ತುಳು ಭಾಷೆಗ್ ಮಾನಾದಿಗೆ, ತುಳುಕೂಟ ಸರಕಾರಗ್ ಅಭಿನಂದನೆ

*ತುಳು ಭಾಷೆಗ್  ರಾಜ್ಯದ ರಡ್ಡನೇ ಅಧಿಕೃತ ಆಡಳಿತ ಭಾಷೆದ ಮಾನ್ಯತೆ: ಸರ್ಕಾರಗ್ ಉಡುಪಿ ತುಳುಕೂಟದ ಅಧ್ಯಕ್ಷೆರಾಯಿನ ಬಿ. ಜಯಕರ ಶೆಟ್ಟಿ ಅಭಿನಂದನೆ.
*
ಉಡುಪಿ: ತುಳು ಭಾಷೆನ್  ರಾಜ್ಯದ ರಡ್ಡನೇ ಅಧಿಕೃತ ಆಡಳಿತ ಭಾಷೆಯಾದ್  ಘೋಷಣೆ ಮಲ್ತಿನ ಬಗೆಟ್ ಸಚಿವ ಸಂಪುಟ ಸಭೆಟ್ ನಿರ್ಧಾರ ದೆತೊಂದಿನ  ಕರ್ನಾಟಕ ಸರ್ಕಾರದ ಮಾನ್ಯ ಮುಖ್ಯಮಂತ್ರಿಲಾಯಿನ  ಡಿ.ಕೆ. ಶಿವಕುಮಾರ್ ಬೊಕ್ಕ ಸಚಿವ ಸಂಪುಟದ ಮಾತಾ ಸಚಿವೆರೆಗ್ ತುಳುಕೂಟ ಬೊಕ್ಕ ಸಮಸ್ತ ತುಳುವೆರೆನ ಪರವಾದ್  ಉಡುಪಿ ತುಳುಕೂಟದ ಅಧ್ಯಕ್ಷೆರಾಯಿನ  ಶ್ರೀ ಬಿ. ಜಯಕರ ಶೆಟ್ಟಿ ಇಂದ್ರಾಳಿ ಮೇರು ಧನ್ಯವಾದ ಸಲ್ಲಿಸಾದೆರ್.
ಕರಿನ  ಚುನಾವಣಾ ಪ್ರಣಾಳಿಕೆಡ್  ಘೋಷಣೆ ಮಲ್ದಿನಂಚ ತುಳು ಭಾಷೆಗ್ ಅಧಿಕೃತ ಮಾನ್ಯತೆ ಕೊರ್ಪಿನ  ಮೂಲಕ ಸರ್ಕಾರ ಪಾತೆರದಲೆಕ್ಕನೇ ನಡತೊಂದುಂಡ್. ಪಂಡುದು ಆರು ಮೆಚ್ಚುಗೆ ವ್ಯಕ್ತಪಡಿಸಾದೆರ್.
ತುಳು ಭಾಷೆಗ್ ಅಧಿಕೃತ ಮಾನ್ಯತೆ ತಿಕ್ಕುನ ನಿಟ್ಟುಡ್  ತುಳುವೆರೆನ ಪರವಾದ್  ಕಾಳಜಿ ವಹಿಸಾಯಿನ  ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆರಾಯಿನ ಶಿವರಾಜ್ ಎಸ್. ತಂಗಡಗಿ, ಸರ್ಕಾರದ ಎದುರು ಮಂಡಿಸಾಯಿನ ಈ ವಿಚಾರೊನ್  ನಿರಂತರವಾದ್  ಮಂಡಿಸಾಯಿನ ಜಿಲ್ಲಾ ಉಸ್ತುವಾರಿ ಸಚಿವೆರಾಯಿನ  ಯು.ಟಿ. ಖಾದರ್, ಪುತ್ತೂರುದ ಶಾಸಕೆರಾಯಿನ  ಅಶೋಕ್ ರೈ ಬೊಕ್ಕ ಕರಾವಳಿದ ಮಾತಾ ಶಾಸಕೆರೆಗ್  ಆರು ಅಭಿನಂದನೆ ಸಲ್ಲಿಸಾದೆರ್.
ಅಂಚೆನೆ  ತುಳು ಭಾಷೆಗ್ ಅಧಿಕೃತ ಮಾನ್ಯತೆ ಕೊರ್ಪಿನಂಚ ಸರ್ಕಾರದ ಮಿತ್ತ್  ನಿರಂತರವಾದ್  ಒತ್ತಡ ಬೊಕ್ಕ ಆಗ್ರಹಲೆನ್ ವ್ಯಕ್ತಪಡಿಸಾಯಿನ  ಅಖಿಲ ಭಾರತ ತುಳುಒಕ್ಕೂಟದ ಅಧ್ಯಕ್ಷೆರಾಯಿನ  ಶ್ರೀ ಎ. ಸಿ. ಭಂಡಾರಿ ಬೊಕ್ಕ ದೇಶ-ವಿದೇಶದ ಮಾತಾ ತುಳು ಸಂಘ-ಸಂಸ್ಥೆಲೆಗುಲಾ ಆರು ಸೊಲ್ಮೆ ಸಂದಾಯ್ತ ಮಲ್ದೆರ್.
“ಸಮಸ್ತ ತುಳುವೆರೆಗ್  ಉಂದೊಂಜಿ ಚಾರಿತ್ರಿಕ ದಿನ. ಜಗತ್ತ್ ಡೊರ್ಮೆ  ಇತ್ತಿನ  ತುಳು ಭಾಷಿಗೆರಡ ಆತ್ಮವಿಶ್ವಾಸೊನ್ ಮೂಡಿಸಾವುನ  ಮಹತ್ವದ ದಿನವಾದುಂಡ್.. ತುಳು ಭಾಷೆದ ಸಮಗ್ರ ಬೆಳವಣಿಗೆದ ನಿಟ್ಟುಡ್  ಉಂದು ಐತಿಹಾಸಿಕ ಪಜ್ಜೆಯಾದುಂಡ್.. ಸುಮಾರು 3 ಸಾರ ವರ್ಷದ  ಐತಿಹಾಸಿಕ ಹಿನ್ನೆಲೆ  ಇತ್ತಿನ  ತುಳು ಭಾಷೆಗ್ ತಿಕ್ಕುದಿನ ಮಹತ್ವದ ಕೊಡುಗೆಯಾದುಂಡ್‌” ಪಂಡುದು ಜಯಕರ ಶೆಟ್ಟಿ ಇಂದ್ರಾಳಿ ತೆರಿಪಾದೆರ್.
ಪಿರಾವುದ ಸರ್ಕಾರದ ಅವಧಿಡ್ ಡಾ. ಎಂ. ಮೋಹನ್ ಆಳ್ವೆರು ಸಲ್ಲಿಸಾಯಿನ  ವರದಿಡ್  ಬೊಕ್ಕ  ಮಾನ್ಯ ಸಿದ್ದರಾಮಯ್ಯ ಅರೆನ ಸರ್ಕಾರ ರಚಿಸಾಯಿನ ಅಧ್ಯಯನ ವರದಿದ ಹಿನ್ನೆಲೆಡ್ , ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಮೇರು ದಿಟ್ಟ ನಿರ್ಧಾರ  ದೆತೊಂದ್ ತುಳು ಭಾಷೆಗ್ ರಾಜ್ಯದ ರಡ್ಡನೇ ಅಧಿಕೃತ ಆಡಳಿತ ಭಾಷೆದ ಮಾನ್ಯತೆ ಕೊರ್ತಿನವ್ ಸಮಸ್ತ ತುಳುವೆರೆಗ್ ಪೆರ್ಮೆದ  ವಿಚಾರವಾದುಂಡ್ ಪಂಡುದು ಆರು ಅಭಿಪ್ರಾಯಪಟ್ಟೊಂದೆರ್.