ಉಡುಪಿ: ನಮ್ಮ ಒವ್ವೇ ಪ್ರಯತ್ನ ಫಲ ಕೊರಂದಿನಪಗ, ಬದುಕುಡು ಸಮಸ್ಯೆಲು ಎದುರಾಯಿನಪಗ ಮಾತ್ರ ನಮಕ್ ದೇವೆರೆನ ನೆನಪಾಪುಂಡ್. ಅಂಚಾವಂದೆ ಭಕ್ತೆರು ದೇವಸ್ಥಾನಲೆಗ್ ನಿತ್ಯ ಬರ್ಪಿಲೆಕ್ಕ ಆವೊಡು ಪಂಡುದು ಕಾಣಿಯೂರು ಮಠಾಧೀಶ ಶ್ರೀ ವಿದ್ಯಾವಲ್ಲಭತೀರ್ಥ ಶ್ರೀಪಾದೆರು ಪಂಡೆರು.
ವಡಭಾಂಡೇಶ್ವರ ಶ್ರೀ ವಡಭಾಂಡ ಬಲರಾಮ ದೇವಸ್ಥಾನದ ಅಷ್ಟಬಂಧ ಪುನಃ ಪ್ರತಿಷ್ಠೆ, ಬ್ರಹ್ಮಕಲಶೋತ್ಸವದ ಧಾರ್ಮಿಕ ಸಭೆಟ್ ಶನಿವಾರ ಆಶೀರ್ವಚನ ಮಲ್ತೆರು.
ದೇವಸ್ಥಾನಲು ಶಾಂತಿ ನೆಮ್ಮದಿದ ಪ್ರತೀಕವಾದ್ ಇಪ್ಪುನವ್ವ್. ಒವ್ವೇ ದೇವಸ್ಥಾನಡ್ ಪೂಜೆ ಪುನಸ್ಕಾರಲು ಸರಿಯಾದ್ ನಡತೊಂದುಪ್ಪುಂಡಾ ಆ ಊರುಡ್ ನೆಮ್ಮದಿ ಇಪ್ಪುಂಡ್ ಪಂಡೆರು.
ಕರ್ಮದ ಫಲ ಜಾಸ್ತಿ
ಸಾನ್ನಿಧ್ಯ ಡಿತ್ತಿನ ಭೀಮನಕಟ್ಟೆ ಮಠದ ಶ್ರೀ ರಘುವರೇಂದ್ರತೀರ್ಥ ಶ್ರೀಪಾದೆರು ಆಶೀರ್ವಚನ ಮಲ್ತುದ್, ನಮ ಬಯಸಿನವ್ವ್ ಮಾತಲಾ ನಮಕ್ ಸುಲಭಡ್ ಸಿಕ್ಕುಲೆಕ್ಕ ಇತ್ತುಂಡ, ನಮ್ಮ ಇಚ್ಛೆದ ಪ್ರಕಾರನೇ ಮಾತಲ ನಡದಂಡ ದೇವೆರೆನ ಬಗ್ಗೆ ನಮಕ್ ಗ್ಯಾನನೇ ಬರ್ಪುಜಿ. ದೇವೆರು ಉಲ್ಲೆ ಪನ್ಪಿನವ್ವ್ ನಮಕ್ ತೆರಿಯುನಾಂಡಲ ಎಂಚ ಪಂಡ ನಮ ಏತೇ ಪ್ರಯತ್ನ ಬತ್ತುಂಡಲಾ ನಮಕ್ ಫಲ ಸಿಕ್ಕಂದಿನಪಗ.
ಕರ್ಮದ ಫಲ ಪನ್ಪಿನವ್ ಪರಾಧೀನವಾದುಂಡ್, ದೇವೆರೆನ ಕೈತ ಉಲಾಯಿಡುಂಡು. ಈ ವ್ಯಕ್ತಿಗ್ ಈತೇ ಫಲ ಕೊರೊಡು ಪಂಡುದು ದೇವೆರೆನ ಚಿತ್ತಡ್ ಇತ್ತಿನಪಗ ಮಾತ್ರ ಆ ಕಾರ್ಯಡ್ ನಮಕ್ ಯಶಸ್ಸು ಸಿಕ್ಕುಂಡ್.
ಅಂಚಾದ್ ದೇವೆರು ಉಲ್ಲೆರ್ ಪಂಡುದು ಗೊತ್ತಾಪಿನಿ ನಮ್ಮ ಪ್ರಯತ್ನ, ನಮ ಬಯಕಿನ ಅವ್ ಪೂರ್ಣವಾಯಿನಪಗ. ನಮ ದೇವೆರೆನ ನಂಬಿಕೆಡ್ ಸಾಗಿನಪಗ ಕರ್ಮದ ಫಲ ಜಾಸ್ತಿ ಸಿಕ್ಕುಂಡ್ ಪಂಡೆರು.
ವಿದ್ವಾಂಸ ಪಂಜ ಭಾಸ್ಕರ ಭಟ್ ಧಾರ್ಮಿಕ ಪ್ರವಚನ ಮಲ್ತೆರು.
ದೇವಸ್ಥಾನದ ಬ್ರಹ್ಮಕಲಶೋತ್ಸವ ಸಮಿತಿ ಅಧ್ಯಕ್ಷ ಸಾಧು ಸಾಲ್ಯಾನ್, ಜ್ಯೋತಿಷಿ ಹಯವದನ ಭಟ್, ಧರ್ಮಸ್ಥಳ ಎಸ್.ಕೆ.ಆರ್.ಡಿ.ಪಿ. ಪ್ರಾದೇಶಿಕ ನಿರ್ದೇಶಕ ದುಗ್ಗೇಗೌಡ, ಮಲ್ಪೆ ಪರ್ಸೀನ್ ಮೀನುಗಾರರ ಸಂಘದ ಅಧ್ಯಕ್ಷ ನಾಗರಾಜ್ ಸುವರ್ಣ, ಉಡುಪಿ ಧಾರ್ಮಿಕ ದತ್ತಿ ಇಲಾಖೆ ಸಹಾಯಕ ಆಯುಕ್ತ ಪ್ರಶಾಂತ ಕುಮಾರ್ ಶೆಟ್ಟಿ, ಮಣಿಪಾಲ ಎಂ.ಐ.ಟಿ. ಪ್ರಾಧ್ಯಾಪಕ ಡಾl ಉದಯ ಕುಮಾರ್ ಶೆಟ್ಟಿ, ಕೊಡವೂರು ಗ್ರಾಮ ಪಂಚಾಯತ್ ಆಡಳಿತಾಧಿಕಾರಿ ಕಾರ್ತಿಕೇಯ ಭಟ್, ನಗರಸಭಾ ಸದಸ್ಯ ಶ್ರೀಶ ಭಟ್ ಕೊಡವೂರು, ಬಿ.ಪಿ. ರಮೇಶ್ ಪೂಜಾರಿ ಬಡಾನಿಡಿಯೂರು, ಕೊಲ್ಲೂರು ದೇವಳ ವ್ಯವಸ್ಥಾಪನ ಸಮಿತಿದ ಮಾಜಿ ಸದಸ್ಯೆ ಸಂಧ್ಯಾ ರಮೇಶ್, ದೇವಳದ ಅಭಿವೃದ್ಧಿ ಸಮಿತಿ ಅಧ್ಯಕ್ಷ ನಾಗರಾಜ ಮೂಲಿಗಾರ್, ಗೌರವಾಧ್ಯಕ್ಷ ಶ್ರೀಶ ಭಟ್ ಕಡೆಕಾರು ಉಪಸ್ಥಿತರಿತ್ತೆರು.
ಬ್ರಹ್ಮಕಲಶೋತ್ಸವ ಸಮಿತಿ ಪ್ರಧಾನ ಕಾರ್ಯದರ್ಶಿ ಪ್ರಕಾಶ್ ಜಿ. ಕೊಡವೂರು ಸ್ವಾಗತ ಮಲ್ತೆರು. ಪೂರ್ಣಿಮಾ ಜನಾರ್ದನ್ ನಿರೂಪಣೆ ಮಲ್ತುದ್ ಸೊಲ್ಮೆ ಸಂದಾಯ್ತ ಮಲ್ತೆರು.
ಸಾಂಸ್ಕೃತಿಕ ಕಾರ್ಯಕ್ರಮದಂಗವಾದ್ ಸುಮನಸಾ ಕೊಡವೂರು ಮೊಕ್ಲೆನ ಶಿಕಾರಿ ತುಳು ಹಾಸ್ಯಮಯ ನಾಟಕ ಪ್ರದರ್ಶನ ಆಂಡ್.
by 