ಅಯೋಧ್ಯೆಡ್ ಶ್ರೀರಾಮನ ಭವ್ಯ ದೇಗುಲ ನಿರ್ಮಾಣ ಬೊಕ್ಕ ಪ್ರಾಣಪ್ರತಿಷ್ಠಾಪನೆ ಆಯಿ ಬೊಕ್ಕ ಉಡುಪಿ ವಡಭಾಂಡೇಶ್ವರಡ್ ಪ್ರಾಚೀನವಾಯಿನ ಪೂರ್ವಾವತಾರಡ್ ಲಕ್ಷ್ಮಣನೇ ಆದಿತ್ತಿನ ಬಲರಾಮರ ಸನ್ನಿಧಿದ ಪುನರುತ್ಥಾನ ಪುನಃ ಪ್ರತಿಷ್ಠೆಲಾ ಸಂಪನ್ನ ಆವೊಂದುಪ್ಪುನವ್ ಸೋಜಿಗದ ಸಂಗತಿಯಾದಿತ್ತುದ್ ಕಾಲನೇ ರಡ್ಡೇನುಲ ನಿರ್ಣಯ ಮಲ್ದಿಲೆಕ್ಕ ಉಂಡು ಪಂಡುದು ಶ್ರೀ ಪೇಜಾವರ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದೆರು ಅಭಿಪ್ರಾಯ ಪಂಡೆರ್ .
ಅಯೋಧ್ಯೆದ ರಾಮನ ಪಾದಮೂಲಡ್ ದೀದ್ ಅರ್ಚನೆ ಮಲ್ತುದ್ ಪೂಜೆ ಮಲ್ತುದ್ ತಾನ್ ಕನದಿನ ಭಗವಂತನ ಸಂಕರ್ಷಣ ಶಾಲಗ್ರಾಮನ್ ನವೀಕರಣ ಆಯಿನ ಶ್ರೀ ವಡಭಾಂಡೇಶ್ವರ ಬಲರಾಮ ದೇವಸ್ಥಾನಗ್ 21ತಾರೀಕು ಗುರುವಾರದಾನಿ ಹಸ್ತಾಂತರ ಮಲ್ತುದ್ ಸಂತಸ ವ್ಯಕ್ತಪಡಿಸಾಯೆರು .
ಉಂದೊಂಜಿ ಅಪೂರ್ವ ಯೋಗವಾದಿತ್ತುದ್ದು ಬಲರಾಮೆ ತ್ರೇತಾಯುಗಡ್ ಲಕ್ಷ್ಮಣೆ ಆದ್ ಅವತಾರ ಆತೆ. ಭಗವಂತನ ಸಂಕರ್ಷಣರೂಪನೇ ಆದುಪ್ಪುನೆಡ್ದಾವರ ಬಲರಾಮನಡೆಗ್ ಅಯೋಧ್ಯೆಡ್ದ್ ಸಂಕರ್ಷಣ ಶಾಲಗ್ರಾಮನ್ ಪೂಜೆ ಮಲ್ತುದ್ ಕನದೆರ್. ಆ ಹಿನ್ನೆಲೆಡ್ ರಾಮ ಬಲರಾಮರ ಸನ್ನಿಧಿಲೆನ ಪುನರುತ್ಥಾನ ಕಾರ್ಯ ಏಕಕಾಲಡ್ ನಡತೊಂದುಪ್ಪುನೆಡ್ದಾವರ ದೇಶೊಗ್ ಮಂಗಳ ಆಪುಂಡ್ ಪಂಡೆರು .
ಈ ಸತ್ಕಾರ್ಯಡ್ ಕೈಜೋಡಿಸಾಯಿನ ಪ್ರತಿಯೊರಿಗುಲ ರಾಮ ಬಲರಾಮೆರೆನ ಅನುಗ್ರಹದ ಬಲ ಸದಾ ಇಪ್ಪಡ್ ಪಂಡೆರು .
ಪುನಃ ಪ್ರತಿಷ್ಠಾ ಬ್ರಹ್ಮಕಲಶೋತ್ಸವದ ನಿಮಿತ್ತ ಆಯೋಜನೆ ಮಲ್ದಿನ ಭಜನೋತ್ಸವಗ್ ತಾಳ ಪತ್ತುದು ಭಜನೆ ಮಲ್ತುದ್ ಚಾಲನೆ ಕೊರಿಯೆರು .
ದೇವಳದ ತಂತ್ರಿಲಾಯಿನ ಸುಬ್ರಹ್ಮಣ್ಯ ತಂತ್ರಿ , ಪ್ರಧಾನ ಅರ್ಚಕ ಶ್ರೀನಿವಾಸ ಭಟ್ , ಜೀರ್ಣೋದ್ಧಾರ ಸಮಿತಿ ಗೌರವಾಧ್ಯಕ್ಷ ಕಡೆಕಾರ್ ಶ್ರೀಶ ಭಟ್ , ಬೆಂಗಳೂರು ಪೂರ್ಣಪ್ರಜ್ಞ ವಿದ್ಯಾಪೀಠದ ಪ್ರಾಚಾರ್ಯ ಡಾ ಸತ್ಯನಾರಾಯಣ ಆಚಾರ್ಯ , ಪೆರಂಪಳ್ಳಿ ವಾಸುದೇವ ಭಟ್ , ಮುರಳೀಕೃಷ್ಣರಾವ್ ಬಡಾನಿಡಿಯೂರು ಉಪಸ್ಥಿತರಿತ್ತೆರು .
by 