ಪರ್ಬದ ಗೆಲ್ಮೆನ

ಪರ್ಬದ ಗೆಲ್ಮೆನ

ಮಂಡೆನ್ ದೆಕ್ಕ್‌ದ್ ಸುಣ್ಣೊನು ಪೂಜಿದ್
ಪೊರ್ಲುದ ಪುರ್ಪೊದ ಸಿಂಗಾರೊಗೆ
ಎಣ್ಣೆನ್ ಪೂಜಿದ್ ಬೆಚ್ಚ ನೀರ್‌ಡ್ ಮೀದ್
ಮೆಯಿ ಮನಸ್‌ಡಿತ್ತಿ ಕುರೆ ಜಾರೊಡುಗೆ

ಬೆನ್ನಿ ಸಾಗೊಳಿದ ಹತ್ಯಾರ್‌ಲೆನ್ ದೆಕ್ಕ್‌ದ್
ಬಚ್ಚಿರೆ ಬಜ್ಜೆಯಿದೊಟ್ಟುಗು ದೀವೊಡು
ಕೈಕಂಜಿಲೆನ್ ಮೀಪಾದ್ ಬೊಟ್ಟು ದೀದ್
ಪೂ ಪೂಜನೆ ಆದ್ ಅಡ್ಯೆ ತಿನ್ಪಾವೊಡು

ಮಂಜಲ್‌ದಿರೆತ ತೀಪೆ ಗಟ್ಟಿನ್ ತಿಂದ್‌ದ್
ತುಡರ್ ದೀಯೆರೆ ಅಟ್ಟನೆ ಮಲ್ಪೊಡು
ಗೂವೆಲ್ ಕಿದೆ ತುಪ್ಪೆ ಗೊಬ್ಬರದ ಮುಟ್ಟೆ
ಜಾಲ್ ನಿಲಿಕೆ ಬೊಲ್ಪುನು ದೀವೊಡು

ಕಂಡೊಗು ಜತ್ತ್‌ದ್ ಬಲೆಕಿ ಮರ ದೀದ್
ಕೊಲ್ತಿರಿದ ಬೊಲ್ಪುನು ಪೊತ್ತಾವೊಡು
ಬಲೀಂದ್ರನ ಸಂಧಿ ಪಂಡ್‌ದ್ ಕೂ ಪಂದ್
ಪೊಲಿ ಲೆತ್ತ್‌ದ್ ಅರಿನ್ ರಾಪಾವೊಡು

ಮೊರೆತಿನ ಪುದ್ದೊಲು ತುಳಸಿಗ್ ಪಾರಾದ್
ಜಾಗಟೆ ಸಬುದೊಡು ಪೂಜೆ ಆವೊಡು
ಬೇರೊದ ಜಾಗೆಡ್ ಕುಂದೆಲ್ ಬರಂದಿಲೆಕ್ಕ
ಲಚ್‌ಮಿನ್ ನೆನೆತ್‌ದ್ ಗೆಲ್ಮೆನ ತಿಕ್ಕೊಡು

✍️ ತೃಪ್ತಿ. ಸುರೇಶ್. ಪಳ್ಳಿ
ತುಲುವೆರೆ ಕಲ