಯೋತ್ಸವ ಮಾನಾದಿಗೆ.

ಶ್ರೀಮತಿ ಮಾಲತಿ‌ ಬೊಕ್ಕ ಶ್ರೀ ಭಾಸ್ಕರ್ ದಂಪತಿಲೆನ ಮಗಲಾಯಿನ ಅಕ್ಷತಾ ದೇವಾಡಿಗ ಮೆರೆನ ಕಲಾಸಾಧನೆಗ್ ಈ ಸರ್ತಿದ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ತಿಕ್ಕುದುಂಡ್.

ಎಲ್ಯ ಪ್ರಾಯೊಡೇ ಸಂಗೀತಾಸಕ್ತಿ ಇತ್ತಿನ ಮೇರು ಸ್ಯಾಕ್ಸೋಫೋನ್ ವಾದನೊಡ್ ವಿಶೇಷ ಸಾಧನೆ ಮಲ್ತುದೆರ್. ಮೆರೆನ ಸುರುತ್ತ ಗುರುಕುಲಾಯಿನ, ವಿದ್ವಾನ್ ಓಬು ಶೇರಿಗಾರ್ ಉಡುಪಿ(ಮೆರೆನ ಅಜ್ಜೆರ್),ವಿದ್ವಾನ್ ಹರಿದಾಸ ಡೋಗ್ರ ಬೊಕ್ಕ ಮಧುರು ಬಾಲಸುಬ್ರಹ್ಮಣ್ಯ ಮೊಕ್ಲೆನ ಶಿಷ್ಯೆಯಾದ್ ತನ್ನ ಕಲಾಪ್ರತಿಭೆನ್ ದುಂಬರಿತೊಂದ್ ಪೋವರೆಗ್ ಅಕ್ಲೆಡ್ ಮಾರ್ಗದರ್ಶನ ಪಡೆತೊಂಡೆರ್.ಮಂಗಳೂರು ಆಕಾಶವಾಣಿ,ಬೆಂಗಳೂರು, ಮೈಸೂರು, ಕೊಯಂಬುತ್ತೂರು, ಚೆನ್ನೈ, ಕೇರಳ,ಗೋವಾ ಇಂಚ ಬೇತೆ ಬೇತೆ ಕಡೆಟ್ ಕಾರ್ಯಕ್ರಮ ಕೊರ್ದ್ ಪುಗಾರ್ತೆನ್ ಪಡೆದೆರ್.

ಮೆರೆಗ್ ತಿಕ್ಕುದಿನ ಪ್ರಶಸ್ತಿಲು….,………ಕನ್ನಡ ಬೊಕ್ಕ ಸಂಸ್ಕ್ರತಿ ಇಲಾಖೆಡ್ದ್ ಸುರುತ್ತ ತಾನೊ,ಶಾಸ್ತ್ರೀಯ ಸಂಗೀತ ಕಲಾಸಾಧನೆಡ್ ರಡ್ಡನೇ ತಾನೊ,ಮೈಸೂರುಡ್ ಆಯೋಜನೆ ಮಲ್ದಿನ ಕಲಾಪ್ರತಿಭೋತ್ಸವ,ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಕಾರ್ಯಕ್ರಮ,ಒಡಿಪು ಶ್ರೀ ಕ್ರಷ್ಣಮಠ ಶ್ರೀ ಶ್ರೀ ವಿದ್ಯಾಧೀಶ ತೀರ್ಥ ಶ್ರೀ ಪಾದೆರ್ ಪಲಿಮಾರುಮಠ ಮೆರೆಡ್ದ್ “ನಾದವಿಶಾರದೆ” ಬಿರುದು,ಶರನ್ನವರಾತ್ರಿ ಮಹೋತ್ಸವದ ಸಂದರ್ಭೊಡ್ ಪರ್ಯಾಯ ಶ್ರೀ ಅದಮಾರು ಮಠತ್ತ ಶ್ರೀ ವಿಶ್ವಪ್ರಿಯ ತೀರ್ಥ ಶ್ರೀ ಪಾದೆರೆಡ್ದ್ “ಬಾಲಕಲಾಪ್ರತಿಭಾ” ಪ್ರಶಸ್ತಿ, ಮಾಜಿ ಸಂಸದೆರಾಯಿನ ವಿನಯ್ ಕುಮಾರ್ ಸೊರಕೆಡ್ದ್ “ಅಭಿನಂದನಾ ಫಲಕ”, ಎರ್ಮಾಳ್ ಡ್ ನಡತಿನ ಕಾರ್ಯಕ್ರಮೊಡ್ ಪಲಿಮಾರು ಶ್ರೀ ವಿದ್ಯಾಧೀಶ ಸ್ವಾಮಿಡ್ದ್ ” ನಾದ ಕಲಾ ಕುಸುಮ” ಬಿರುದು.ಒಡಿಪು ಶಾಸಕೆರಾಯಿನ ಶ್ರೀ ಕೆ.ರಘುಪತಿ ಭಟ್ ಮೆರೆಡ್ದ್ ಸನ್ಮಾನ,74‌ನೇ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನೊಡ್ ಪ್ರಶಂಸಾ ಪತ್ರ,ಅಖಿಲಭಾರತ ಕನ್ನಡ ಮಕ್ಕಳ ಮನೆ ಕಲಾಕಿರಣ ಪುರಸ್ಕಾರ,ಉಡುಪಿ ರೋಟರಿ ಕ್ಲಬ್ ಡ್ದ್ ಮಾನಾದಿಗೆ,ಸುವರ್ಣ ಸಂಸ್ಕ್ರತಿ ದಿಬ್ಬಣಡ್ ಮಾನಾದಿಗೆ.ಇಂಚ ಮೆರೆನ ಕಲಾಸಾಧನೆಗ್ ಮೆಚ್ಚಿದ್ ಮೆರೆಗ್ ಪ್ರಶಸ್ತಿ ಲು ಬೈದುಂಡ್. ಈ ಸರ್ತಿದ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಮೆರೆನ ಸಾಧನೆಗ್ ಕುಡಲಾತ್ ಬಲ ಕೊರ್ತುಂಡ್.ಅನೂಪ್ ದೇವಾಡಿಗ ಮೆರೆನೊಟ್ಟುಗ್ ಬದುಕುದ ಪಯಣೊಡ್ ಪಜ್ಜೆ ದೀತಿನ ಮೆರೆಗ್ ಅನೂಪ್ ಮೇರು ದಿಂಜ ಸಾತ್ ಕೊರೊಂದುಲ್ಲೆರ್.

ಅಕ್ಷತಾ ದೇವಾಡಿಗ ಮೆರೆನ ಈ ಸಾಧನೆ ನಿರಂತರವಾದುಪ್ಪಡ್.ನನಲಾತ್ ಪ್ರಶಸ್ತಿ ಲು ಅರೆಗ್ ತಿಕ್ಕಡ್ ಪಂಡುದ್ ಮಾತೆರ್ಲಾ ಬಯಕುಗ.