ತುಳು ವರ್ಲ್ಡ್ ಫೌಂಡೇಶನ್ ಚಟುವಟಿಕೆಗ್ ಕಟೀಲುಡ್ ಚಾಲನೆ..

ಕಟೀಲು(ಸೆ.5)
ತುಳು ಭಾಷಾ ಸಂಸ್ಕೃತಿದ  ಬುಲೆಚ್ಚಿಲ್ ಗಾದ್  ಕಾಳಜಿ ದೀದ್  ರಚನಾತ್ಮಕ ಕಾಯಕ ನಿರತವಾದುಪ್ಪುನ ಧ್ಯೇಯೋದ್ದೀಶಡ್ ಅಸ್ತಿತ್ವಗ್ ಬೈದಿನ ತುಳು ವರ್ಲ್ಡ್ ಫೌಂಡೇಷನ್ ದ ವಿಸ್ತೃತ ಚಟುವಟಿಕೆಲೆಗ್  ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಾಲಯಡ್  ಚಾಲನೆ ತಿಕ್ಕುಂಡ್..
ಕಟೀಲು ಕ್ಷೇತ್ರದ ಅರ್ಚಕೆರಾಯಿನ ವೇ.ಮೂ. ಹರಿನಾರಾಯಣ ದಾಸ ಆಸ್ರಣ್ಣರ ಉಪಸ್ಥಿತಿ ಬೊಕ್ಕ ಗೌರವಾಧ್ಯಕ್ಷತೆಡುಪ್ಪುನ ಸಂಘಟನೆದ ಸೃಜನಶೀಲ ಚಟುವಟಿಕೆದ  ದುಂಬರಿಕೆಗ್ ಕಟೀಲ್ದಪ್ಪೆನ ತಲೆಜಾಗೆಡ್  ವಿಶೇಷವಾದ್ ಸುಗಿತುದ್  ಚಾಲನೆ ಕೊರಿಯೆರ್.
ಈ ಸಂಬಂಧ ಕಟೀಲು ಕ್ಷೇತ್ರಡ್  ನಡತಿನ ಫೌಂಡೇಷನ್ ಪದಾಧಿಕಾರಿಲೆನ ಸಮಾಲೋಚನಾ ಸಭೆನ್  ಉದಿಪನ ಮಲ್ತಿನ ವೇ.ಮೂ. ಹರಿನಾರಾಯಣ ದಾಸ ಆಸ್ರಣ್ಣೆರು “ಪಂಚ ದ್ರಾವಿಡ ಭಾಷೆಲೆಡೇ  ಪ್ರಾಚೀನವಾಯಿನ  ತುಳು ಭಾಷೆಡ್  ಸಾಂಸ್ಕೃತಿಕ ಶ್ರೀಮಂತಿಕೆ ಉಂಡು. ಆ ಬಗೆಟ್  ತೆರಿಯೊಂದ್, ಅಧ್ಯಯನಡ್  ಅಭಿಮಾನ  ದೀಯೊನೊಡು. ತುಳು ಪಂಡ ಕಾಲಿ   ಮನೋರಂಜನಾ ಪ್ರದರ್ಶನ ಅತ್ತ್,. ಅವ್ವ್  ಬದುಕುದ  ಸಂಸ್ಕೃತಿ. ನೆತ್ತ  ರಕ್ಷಣೆಗಾದ್  ಜಗತ್ತುದ  ತುಳುವೆರ್ ಮಾತಾ  ಒಂಜೇ ಕೊಡಿಯಡಿಟ್  ಉಂತುದ್, ಒಂಜೇ ಕುಟುಂಬದಂಚ ಬೆರೆಯೊಂದು ಬೆನೊಡು” ಪಂಡೆರು.

ತುಳು ಬಾಸೆಗಾದ್ ಕೈ ಜೋಡ್ಪಾಲೆ.

ಫೌಂಡೇಷನ್ ಅಧ್ಯಕ್ಷ ಅಬುದಾಬಿದ  ಸರ್ವೋತ್ತಮ ಶೆಟ್ಟಿ ಪಾತೆರ್ದ್  “ತುಳುವೆರೆಡ  ಒಗ್ಗಟ್ಟುದ  ಕೊರತೆ ಉಂಡು. ತುಳು ಒಂಜಿ   ಜನಾಂಗದ ಭಾಷೆ ಅತ್ತ್, ಅವ್ವ್  ತುಳುನಿಡುದ  ಜನಕ್ಲೆನ  ಬದುಕುನ ಸಂಸ್ಕೃತಿ. ಈ ಬಗೆಟ್ ತೆರಿಯೊನೊಡು, ಅಭಿಮಾನಡ್  ಜಗತ್ತುದ  ತುಳುವೆರ್ ಮಾತಾ  ಒಗ್ಗಟ್ಟಾವೊಡು. 8ನೇ ಪರಿಚ್ಛೇದ ಸೇರ್ಪಾವುನ ಬೊಕ್ಕ ತುಳುತ್ತ  ಬಹುಕಾಲದ ಬೇಡಿಕೆಲು ಈಡೇರೋಡ್” ಪಂಡೆರು.

ಫೌಂಡೇಷನ್ ಗ್  ಕಟೀಲು ಆಸ್ಥಾನ

ಜಾಗತಿಕ ತುಳು ಫೌಂಢೇಷನ್ ದ  ಔದ್ಯೋಗಿಕ ಉದಿಪನ  ಕಜ್ಜೋ ಕೂಡಲೇ  ಕಟೀಲುಡ್  ನಡಪರೆಗುಂಡ್.. ಉಂದೇಟ್ ಜಗತ್ತುದ  ತುಳುವರ್  ಪಾಲ್ ಪಡೆಯೊಡ್.
ಈ ಹಿನ್ನೆಲೆಡ್  ಫೌಂಡೇಷನ್ ದ  ಕೇಂದ್ರ ಕಛೇರಿ ಕಾರ್ಯಾಚರಣೆ ಮಲ್ಪರೆಗ್  ಕಟೀಲು ಕಾಲೇಜಿದ ಕೋಣೆನ್ ಧರ್ಮಾರ್ಥವಾದ್ ಕೊರ್ಪ ಪಂಡುದ್  ಸಭೆಟ್  ಗೌರವಾಧ್ಯಕ್ಷೆರಾಯಿನ  ಶ್ರೀಹರಿನಾರಾಯಣ ದಾಸ ಆಸ್ರಣ್ಣೆರು ಘೋಷಣೆ ಮಲ್ತೆರು.
ಕಟೀಲುಡ್  ನಡತಿನ  ಸಮಾಲೋಚನಾ ಸಭೆಟ್ ಫೌಂಢೇಷನ್ ಸ್ಥಾಪಕ, ನಿರ್ದೇಶಕ ಡಾ.ರಾಜೇಶ್ ಆಳ್ವ ಬದಿಯಡ್ಕ ಪ್ರಾಸ್ತಾವಿಕ ಪಾತೆರ್ದ್  ಸಂಘಟನೆದ  ಅಗತ್ಯ, ಅನಿವಾರ್ಯತೆ, ಧ್ಯೇಯೋದ್ದೇಶಲೆನ್ ವಿವರಣೆ ಮಲ್ತುದ್ ಫೌಂಡೇಷನ್ ದುಂಬುದ ದಿನೊಟ್  ವಿಶಾಲ ವ್ಯಾಪ್ತಿದೊಟ್ಟುಗ್ ಧ್ಯೇಯಬದ್ಧ ಚಟುವಟಿಕೆ ನಡಪಾವರೆಗುಂಡ್ ಪಂಡೆರು..

ಫೌಂಢೇಷನ್ ಪ್ರಧಾನ ಕಾರ್ಯದರ್ಶಿ, ಲೇಖಕ, ಚಿಂತಕ ಪ್ರೊ. ಪುರುಷೋತ್ತಮ ಬಲ್ಯಾಯ ಬೆಳ್ಮಣ್ಣು, ಗೌ. ಸದಸ್ಯೆರಾಯಿನ ಲೇಖಕಿ ವಿಜಯಲಕ್ಷ್ಮಿ ಶೆಟ್ಟಿ, ಡಾ. ಮಾಧವ ಎಂ.ಕೆ, ಉಪಾಧ್ಯಕ್ಷೆ ತಾರಾ ಆಚಾರ್ಯ ಉಡುಪಿ, ಉಪಾಧ್ಯಕ್ಷ ಪ್ರೊ. ಡಿ.ಯದುಪತಿ ಗೌಡ ಬೆಳ್ತಂಗಡಿ, ಚಂದ್ರಹಾಸ ದೇವಾಡಿಗ ಮೂಡಬಿದ್ರೆ, ಕಾರ್ಯಕಾರಿ ಮಂಡಳಿ ಸದಸ್ಯ, ‘ಕಣಿಪುರ’ ಸಂಪಾದಕ ಎಂ.ನಾ. ಚಂಬಲ್ತಿಮಾರ್, ಜನಪದ ಕಲಾವಿದ ಶಂಕರ ಸ್ವಾಮೀಕೃಪ, ಸುಖಾಲಾಕ್ಷಿ ವೈ. ಸುವರ್ಣ, ಸಂಚಾಲಕಿ ಆಶಾ ಶೆಟ್ಟಿ ಅತ್ತಾವರ, ಕಾರ್ಯದರ್ಶಿ ಭಾಸ್ಕರ್ ಕುಂಬ್ಳೆ, ಮುರಳೀ ಭಟ್ ಉಪ್ಪಂಗಳ, ಮೊಕುಲು ಉಪಸ್ಥಿತರಿತ್ತೆರು.
ತುಳು ಭಾಷೆ, ಸಂಸ್ಕೃತಿ ಬಗೆಟ್ ಜಾಗತಿಕ ತುಳುವರೆನ್ ಸಂಘಟನೆ ಮಲ್ಪುನ ಒಟ್ಟುಡ್   ತುಳುತ್ಥ  ಬಗೆಟ್ ಅಧ್ಯಯನಾತ್ಮಕ ದಾಖಲೀಕರಣ ಬೊಕ್ಕ ಅಕಾಡೆಮಿಕ್ ಕೆಲಸೊಲು  ನಡಪೊಡು ಪಂಡುದ್  ಸಭೆಟ್  ನಿರ್ಧಾರ ಆಂಡ್..
ಈ ದಿಟ್ಟಿಡ್  ಫೌಂಡೇಷನ್ ದುಂಬು ದೀಪುನ  ಪಜ್ಜೆಗ್ ವಿಶ್ವದ ಸರ್ವ ತುಳುವೆರೆನ  ಬೆರಿಬಲ ಬೋಡುಂದು ಬಯಕಿಯೆರ್.