ವಿಷ್ಣುಪಾದ ಸೇರಿನ ದಾಮೋದರ ನಿಸರ್ಗ

ಕರಿನ 10 ದಶಕಡಿಂಚಿ ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್  ತುಳು ಕನ್ನಡ ಸಾಹಿತ್ಯ ಸಂಘಟನೆಲೆನ್ ನಡಪಾವೊಂದ್ ಅವ್ವೇತೋ ಸಮ್ಮೇಳನಲೆನ್  ಸಂಯೋಜನೆ ಮಲ್ದಿನ ಅನುಭವಿ ಸಂಘಟನಾ ಕ್ಷೇತ್ರದ ದಿಗ್ಗಜ ಸಾಮಾಜಿಕ ಧಾರ್ಮಿಕ ಕ್ಷೇತ್ರಲೆಡ್  ಸಂಚಲನ ಮೂಡಿಸಾಯಿನ ತುಳುಕೂಟದ ಅಧ್ಯಕ್ಷೆರಾದ್ ಕೆಲವಾರು ವರ್ಷಡಿಂಚಿ ತುಳು ಸಾಹಿತ್ಯ ಕ್ಷೇತ್ರಗ್ ಅದ್ವಿತೀಯ ಕೊಡುಗೆ ಕೊರ್ತಿನ ಶ್ರೀ ಬಿ ದಾಮೋದರ ನಿಸರ್ಗ ಮೇರು ಅಲ್ಪಕಾಲದ ಅಸೌಖ್ಯಡಾದ್ ಮಂಗಳೂರುದ ಖಾಸಗಿ ಆಸ್ಪತ್ರೆಡ್ ವಿಷ್ಣುಪಾದ ಸೇರಿಯೆರು. ನಮ್ಮ ರಾಜ್ಯದ ಪುಗಾರ್ತೆದ ಕಾದಂಬರಿ ಕಾರೆ,ಚಲನಚಿತ್ರ ನಿರ್ದೇಶಕೆರಾಯಿನ ವಿಶುಕುಮಾರ್ ಮೆರೆನ ಸಹೋದರೆರಾಯಿನ  ದಾಮೋದರ ನಿಸರ್ಗ ಮೇರು 11.08,1949ಡ್  ಮಂಗಳೂರು ಮರೋಳಿಯ ನಿಸರ್ಗ ಮನೆಯಲ್ಲಿ ಯಕ್ಷಗಾನ ಕ್ಷೇತ್ರದ ದಿಗ್ಗಜ ಶ್ರೀ ದೋಗ್ರ ಪೂಜಾರಿ ಬೊಕ್ಕ ಚಂದ್ರಾವತಿ ಮೆರೆನ ಮಗೆ ಆದ್  ಪುಟ್ಟಿನಾರು. ಬುಡೆದಿ ಹೇಮಾ ನಿಸರ್ಗ, ಮಗಳು ಡಾಕ್ಟರ್ ವಿನ್ಯಾಸ ನಿಸರ್ಗ, ಮರ್ಮಾಯೆ ಡಾಕ್ಟರ್ ವಿನಯ್ ಜತ್ತನ್ ಬೊಕ್ಕ ಮಗ ತ್ರಿದೇವ್ ನಿಸರ್ಗ ಮೊಕ್ಲೆನೊಟ್ಟುಗ್ ಕೂಡು ಕುಟುಂಬದ ಅಪಾರ ಬಂಧು ಮಿತ್ರೆರೆನ್  ಅಗತುದೆರ್.

ಸಾಹಿತ್ಯ ಸಂಘಟನೆದ  ಪ್ರವೃತ್ತಿದೊಟ್ಟುಗ್ ಸಿವಿಲ್ ಕಾಂಟ್ರಾಕ್ಟರ್ ಆದಿತ್ತಿನ  ದಾಮೋದರ ನಿಸರ್ಗ ಮರೋಳಿದ  ಸೂರ್ಯನಾರಾಯಣ ದೇವಸ್ಥಾನದ ಆಡಳಿತ ಮೊಕ್ತೈಸರೆರಾದ್,ಗೋಕರ್ಣನಾಥ ಬ್ಯಾಂಕ್ ದ ಅಧ್ಯಕ್ಷೆರಾದ್ ,ಕಂಕನಾಡಿ ಗರಡಿದ ಆಡಳಿತ ಮಂಡಳಿದ ಸದಸ್ಯೆರಾದ್ ,ಕಂಕನಾಡಿ ಬಿಲ್ಲವ ಸಂಘದ ಸ್ಥಾಪಕ ಅಧ್ಯಕ್ಷೆರಾದ್,ಕುಡ್ಲ ತುಳುಕೂ ಟದ ಅಧ್ಯಕ್ಷೆರಾದ್ ,ತುಳು ಒಕ್ಕೂಟದ ಕಾರ್ಯಾಧ್ಯಕ್ಷೆರಾದ್ , ಎ ಸ್‌.ಸಿ.ಡಿ.ಸಿ.ಸಿ. ಬ್ಯಾಂಕಿನ ನಿರ್ದೇಶಕೆರಾದ್ ,ದೋಗ್ರ ಪೂಜಾರಿ ಯಕ್ಷಗಾನ ಕೇಂದ್ರದ ಸ್ಥಾಪಕ ಅಧ್ಯಕ್ಷೆರಾದ್, ದೋಗ್ರ ಪೂಜಾರಿ ಯಕ್ಷಗಾನ ಪ್ರಶಸ್ತಿದ  ಸ್ಥಾಪಕೆರಾದ್ ಹಲವಾರು ಕ್ಷೇತ್ರಡ್ ,ಸಂಘ-ಸಂಸ್ಥೆಲೆಡ್ ಶಿಕ್ಷಣ ಸಂಸ್ಥೆಲೆಡ್, ತನನ್ ತೊಡಗಿಸಾವೊಂದಿನಾರ್ ,ಏತೋ ಸಾಹಿತ್ಯ ಸಮ್ಮೇಳನಲೆನ್ ಸಂಘಟಿಸಿದಿನಾರ್. ಅರೆನ ಅಗಲಿಕೆಡಾದ್ ದಕ್ಷಿಣ ಕನ್ನಡ ಜಿಲ್ಲೆದ ತುಳು ಕನ್ನಡ ಸಾಹಿತ್ಯ ಸಂಘಟನಾ ಕ್ಷೇತ್ರಗ್  ಸಾಮಾಜಿಕ ಧಾರ್ಮಿಕ ಕ್ಷೇತ್ರಗ್  ಅಪಾರ ನಷ್ಟ ಆತುಂಡ್.