ಉಡುಪಿ ವಿಧಾನಸಭಾ ಕ್ಷೇತ್ರೊಗ್ ಆಮ್ ಆದ್ಮಿ ಪಾರ್ಟಿದ ಅಭ್ಯರ್ಥಿಯಾದ್ ದಿವಾಕರ್ ಸನಿಲ್..

ವಿಧಾನಸಭಾ ಕ್ಷೇತ್ರದ ಚುನಾವಣೆ ಕೈತಲ್ ಬರೊಂದಿತ್ತುದ್ ಬೇತೆ ಬೇತೆ ಪಕ್ಷೊಲೆಡ್ ಅಭ್ಯರ್ಥಿಲಯ ಸ್ಪರ್ಧಿಸಾವರೆಗ್ ತಯಾರಿ ಮಲ್ತೊಂದುಲ್ಲೆರ್..ಅಂಚೆನೇ ಈ ಸರ್ತಿ ಉಡುಪಿಡ್ ಬದಲಾವಣೆ ಕನವೊಡ್ ಪನ್ಪಿನ ನಿಟ್ಟುಡ್ ಆಮ್ ಆದ್ಮಿ ಪಾರ್ಟಿ ತನ್ನ ಪಕ್ಷೊನ್ ಗಟ್ಟಿ ಮಲ್ತೊಂದ್ ,ಪೂರಾ ಸಮಾಜದಕ್ಲೆನೊಟ್ಟುಗ್ ಎಡ್ಡೆ ಒಡನಾಟ ಇತ್ತಿನ,ಜಾತಿ ಧರ್ಮ ಭೇದ ಉಪ್ಪಂದೆ ಸಮಾಜಸೇವೆಡ್ ತೊಡಗಿಸಾವೊಂದಿತ್ತಿನ ಉಡುಪಿದ ಪ್ರಸಿದ್ಧ ಸಂಸ್ಥೆ ಸ್ಮರಣಿಕಾದ ಮಾಲಕೆರಾಯಿನ ದಿವಾಕರ್ ಸನಿಲ್ ಮೆರೆನ್ ಉಡುಪಿಡ್ ಜಿಲ್ಲಾಧ್ಯಕ್ಷೆರಾದ್ ಆಯ್ಕೆ ಮಲ್ದೆರ್.
.ಪಂಜಾಬ್, ದೆಹಲಿ ರಾಜ್ಯೊಡ್ ಅಧಿಕಾರೊಡುಪ್ಪುನ ಗುಜರಾತ್ ದ ಚುನಾವಣೆಡ್ ಪೈಪೋಟಿ ನಡತೊಂದುಪ್ಪುನ ಕರ್ನಾಟಕ ವಿಧಾನಸಭೆ ಕ್ಷೇತ್ರೊಡ್ ಪೂರಾ ಕಡೆಟ್ ಅಭ್ಯರ್ಥಿಲು ಆಯ್ಕೆ ಆದಿತ್ತುದ್, ಅಬ್ಬರದ ಪ್ರಚಾರ ಇಜ್ಜಾಂಡಲಾ ಗ್ರಾಮ ಸಂಪರ್ಕ ಅಭಿಯಾನದ ಮುಖೇನ ಬೂತ್ ಮಟ್ಟದ ಕಾರ್ಯಕರ್ತೆರೆನ್ ಸೇರ್ಪಡೆ ಮಲ್ಪುನ ಕಾರ್ಯ ನಡತೊಂದುಂಡ್.ಸನಿಲ್ ಮೇರ್ ಆರೋಗ್ಯ,ಶೈಕ್ಷಣಿಕ ಅಂಚೆನೇ ಸಾಮಾಜಿಕ ಕ್ಷೇತ್ರೊಡ್ ಪ್ರಚಾರದಾಂತೆನೇ ಸೇವೆ ಕೊರೊಂದುಲ್ಲೆರ್.
ಮೆರೆನ ಕಾರ್ಯವೈಖರಿನ್ ಮೆಚ್ಚಿದ್,ಇಂಚಪ್ಪೊಗ್ ಆಮ್ ಆದ್ಮಿ ಪಾರ್ಟಿದ ರಾಜ್ಯಾಧ್ಯಕ್ಷೆರಾಯಿನ ಪ್ರಥ್ವಿ ರೆಡ್ಡಿ ಮೇರ್ ಮಂಗಳೂರುಗ್ ಬತ್ತಿನಪಗ ಕರಾವಳಿದ ಸಂಯೋಜಕೆರಾಯಿನ ವಿವೇಕಾನಂದ ಸಲಿನ್ಸ್ ನೇತೃತ್ವದ ಆಮ್ ಆದ್ಮಿ ಪಾರ್ಟಿದ ಕರಾವಳಿದ ಪ್ರಮುಖೆರೆನ ಸಭೆ ನಡತುದ್ ಉಡುಪಿ ಬೊಕ್ಕ ದ.ಕ.ಜಿಲ್ಲೆದ ಪದಾಧಿಕಾರಿಲೆನ ಸಭೆಟ್ ವಿಧಾನಸಭಾ ಕ್ಷೇತ್ರದ ಅಭ್ಯರ್ಥಿಯಾದ್ ಅಂಚಿಡ್ ಮಂಗಳೂರು ದಕ್ಷಿಣದ ಪ್ರಬಲ ಅಭ್ಯರ್ಥಿಯಾದ್ ಸಂತೋಷ್ ಕಾಮತ್,ಇಂಚಿಡ್ ಉಡುಪಿಗ್ ಪ್ರಬಲ ಅಭ್ಯರ್ಥಿಯಾದ್ ದಿವಾಕರ್ ಸನಿಲ್ ಮೆರೆನ್ ಮಾತೆರ್ಲಾ ಸೇರ್ದ್ ಏಕಪಕ್ಷೀಯವಾದ್ ಆಯ್ಕೆ ಮಲ್ತುದೆರ್.ಪನ್ಪಿನ ಸುದ್ದಿ ತೆರಿದ್ ಬೈದುಂಡ್.
ಮಲ್ಪೆದ ಕಡಲ ಕಿನಾರೆಡ್ ಪುಟ್ಟು ಬಲತಿನ ದಿವಾಕರ್ ಸನಿಲ್ ಮೇರ್ ಎಲ್ಯ ಪ್ರಾಯೊಡೇ ಸಾಮಾಜಿಕ ಚಟುವಟಿಕೆಲೆಡ್ ನಿರತರಾದಿತ್ತೆರ್.ಪ್ರಸ್ತುತ ಮೇರ್ ಉಡುಪಿ ಜಿಲ್ಲಾ ವರ್ತಕರ ಹಿತರಕ್ಷಣಾ ವೇದಿಕೆದ ಅಧ್ಯಕ್ಷೆರಾದ್,ಉಡುಪಿ ಜಿಲ್ಲಾ ವರ್ತಕರ ಸೌಹಾರ್ದ ಸಹಕಾರಿದ ಉಪಾಧ್ಯಕ್ಷೆರಾದ್,ಉಡುಪಿ ಜಿಲ್ಲಾ ಬಿಲ್ಲವ ಯುವವೇದಿಕೆದ ಗೌರವಾಧ್ಯಕ್ಷೆರಾದ್,ಶ್ರೀ ವಿಶ್ವನಾಥ ಕ್ಷೇತ್ರ ಕಟಪಾಡಿದ ಮಾಜಿ ಜತೆ ಕಾರ್ಯದರ್ಶಿಯಾದ್,ಬೈಲೂರು ಮಹಿಷಮರ್ದಿನಿ ದೇವಸ್ಥಾನದ ಜೀರ್ಣೋದ್ದಾರ ಸಮಿತಿದ ಜತೆ ಕೋಶಾಧಿಕಾರಿಯಾದ್,ತುಳುಕೂಟ ಉಡುಪಿದ ಉಪಾಧ್ಯಕ್ಷೆರಾದ್,ಲಯನ್ಸ್ ಕ್ಲಬ್ ಉಡುಪಿ ಇಂದ್ರಾಳಿದ ಸದಸ್ಯೆರಾದ್,ರೋಟರಿ ಕ್ಲಬ್ ಉಡುಪಿ ರೋಯಲ್ ದ ಸದಸ್ಯೆರಾದ್,ಯಕ್ಷಗಾನ ಕಲಾರಂಗ ಉಡುಪಿದ ಸದಸ್ಯೆರಾದ್,ಜಯಂಟ್ಸ್ ಸಂಸ್ಥೆಡ್ ಸದಸ್ಯೆರಾದ್ ಸೇವೆ ಮಲ್ತೊಂದುಲ್ಲೆರ್.
ಕರಿನ 30 ವರ್ಸೊಡಿಂಚಿ ಉಡುಪಿಡ್ ಸ್ಮರಣಿಕಾ ಮೆಮೆಂಟೊ & ಗಿಫ್ಟ್ ಶಾಪ್ ದ ಮಾಲಕೆರಾದ್ ಉಡುಪಿ ಜಿಲ್ಲೆಡ್ ಮಾತ್ರ ಅತ್ತಾವಂದೆ ಇಡೀ ರಾಜ್ಯೊಡೇ ಸ್ಮರಣಿಕೆದ ಉದ್ಯಮಡ್ ಪುಗಾರ್ತೆದ ಸಂಸ್ಥೆಯಾದ್ ಬೆಳಗಾದೆರ್.ನಿರಂತರವಾದ್ ಪ್ರತಿಯೊಂಜಿ ಕ್ಷೇತ್ರೊಡುಲಾ ಸಮಾಜಸೇವೆಡ್ ತೊಡಗಿಸಾವೊಂದುಪ್ಪುನ ಮೇರ್ ಮಾತಾ ರಾಜಕೀಯ ಪಕ್ಷದಕ್ಲೆನೊಟ್ಟುಗ್ ಎಡ್ಡೆ ರೀತಿಡ್ ಇತ್ತುದ್ ರಾಜಕೀಯ ರಹಿತವಾದ್ ಸೇವೆ ಮಲ್ದಿನಾರ್.ದುಂಬು ಎಂಚ ಸಮಾಜಸೇವೆ ಮಲ್ದೆರಾ ಪಕ್ಷೊಗ್ ಸೇರಿಬೊಕ್ಕಲಾ ಅಂಚೆನೇ ಸಮಾಜಸೇವೆಡ್ ತೊಡಗಿಸಾವೊಂದೆರ್.
ಉಡುಪಿದ ಸಮಗ್ರ ಅಭಿವೃದ್ಧಿದ ಚಿಂತನೆ ದೀಯೊಂದ್ ವಿಧಾನಸಭಾ ಕ್ಷೇತ್ರದ ಆಮ್ ಆದ್ಮಿ ಪಾರ್ಟಿದ ಅಭ್ಯರ್ಥಿಯಾದ್ ಚುನಾವಣೆಗ್ ಜತ್ತೊಂದುಲ್ಲೆರ್ .ಉಡುಪಿಡ್ ಈ ಸರ್ತಿ ದಾದಾಂಡಲಾ ಬದಲಾವಣೆ ಆಪುಂಡ ಪಂಡುದ್ ಕಾತುದ್ ತೂವೊಡ್.