ಬಾಳೆ ಮೇಳ

ಸೋದೆ ವಿಶ್ವವಲ್ಲಭ ತೀರ್ಥರ ಸಂಕಲ್ಪದಂಚ ನ.29ಡ್ದ್  ಮೂಜಿ ದಿನತ್ತ ‘ಕದಳೀ ವಿಶ್ವದರ್ಶನ’ ಬಾಳೆ ಮೇಳ

ಸೋದೆ ಶ್ರೀ ವಾದಿರಾಜ ಮಠದ ಪೀಠಾಧಿಪತಿಲಾಯಿನ ಶ್ರೀ ವಿಶ್ವವಲ್ಲಭತೀರ್ಥ ಶ್ರೀಪಾದೆರೆನ ದೂರದೃಷ್ಟಿ ಬೊಕ್ಕ ಸಂಕಲ್ಪದಂಚ ನವೆಂಬರ್ 29ಡ್ದ್  ಡಿಸೆಂಬರ್ 1ಮುಟ್ಟ ಮೂಜಿ ದಿನತ್ತ  ಉಡುಪಿದ ಶ್ರೀಕೃಷ್ಣ ಮಠದ ಪಾರ್ಕಿಂಗ್ ಪ್ರದೇಶದ ಸಮೀಪ ರಾಷ್ಟ್ರಮಟ್ಟದ ‘ಕದಳೀ ವಿಶ್ವದರ್ಶನ’ ಬಾಳೆ ಮೇಳನ್  ಆಯೋಜನೆ ಮಲ್ದುಂಡ್.

ಈ ಬಗೆಟ್ ಮಾಹಿತಿ ಕೊರಿನ ಶ್ರೀ ವಿಶ್ವವಲ್ಲಭತೀರ್ಥ ಶ್ರೀಪಾದೆರು, 2028ಡ್ ನಡಪರೆಗುಪ್ಪುನ ಸೋದೆ ಪರ್ಯಾಯದ ಅಂಗವಾದ್ ನವೆಂಬರ್ 29ಗ್ ಕಾಂಡೆ 7.45ಗ್ ಸರಿಯಾದ್ ಧಾರ್ಮಿಕ ಕಾರ್ಯಕ್ರಮದೊಟ್ಟುಗ್ ಬಾಳೆ ಮುಹೂರ್ತ ನಡಪರೆಗುಂಡ್.. ಬಾಳೆ ಕೃಷಿತ್ತ ಮಹತ್ವನ್ ಜನಸಾಮಾನ್ಯರೆಗ್ ಪರಿಚಯ ಮಲ್ಪುನವ್ ಬೊಕ್ಕ ಕೃಷಿಕೆರೆಗ್ ಪೊಸ ಅವಕಾಶಲೆನ್ ಒದಗಿಸಾವುನ ಉದ್ದೇಶಡ್ ಈ ಮೇಳನ್ ಆಯೋಜನೆ ಮಲ್ದುಂಡ್ ಪಂಡುದ್  ತೆರಿಪಾಯೆರು.

ಮೇಳಡ್ 100ಕ್ಕ್ ಲಾ ಜಾಸ್ತಿ ಬಗೆತ ತಳಿತ್ತ ಬಾರೆ ಗೊನೆತ್ತ ಪ್ರದರ್ಶನ, ನಾನಾ ತಳಿತ್ತಬಾಳೆ ಪರುಂದುದ ಮಾರಾಟ ಬೊಕ್ಕ 150ಕ್ಕ್ ಲಾ ಜಾಸ್ತಿ  ಬಗೆತ್ತ ಬಾರೆದ ತಳಿತ್ತ ಪರಿಚಯ ಬೊಕ್ಕ ಅಯಿತ್ತ ಸಸಿತ್ತ  ಮಾರಾಟಗ್ ವಿಶೇಷ ವ್ಯವಸ್ಥೆ ಮಲ್ದುಂಡ್..  ಬಾಳೆ ಕೃಷಿಟ್  ತೊಡಗಿಸಾವೊಂದಿನ ರೈತೆರೆಗ್ ಪೊಸ ತಳಿಕುಲು, ಸುಧಾರಿತ ಕೃಷಿ ಪದ್ಧತಿಲು, ಬೊಕ್ಕ ನವೀನ ತಂತ್ರಜ್ಞಾನದ ಪರಿಚಯ ಆವರೆಗುಂಡ್. ಬಾರೆ ಕೃಷಿಟ್ ಪೊಸ ಪ್ರಯೋಗಲೆನ್  ಮಲ್ಪರೆಗ್ ಆಸಕ್ತಿ ಇತ್ತಿನ ರೈತೆರು ಬೊಕ್ಕ ಕೃಷಿ ಉದ್ಯಮಿಲೆಗುಲಾ ಈ ಮೇಳ ವೇದಿಕೆಯಾಪುಂಡ್.

ಭಾರತಡ್  ಅಂದಾಜು 500ಕ್ಕ್ ಲಾ ಜಾಸ್ತಿ  ಬಗೆತ್ತ  ಬಾರೆದ ತಳಿ ಇತ್ತುದ್  ಅಯಿಟ್  ಕೆಲವು ತಳಿಕುಲೆಗ್  ನನಲಾ ನಿರ್ದಿಷ್ಟ  ಪುದರ್ ಇಜ್ಜಿ.ಇಂಚ  ಪುದರ್  ಉಪ್ಪಂದಿನ ತಳಿತ್ತ ಪೈಕಿ ಒಂಜಿ  ವಿಶಿಷ್ಟ ತಳಿತ್ತ  ಆಯ್ಕೆ ಮಲ್ತುದ್ , ಮೇಳದ ಸಂದರ್ಭಡ್ ಸೋದೆ ಶ್ರೀ ವಾದಿರಾಜ ಮಠದ ವತಿಡ್ದ್  ನಾಮಕರಣ ಮಲ್ಪುನ ವಿಶೇಷ ಯೋಜನೆ ರೂಪಿಸಾದುಂಡ್.. ಆ ಮೂಲಕ ಅಪರೂಪದ ಬಾಳೆ ತಳಿನ್  ಜನಕ್ಲೆಗ್ ಪರಿಚಯ ಮಲ್ತುದ್ ಜನಪ್ರಿಯ ಮಲ್ಪುನ ಪ್ರಯತ್ನ ನಡಪರೆಗುಂಡ್.

ಬಾಳೆ ಕೃಷಿಕ್  ಸಂಬಂಧ ಪಟ್ಟಿನ ಜ್ಞಾನ ವಿನಿಮಯಕ್ಕಾದ್ ನ.29ಗ್  ಬಯ್ಯಗ್ ಸಂಪನ್ಮೂಲ ವ್ಯಕ್ತಿಲೆಡ ಉಪನ್ಯಾಸ ಕಾರ್ಯಕ್ರಮ ನಡಪರೆಗುಂಡ್ ಬಾರೆದ  ವೈಶಿಷ್ಟ್ಯ, ವಿವಿಧ ತಳಿಕುಲು ಬೊಕ್ಕ ಕೃಷಿ ಪದ್ಧತಿದ ಬಗೆಟ್ ಕೈಪಿಡಿ ಮಲ್ಪುನ ಯೋಜನೆಲಾ ಉಂಡು. ಬಾಳೆ ಕೃಷಿ ಮಲ್ಪುನಕ್ಲೆಗ್ ಸಬ್ಸಿಡಿ ಆಧಾರಡ್  ಸಸಿಕುಲೆನ್  ಒದಗಿಸಾವುನ ವ್ಯವಸ್ಥೆ ಕಲ್ಪಿಸಾದುಂಡ್. ನುಂಗಾಯಿನ ಬಾರೆಪರುಂದುನ್  ಪ್ರಸಾದ ರೂಪಡ್  ವಿತರಣೆ ಮಲ್ಪುಂಡ್.

ಮೇಳದ ಕುಡೊಂಜಿ  ಪ್ರಮುಖ ಆಕರ್ಷಣೆಯಾದ್ ಬಾರೆದ ನಾರುಡ್  ತಯಾರ್ ಮಲ್ತಿನ ಕರಕುಶಲ ವಸ್ತುಲು,, ಲೇಖನ ಸಾಮಗ್ರಿಲು ಬೊಕ್ಕ ಜವಳಿ ಉತ್ಪನ್ನದ ಪ್ರದರ್ಶನ ಬೊಕ್ಕ ಮಾರಾಟ ನಡಪರೆಗುಂಡ್.. ರಾಜ್ಯದ ನುರಿತ ಕರಕುಶಲ ಕಲಾವಿದೆರೆನ ತಂಡೊಡ್ ಬಾರೆ ನಾರುದ ಉತ್ಪನ್ನಲೆನ ತಯಾರಿಕೆದ ನೇರ ಪ್ರಾತ್ಯಕ್ಷಿಕೆ  ಇಪ್ಪುಂಡ್..

ಹ್ಯಾಂಗ್ಯೋ ಸಂಸ್ಥೆದ  ಬಾರೆದ ಪರುಂದುದ ಪೊಸ ಐಸ್‌ಕ್ರೀಮ್‌ ಬುಡುಗಡೆ ಆಪುಂಡ್.. ಬಾರೆದ ದಿಂಡುಡ್ ನಿರ್ಮಿಸಲಾಯಿನ ಮಂಟಪದ ಕಲಾಕೃತಿ ಬೊಕ್ಕ ಶ್ರೀಕೃಷ್ಣನ ಪ್ರತಿಮೆ ವಿಶೇಷ ಆಕರ್ಷಣೆಯಾವರೆಗುಂಡ್.. ಬಾರೆದ ಪರುಂದುದ ಬೇತೆ ಬೇತೆ ಖಾದ್ಯದ  ತಯಾರಿಕೆದ ಲೈವ್ ಕಿಚನ್, ಬಾರೆ ದಂಡುದ ಪಾನೀಯ ಬೊಕ್ಕ ಬಾರೆದ ಆಧಾರಿತ ಆಹಾರ ಪದಾರ್ಥಲೆಗ್ ಅವಕಾಶ ಕಲ್ಪಿಸಾದುಂಡ್..

ಮೇಳದ ಸಂಪೂರ್ಣ ಅಲಂಕಾರಗ್ ಬಾರೆದ ದಂಡುನೇ ಬಳಕೆ ಮಲ್ತುದ್, ಶಿರಸಿಡ್ದ್  ವಿಶೇಷ ತಂಡ ಬರ್ರೆಗುಂಡ್. ಬಾರೆದ  ಮಹತ್ವ ಸಾರುವ ಸಾಂಸ್ಕೃತಿಕ ಕಾರ್ಯಕ್ರಮಲೆನ್ ಆಯೋಜನೆ ಮಲ್ದುಂಡ್ ಬಾರೆದ ಬಗೆಟ್ ವಿಶೇಷ ಪದ್ಯ  ರಚನೆ ಮಲ್ದಿತ್ತುದ್, ಬಾರೆ ಮುಹೂರ್ತದ ಪೂರ್ವಡ್  ಈ ಪದೊನ್ ಬುಡುಗಡೆ ಮಲ್ಪುಂಡ್..

ಬಾರೆ ಕೇವಲ ಒಂಜಿ  ಕೃಷಿ ಉತ್ಪನ್ನ ಆದ್ ತೂವಂದೆ, ಅಯಿತ್ತ ಆಹಾರ, ಔಷಧೀಯ, ಆರ್ಥಿಕ, ಸಾಂಸ್ಕೃತಿಕ ಬೊಕ್ಕ ಪರಿಸರ ಸ್ನೇಹಿ ವೈಶಿಷ್ಟ್ಯಲೆನ್  ಜನಕ್ಲೆಗ್ ಪರಿಚಯ ಮಲ್ಪುನವ್ ‘ಕದಳೀ ವಿಶ್ವದರ್ಶನ’ದ ಆಶಯವಾದುಂಡ್.. ಈ ಹಿನ್ನೆಲೆಡ್  ಸಮೀಪದ ಹೋಟೆಲ್‌ ಡುಲಾ  ಬಾರೆದ ಪರುಂದುದ ಬೊಕ್ಕ ಬಾಳೆಕಾಯಿಡ್  ತಯಾರ್ ಮಲ್ದಿನ  ಬೇತೆ ಬೇತೆ ತೆನಸುಲೆನ್ ಮಲ್ಪರೆಗ್ ತೆರಿಪಾದುಂಡ್‌.ಸಾವಯವ ಕೃಷಿಕ್  ಉತ್ತೇಜನ ಕೊರ್ಪುಂಡ್. ಮೇಳಡ್  ಆದ್ಯತೆ ಕೊರ್ಪುಂಡ್  ಪಂಡುದು ಶ್ರೀಕುಲು ವಿವರಣೆ ಮಲ್ತೆರು.