ವೈಜ್ಞಾನಿಕ ಯುಗೊಟ್ ಮಾತಲಾ ಫ್ಯಾಶನ್ ಆದ್ ಪೋತಿನ ಕಾಲಘಟ್ಟೊಡ್ ನಮ್ಮ ಹಿರಿಯೆರೆನ ಸಂಪ್ರದಾಯೊಕಲೆನ್ ನಮ ಮದತೊಂದ್ ಪೊಸ ವಿಚಾರದ ಬಗೆಟೇ ಯೋಚನೆ ಮಲ್ತೊಂದುಪ್ಪುನವ್ ಬಾರೀ ಬೇಜಾರುದ ಸಂಗತಿ. ನಮ್ಮ ಹಿರಿಯೆರೆನ ಸಂಪ್ರದಾಯೊಲ್ ವೈಜ್ಞಾನಿವಾದ್ ಮೀರಿನ ವಿಚಾರ.ಅಂಚಾದ್ ಆ ಸಂಪ್ರದಾಯೊಲೆನ್ ಒರಿಪುನ ಬೇಲೆ ಮಲ್ಪೊಡಾಪಿನ ಬಾರೀ ಅಗತ್ಯ ಉಂಡು ಪಂಡುದ್ ದ್ವಾರಕಾಮಯಿ ಶ್ರೀ ಸಾಯಿಬಾಬಾ ಮಂದಿರ ಶಂಕರಪುರದ ಧರ್ಮದರ್ಶಿ ಶ್ರೀ ಸಾಯಿ ಈಶ್ವರ್ ಗುರೂಜಿ ಪಂಡೆರ್.
ಸಾಯಿಮಂದಿರೊಡ್ ನಡಪುನ ಪೊಸ ಯೋಜನೆ ಆಯಿನ ಪೊಣ್ಣು ಜೋಕುಲೆಗ್ ಬಂಗಾರ್ದ ಮೂಕುದಬೊಟ್ಟು ಪಾಡುನ ಕಾರ್ಯಕ್ರಮದ ಪೂರ್ವಭಾವಿ ಸಭೆಟ್ ಆರು ಪಾತೆರಿಯೆರ್.
ಇತ್ತೆ ಹೆಚ್ಚಾದ್ ಬದುಕುದ ಕೆಲವು ಎಲ್ಯ ಸಮಸ್ಯೆಲೆನ್ ಮನಸ್ಸುಡ್ ದೀಯೊಂದ್ ಈ ಬದುಕೇ ಬೊಡ್ಚಿ ಪಂಡುದ್ ಜೀವ ದೆತೊಂಬಿನ ಮಸ್ತ್ ಘಟನೆಲೆನ್ ನಮ ತೂಪ. ಮದಿಮೆ ಆದ್ ಒಂಜಿ ವರ್ಸದುಲಾಯಿ ವಿಚ್ಛೇದನ ಆಪಿನವ್ವ್, ಎಲ್ಯ ಪ್ರಾಯೊಡೇ ಜೀವನದ ಬಗ್ಗೆ ಜಿಗುಪ್ಸೆ ಬರ್ಪಿನವ್ವ್ ಇಂಚಿನ ಕೆಲವ್ ಅವಾಂತರೊಲೆನ್ ತಪ್ಪಾವೊಡಾಂಡ ಯುವಪೀಳಿಗೆಗ್ ಹೆಚ್ಚಿನ ಮಾರ್ಗದರ್ಶನದ ಅಗತ್ಯ ಉಂಡು.ಜೋಕುಲೆಗ್ ಸಂಸ್ಕಾರ ಕಲ್ಪಾವುನ ಅಗತ್ಯ ಉಂಡು ಪಂಡುದ್ ಗುರೂಜಿ ಈ ಪೊರ್ತುಡ್ ತೆರಿಪಾಯೆರ್.
ಉಡುಪಿ ನಗರ ಸಭಾ ಸದಸ್ಯೆರಾಯಿನ ವಿಜಯ್ ಕೊಡವೂರು ಪಾತೆರ್ದ್ ನಮ್ಮ ಸಂಸ್ಕೃತಿ ಸಂಪ್ರದಾಯೊಲ್ ಒರಿಯೊಡಾಂಡ ಶ್ರದ್ಧಾ ಕೇಂದ್ರೊಲೆಡ್ ಆಚಾರ ವಿಚಾರೊಲೆನ್ ತೆರಿಪಾವುನ ಬೇಲೆ ಆವೊಡ್.ಈ ನಿಟ್ಟುಡ್ ಸಾಯಿಈಶ್ವರ್ ಗುರೂಜಿಲೆನ ಈ ಒಂಜಿ ಪೊಣ್ಣುಜೋಕುಲೆಗ್ “ಮೂಗುತಿ ಧಾರಣೆ” ಕಾರ್ಯಕ್ರಮ ನಿಜವಾದುಲಾ ಅರ್ಥಪೂರ್ಣವಾಯಿನವ್ವ್ ಪಂಡೆರ್.
ಸಭೆಟ್ ಸಾಯಿ ಸಾಂತ್ವನ ಮಂದಿರದ ಟ್ರಸ್ಟಿ ವಿಶ್ವನಾಥ ಸುವರ್ಣ, ಟ್ರಸ್ಟಿದ ಸದಸ್ಯೆರಾಯಿನ ರಾಧಾಕೃಷ್ಣ ಮೆಂಡನ್,ಕೊಲ್ಲೂರು ಮೂಕಾಂಬಿಕಾ ದೇವಸ್ಥಾನದ ಟ್ರಸ್ಟಿ ಸಂಧ್ಯಾ ರಮೇಶ್, ಪಾಂಡುರಂಗ ಮಲ್ಪೆ,ದಮಯಂತಿ ಎ. ಪ್ರಭಾವತಿ ಕೃಷ್ಣ, ವಿಜಯ ಕುಂದರ್,ಅಮಿತಾ ಗಿರೀಶ್,ನಾರಾಯಣ ಶೆಟ್ಟಿ,ಸತೀಶ್ ದೇವಾಡಿಗ,ಮಹೇಶ್ ಜತ್ತನ್,ಸ್ಮಿತಾ ಪ್ರವೀಣ್,ಪ್ರಸಾದ್ ಸುವರ್ಣ,ಪ್ರಮೋದ್ ಸುವರ್ಣ, ವಿಘ್ನೇಶ್ ಉಪಸ್ಥಿತರಿತ್ತೆರ್.ಹೊನ್ನಯ್ಯ ಶೆಟ್ಟಿಗಾರ್ ನಿರೂಪಣೆ ಮಲ್ತೆರ್.
ಉಂದುವೇ ಬರ್ಪಿನ ಮಾರ್ಣಮಿ ಉಚ್ಚಯದ 4ನೇ ದಿನೊತ್ತಾನಿ ದ್ವಾರಕಾಮಯಿ ಸಾಯಿ ಸಾಂತ್ವನ ಮಂದಿರ ಶಂಕರಪುರಡ್ ಗುರೂಜಿ ಸಾಯಿ ಈಶ್ವರ್ ದಿವ್ಯ ಸಂಕಲ್ಪೊಡ್ ನಡಪರೆಗುಪ್ಪುನ ಪೊಣ್ಣು ಜೋಕುಲೆಗ್ ಧಧರ್ಮಾರ್ಥವಾದ್ ಮೂಕುದ ಬೊಟ್ಟು ಪಾಡುನ ಕಜ್ಜೊ ನಡಪರೆಗುಂಡ್.7ವರ್ಸೊಡುದ್ 18 ವರ್ಸೊದ 108 ಪೊಣ್ಣುಜೋಕುಲ್ ಈ ಕಜ್ಜೊಡ್ ಮೂಕುದ ಬೊಟ್ಟು ಪಾಡುನ ಒಂಜಿ ಅರ್ಥಪೂರ್ಣವಾಯಿನ ಕಜ್ಜೊ ನಡಪರೆಗುಂಡ್. ಪೊಣ್ಣು ಜೋಕುಲ್ ಹೆಚ್ಚಿನ ಸಂಖ್ಯೆಡ್ ಪುದರ್ ಕೊರ್ತೆರ್.ಶಿವಮೊಗ್ಗ,ಚಿಕ್ಕಮಗಳೂರ್,ಬಂಟ್ವಾಳ,ಮಂಗಳೂರು ಇಂಚ ದೂರದೂರುಡ್ದ್ ಲೆಪ್ಪು ಬೈದುಂಡ್.ಸದ್ಯೊಗ್ ಕೈತಲುದಕ್ಲೆಗ್ ಪ್ರಾಶಸ್ಯ ಕೊರ್ಪುಂಡ್ ಪೊಣ್ಣು ಜೋಕುಲ್ ಈ ಕಜ್ಜೊದ ಪ್ರಯೋಜನನ್ ಪಡೆತೊನೊಲಿ ಪಂಡುದ್ ಸಾಯಿ ಈಶ್ವರ್ ಗುರೂಜಿ ತೆರಿಪಾದೆರ್.
by 