ಟೀಚರ್ಸ್ ಡೇ ಪ್ರಯುಕ್ತ ನಿವ್ರತ್ತ ಶಿಕ್ಷಕಿಗ್ ಮಾನಾದಿಗೆ.

ಸೆ. 5: ಶಿಕ್ಷಕೆರೆನ ದಿನಾಚರಣೆದ ಅಂಗವಾದ್ ಮಲ್ಪೆ ಮೊಗವೀರ ಯುವ ಸಂಘಟನೆದ ವತಿಡ್ದ್ ನಿವ್ರತ್ತ ಪೆರಿಯ ಶಿಕ್ಷಕಿ 84 ವರ್ಷ ಪ್ರಾಯದ ತಾರಾ ಬಾಯಿ ಮೆರೆಗ್ ಅರೆನ ಇಲ್ಲಗೆ ಪೋದು ಮಾನಾದಿಗೆ ಮಲ್ತೆರ್. ತಾರಾ ಬಾಯಿ ಮೇರ್ ಬೆಂಗ್ರೆ, ಹೆಜಮಾಡಿ, ಫಿಶರೀಶ್ ಶಾಲೆಡ್ ಟೀಚರ್ ಆದ್ ಸೇವೆ ಮಲ್ತುದ್, ಮಲ್ಪೆ  ವಡಭಾಂಡೇಶ್ವರ ಗಾಂಧಿಶತಾಬ್ದಿ ಶಾಲೆಡ್ ಮುಖ್ಯ ಶಿಕ್ಷಕಿಯಾದ್ ಸೇವೆ ಮಲ್ದೆರ್. ಸುಮಾರು 35 ವರ್ಷ ಸೇವೆ ಮಲ್ತುದ್ ಇತ್ತೆ ನಿವ್ರತ್ತಿಯಾದ್ ಇಲ್ಲಡೇ ಉಲ್ಲೆರ್. ಆರೋಗ್ಯದ ಏರುಪೇರು ಇತ್ತುಂಡಲಾ ಇತ್ತೆಲಾ ಏರೇ ಇಲ್ಲಗ್ ಬತ್ತುಂಡಲಾ ಬಾರೀ ಪ್ರೋತ್ಸಾಹದಾಯಕವಾದ್ ಪಾತೆರ್ದ್ ಬದುಕುಡ್ ವಿದ್ಯಾವಂತೆರಾದ್ ಮಾತೆರ್ಲ ದೇಶದ ಎಡ್ಡೆ ಪ್ರಜೆ ಆದ್ ಮೂಡ್ದ್ ಬರೊಡ್ ಪಂಡುದ್ ಸಃದೇಶೊನ್ ಕೊರ್ಪೆರ್. ತಾರಾ ಬಾಯಿ ಮೆರೆಗ್ ರಡ್ಡ್ ಪೊಣ್ಣು ಬೊಕ್ಕ ಒರಿ ಮಗೆ ಉಲ್ಲೆರ್.ಅರೆನ ಮಗೆ ನಾಗರಾಜ್ ಮೇರು, ಬೈಂದೂರುರ ಸರಕಾರಿ ಪ್ರೌಢಶಾಲೆಡ್ ಮುಖ್ಯಶಿಕ್ಷಕೆ ಆದ್ ಸೇವೆ ಮಲ್ತೊಂದುಲ್ಲೆರ್. ಮರ್ಮಾಳ್ ಕಾಪು ಸರಕಾರಿ ಶಾಲೆಡ್ ಶಿಕ್ಷಕಿಯಾದ್ ಸೇವೆ ಮಲ್ತೊಂದುಲ್ಲೆರ್.

ಮೊಗವೀರ ಯುವ ಸಂಘಟನೆ ವತಿಡ್ದ್ ಪ್ರತೀ ವರ್ಷ ಶಿಕ್ಷಕೆರೆನ ದಿನಾಚರಣೆದಾನಿ ಸ್ಥಳೀಯ ಟೀಚರ್ ನಕ್ಲೆನ್ ಗುರುತಿಸಾದ್ ಮಾನಾದಿಗೆ ಮಲ್ಪುಂಡ್. ಈ ಸರ್ತಿದ ಮಾನಾದಿಗೆನ್ ತಾರಾ ಬಾಯಿ ಮೆರೆಗ್ ಮಲ್ತೆರ್. ಈ ಪೊರ್ತುಡ್ ಮಲ್ಪೆ ಮಹಿಳಾ ಘಟಕದ ಅಧ್ಯಕ್ಷೆ ಶ್ರೀಲತಾ ಜೀವನ್, ಶಶಿಕಲಾ ಸುಂದರ್, ಲಲಿತಾ, ಸಂಗೀತಾ, ಸಂಪ್ರೀತಾ ಬೊಕ್ಕ ಯಶೋದ ಕೇಶವ್ ಬೊಕ್ಕ ತಾರಾ ಬಾಯಿ ಮೆರೆನ ಕುಟುಂಬದಕುಲು ಉಪಸ್ಥಿತರಿತ್ತೆರ್.