ರೇಡಿಯೋದ ಜಂಬರ..

ನೀತಿ ಕತೆ

*ರೇಡಿಯೊದ ಜಂಬರ **

ಈ ಕತೆ ರೇಡಿಯೊದ ಕಾಲ ದ ಅಲ್ಪ ಅಲ್ಪ ಒಂಜೆಂಜಿ ಇಲ್ಲಡ್ ಬೊಬ್ಬೆ ದೀವೊಂದು ಇತ್ತ್ಂಡ್ . ರೇಡಿಯೊ ಇತ್ತಿನ ಇಲ್ಲಗ್ ಒಂತೆ ಜಾಸ್ತಿ ಮರ್ಯಾದಿ. ಇಂಚೊಪ್ಪುನಗ ದೊಮ್ಮಣ್ಣೆ ಅರ್ನ ಕೆಬಿತ ಮುರುನ್ ಮಾರ್ದ್ ಇಲ್ಲಗ್ ಒಂಜಿ ರೇಡಿಯೊ ಕನತೆರ್. ದೊಮ್ಮಣ್ಣೆ ಬೋಡೆದಿಗ್ ಮಗಳೆಗ್ ಕುಸಿಟ್ ನೆಲಟ್ ಕಾರ್ ಇಜ್ಜಿ. ಮಾತೆರೆಗ್ಲ ಕೇನುಲೆಕ ಜೋರ್ ಸ್ವರಟ್ ರೇಡಿಯೊ ಚಾಲ್ ದೀಯೊಂದು ಇತ್ತೇರ್ ಊರು ಇಡೀ ಸುದ್ದಿ ಅಂಡು ನೆರೆಕರೆ ಪೂರ ಬತ್ತ್ ತೂದ್ ಕುಸಿ ಪಡೆಯೇರ್. ಅಲ್ಪದ ಏರಿಯಾಡ್ ಸುರು ರೇಡಿಯೊ ದೊಮ್ಮಣ್ಣನ ಇಲ್ಲಗ್ ಬತ್ತಿನಿ . ಬರಿತ ಇಲ್ಲದ ಬಿಟ್ಟಕ್ಕಗ್ ದಾದಾನ ಆರ್ನ ಇಲ್ಲಗೆ ರೇಡಿಯೊ ಬೈದಿಲೆಕ್ಕನೇ ಕುಸಿ ಅರ್ನ ರಡ್ಡ್ ಜೋಕುಲು ದೊಮ್ಮಣ್ಣನ ಇಲ್ಲ ಜಾಲ್ ಡೆ ನಲಿತೊಂದುಲ್ಲೆರ್. ರಡ್ಡ್ ಮೂಜಿ ದಿನೊ ಕರಿಂಡ್ ದೊಮ್ಮಣ್ಣನ ಮಗಲೆಗ್ ಮಲ್ಲಾದಿಗೆ ಸುರುವಾಂಡ್. ನೆರೆ ಕರೆತ ಜನ ರೇಡಿಯೊ ಕೇನರೆ ಬತ್ತೆರ್ ಡ ರಪ್ಪ ಬಂದ್ ದೀಯೊಂದು ಇತ್ತೊಳು ಬುಸು ಬುಸು ಪನರೆ ಪತಿಯೊಳು ಬೈದಿನಕುಲು ಮೋನೆ ಚಪ್ಪೆ ಮಲ್ತೊಂದು ಪಿರ ಪೊರೆ ಪತಿಯೆರ್.
ಒಂಜಿ ದಿನ ಬಿಟ್ಟಕ್ಕ ಇಲ್ಲದ ಪೂರ ಬೇಲೆ ರಪ್ಪ ರಪ್ಪ ಮಲ್ತ್ ದ್ ಜೋಕುಲೆನ್ ಬೀಡಿ ದ ಸೂಪುನ್ ಸೊಂಟಡ್ ಪತ್ತೊಂದು, ಜೋಕುಲೆ ಲೆತ್ತೊಂದು ರೇಡಿಯೊಡ್ ಬರ್ಪಿನ ತುಲು ಪಾರ್ದನ ಕೇನಾರೆ ಬರ್ಪೆರ್ . ಅಕ್ಲೆನ್ ತೂದು ರೇಡಿಯೊ ಬಂದ್ ಮಲ್ಪುವಲ್ ಆತೇ ಅತ್ತಂದೆ ಬಿಟ್ಟಕ್ಕ ಇರೆಗ್ ಪದ ಕೇನೋಡು ಪನ್ನಗ ಜೋಕಲ್ನ ಕೆಬಿನ್ ಪಿಂಟವೊಡು ಜೋಕುಲು ಬುಲಿಪುನುಲ ಒಂಜಿ ಪದತಂಚನೆ ಆತೆ ಅಕ್ಕೆ ಪಂದು ಮಕ್ಕರ್ ಮಲ್ಪುವಲ್ . ಉಂದೆನ್ ಕೇಂಡಿನ ಬಿಟ್ಟಕ್ಕ ಒಂಜಿ ಗಳಿಗೆಲ ಅಲ್ಪ ಉಂತುಜೇರ್ ಇಲ್ಲಗ್ ಬತ್ತ್ ಬೇಜಾರ್ ಮಲ್ತೋನುವೆರ್. ಆರ್ ರೇಡಿಯೊ ಕನಪಿನ ಇತ್ತೆದ ಪರಿಸ್ಥಿತಿ ಡ್ ಇಜ್ಜೇರಾಂಡಲ ಮನಸ್ ಡೇ ನಿಘಂಟ್ ಮಲ್ತೊಂಡೆರ್ ಎನ್ನ ಇಲ್ಲಡ್ಲ ಒಂಜತ್ ಒಂಜಿ ದಿನ ರೇಡಿಯೊದ ಸೊರೊ ಕೇನೊಡೆಂದ್.ಒಂಜಿ ದಿನ ಕರಿಂಡ್ ದೊಮ್ಮಣ್ಣನ ಇಲ್ಲದ ರೇಡಿಯೊ ಬುರ್ ಬುರ್ ಪನಾರೆ ಪತ್ತ್ಂಡ್ . ಪಿದೈಡ್ ಇತ್ತಿನ ದೊಮ್ಮಣ್ಣೆ ಉಳಾಯಿಡ್ ಬೇಲೆಡ್ ಇತ್ತಿನ ಮಗಲ್ಡ ಪನ್ಪೆರ್ , ಮಗ ರೇಡಿಯೊದ ಸೆಲ್ಲ್ ಸನಿದುಂಡು ತೋಜೊಡು ಸೆಲ್ಲ್ ನ್ ಗೆತ್ತ್ ದಿಕ್ಕೆದಲ್ಪಾ ದೀಲ ಪಂದ್. ದಾಲ ತೆರಿಯಂದಿನಲ್ ಆವು ಅಮ್ಮೆರೆ ಪಂಡಿನಲ್ ರೇಡಿಯೊ ನ್ ಕೊನೊದು ದಿಕ್ಕೆದ ಮಿತ್ತ್ ದೀದ್ ಇಂಚಿರ್ದ್ ದಿಕ್ಕೆಲ್ ಗ್ ಕನಕ್ ದೀದ್ ಸೀದಾ ನೀರ್ ಕನರೆ ಪೋಪಲ್. ಮುಲು ರೇಡಿಯೊ ಬೆಚ್ಚ ಆದ್ ಒಂಜೆಂಜೆ ಅದೆ ಪಟಪಟ ಪುಡಾರೆ ಸುರು ಕೊರ್ಪುಂಡು. ದೊಮ್ಮಣ್ಣೆ ಉಳಾಯಿ ಬತ್ತ್ ತೂನಾಗ ದಿಗಿಲ್ ಅಪುಂಡು ರೇಡಿಯೊ ಕಂರ್ಚಿದ್ ಮಜ್ಜಿ ಅದುಪ್ಪುಂಡು . ಅಯ್ಯೋ ದೇವೆರೆ ಅಮ್ಮೆ ರ್ ಮಲ್ತ್ ಕೊರ್ತಿನ ಮುರುನ್ ಮರ್ದ್ ಕನತಿನ ರೇಡಿಯೊನ್ ಮಗಲ್ ಅಲ್ನ ಎಡ್ಡ್ ಡ್ ಪೊತ್ತಾದ್ ಪಡಿಯೊಲತ ಬುಲ್ತೆರ್ . ನೀರ್ ಕನತ್ ಬತ್ತಿನಲ್ ಅಮ್ಮೆ ರ್ ದಾನಿ ಬುಲ್ತೊಂದುಲ್ಲೆರ್ ತೂನಗ ಅರ್ನ ಎದುರು ರೇಡಿಯೊ ಮಜ್ಜಿ ಆದ್ ತುಂಡು ತುಂಡು ಆದಿತ್ತ್ಂಡ್ . ಪೋಡಿದ್ ತಪ್ಪಾಂಡ್ ಪಂದ್ ಅಮ್ಮೆ ರ್ನ ಕಾರ್ ಗ್ ಅಡ್ಡ ಬುರುವಲ್ . ಮಗಲ್ನ ಈ ಮರ್ಲ್ ಬುದ್ದಿಡ್ ಕೋಪ ನೆತ್ತಿಗ್ ಏರ್ದಿತ್ತ್ಂಡಲ , ತಪ್ಪು ನಿನ್ನ ಆತ್ತ್ ಮಗ ಎನ್ನ ಅಪಗ ರಡ್ಡ್ ಅಚ್ಚರ ನಿಕ್ಕ್ ಕಲ್ಪರೆ ಹಾಲೆಂಡ್ ಗಿಡದೆಡ ಈ ಪರಿಸ್ಥಿತಿ ಬೈದಂದ್ ಪಂದ್ ಬೈರಸ್ ಪುಗ್ಗೆಲ್ ಗ್ ಪಡೊಂದು ಪಿದೈ ಬತ್ತೆರ್. ಒಂಜಿ ವರ್ಸ ಕರಿ ಬೊಕ್ಕ ರೇಡಿಯೊ ದ ಸೊರೊ ಬಿಟ್ಟಕ್ಕ ನ ಇಲ್ಲಡ್ ಕೇನಾರೆ ಪತ್ತ್ಂಡ್ ಆಂಡ ಅರ್ ಮಲ್ಲಾದಿಗೆ ಮಲ್ತ್ ಜೆರ್ ಇಲ್ಲಗ್ ರೇಡಿಯೊ ಕೇನರೆ ಬತ್ತಿನಕ್ಲೆನ್ ಮೋಕೆಡ್ ಎದುಕೊಂಡೆರ್. ದೊಮ್ಮಣ್ಣನ ಬೋಡೆದಿ ,ಮಗಲ್ ಲ ಬಿಟ್ಟಕ್ಕ ನ ಇಲ್ಲಗ್ ರೇಡಿಯೊ ಕೇನರೆ ಬರ್ರೆ ಪತಿಯೇರ್ . ಅಕ್ಲೆನ್ಲ ಮೋಕೆ ಡ್ ಉಲಾಯಿ ಲೆತ್ತೆ ದ್ ಕುಲ್ಲದ್ ಬೆಲ್ಲ ನೀರ್ ಕೊರಿಯೆರ್

ಮಲ್ಲಾದಿಗೆ ಮಲ್ತ್ಂಡ ಕಡೆ ಮುಟ್ಟ ಒರಿಯೂಜಿ

✍️ ದಿವ್ಯ ಅಂಚನ್ ಪಕ್ಷಿಕೆರೆ*
ತುಲುವೆರೆ ಕಲ